1 Bakaga 8 - La Sainte Bible en Langue Yipunu

Yigara yipangini yimasunsu o Ndagu Nsambi

¹ Va temu eni kaga Salomon amanengila bivunda biIsrael na basefu botsu babifumba na bamikuta mibaIsrael o Jerusalem uyebonga yigara yipangini yiFumu o Sion agumaGba musiengi uDavid uyikotisa O Ndagu Nsambi.

² Kabogu baIsrael botsu bamagukama ombu kaga Salomon uvaga feta jitsungi Etanim ajivu tsungi jimusambuali.

³ Bivunda biotsu biIsrael va mosi na bavagulitsi bapagu bamabega yigara yipangini.

⁴ Bavagulitsi bapagu na bisi Levi bamanangula yigara yipangini yiFumu na Ndagu Yibenguna jitsanda na bisalulu biotsu biyingitsi abimasalulu muna.

⁵ Kaga Salomon na dibuli diotsu dibaIsrael bamagukama ombu gandi va gusu yigara yipangini: puela bindombu na bangombi bamavagulu pagu abisamarungula nesi utalu.

⁶ Bavagulitsi bapagu bamakotisa yigara yipangini yiFumu o mbura jiyionyi o Mbura Ajivu Tindi Yingitsi o tsi mapapi mabibagunu bibiansa.

⁷ Bibagunu bibiansa bimasamba mapapi va julu yigara yipangini na mamakubiga yigara yipangini na manguangu mayionyi.

⁸ Manguangu meni mamaba masakama te na bamalabililanga makodu mamonyi o Mbura Nsambi va gusu kana Mbura Nsambi tumba masamalabanga va gusu kana, mavu vana te na namunyi.

⁹ O gari yigara yipangini umaba yika mamanyi mabeji mamigaga ama Moise amapodula muna o Horeb ava Fumu amavanginina pangini na baIsrael ava bamapalila o Egypte.

¹⁰ Ava bavagulitsi bapagu bamapalila o Mbura Yingitsi dimungi dimabasa Ndagu Nsambi.

¹¹ Bavagulitsi bapagu basamarungula usala yisalu mu diambu didimungi mu mbari bundumba buFumu bumabasa Ndagu Nsambi.

¹² Mbana Salomon amavosa rie: Fumu gumatabula diambu utsana o tsi dimungi!

¹³ Tumba nyimagurungila Ndagu jineni, mbura aji gutsaninanga te na mutubu!

Amamavosu va temu aji Ndagu Nsambi jimawakusulu

¹⁴ Dibuli diotsu diIsrael dimaba diteli va gusu kaga; amageluga ubagengila nobagabila miula.

¹⁵ Mbana amavosa rie: Diboti ombu Fumu Nsambi Israel agumavosa jaʼ beni na taji ami David na mangolu mandi edugusu ama amatabula rie:

¹⁶ Ubandila va yilumbu ayi nyimapalisila batu bami baIsrael o Egypte nyisamasola ne musiengi umosi ubifumba biIsrael utungila Ndagu aji nyutsaninanga tumba ndeʼ David nyimagusola urumanga batu bami baIsrael.

¹⁷ Taji ami David amaba na murima urungila Fumu Nsambi Israel Ndagu.

¹⁸ Fumu amatsingula taji ami David rie: Diwelimina yiri guna murima utungila Ndagu

¹⁹ tumba tsiri ndeʼ agurunga Ndagu; muana agu otungila Ndagu.

²⁰ Mbana Salomon amabuesa rie: Fumu amadugusu mambu mandi. Nyimavinga va mbura taji ami David na nyivu va yitsiga yibufumu yiIsrael nana Fumu amavosila na nyimarungila Fumu Nsambi Israel Ndagu.

²¹ Nyimakunsa mbura usunsa yigara yipangini yiFumu ayivu na miganda mipangini aji amavangana na bataji betu ava amabapalisila o Egypte.

Dusambu duSalomon

²² Salomon amavioga va gusu yinyensulu yipagu yiFumu va nsungisini na dibufi diotsu diIsrael. Amasamba miogu o julu na amasambila rie:

²³ Aa Fumu Nsambi Israel! Vagaa Nsambi agubagunu nagu nesi o julu nesi va butamba. Guikelisi pangini na guilasi maboti ombu basalitsi bagu abewendingi sungingi va gusu agu!

²⁴ Gumakelisa pangini aji gumavangana na musalitsi agu taji ami David. Nyiina, adi gumavosa gumadidugusu namunyi.

