1 Bakaga 4 - La Sainte Bible en Langue Yipunu

Salomon usola esoli abosalanga nandi

¹ Kaga Salomon amaba kaga agumarumanga baIsrael botsu.

² Amama la miina mabivunda abimamusalilanga: Azaria muana dibaala uSadoc muvagulitsi upagu,

³ Elihoref na Ahia baana bababaala baChicha bamaba basonitsi; Yochafat muana dibaala uAhiloud amaba mukipitsi umiganda;

⁴ Benaya muana dibaala uYoyada amarumanga bagora; Sadoc na Abiatar bamaba bavagulitsi bapagu;

⁵ Azaria muana dibaala uNatan amaba yivunda yibasalitsi; Zaboud muana dibaala uNatan amaba muvagulitsi upagu na mulongitsi ukaga;

⁶ Ahichar amaba yivunda yiyisalu yindagu kaga; Adoniram muana dibaala uAbda amaba mubongitsi lepu.

⁷ O Israel jiotsu Salomon amaba na yigumi na basalitsi babeji abamarombanga biguji bindagu andi, musatitsi musalitsi tsungi andi.

⁸ Miina mogu amama: muana dibaala uHour o mukongu uEfraim;

⁹ muana dibaala uDequer o Macas o Chaalbim o Bet-Chemech o Elon no Bet-Hanan;

¹⁰ muana dibaala uHessed o Aroubot; amaba na Soko na bulongu buotsu buHefer;

¹¹ muana dibaala uAbinadab amaba na yiari yiotsu yiDor (Tafat muana mugetu uSalomon amaba mugatsi andi);

¹² Baana muana dibaala uAhiloud amaba na Taanak na Meguiddo o Bet-Chean aguvu bebeli na Sartan o banda Jizreel ubandila o Bet-Chean te no Abel-Mehola te no disimu dina diYocneam;

¹³ muana dibaala uGueber o Ramot o Galaad; agumaba na misiengi miYair muana dibaala uManasse o Galaad. Amamueba na yiari yiArgob o Bachan, diwendi rie: magumasiamunu mamisiengi mineni amimakandu na bivaga abimawarusu na makutu makunga;

¹⁴ Ahinadab muana dibaala uIddo o yiari yiMahanaim;

¹⁵ Ahimaas o yiari yiNeftali. Amawela Basmat muana mugetu uSalomon;

¹⁶ Baana muana dibaala uHouchai o yiari yiAsser na yiBealot;

¹⁷ Yochafat muana dibaala uParoua o yiari yiIssakar;

¹⁸ Chimei muana dibaala uEla o yiari yiBenjamin;

¹⁹ Gueber muana dibaala uUri o bulongu buGalaad amaba na yiari yiSihon kaga jibaAmor na yiOg kaga jiBachan. Va julu yigumi na babeji beni bamaba yivunda yisusu o bulongu buJuda.

²⁰ BaJuda na baIsrael bamafuna tindi ufuna nderi yisieyi yimubu. Bamajanganga na bamanuanganga nolabanga ubueji.

²¹ Salomon amarumanga biari biotsu ubandila o mujamba te no bulongu bubaPhilistin nesi te no mandilu maEgypte; bamabeganga milendu na bamaba o tsi durumu duSalomon yitsingu yiandi yiotsu.

²² Abi Salomon na batu bandi bamajanganga yilumbu na yilumbu abibi: magumabeji na yisambuali yitona tsifufu,

²³ na yigumi yingombi tsivonga na magumabeji mangombi tsisusu na kama bindombu va julu vana bakabi na batsiesi na mapondu na bakoku bavonga.

²⁴ Salomon amarumanga bulongu buotsu abuvu o disimu dina dimujamba Euphrate ubandila o Tifsa te no Gaza; amarumanga bakaga botsu badisimu dimosi dimujamba. Amaba na duvotsu o biari biotsu bimbanda tsi.

²⁵ BaJuda na baIsrael ubandila o Dan te no Bercheba, bamatsananga na mirima misunda, mutu mutu o ndagu andi na mutu mutu na nungi andi va durumu duotsu duSalomon.

²⁶ Salomon amaba na mbura tsiwelimina ukelisila magumana matosini tsibakabala atsimadutanga makalu mandi na yigumi na tosini beji tsibabeyitsi bamakalu.

²⁷ Yigumi na basalitsi babeji bamarombilanga kaga Salomon na botsu abamajanganga nandi biwelimina: mutu mutu na tsungi andi, basamasinganga yiri vogambu yima,

²⁸ nesi biguji biminongu na minongu ulisila bakabala bakaga abamatsananga mu mbura tsiogu.

Salomon amaviolila batu botsu diela

²⁹ Nsambi amavega Salomon diela na dujabu adugorungula uwetsugu nesi utasila basusu.

³⁰ Diela diSalomon dimaviolila diela dibatu botsu o yiari ayi wisi epalili na diela diotsu dibisi Egypte.

³¹ Amaba na diela diviolila babaala botsu ne uviolila diEtan muisi Ezra ne uviolila diHeman na diKalkol na diDarda baana bababaala baMahol; na diduma diandi dimanyava o malongu motsu mambanda tsi.

³² Amabuaga tosini yirieru tsibanongu na amatuba tosini na nyimbu yiranu.

³³ Amatsiyisa mambu mamiri ubanda na sedera jiLiban te na yisopa atsipalili o yivaga; amatsiyisa mambu mabibulu wandi na mabatsoli na mabilandila na manyama tsimamba.

³⁴ Batu bamaruyilanga o malongu motsu uyegulu diela diSalomon nesi bakaga basusu bamasindiga batu bogu uyewiji diela diSalomon.