1 Bakaga 6 - La Sainte Bible en Langue Yipunu

Urunga berungi Ndagu Nsambi

¹ Kama jina na mugumidunana mabilima bidupalulu dubaIsrael o Egypte Salomon amarungila Fumu Ndagu, diwendi rie: mu yilima yimuina bidurumu duandi o Israel mu tsungi Ziv ajivu tsungi jimubeji.

² Usakama uNdagu aji Salomon amarungila Fumu umaba magumarieru mametera; uroga ujionyi yigumi yimetera na yirela yijionyi yigumi na metera yiranu.

³ Piasu o gusu Ndagu Nsambi jimaba na yigumi yimetera, jimaba dedi na uroga uNdagu Nsambi; udonga ujionyi umaba metera yiranu.

⁴ Mumaba bafenetera mu bibaga bindagu.

⁵ Amaguka bibuku bindagu yiari na yiari abimagaganga bibaga biNdagu nesi biMbura jiMbura jiYingitsi.

⁶ Kilingu ajitega jimaba na yiavu yimetera beji na yibuku; amatsiengisa yivaga yiari na yiari bindagu yiri tsimbi tsimuansa tsigobemba bibaga biNdagu Nsambi.

⁷ Ava bamarungila Ndagu Nsambi bamasalisa mamanyi motsu mapaku, nesi martu nesi diumbi nesi yisalulu yiotsu yibudilu yisamasalusu o gari Ndagu Nsambi mu mbari nduku jikegulunu.

⁸ Munu ndagu ukilingu ajitega umaba o yiari yimabaala mandagu; bamamatanga o kilingu ajigari mu yikadi ayimatsiengilanga Ndagu Nsambi te no ajimurieru.

⁹ Anomana urungisa Ndagu, bamajigumba tsimbi na mikambu misedera.

¹⁰ Amavaga metera beji na yibuku yirela yikadi kilingu atsimatsiengila ndagu na amabinamasana na Ndagu na tsimbi tsisedera.

¹¹ Fumu amatsinguia Salomon rie:

¹² Ndeʼ aguirungi Ndagu ejiji pa guiduki migaga miami nesi bingitsi biami na pa guikelisi nokipanga maruma mami nyugudugusulu pangini aji nyimavangana na taji agu David;

¹³ nyuyitsananga na baIsrael na ngobaliyila nsima.

Usala besali abiuba o gari Ndagu Nsambi

¹⁴ Kabogu bamarunga Ndagu Nsambi na bamajimanisila nana Salomon amarumina.

¹⁵ Bamagomina tsimbi tsisedera mu bibaga o gari Ndagu ubandila va tsi te no julu; munongu mosi bamadibiga miri migari ndagu na bamawala tsimbi tsisipara mu tsi.

¹⁶ Bamagomina tsimbi tsisedera mu yigumi yimetera yigari Ndagu ubandila va tsi te no julu yibagi. Na bamakunsa yibuku usunsa yigara yipangini ayimanengulungu Mbura Ajivu Tindi Yingitsi.

¹⁷ Yibuku ayimaba yineni yimaba va gusu Mbura Yingitsi; yimaba usakama umagumabeji mametera.

¹⁸ Tsimbi tsisedera atsimaba o gari Ndagu tsimabaku bibagunu bimatsuva na bibafelera banyanguga; tsiotsu tsimaba sedera na sedera ne dimanyi dimosi disamalabana.

¹⁹ Mbana bamakunsa yibuku o gari ndagu yiusunsila yigara yipangini yiFumu.

²⁰ Yibuku yieni yimaba usakama uyigumi yimetera na yirela yigumi yimetera. Bamajikubiga tindi lora na bamarunga yinyensulu yipagu yimiri misedera ayimasunsu va gusu Mbura Nsambi na bamayikubiga lora.

²¹ Bamakubiga tindi lora o gari Ndagu mbana bamaleliga dumbu na panga tsilora va gusu Mbura Nsambi; biotsu yika lora na lora.

²² Bamakubiga Ndagu jiotsu na yinyensulu yipagu ayimaba va gusu Mbura Nsambi lora wandi.

²³ Na muoliva umumbendila bamavala bibagunu bibiansa bibeji abimaba na yirela yimetera yiranu.

²⁴ Kadi dipapi diyibagunu yiyiansa yitega dimaba metera beji na yibuku, diwendi rie: motsu mabeji metera yiranu.

²⁵ Yibagunu yiyiansa ayimubeji yimaba na metera yiranu wandi. Bibagunu biotsu bibeji bibiansa bimaba dedi.

²⁶ Yirela yibibagunu biotsu bibeji bibiansa yimaba metera yiranu.

²⁷ Bamasunsa bibagunu bibiansa va tindi gari ndagu. Bibagunu bibiansa bimasamba mapapi: dipapi di-ayitega dimaduku yibaga yimosi na dipapi di-ayimubeji dimaduloi yibaga yisusu; na mapapi mogu masusu mamadukusunu makodu va gari ndagu.

²⁸ Bamakubiga bibagunu bibiansa lora.

²⁹ Bamabaka bibaga bibuku biotsu bibeji bibagunu bibiansa na bimambari na bibafelera banyanguga.

³⁰ Bamakubiga mu tsi bibuku biotsu bibeji lora.

³¹ Mu yibuku yiyigara yipangini bamavaga yiabutsu ayimaba maguyi mabeji matsimbi tsimuoliva umumbendila; munu ndagu umaba minongu miranu.

³² Maguyi motsu mabeji mamavagu na tsimbi tsimuoliva umumbendila. Bamabaka bibagunu bibiansa muna na bimambari na bibafelera banyanguga, bamakubiga na maguyi na bibagunu bibiansa na bimambari lora.

³³ Bamavaga dedi mosi na diguyi diyibuku ayinami na makutu mamuoliva umumbendila na maguyi matsimbi tsisipara,

³⁴ kadi diguyi dimaba biabutsu bibeji abimabaku.

³⁵ Bamabaka bibagunu bibiansa na bimambari na bibafelera banyanguga na bamakubiga biotsu lora.

³⁶ Bamarunga mbura o gari ajimaba na milonga mirieru mimamanyi amamabaku na mulonga umosi umikambu misedera.

³⁷ Yilima yimuina na tsungi Ziv yibuga yiNdagu Nsambi yimarungu;

³⁸ na mu yilima yiyigumi na yimosi mu tsungi Bul ajivu tsungi jimunana, Ndagu Nsambi jimasuka urungu nana jimarumunu. Kabogu jimarungu mu yisambuali yibilima.