²⁵ Kokolu tsiagu Fumu Nsambi Israel, kelisa pangini aji gumavangana na taji ami David ava gumavosila nandi rie: Te na mutubu gugogambu na yivinga va gusu ami ayiutsananga va yitsiga yibufumu yiIsrael, dimosi buandi, baana bagu bakebini na bifu biogu, bawendingi va gusu ami nana ndeʼ beni gumawendilanga.

²⁶ Aa Nsambi Israel pangini aji gumavangana na taji ami David, kokolu jidugusu!

²⁷ Yika tsie! Je Nsambi otsananga va butamba? Gulu julu na tindi julu jigaa mbura jiwelimina nagu tambusa na Ndagu ejiji aji nsigurungila!

²⁸ Fumu Nsambi ami ba limba ugulu dusambu duami na dulembu duami; gulu migamu na tsambu atsi nyigusambili namunyi.

²⁹ Gengila Ndagu ejiji jiNsambi temu tsiotsu na mbura ejiji aji gumavosila rie: Avana nyutsaninanga. Gulu dusambu duami adu nyigusambili va mbura ejiji.

³⁰ Gulu dulembu duami na dubatu bagu baIsrael ava tugusambililanga va mbura ejiji. Nyiina, gulu ava guvu o julu, gulu notutanda wandi.

³¹ Pa mutu bvayila mutu nandi dibi na bomutsotsa uleva pesi umutabulila bunsonsi na pa oyijiwarisa va yinyensulu yiagu yipagu o Ndagu ejiji,

³² ndeʼ Fumu aguvu o julu, mugulu, muwamusi na tabulila basalitsi bagu bunsonsi; vega mungo mbela mbela andi, vega mungo ndunga ndunga andi!

³³ Ava baIsrael bobetsulu na bavinitsi bogu mu mbari bamaguvayila mabi; pa begabuyi ombu gagu uguyitsa na pa begusambili nogulembiyila mu Ndagu ejiji,

³⁴ ndeʼ Fumu aguvu o julu, bagulu na batandi dibi diogu na bagabusili malongu ama gumalevega bataji bogu!

³⁵ Ava julu jiudibimina na mfula jigomuenoga mu diambu dimabi ama baIsrael bamaguvayila pa boyisambila va mbura ejiji noyitsa diina diagu nokesunsa va gusu agu na pa boliyila mabi mogu nsima mu mbari gumabakilisa,

³⁶ ndeʼ Fumu aguvu o julu bagulu na batandi dibi diogu mu mbari bavu basalitsi bagu na batu bagu; balonsi udugusu duganu duagu mbana banoyisili mfula mu butamba abu gumabavega disiala.

³⁷ Ava dungosu dunsala nesi yivunga nesi bivaru biunyenga nesi ubumba nesi makokoku mamunongu na munongu biubila mu bulongu; ava bavinitsi bokandila batu bagu o bulongu buogu nesi o mandagu ava bidungu biulabinina nesi mali maminongu na minongu;

³⁸ pa batu bagu baIsrael bogusambila nogulembiyila na munyongu pa bogengila Ndagu ejiji nosamba makaka ugusambilila;

³⁹ ndeʼ Fumu aguvu o julu bagulu na batandi na bawamusi na vayila mutu mutu dedi mosi na bifu biandi, ndeʼ aguijabi murima umutu mutu. Mu mbari bundeju aguijabi mirima mibatu botsu.

⁴⁰ Vaganga nana yiri bogudumanga temu tsiotsu atsi botsananga o bulongu abu gumavega bataji betu!

⁴¹ Ava benyi abagaa mu dibuli dibaIsrael borambuyila o bulongu buvala,

⁴² mu mbari bogulu diduma diagu na nana mangolu magu mamalasulu yiari na yiari,

⁴³ ndeʼ Fumu aguvu o julu bagulu na bavayili ama bogusambilila o Ndagu ejiji. Mbana bisi malongu motsu bojaba diina diagu na boguyitsanga nana batu bagu baIsrael beguyitsilingi na bojaba yiri diina diagu disambulungu o Ndagu aji nyimagurungila.

⁴⁴ Ava batu bagu boyebengusinina bavinitsi bogu o divita mu mbari gumabaruma udivaga pa bogusambila ndeʼ Fumu na pa bogengila o yiari yimusiengi agu gumasola no Ndagu aji nyimagurungila, kokolu tsiagu,

⁴⁵ gukagulu tsambu tsiogu, ndeʼ Fumu aguvu o julu, bawamusi!

