1 Jean 2 - La Sainte Bible en Langue Yipunu

Christ la yivovi yietu

¹ Raana bageyi nyidusonini mambu memama yiri dugomuevaga masumu. Pa mutu va gari etu amavaga masumu tuna yivovi la Jesus Christ aguvu usungama utuvosila ombu Tata.

² Mu mbari Jesus Christ amawakusulu mulendu mu diambu dimasumu metu tsiri yika ametu tumba na batu botsu wandi.

³ Pa tuidedili maruma maNsambi adina dilasi yiri tumamujaba.

⁴ Jandi oyivosi rie: Nyimujabi tumba agededili maruma mandi aji mufuritsi nangensa jigaanandi.

⁵ Tumba jandi oyidedili Mbembu Nsambi elasi yiri emurondi tindi uronda; mu dionyi tuijabi yiri tumafubana mirima nandi.

⁶ Jandi oyifubini murima nandi awendingi nana jandi beni amawendilanga.

Diruma digona

⁷ Bambatsi badurondu ngedusonini diruma digona; divu diruma digulu adi dumagulu va dibandu. Diruma digulu divu bulumbi abu dumalegulu.

⁸ Diurungula uba yiri duilabi digulu; ne nana nyimuediwarisa mu mbari nyijabi yiri digetsiemuyi na divu dingensa; dimalasu na nsanunu andi na tsienu wandi. Diwendi rie: Pisama usiamuga jisiamuyi na yijalala yingensa yibangingi.

⁹ Jandi oyivosi yiri yijalala yivu nandi na evini muana taji andi akivu o tsi pisama jimasumu.

¹⁰ Jandi oyirondi muana taji andi elasi yiri yijalala yivu nandi na agetsimbusu basusu.

¹¹ Tumba jandi oyivini muana taji andi aji o tsi pisama eni na elingi o tsi jionyi; agejabi agu ewendi mu mbari pisama eni jimamukalusa nderi yidunga.

¹² Baanabami, nyidusonini mu mbari masumu menu mamadutandu mu diina diChrist.

¹³ Batata, nyidusonini mu mbari duijabi jandi omaba ubanda va dibandu. Bafudu, nyidusonini mu mbari dumaviolila mutu mubi.

¹⁴ Baana bami, nyidusonini mu mbari dumajaba Tata. Batata, nyidusonini mu mbari dumajaba jandi omaba ubanda va dibandu. Bafudu, nyidusonini mu mbari duna mangolu na Mambu maNsambi mavu nenu na dumaviolila mutu mubi.

¹⁵ Duyaronda bulongu nesi mambu mabulongu.

¹⁶ Pa mutu erondi bulongu durondu duTata dugaa nandi; mu mbari motsu amavu mu bulongu: nsala tsimusonyi na nsala tsimisu na dunangu mageruyili ombu Tata tumba mavu mabulongu.

¹⁷ Bulongu buivioyi na nsala tsibuonyi wandi tumba jandi oyivayi duganu duNsambi obanganga mutubu.

Muvinitsi uChrist

¹⁸ Baana tuji o temu ajiusita. Dumagulu yiri Muvinitsi uChrist oruga. Namunyi bavinitsi bavu bapuela kabogu tuijabi yiri ajiji la temu ajiusita.

¹⁹ Batu bebaba bamatusila; basamaba abetu mu mbari mbe bamaba abetu mbe bakivu netu. Tumba bamakakana netu yiri dijabunu rie: bagaa abetu.

²⁰ Christ amaduvega Yinyunyi yiNsambi kabogu duijabi ngensa.

²¹ Nyidusonini udujabisa ngensa mu mbari dumajijaba na kala na duijabi yiri ngensa jigogaru ufura.

²² Anyi avu mufuritsi? Tsiri jandi oyigali yiri Jesus aji Christ? Jandi aji muvinitsi uChrist; egali Taji na Muana.

²³ Uotsu oyigali Muana egali Taji wandi. Uotsu oyimemi Muana ememi Taji wandi.

²⁴ Malongi ama dumagulu va dibandu madukianu! Pa malongi meni magetsiemuyi, dilasi yiri dumafubana mirima na Muana na Taji.

²⁵ Christ amavangana netu utuvega monyu umutubu.

²⁶ Nyidusonini mambu memama udulubusa mu diambu dijogu abedudunsi.

²⁷ Christ amaduvega Yinyunyi yiandi. Yiotsu ayi Yinyunyi yieni etsanini nenu dugaa na nsala mulonsi ususu. Mu mbari Yinyunyi yieni edulonsi motsu: amavu mangensa na amagaa mangensa. Kabogu dedilanu malongi maYinyunyi yiChrist yiri duba murima umosi nandi.

²⁸ Baana bami, banu na murima umosi na Christ yiri ava oruyila odurasuna duwara na dugolaba yisonyi va yilumbu ayi oruyila.

²⁹ Duijabi yiri Christ avu asungama kabogu uotsu aguvu asungama aji muana uNsambi.