1 Misamu 16 - La Sainte Bible en Langue Yipunu

¹ Bamakotisa yigara yipangini yiNsambi o ndagu jitsanda aji David amayirungila. Mbana bamavagulila Nsambi pagu tsiunyensa na pagu tsikabusulu tsimaboti.

² David anomana uvagula pagu tsiunyensa na pagu tsikabusulu tsimaboti amagabila batu miula mu diina diFumu.

³ Mbana amagabila baIsrael botsu nesi babaala nesi bagetu; mutu mutu dipa dimosi na dipula dinyama na dipa digeyi adimavagu na mirayisan.

Bisi Levi uwimbila bewimbili nyimbu tsiFumu

⁴ David amavega bisi Levi bamosi mbura va gusu yigara yipangini yiNsambi uyenasambilanga nododisanga noyitsanga Fumu Nsambi Israel.

⁵ Assaf amabawendisanga na amaba utega, Zacharie amaba agumubeji mbana Yaziel na Chemiramot na Yehiel na Mattitia na Eliab na Benaya na Obed-Edom na Yeiel bamadukanga na bamasiganga bangomfi na basambi; yika Assaf agumasiganga bambumbu.

⁶ Banaya na Yaziel bavagulitsi bapagu bamasiganga mimbanda va gusu yigara yipangini yiNsambi.

⁷ Muna yilumbu yieni David amaveyila Assaf na bambatsi bandi yisalu uwimbilanga nyimbu tsiFumu umuyitsanga.

⁸ Yitsanu Fumu, munengilianu na diina diandi, Jabisanu bisalu biandi bineni ombu batu

⁹ Wimbilanu, wimbilanu umuyitsa! Samunanu maboti mandi motsu!

¹⁰ Mukakisianu, Nsambi aguvu tindi Nsambi! Aberombi Fumu, basingilingi!

¹¹ Rombanganu Fumu na mangolu mandi murombinganu temu tsiotsu!

¹² Rangiminanganu bilimba abi amalasanga na bimaga biandi na bunsonsi buandi.

¹³ Jenu baIsrael, basalitsi bandi Jenu baJacob, bisolu biandi!

¹⁴ Nsambi avu Fumu etu; erumi malongu motsu.

¹⁵ Rangiminanganu pangini andi te na mutubu, pangini tsiandi tsitsingi te na tosini jikula.

¹⁶ Pangini aji amavangana na Abraham na pesi andi aji amalevila Isaac;

¹⁷ na Jacob jimawarusu te na mutubu.

¹⁸ Amavangana rie: Nyuguvega bulongu buCanaan; abuna buba dikabu diagu didisiala.

¹⁹ Dumaleba yika mua dikabu dibatu, tindi pesu batu, dumaba benyi mu bulongu bungana.

²⁰ Bamawendanga yiari na yiari, o bufumu bumosi te no bususu.

²¹ Tumba Nsambi asamavega mutu musuga ubalasa maguga; mu diambu diogu amakilisila nesi bakaga.

²² Amavosa nogu rie: Duyabemba bibiatsi biami, duyavaga babiyitsi bami dibi!

²³ Bisi butamba botsu wimbilanu nyimbu uyitsa Nsambi Samunanu dugobutsu duandi yilumbu na yilumbu!

²⁴ Wimbilanganu bundumba buandi ombu botsu vosanganu maboti mandi ombu batu botsu!

²⁵ Fumu avu muneni, avu tindi uwelimina uyitsu. Eviolili bansambi botsu diduma.

²⁶ Bansambi botsu babatu bagaa na tsongu tumba Fumu amavaga julu.

²⁷ Avu na digoba na bundumba mangolu na kembu bibasi mbura andi.

²⁸ Jenu batu botsu veganu duyitsu ombu Fumu, na jabisanu bundumba buandi nesi mangolu mandi!

²⁹ Nyiina, jabisanu bundumba buandi! Veganu miensili mienu ombu gandi! gudamanu va gusu Fumu, ava elasili bunsambi buandi!

³⁰ Mureyiminianu, jenu batu botsu, bulongu bumawara bugopupusu.

³¹ Bisi julu sangilanu, jenu bisi butamba sangilanu wandi! Bisi malongu motsu bevosi rie: Fumu avu kaga!

³² Mubu uigumbi na biotsu abivu muna! Nungi na biotsu abivu muna bisangili!

³³ Miri mimusiru migamuyi na misangili mu mbari uruga eruyi uyitabulila batu bunsonsi.

³⁴ Yitsanu Fumu, avu muboti, durondu duandi duitsingingi te na mutubu!

³⁵ Gamuganu rie: Nsambi Mugobutsi etu tugobuli, tuwaki kalala va gari malongu, tugukiyi. Kabogu tuguyitsanga, tuyitsanga diina diagu diyingitsi, tulasanga bundumba buagu uguyitsa!

³⁶ Diboti ombu Fumu Nsambi Israel! Diboti ombu gandi mutubu na mutubu! Batu botsu bamagamuga rie: Amen! Yitsanu Fumu!

³⁷ David amaruma Assaf na baana bataji bandi uba va mugula yigara yipangini yiNsambi yiri bosalanga yisalu yiogu yilumbu na yilumbu.

³⁸ Amaruma Obed-Edom muana dibaala uYedoutoun na magumasiamunu na yinana yibatu bandi usala nogu. Va julu vana Obed-Edom na Hossa bamaba bakelisi bamakotulu.

³⁹ Amawakisa Sadoc muvagulitsi upagu na bavagulitsi bapagu abamaba baana bataji bandi yisalu yiMbura Nsambi o mbura jiduyitsu o Gabaon.

⁴⁰ Yisalu yiogu yimaba uvagulilanga Fumu pagu tsiunyensa kedi na tsisiga udugusu motsu amamasonugu mu mugaga uFumu agu Fumu amaruma baIsrael.

⁴¹ Heman na Yedoutoun bamasala nogu va mosi na basusu abamasolu uyitsanga Fumu mu mbari durondu duandi duitsingingi mutubu!

⁴² Heman na Yedoutoun bamakipanga mimbanda na bambumbu bibasiyitsi na bisigu binyimbu tsiuyitsila Nsambi. Baana bababaala baYedoutoun bamaba bakelisi bamakotulu.

⁴³ Batu botsu bamawenda, mutu mutu o ndagu andi na David amagabuga uyegabila bisi ndagu andi mula.