1 Misamu 14 - La Sainte Bible en Langue Yipunu

David o Jerusalem

¹ Hiram kaga jiTyr amatinda bilumbi ombu David na tsimbi tsisedera na bapakitsi bamamanyi na barungitsi bamandagu.

² David amatsiyisa yiri Fumu amamuwarisa mu bukaga buIsrael na amaroyisa bufumu buandi mu diambu dibatu bandi baIsrael

³ David amamuewela bagetu o Jerusalem na amamuebura baana bababaala na babagetu.

⁴ Miina ma-aba amaburila o Jerusalem amama: Chammoua na Chobab na Natan na Salomon

⁵ na Ibar na Elichoua na Elpelet

⁶ na Noga na Nefeg na Yafia

⁷ na Elichama na Beeliada na Elifelet

David ubetsa ebetsi baPhilistin

⁸ BaPhilistin bamagulu yiri David amabiatsu kaga o Israel jiotsu kabogu bamawenda botsu uyemutoyisa. David anolubusu, jaʼ wandi amayebabengusana.

⁹ BaPhilistin bamatola na bamabasa o yibususu yibaRefaim.

¹⁰ David amawivula Fumu rie: Nyuwenda uyetoyisa baPhilistin? Gubawakisa ombu gami? Fumu amamuruma rie: Wendanga, nyuwakisa baPhilistin ombu gagu.

¹¹ Kabogu bamawenda o Baal-Perassim agu David amababelisila. Mbana amavosa rie: Dedi mosi nana nyidu jipumuyili anana Fumu amapansila bavinitsi bami. La dibandu bamaluyila mbura eni Baal-Perassim.

¹² BaPhilistin bamasila bansambi bogu vana, David amaruma batu ubanyensa.

¹³ BaPhilistin bamamuebasa o yibususu yibaRefaim.

¹⁴ David amamuemoga na Nsambi na Nsambi amamutsingula rie: Guyabaduka, bagongi mbana gukababengusana va nsungisini na musiru umikokoli.

¹⁵ Ava gugululu mikindu o mandeka mamiri gukapala utoga; vola muendu mu mbari Fumu amarela o gusu agu ugubelisila bagoraba baPhilistin.

¹⁶ David amavaga adi Fumu amamuruma na bagora babaPhilistin bamabetsu, ubandila o Gabaon te no Guezer.

¹⁷ Diduma diDavid dimanyava o biari biotsu, Fumu amarombisa malongu motsu umuduma.