1 Bakaga 3 - La Sainte Bible en Langue Yipunu

Salomon uwela eweli muana Pharaon

¹ Salomon amatunga diwela na Pharaon kaga jiEgypte, amawela muana mugetu uPharaon na amayenamubega o musiengi uDavid o Jerusalem; amaba vana te na amamana urunga ndagu andi nesi Ndagu Nsambi nesi bivaga biJerusalem.

² Va temu eni batu bamavagulanga pagu mu mbura tsiduyitsu tsibulongu mu mbari te na temu eni mbe basakarungila Fumu Ndagu.

³ Salomon amarondanga Fumu na amadukanga bifu bitaji andi David. Amavagulanga pagu na bima bimbunga jiboti va mbura tsiduyitsu.

Salomon uvonda evondi Nsambi diela uruma

⁴ Yilumbu yimosi kaga amawenda o Gabaon uyevagula pagu tsiunyensa mu mbari jimaba mbura jiviolila mbura tsiotsu tsiduyitsu. Salomon amavagula tosini pagu tsiunyensa va yinyensulu yipagu yieni.

⁵ Mukolu umosi Fumu Nsambi amalabana o ndosi na Salomon o Gabaon, amamutsingula rie: Vonda ayi guirondi yiri nyuguvega.

⁶ Salomon amawaka rie: Gumavayila musalitsi agu taji ami David maboti mu mbari amaba asigama va gusu agu na amaba na dusungugu na businganyi; gumamulasa maboti meni maneni na gumamuvega muana udibaala aguitsani va yitsiga yibufumu buandi nana tuilabili namunyi.

⁷ Fumu Nsambi ami amapinsa va yivinga yitaji ami David; menu nyivu yika mua mufudu agusakajaba usala yisalu yieyiyi.

⁸ Nyimasundila ulabana yivunda yibatu aba gumasola, bavu bapuela bapuela te na bagorungula nesi utalu.

⁹ Kabogu peyi dujabu utabulila batu bagu bunsonsi nokelula maboti na mabi! Anyi orungula utabula bunsonsi bubatu bagu abavu bapuela bapuela?

¹⁰ Yivu yiSalomon yimalasa Fumu ubueji.

¹¹ Nsambi amamutsingula rie: Gugekevondila nesi yitsingu yineni nesi busina nesi dufu dubavinitsi bagu, guivondi dujabu uruma batu bami na dusungugu,

¹² kabogu nyuguvaga nana gutsivondila. Nyuguvega diela na dujabu abisakaleba na mutu na vagoba mutu aguba dedi nagu te na mutubu.

¹³ Va julu vana nyuguvega abi gugaavonda: busina na bundumba, yitsingu yiagu yiotsu vagoba kaga ajiuba dedi nagu.

¹⁴ Pa guidugusu duganu duami nokelisa migaga miami na maruma mami nana taji agu David amabikelisilanga, nyugubuesa bilumbu.

¹⁵ Salomon anorambuga amajaba yiri Nsambi amavosa nandi o ndosi. Anogabuga o Jerusalem amakelasa ombu Fumu va gusu yigara yipangini. Amavagula pagu tsiunyensa na pagu tsikabusulu tsimaboti mbana amalambisila basalitsi bandi mulambu.

Salomon utabula etabuli bunsonsi

¹⁶ Yilumbu yimosi bimbembu bibeji bibagetu bamawenda ombu kaga.

¹⁷ Mugetu mosi amavosa rie: Guluati fumu ami! Jetu na mugetu egugu tuitsani mu ndagu mosi; menu nyimabura muana dibaala va misu mandi.

¹⁸ Bilumbu birieru binovioga jaʼ wandi amabura muana dibaala. Tuitsaningi va mosi; vagaaruga muenyi o ndagu yika jetu nandi babeji tubetsi guna.

¹⁹ Muana umugetu egugu atsifu va gari wisi mu mbari atsimuvika.

²⁰ Atsisimbuga va gari wisi, atsibonga muana ami va mugula ami ava nyibetsili yilu na atsimusiliga va tulu andi; mbana atsisiliga muana andi agutsifu va tulu ami.

²¹ Kedi nyinorambuga unuisa muana dibenyi kabogu afu kala. Wisi unorenduga nsimugengila na buranga mbana nsilaba yiri aguna tsiri muana ami.

²² Mbatsi andi amagamuga rie: Tsiri nana! Muana ami aguvu monyu, agufu avu muana agu. Tumba mugetu utega amawaka rie: Viaga! Muana agu amafu, aguvu monyu la muana ami. Anana bamatsundila va gusu kaga.

²³ Kaga amavosa rie: Umosi evosi rie: Aguvu monyu aguami, agufu la muana agu; ususu amawaka rie: Viaga! La muana agu agufu, aguvu monyu aguami.

²⁴ Kabogu amaruma rie: Mbeyilianu dijenga. Bamabeyila kaga dijenga.

²⁵ Kaga amaruma rie: Tabulanu muana aguvu monyu bibuku bibeji, dukabavega mutu mutu yibuku yiandi.

²⁶ Kabogu mugetu agu muana andi amaba monyu amagaangu na munyongu umuana andi, amagamuga rie: Aa fumu ami, muveyi muana aguvu monyu, guyamuboka. Tumba mbatsi andi amavosa rie: Jetu botsu tumuvinda, mutabulianu!

²⁷ Mbana kaga amavosa rie: Duyarauboka, veganu muana ombu mugetu agutega.

²⁸ BaIsrael botsu bamagulu bunsonsi abu kaga amatabula. Bamaduma kaga mu mbari bamalaba yiri amaba na diela diNsambi utabula bunsonsi.