1 Bakaga 22 - La Sainte Bible en Langue Yipunu

Achab upatula epatuli kaga jiSyrie musiengi Ramot

¹ BaSyrie na baIsrael bamatsana bilima bibeji tsiri utoga divita.

² Muna yilima Josaphat, kaga jiJuda amawenda ombu kaga jiIsrael.

³ Kaga jiIsrael amawivula basalitsi bandi rie: Duijabi yiri Ramot aguvu o Galaad aguetu? Dibandu yi tugegupatulili kaga jiSyrie?

⁴ Kabogu amawivula kaga Josaphat rie: Gugowenda nami uyetumuna bisi Ramot o Galaad? Josaphat amawagula kaga jiIsrael rie: Tʼwendianu na batu betu na bakabala betu.

Babiyitsi ubiga bebiyi ndungulu

⁵ Mbana Josaphat amavosa na kaga jiIsrael rie: Kokolu tsiagu lewivula Fumu.

⁶ Kaga jiIsrael amagukiga kama jina tsibabiyitsi na amabawivula rie: Nyuwenda uyetumuna bisi Ramot o Galaad vo nyiyawenda? Jogu bamawaka rie: Wendanga, Fumu oguwakisa musiengi eni.

⁷ Mbana Josaphat amawivula rie: Avava vesa mubiyitsi ususu uFumu agu turungula umuewivula?

⁸ Kaga jiIsrael amawagula Josaphat rie: Vakivu dibaala dimosi orungula utuwivulila Fumu; tumba nyimuvini mu mbari agembiyili ne mbigulu jimosi jiboti, ebiyingi yika mbigulu tsibi. Diina diandi Michee muana dibaala uImla. Josaphat amavosa rie: Guyavosa nana!

⁹ Mbana kaga jiIsrael amanengila muvangu na amamuruma rie: Lensa noyenengila Michee muana dibaala uImla.

¹⁰ Kaga jiIsrael na Josaphat kaga jiJuda bamaduara biduaru biogu bibukaga na mutu mutu amatsana va yitsiga yiandi yibufumu va dikotulu diSamarie; avana babiyitsi botsu bamabiyila.

¹¹ Sidequia muana dibaala uKenaana amalevaga masiyi mabudilu mbana amavosa rie: Fumu jandi rie: Na masiyi memama gudimbila baSyrie te na gubabunga.

¹² Babiyitsi botsu bamawarisa mbigulu tsiandi rie: Wenda o Ramot o Galaad! Gulunga na Fumu oguwakisa musiengi eni.

Mubiyitsi Michee ubiga ebiyi mbetsulu

¹³ Yilumbi ayimayenengila Michee amamutsingula rie: Gulu babiyitsi bavu na kingu mosi; bamabiyila kaga mbigulu tsiboti kabogu mbigulu tsiagu tsibi kingu mosi nogu! Gukaabiga ndungulu.

¹⁴ Michee amawaka rie: Fumu jaʼ beni ejabi. Nyubiga ama Fumu onsingula.

¹⁵ Ava amatolila ombu kaga amamuwivula rie: Michee, tuwenda uyetumuna bisi Ramot o Galaad vo tuyawenda? Amamuwagula rie: Wendanga, gulunga! Fumu oguwaka musiengi eni.

¹⁶ Kaga amamuwivula rie: Kumbu kweʼ nyugulevisa pesi na diina diFumu yiri adi guivosi divu dingensa?

¹⁷ Michee amawaka rie: Nyilabi baIsrael botsu upansiga bepansiyi o mikongu bavu nderi bindombu abigaa na mubungulitsi; Fumu amavosa rie: Batu beni bagaa na sefu mutu mutu agabuyi na duvotsu o ndagu andi.

¹⁸ Kaga jiIsrael amawivula Josaphat rie: Ngaalegutsingula? Agembiyili mbigulu tsiboti, embiyili yika mbigulu tsibi.

¹⁹ Michee amavosa rie: Kabogu legulu mbembu Fumu! Nyimalaba Fumu atsana va yitsiga yiandi yibufumu na bisi julu botsu bamaba diteli bebeli nandi va mabaala na va magetu mandi.

²⁰ Mbana Fumu amawivula rie: Anyi odunsa Achab yiri owenda o Ramot o Galaad yiri oyeboku guna? Umosi amawagula kingu mosi na ususu kingu jisusu.

²¹ Mbana yinyunyi yimosi yimabambana na Fumu na yimavosa rie: Menu nyumudunsa. Fumu amawivula rie: Ayi?

²² Yimawagula rie: Nyuwenda na nyuba yinyunyi yimfurulu mu miunu mibabiyitsi bandi botsu. Fumu amavosa rie: Nyiina, gurungula umudunsa. Wenda yevaga nana gutsivosila.

²³ Kabogu Michee amabuela rie: Fumu amavega yinyunyi yimfurulu ombu babiyitsi bagu botsu. Diuleba Fumu amatabula diambu ugulasa maguga.

²⁴ Vana vana Sidequia muana dibaala uKenaana amabambana na Michee amamudimba va dibanga nomuwivula rie: Je Yinyunyi yiNsambi evosi bunagu, agevosi nami?

²⁵ Michee amawaka rie: Gulaba yilumbu ayi gusuemina o gari ndagu.

