1 Bakaga 9 - La Sainte Bible en Langue Yipunu

Fumu amamuelabana na Salomon

¹ Salomon anomana urunga Ndagu Nsambi na ndagu andi na biotsu abi amaronda urunga

² temu ajimubeji Fumu amamuelabana nandi nana amalelabinina nandi o Gabaon.

³ Fumu amamutsingula rie: Nyimagulu dusambu duagu na dulembu duagu ava gumansambilila, nyimaliomisa Ndagu aji gumatungila; amuna nyutsaninanga, nyujigengilanga na nyudulasanga ubueji.

⁴ Mbe ka ndeʼ pa gudugusu duganu duami nana taji agu David amadudugusulungu na murima uotsu novaganga motsu ama nyimaguruma, pa guikelisi migaga miami na maruma mami,

⁵ jaba yiri nyuwarisa yitsiga yibufumu buagu o Israel te na mutubu nana nyimatsingulila taji agu David rie: Gugogambu na yivinga va yitsiga yibufumu buIsrael.

⁶ Tumba pa dundiyila nsima jenu na baana bagu na pa dugekelisi maruma mami na migaga miami abi nyimaduruma, pa dusalila bansambi bangana nobakutimina,

⁷ nyutsiemusa baIsrael o bulongu abu nyimabavega na nyuliyila Ndagu aji nyimaletsaninanga nsima. Mbana va gari malongu motsu baIsrael bodesungu na bopejungu.

⁸ Ava batu bovioyila va mugula Ndagu ejiji bokambulu novosa rie: Agu! Bowivula rie: Dibandu yi Fumu amavayila bulongu buebubu na Ndagu ejiji nana?

⁹ Mbana batu bowaka rie: Bamabusa Fumu Nsambi ogu agumapalisa bataji bogu o Egypte na bamakevega ombu bansambi banganga nesi ubakutimina nesi ubasalila; la dibandu Fumu ebalasili maguga meni motsu.

Bisalu bisusu biSalomon

¹⁰ Mu magumabeji mabilima Salomon amarungisila mandagu meni mabeji: Ndagu Nsambi na ndagu andi.

¹¹ Hiram kaga jiTyr amarombila Salomon tsimbi tsisedera na tsisipara na lora nana amarondila, kabogu kaga Salomon amavega Hiram magumabeji mamisiengi miGalilee.

¹² Hiram amarambuyila o Tyr uyelaba misiengi ami Salomon amamuvega, tumba asamamironda.

¹³ Amawivula rie: Mbatsi ami misiengi minongu yi gumapega? La dibandu misiengi mieni minengulungu Kaboul te na namunyi.

¹⁴ Ne nana Hiram amatindila kaga Salomon tona yirieru na yibuku tsilora.

¹⁵ Guluati nana kaga Salomon amakotisila batu o yisalu urungila Fumu Ndagu nesi ndagu jijaʼ beni nesi Millo wandi nesi bivaga biJerusalem nesi Hassor nesi Meguiddo nesi Guezer.

¹⁶ Pharaon kaga jiEgypte amaweʼ uyetumuna bisi Guezer na amanyensa musiengi. Amaboka bisi Canaan abamatsananga muna; mbana aniavega musiengi eni ombu muana andi umugetu, ava amamuwetsila na Salomon.

¹⁷ La dibandu Salomon amamuerungisila Guezer. Amamuerungisa Bet-Horon aguvu o banda,

¹⁸ na Baalat na Tamar o kumu o bulongu buJuda,

¹⁹ na misiengi miotsu miusueyila abiandi na misiengi mimakalu na misiengi mibakabala. Amarungisa miotsu ami amaronda urungisa o Jerusalem nesi o Liban nesi o malongu motsu ama amarumanga. Anana Salomon amakotisila batu o bisalu biandi:

²⁰ baAmor na baHitt na baPerezie na baHevie na baJebusie, diwendi rie: abasamaba baIsrael abamasiala o bulongu.

²¹ Bamatsananga o bulongu mu mbari baIsrael basamarungula ubaboka, kabogu Salomon amabasalisa baviga, anana bavu te na namunyi.

²² Tumba Salomon asamasalisa baIsrael baviga: bamaba bagora na basalitsi bandi na basefu na bivunda bibagora na bivunda bibatu abamabeganga makalu mandi na bakabala bandi.

²³ Dutalu dubivinda bibisalu biSalomon adudu: kama yiranu na magumaranu abamakipanga basalitsi.

²⁴ Muana mugetii uPharaon amarambuyila o musiengi uDavid uwenda o ndagu andi aji Salomon amamurungila. Va julu vana Salomon amarungisa Millo.

²⁵ Kumbu yirieru mu yilima Salomon amavagulanga pagu tsiunyensa na tsikabusulu tsimaboti va yinyensulu yipagu ayi amarungila Fumu na amanyensa bima bimbunga jiboti va yinyensulu yibima bimbunga jiboti. Anana amasalisila abi amarungisa.

²⁶ Kaga Salomon amarungisa makumbi mamamba o Ession-Gueber bebeli na Elath va mugula Mubu uBenga o bulongu buEdom.

²⁷ Kaga Hiram amasindiga basalitsi bandi abamajaba ubega makumbi meni uyewamusa basalitsi baSalomon.

²⁸ Bamawenda o Ofir na bamayenabega lora, diwendi rie: yigumi na tona beji tsilora ombu kaga Salomon.