1 Corinthiens 6 - La Sainte Bible en Langue Yipunu

Banyi botabulila bisi dibundu bunsonsi?

¹ Pa mutu va gari enu ana diambu na muana taji dibandu yi omufundila ombu abageduki Nsambi na tsiri ombu batu baNsambi?

² Dugejabi yiri batu baNsambi botabulila bisi bulongu bunsonsi? Pa o gusu dutabulila bisi bulongu bunsonsi dugorungula uvotsa mitsundu migeyi amivu nenu?

³ Dugejabi yiri dutabulila biansa bunsonsi? Kabogu mua mambu mabutamba dugomatabula?

⁴ Kabogu pa duna mambu dubega monyi ombu batu abagaa mu dibundu yiri boba bansonsi benu?

⁵ Ka muna yisonyi yi! Dugaa ne na mutu umosi aguvu na diela utabulila baana bataji bunsonsi?

⁶ Diwelimina yiri muana taji efundisi muana taji andi ombu bansonsi abagaa na yitu?

⁷ Mu mbari duna mambu jenu beni na jenu beni adina dilasi yiri dumaketsimbusu. Dibandu yi dugorungulila uwarila mua mambu lila uwarila udiongu?

⁸ Tsia jenu beni duivayingi baana bataji mambu amagaa mawelimina na duibadiongi?

⁹ Dugejabi yiri batu babi bagojaba Durumu duFumu? Duyakedunsa; ne bivuyisa ne basambilitsi babakosi na bimbembu na babaala abavayi dijamba na babaala nogu vo bagetu abavayi munongu mosi

¹⁰ ne badayitsi na bango nyinga ne balangitsi ne bango lanyi ne bikongu bagojaba duonyi.

¹¹ Jenu basusu dumaleduka mambu meni tumba namunyi dumaliomusu na dumavegu ombu Nsambi na dumasungugu mu diina diFumu etu Jesus Christ na mu diina diYinyunyi yiNsambi.

Keveganu uroyisa diina diNsambi

¹² Tanguji mutu ovosa rie: Nyina musuga uvaga motsu. Diurungula uba tumba motsu magaa mawelimina ombu gagu. Nyurungula uvosa rie: Nyina musuga uvaga motsu tumba ngokevaga muviga mu uonyi.

¹³ Mutu ususu ovosa rie: Biguji bisamakunsulu moji? Moji ugetati biguji? Diurungula uba tumba ne nana Nsambi ana mangolu ubunga biotsu bibeji. Mutu asamasundu uvaga buvuyisa amasundu mu mbari Fumu na Fumu avu awelimina umukelisa.

¹⁴ Nsambi omarambusa Fumu o dufu oturambusa na mangolu mandi wandi.

¹⁵ Jenu dugejabi yiri nyuru tsienu tsivu bilema biChrist? Kabogu divu diwelimina yiri yilema yiChrist yiufubana na yipumbi? Tsatsabi.

¹⁶ Dugejabi yiri jandi oyifubini na yipumbi aji dunyuru dumosi nandi? Bisonu bisonugu rie: Jogu botsu babeji boba umosi.

¹⁷ Munongu mosi oyifubini murima na Fumu oba umosi nandi.

¹⁸ Rinanu buvuyisa. Masumu motsu masusu ama mutu evayi magebivisi dunyuru tumba oyivayi buvuyisa ebivisi dunyuru duandi.

¹⁹ Dugejabi yiri nyuru tsienu tsivu nderi ndagu Yinyunyi yiNsambi oyitsani nenu ayimaduvegu nandi? Jenu dugaa na musuga uvaga nana duirondili.

²⁰ Nsambi amadusumba na dufunu duneni. Kabogu keveganu uroyisa diina diandi.