1 Misamu 10 - La Sainte Bible en Langue Yipunu

YILOMBI YIDAVID, KAGA JI-ISRAEL Dufu duSaul

¹ Yilumbu yimosi baPhilistin bamatoga divita na baIsrael o mukongu uGuilboa. BaIsrael bapuela bamarina baPhilistin na bapuela bamaboku.

² BaPhilistin bamaduka Saul na baana bandi bababaala na bamaboka Jonatan na Abinadab na Malkichoua, botsu baana bababaala bakaga.

³ Divita dimagaanga Saul, barela badupalu bamamunemisa na mbansa tsiogu.

⁴ Mbana Saul amaruma agumabega bitogulu biandi rie: Somuna dijenga diagu nondukula mu mbari abasarebu beni bondukula nonsoyisa. Tumba agumabeganga bitogulu biandi amagaangu na tindi goma. Kabogu Saul jaʼ beni amabonga dijenga diandi na amakebuaga va julu dionyi.

⁵ Jandi agumabeganga bitogulu biSaul anomulaba afu, jaʼ wandi amakebuaga va julu dijenga diandi ukeboka.

⁶ Anana Saul na baana bandi barieru bababaala bamafuila na mukuta andi umatsiemuga.

⁷ BaIsrael abamatsana o yibususu banolaba yiri urina berini na Saul na baana bandi bababaala bamafu, jogu wogu bamasila misiengi miogu urina. Kabogu baPhilistin bamayetsana muna.

⁸ Ava kedi baPhilistin bamawenda uyevula bamfumbi na bamarasuna bamfumbi baSaul na baana bandi barieru bababaala va julu mukongu uGuilboa.

⁹ Bamavula mfumbi jiSaul na bamajitabula muru na bamabonga bitogulu biandi. Mbana bamanyavisa misamu mieni miboti o bulongu buotsu bubaPhilistin nesi o mandagu mabakosi bogu nombu batu botsu.

¹⁰ Mbana bamakotisa bitogulu biSaul o ndagu nsambi ogu, na bamavakiga dubengili duandi o ndagu nsambi Dagon.

¹¹ Ava bisi Yabech o Galaad bamagululu nana baPhilistin bamavayila Saul,

¹² babaala botsu bamangolu bamaretsama; bamabonga bamfumbi baSaul na baana bandi bababaala na bamababega o Yabech. Bamatsiga bivisi biogu va tsi muiri o Yabech; bamabusa uji mu yisambuali yibilumbu.

¹³ Saul amafu mu mbari asamaba asigama va gusu Fumu: asamakipanga migaga miFumu na amawenda o uresa,

¹⁴ asamamuewenda ombu Fumu. Kabogu Fumu amamubokisa na amawakisa bufumu ombu David muana dibaala uJesse.