1 Misamu 12 - La Sainte Bible en Langue Yipunu

Badukitsi batega baDavid o Siclag

¹ Va temu aji David amasuemina o Siclag urina Saul muana dibaala uQuich, babaala bamosi bamafubana nandi; bamaba dibuli dibabaala bamangolu abamakunsama umuwamusa utoga divita.

² Bamaba barela badupalu na barela babilangandaji abamaba na dutsunga. Amama la miina mayifumba yibaBenjamin abamaba tindi baana bataji baSaul:

³ sefu Ahiezer na muana taji andi Yoach muana dibaala uChema agumaba muisi Guibea na Yeziel na Pelet muana dibaala uAzmavet na Beraka na Yehou muisi Anatot

⁴ na Ichemaya muisi Gabaon sefu jimosi va gari magumarieru mabatoyitsi

⁵ na Irmeya na Yaziel na Yohanan na Yozabad muisi Guedera

⁶ na Elouzai na Yerimot na Bealia na Chemaria na Chefatia muisi Harouf

⁷ na Elcana na Issia na Azarel na Yoezer na Yachoban abamaba bategula baCora

⁸ va mosi na Yoela na Zebadia muana dibaala uYeroam muisiGuedor.

⁹ BaGad bamosi abamaba babaala bamangolu bamarasuna David o yisuemunu yiandi o kumu. Bamaba babaala abamawiji utoga divita abamajaba usalisa bangubu na makongu na abamaba na mangolu nderi bimbungu na ulenga nderi batsiesi.

¹⁰ Bamaba yigumi na dibaala dimosi: Ezer amaba sefu ogu mbana Obadia na Eliab

¹¹ na Michemanna na Irmeya

¹² na Attai na Eliel

¹³ na Yohanan na Elzabad

¹⁴ na Irmeya na Makbannai.

¹⁵ Botsu bana bamaba baana bababaala baGad abamaba bivunda bibagora; agumaviolila udeda amaba na mangolu utoyisa kama bagora na agumaba na tindi mangolu amaba na mangolu utoyisa tosini bagora.

¹⁶ Bamasabuga Jourdain mu tsungi jitega aji nyidu jimabasila na bamabingisa bisi yibususu botsu o yiari ayi wisi epalili nesi ayi ewendisini.

¹⁷ BaBenjamin na baJuda bamarasuna David o yisuemunu yiandi wandi.

¹⁸ David amayebabengusana na amavosa nogu rie: Pa duiruyi ombu gami na murima umosi uyikwamusa nyufubana nenu; tumba pa duiruyi uyindunsa nokwakisa ombu bavinitsi bami, diuleba ngaa na mbela, Nsambi bataji betu abi mbeji, jaʼ beni adukilisi!

¹⁹ Kabogu Yinyunyi yiNsambi amabasa Amassai sefu jimagumarieru na amagamuga rie: Jetu tuvu abagu David nyiina, tuji nagu, ndeʼ David muana uJesse! Duvotsu, duvotsu, duvotsu ombu gagu na duvotsu ombu abeguwamusi mu mbari Fumu agu amaguwamusa! David amabadila na amabavaga bivunda bidibuli dibagora bandi.

²⁰ Bagora baManasse bamayefubana na David ava amayetoyila divita na Saul, jogu na baPhilistin. Tumba baPhilistin basamagaru uwamusu nandi mu mbari basefu babaPhilistin bamabinga David novosa rie: Yilumbu yimosi ovioga o yiari yifumu andi Saul, adina diuturombisa dufu.

²¹ Ava amagabusila o Siclag bagora baManasse bamafubana nandi, abamafubana nandi ababa: Adna na Yozabad na Yadiael na Mikael na Yozabad na Elihou na Silletai; botsu bamaba bivunda bibatosini bibagora.

²² Bamawamusa David utoga na bakinditsi; jogu botsu bamaba bangogaga na botsu bamaba bivunda bibagora.

²³ Yilumbu na yilumbu bagora bamafubananga na David umuwamusa te na dibadi diandi dimaroga na dimaba dineni.

Dutalu dubadukitsi baDavid o Hebron

²⁴ Adudu la dutalu dubagora abamarasuna David o Hebron umuwakisa bufumu buSaul nana Fumu amaruminina:

²⁵ BaJuda abamabeganga bangubu na makongu, tosini yisiamunu na yinana yikama tsibagora.

²⁶ BaSimeon, yisambuali yitosini na kama mosi jibagora bamangolu.

²⁷ Bisi Levi, tosini jina na kama yisiamunu,

²⁸ va mosi na Yoyada, sefu jimukuta uAaron na tosini yirieru na yisambuali yikama yibatu;

²⁹ na Sadoc mufudu agumaba ngogaga na magumabeji na sefu beji.

³⁰ BaBenjamin baana bataji baSaul, tosini yirieru, dikabu dieni mbe dikivu mu yisalu yimukuta uSaul.

³¹ BaEfraim, magumabeji matosini na yinana yikama tsibagora abamadumusu mu diambu dibataji bogu.

³² Yiasi yiyifumba yiManasse, yigumi na yinana yitosini abamasolu uyetubula bukaga buDavid.

³³ BaIssakar, kama beji tsibasefu abamaba na dujabu ujaba nesi nana baIsrael bovayilanga.

³⁴ BaZabulon, magumaranu matosini abamaba bawelimina uwenda o divita na bitogulu bimavita motsu na bamaba bakunsama utoga tindi utoga.

³⁵ BaNeftali, tosini jibasefu na magumarieru na yisambuali yitosini tsibagora abamabeganga bangubu na makongu.

³⁶ BaDan, magumabeji na yinana yitosini na kama yisiamunu abamaba bakunsama utoga divita.

³⁷ BaAsser, magumana matosini abamaba bawelimina uyetoga divita na bamaba bakunsama utoga.

³⁸ O disimu dimosi diJourdain baRuben na baGad na yiasi yiyifumba yiManasse, kama na magumabeji matosini abamaba na bitogulu biotsu bidivita.

³⁹ Bagora beni botsu bamaba bakunsama utoga, bamatola o Hebron na murima umosi uyetubula bukaga buDavid o Israel jiotsu. BaIsrael basusu wandi bamaba kingu mosi nogu uvaga David kaga.

⁴⁰ Bamasilama bilumbu birieru vana na David; bamajanganga nonuanganga biguji bibaana bataji bogu.

⁴¹ Nesi baIssakar na baZabulon na baNeftali bamatinda biguji mu baburu na basamo na bangombi abi bamatinda abibi: fufu na mifiga tsigumuga na mirayisan tsigumuga na malamu na matsi; bamatinda nesi bangombi na bindombu. BaIsrael bamavaga feta jineni.