1 Corinthiens 13 - La Sainte Bible en Langue Yipunu

Durondu

¹ Ne pa nyuvosa mambembu mabatu nesi mabiansa pa ngaa na durondu posulu tsiami tsivu nana mukuku aguidimbu vo nana dumbumbu aduinsieyirini.

² Diurungula uba yiri nyimadila pegulu jiNsambi ubiga nesi diela dineni dibisalu nesi dujabu duotsu; diurungula uba wandi yiri nyina yitu yiwelimina urakula mikongu tumba pa ngaa na durondu yi nyudila mu dionyi?

³ Diurungula uba yiri nyugabila bijaga biami biotsu vo tanguji nyuwakisa dunyuru duami unyensu tumba pa ngaa na durondu yi nyudila mu dionyi?

⁴ Durondu la uwarila na ubueji durondu dugaa na ngusu na dugekematisa na dugaa na dunangu.

⁵ Durondu dugaa na diengula na dugerombi amandi. Durondu dugaa na yifutsu na dugesueyi kueru.

⁶ Durondu dugesangili mabi tumba duilabi nsangu na ngensa.

⁷ Durondu dugededi, diwendi rie: dugetsiemusi yitu vo ditasa vo uwarila.

⁸ Durondu dugesuki tumba mbigulu tsiuvioga na mambembu mosuka na dujabu dutsiemuga.

⁹ Diwendi rie: tusakamana dujabu duotsu nesi mbigulu tsiotsu

¹⁰ tumba ava jandi agumamanina motsu oruyila ametu amavu yika yibuku motsiemuga.

¹¹ Ava nyimabila ngebi nyimavosanga nana ngebi na nyimatasanga nana ngebi na nyimasalanga nana ngebi tumba nyinobanguga nyimabusa mambu mabungebi.

¹² Namunyi tugelabi kengili tuilabi nderi tuigengili mu dumuenu dufuba tumba o gusu tugengasana. Namunyi nyisakatsiyisa motsu tumba o gusu nyujaba nana Nsambi amanjabila.

¹³ Te na temu eni mambu marieru mavu: yitu na ditasa na durondu; tumba adiviolili motsu la durondu.