⁴⁶ Ava baIsrael boguvayila mabi mu mbari vagaa mutu ne umosi agugevayi mabi, ava gubanyoyila kabu na gubawakisa ombu bavinitsi abobabega baviga o bulongu bubavinitsi abuvu vala vo bebeli;

⁴⁷ pa bokalula diela o bulongu abu bobila baviga, pa boruga ombu gagu nogulembiyila o bulongu bungana abu bavu baviga na bovosa rie: Tumavaga masumu, tumaviosulila uvaga mabi!

⁴⁸ Pa bogabuga ombu gagu na mirima miogu miotsu o bulongu bubavinitsi bogu abamabavaga baviga, pa bogusambila na borangimina bulongu buogu abu gumavega bataji bogu, pa bogengila o yiari yimusiengi agu ndeʼ gumasola no Ndagu aji nyimagurungila,

⁴⁹ kokolu tsiagu gukagulu tsambu tsiogu; ndeʼ Fumu aguvu o julu bawamusi!

⁵⁰ Batandi mabi mogu na nsimbulu tsiogu tsiotsu atsi bamagutsimbulu, gukadetsa mirima mijogu abamabavaga baviga yiri bobalasa yingeba.

⁵¹ Bavu batu bagu na disiala diagu aba gumapalisa o muji uEgypte!

⁵² Kokolu tsiagu gukatugengila nogulu ndembu tsietu ava tugugamuyilanga.

⁵³ Aa Fumu ndeʼ agumakakasana batu bagu na bisi malongu masusu na gumabavaga disiala diagu nana gumavosila na musalitsi agu Moise ava gumapalisila bataji betu o Egypte!

Salomon uvonda evondi miula miNsambi

⁵⁴ Ava Salomon amamanina usambila Fumu dusambu dueni na umulembiyila amaretsama va gusu yinyensulu yipagu yiFumu agu amaba akutama na miogu misambu o julu!

⁵⁵ Anoretsama amagabila dibuli diotsu diIsrael miula rie:

⁵⁶ Nyigugabusili diboti Fumu ndeʼ agumavega yivumu ombu batu bagu baIsrael nana gumavanginina na musalitsi agu Moise.

⁵⁷ Fumu Nsambi etu abi netu nana amabila na bataji betu, ayatulibana na ayatusila pinsa,

⁵⁸ tumba agelusi mirimamietu ombu gandi yiri tudugusu duganu duandi nokipanga maruma mandi na migaga miandi na bingitsi biandi abi amavega bataji betu.

⁵⁹ Nyanga na mukolu Fumu agulu mambu mami nesi ndembu tsiami notuwamusa jetu atuvu batu bandi.

⁶⁰ Mbana bisi malongu motsu bojaba yiri Fumu avu Nsambi na vagaa jisusu!

⁶¹ Veganu mirima mienu miotsu ombu Fumu Nsambi etu, kipanganu migaga miandi nokelisanga maruma mandi nana duivayingi namunyi.

Pagu atsimavagululu Fumu

⁶² Kaga Salomon na baIsrael botsu bamavagulila Fumu pagu.

⁶³ Salomon amabokisa magumabeji na tosini beji tsibangombi na kama na magumabeji matosini tsibindombu na binsabi abi amavagula pagu jikabusulu tsimaboti. Anana bamawakisila Ndagu Nsambi.

⁶⁴ Muna yilumbu yieni kaga amawakisila dulombili aduvu va gusu Ndagu Nsambi; avana amavagulila pagu tsiunyensa na pagu tsitsangu na matsi mapagu tsikabusulu tsimaboti mu mbari yinyensulu yipagu yikunga ayimaba va gusu Ndagu Nsambi yimaba yiviolila ugeyi uvagulila Fumu pagu tsieni.

⁶⁵ Va temu eni amakunsila feta jimasamba va mosi na baIsrael botsu. Yinombu yineni yimaruyila o yiari yiHamat te no mijamba miEgypte; bamagukama va gusu Fumu Nsambi etu te na yisambuali yibilumbu.

⁶⁶ Mu yilumbu yimunana kaga amaganina batu, bamagabusila kaga diboti na bamayenawenda na nsangu nobueji o mandagu mogu mu diambu dimaboti ama Fumu amavayila musalitsi andi David na batu bandi baIsrael.