1 Corinthiens 3 - La Sainte Bible en Langue Yipunu

Basalitsi baNsambi

¹ Baana bataji ava nyimabila nenu nyimarungula udulonsa nana nyimalonsila batu abamadila Yinyunyi yiNsambi? Nesi, nyimadulonsa nderi bisi butamba nderi duvu baana bageyi.

² Nyimadukelisa nderi baana abenu mabenyi. Nyisamarungula udukelisa nderi bivunda abejangingi biguji, diwendi rie: te na namunyi dukivu dudeda

³ na duitsani nana bisi butamba. Labanu va gari enu vavu ngusu na mitsundu; adina digelasi yiri dukivu na bifu bibutamba?

⁴ Ava umosi evosili rie: Menu nyiji mutu uPaul! Na ususu rie: Menu nyiji mutu u Apollos! Atsina tsiri posulu tsibatu?

⁵ Apollos la nyi? Paul la nyi? Tembusa basalitsi baNsambi abamadubega ombu Christ Mutu mutu amasala yika ayi Fumu amamuruma usala;

⁶ menu nyimavara na Apollos amatsatsa tumba Nsambi amabendisa.

⁷ Oyivari na oyitsatsi bagaa na tsongu tumba tsongu jivu na Nsambi oyibendisi.

⁸ Ombu Nsambi, oyivari na oyitsatsi baji dedi; osaka mutu mutu nana amasalila.

⁹ Mu mbari jetu tuisalili Nsambi na jenu duvu nderi nungi andi. Duvu nderi ndagu Nsambi wandi.

¹⁰ Nyimasalila pegulu atsi Nsambi amapega nana murungitsi aguvu na diela; nyimasunda yibuga na mutu ususu erungi va julu yidnyi. Mutu mutu akebini nana erungili.

¹¹ Nsambi amakesundila Jesus Christ nana yibuga na vagorungula uba yibuga yisusu.

¹² Bamosi borunga na lora vo lora jivema na basusu na mamanyi madufunu duneni na basusu miri na bilonga na kunsa.

¹³ Yisalu yimutu mutu yiulabana yilumbu ayi Christ otabulila batu bunsonsi. Diwendi rie: yilumbu yieni yiulasa biotsu mu mbari voba muji agunyensa yisalu yisalu.

¹⁴ Pa mutu amarunga na buranga va yibuga na yisalu yiandi yigonyenga, osaku.

¹⁵ Tumba pa yisalu yimutu yiunyenga; yiuba yikadibufu na dibufu. Jaʼ beni aji sui tumba yisalu yiandi yimatsiemuga, diwendi rie: aji nderi mutu agumabunyenga.

¹⁶ Jabanu rie: Jenu duvu nderi ndagu Nsambi la dibandu Yinyunyi yiNsambi etsani nenu!

¹⁷ Pa mutu ebungi ndagu Nsambi, Nsambi omubunga wandi. Ndagu Nsambi jivu yingitsi na jenu wenu.

¹⁸ Mutu ayakedunsa: oyitasi yiri ana diela adivu dedi na bisi butamba akaluyi yiduka yiri ojaba diela dingensa.

¹⁹ Mu mbari ombu Nsambi diela dibutamba buebubu divu yika buduka. Nana Bisonu bisonugulu rie: Nsambi ebaguli basoyitsi badiela na diela diogu.

²⁰ Bisonugu wandi rie: Fumu ejabi yiri diela dibango diela, digaa na tsongu.

²¹ Kabogu mutu ayasangila batu mu mbari botsu bavu abenu!

²² Ne Paul ne Apollos ne Pierre ne bulongu ne monyu ne dufu ne mambu amavu namunyi ne mambu amoba, diwendi rie: biotsu bina abienu.

²³ Jenu duvu aba Christ na Christ avu agu Nsambi.