²⁶ Kaga jiIsrael amaruma musalitsi rie: Bonga Michee gukamubega ombu Amon yivunda yimusiengi nombu Yoach muana dibaala ukaga.

²⁷ Gukavosa rie: Kaga jandi rie: Kotisanu dibaala diedidi o tsugu na dukamuveganga mua pesu mapa na mua pesu mamba te na nyugabuga na duvotsu.

²⁸ Michee amavosa rie: Pa gugabuga na duvotsu, kabogu Fumu agaavosa nami. Amabuela rie: Jenu batu botsu duigulu?

Kaga Achab amaboku o divita

²⁹ Kaga jiIsrael na Josaphat kaga jiJuda bamawenda o Ramot o Galaad.

³⁰ Kaga jiIsrael amatsingula Josaphat rie: Ndeʼ guduara biduaru bibukaga na menu nyuduara bisusu abi bagonjabila mbana nyuwenda o utoga. Anana kaga jiIsrael amawendila o utoga na biduam abi basamamujabila.

³¹ Kabogu kaga jiSyrie amavega diruma ombu magumarieru na bivunda bibeji bimakalu rie: Duyatumuna nesi ngebi nesi yivunda, tumba tumunanu kaga jiIsrael.

³² Kabogu ava bivunda bibabeyitsi bamakalu bamalabila Josaphat bamavosa rie: Ngensa aguna aji kaga jiIsrael! Bamabambana nandi umutumuna tumba Josaphat amagamuga mugamu andi udivita.

³³ Mbana bivunda bibabeyitsi bamakalu bamalaba yiri aguna tsiri kaga jiIsrael, kabogu bamadunda umuduka.

³⁴ Mbana gora mosi jiSyrie amatinda dubansa duandi matitinda na amadunamusu kaga jiIsrael va dinami dingubu. Kaga amaruma agumabeganga dikalu diandi rie: Geluga na palisi o divita mu mbari nyimatsunguga.

³⁵ Tumba divita dimaranga tindi uranga muna yilumbu yieni. Kaga amasikugu na dikalu diandi va nsungisini na dibadi diSyrie, amafu ava tsisiga. Malungu mandi mamawitama mu dikalu.

³⁶ Ava tsisiga bamagamuga o milaku rie: Mutu mutu agabuyi o musiengi andi na mutu mutu o bulongu buandi mu mbari kaga amafu!

³⁷ Bamabega mfumbi o Samarie, avana bamajitsiyila.

³⁸ Ava bamasusila dikalu diAchab o dianga diSamarie bamondi bamavenda malungu mandi na bimbembu bamabuila muna nana Fumu amavosila.

³⁹ Misamu misusu miAchab na motsu ama amavaga nana amarungisila ndagu jipungi na misiengi wandi mamasonugu mu Dibuku diBisalu bibaKaga baIsrael.

⁴⁰ Achab amafu. Ahazia muana andi udibaala amarumanga va yivinga yiandi.

Josaphat kaga jiJuda

⁴¹ Josaphat muana dibaala uAsa amarumanga o Juda mu yilima yimuina yiAchab kaga jiIsrael.

⁴² Josaphat amaba na magumarieru na bilima biranu ava amabandila uruma na amarumanga o Jerusalem magumabeji na bilima biranu. Diina nguji andi Azouba muana mugetu uChili.

⁴³ Amadukanga bifu bitaji andi Asa; asamavaganga masumu; amavaganga yika amamalasanga Fumu ubueji.

⁴⁴ Tumba mbura tsiduyitsu tsisamatsiemuga; batu bamavagulanga pagu na miyombu va mbura tsiduyitsu.

⁴⁵ Josaphat na kaga jiIsrael bamaba na duvotsu.

⁴⁶ Misamu misusu miJosaphat nana amalasila mangolu mandi na nana amawendila o mavita mimasonugu mu Dibuku diBisalu bibaKaga baJuda.

⁴⁷ Amagusula bimbembu bisusu mu bulongu abi taji andi asamagusula.

⁴⁸ O Edom vasamaba kaga: yivunda ayimasolu na kaga jiJuda amawendisanga bisalu biotsu.

⁴⁹ Josaphat amarungisa makumbi maneni mamamba o Ession-Gueber uyenarombanga lora jiOfir tumba muendu usamabueji mu mbari mungudi uneni umagumbanga agumamadiamisa.

⁵⁰ Mbana Ahazia muana dibaala uAchab amawivula Josaphat rie: Tsie basalitsi bana bagowenda na abagu mu makumbi mamamba? Josaphat amabusa.

⁵¹ Josaphat amafu na amatsigu va mugula bataji bandi o musiengi utaji andi David. Joram muana andi udibaala amarumanga va yivinga yiandi.

Ahazia kaga jiIsrael

⁵² Ahazia muana dibaala uAchab amarumanga o Israel o Samarie mu yilima yiyigumi na yisambuali biJosaphat kaga jiJuda. Amaruma baIsrael bilima bibeji.

⁵³ Amavaga amasamalasa Fumu ubueji na amaduka bifu bitaji andi na binguji andi na biJeroboam muana dibaala uNebat agumarombisa baIsrael uvaga masumu.

⁵⁴ Amakota mu muyitsa uBaal umuyitsanga; amanyoyisa Fumu Nsambi Israel dedi mosi nana taji andi.