1 Jean 4 - La Sainte Bible en Langue Yipunu

Yinyunyi yiNsambi na yinyunyi yiMuvinitsi

¹ Bambatsi badurondu, duyavayila botsu yitu abevosi rie: Yinyunyi yiNsambi aji nami. Lebawijianu nojaba yeri yinyunyi ayivu nogu yimaruyila ombu Nsambi. Babiyitsi bamfurulu bamayenalinganga yiari na yiari.

² Guluanu nana dujabila Yinyunyi yiNsambi: Yinyunyi yiotsu oyrvosi yiri Jesus Christ amabonga yibagunu yimutu na amayitsana yivu yiNsambi.

³ Tumba uotsu oyigali dionyi agaa na Yinyunyi yiNsambi. Yinyunyi yieni yiruyili ombu Muvinitsi uChrist; dumagulu yiri uruga eruyi kabogu amakeruyila.

⁴ Tumba jenu duvu baana baNsambi na dumabelisa babiyitsi bamfurulu: Yinyunyi yiNsambi aguvu nenu avu na mangolu uviolila ayivu na jogu abavu bisi bulongu.

⁵ Jogu bevosi mambu mabulongu na bisi bulongu bebagulu.

⁶ Jetu tuvu aba Nsambi. Jandi oyijabi Nsambi egulu ametu; agugaa agu Nsambi agetugulu. La dibandu tuijabili Yinyunyi yingensa na yinyunyi yindusulu.

Nsambi la durondu

⁷ Bambatsi badurondu turondisinianu mu mbari durondu duiruyili ombu Nsambi na uotsu ojivu na durondu amaburu na Nsambi na emujabi.

⁸ Jandi agugaa na durondu agejabi Nsambi mu mbari Nsambi la durondu.

⁹ Durondu duNsambi dumalasu ombu getu ava amasindiyila Muana andi divingu ombu getu yiri mu diambu diandi tudila monyu.

¹⁰ Guluanu nana durondu duvu: tsiri jetu atumaronda Nsambi tumba jandi omaturonda na amasindiga Muana andi ututandila masumu metu.

¹¹ Bambatsi badurondu pa Nsambi amaturonda nana, kabogu jetu wetu vengu turondasananganu.

¹² Dingensa ne mutu mosi asakalaba Nsambi. Pa tuirondisini Nsambi aji netu na durondu duandi dumatudugunu.

¹³ Tuijabi yiri tumafubana mirima nandi na jandi amafubana murima netu mu mbari amatuvega Yinyunyi yiandi.

¹⁴ Jetu tumamulaba na tuisingisili bumbeji rie: Tata amasindiga Muana andi ugobula batu botsu.

¹⁵ Jandi aguisingisili yiri Jesus la Muana Nsambi, Nsambi amafubana murima nandi na jandi amafubana murima na Nsambi.

¹⁶ Jetu beni tuijabi Nsambi na durondu aduvu nandi na tugedutumuni paga. Nsambi la durondu; jandi ona durondu, Nsambi aji nandi.

¹⁷ Yilimba ayilasi yiri durondu dumatudugunu lʼayiyi rie: tugoviva yilumbu yibunsonsi na goma mu mbari nsanunu tsietu tsivu dedi na jiChrist

¹⁸ Durondu dugaa na goma. Durondu adudugu duitsiemusi goma mu mbari goma jirangimisi mukiki na jandi ona goma agaa na durondu duwelimina.

¹⁹ Jetu tuimurondi mu mbari jandi amatureyila uronda.

²⁰ Pa mutu evosi rie: Nyirondi Nsambi tumba evini muana taji andi kabogu aji mufuritsi mu mbari jandi agugerondi muana taji andi agu elabi tsie orondila Nsambi agu agelabi?

²¹ Diruma adi tumadila ombu gandi adidi rie: Jandi oyirondi Nsambi arondi muana taji andi wandi.