1 Bakaga 21 - La Sainte Bible en Langue Yipunu

Kaga Achab amabokisa Nabot

¹ Mambu memana manovioga, adina dimalabana. Nabot muisi Jizreel amaba o nungi o Jizreel va mugula ndagu kaga Achab o Samarie.

² Yilumbu yimosi Achab amavosa na Nabot rie: Peyi nungi agu yiri jiuba ajiami mu mbari jivu bebeli na ndagu ami. Nyuguvinsila tindi nungi jiboti vo pa guirondi nyugufutila.

³ Tumba Nabot amawaka Achab rie: Fumu ekandisi uguvega disiala dibataji bami.

⁴ Achab amakota o ndagu andi na munyongu na kabu mu diambu dikabusulu jiNabot. Amasilama va tangi andi, amagengila o yibaga na asamaji ne uji.

⁵ Mugatsi andi Jezabel amamurasuna na amamuwivula rie: Dibandu yi guinyongili na dibandu yi guibusili uji?

⁶ Amamuwagula rie: Nsivosa na Nabot muisi Jizreel na nsimuvonda rie: Nsumbisi nungi agu; vo pa guirondi nyuguvinsila nungi jisusu. Tumba atsivosa rie: Ngoguvega nungi ami!

⁷ Mbana mugatsi andi Jezabel amamuwivula rie: Tsiri ndeʼ aguirumi Israel? Simbuga, ji, sangila; menu nyuguvega nungi jiNabot muisi Jizreel.

⁸ Amasona miganda mu diina diAchab ami amanamiga bilimba bikaga na amamitinda ombu bivunda bimunongu na munongu abimatsananga na Nabot o musiengi andi.

⁹ Guluanu adi amasona mu miganda mieni rie: Tubulanu temu jiubusa uji; dukavaga Nabot yivunda yibatu botsu.

¹⁰ Mbana dukasola babaala babeji abosungasana nandi abomusingisila bumbeji rie: Gumavosila Nsambi ndogulu na gumasienga kaga! Va julu vana dukamubega o tsomu dimbu, dukamutindila mamanyi umuboka.

¹¹ Bisi musiengi uNabot, bivunda bimunongu na munongu bimusiengi bamavaga nana Jezabel amabarumina mu miganda ami amabasonina.

¹² Bamatubula temu ubusa uji na bamavaga Nabot yivunda yibatu botsu.

¹³ Babaala beni babeji bamasungasana nandi na bamafuengilila Nabot va gusu batu botsu rie: Nabot amasienga Nsambi na kaga! Mbana bamamubega o tsomu dimbu na bamamutindila mamanyi na amafu.

¹⁴ Bamatinda yilumbi uyetsingula Jezabel rie: Nabot amatindulu mamanyi na amafu.

¹⁵ Ava Jezabel amadigululu amamma Achab rie: Relama, bonga nungi jiNabot muisi Jizreel agumabusa ugusumbisa jionyi; Nabot asatsi, amafu.

¹⁶ Ava Achab amagulu yiri Nabot amafu amarelama na amavindama o nimgi jiNabot muisi Jizreel uyejibonga.

Nsambi uvega eveyi Achab na Jezabel mbela

¹⁷ Mbana Fumu amatsingula mubiyitsi Elie muisi Tichebe mambu memama rie:

¹⁸ Relama, yebengusana Achab kaga jiIsrael o Samarie; avu o nungi jiNabot, amavindama uyejibonga.

¹⁹ Gukamutsingula rie: Fumu ewivuli rie: Tsiri ndeʼ aguvu punyi na mudayitsi? Mbana gukabuesa rie: Vana mbura aji bamondi bamavendila malungu maNabot avana bamondi bovendila malungu magu.

²⁰ Achab amawivula Elie rie: Muvinitsi ami, gumatasuna? Amawaka rie: Nyimagurasuna. Gumalaba ubueji uvaga adigaa diwelimina va gusu Fumu.

²¹ Fumu evosi rie: Nyugutindila maguga; nyugugudisa na nyuboka mutu uotsu uAchab o Israel nesi muviga nesi fumu.

²² Nyuvaga mukuta agu dedi mosi nana uJeroboam muana dibaala uNabot na uBacha muana dibaala uAhia mu mbari gumanyoyisa na gumarombisa baIsrael uvaga masumu.

²³ Elie amabuela rie: Fumu amavosa mu diambu diJezabel wandi rie: Bamondi boji Jezabel va mugula uyivaga yiJizreel.

²⁴ Muisi mukuta agu uotsu agufuila o musiengi oligu na bamondi, agufuila o musiru ododu na batsoli.

²⁵ Vasakaba mutu agumalaba ubueji uvaga adigaa diwelimina va gusu Fumu nana Achab agumasibusu na mugatsi andi Jezabel.

²⁶ Amavaga tindi nsoruru; amasambila bakosi nana baAmor aba Fumu amabinga va gusu baIsrael.

Achab amakesundusa

²⁷ Achab anomana ugulu mambu baElie amapasa biduaru biandi; amaduara siela na amabusa uji; amasilamanga na siela eni na amavindama va gegeyi.

²⁸ Fumu amawivula Elie muisi Tichebe rie:

²⁹ Gumalaba nana Achab amakesundusila va gusu ami? Mu dionyi ngomuemulasa diguga dieni va yitsingu yiandi yiotsu; nyulasa diguga dieni ombu mukuta andi va temu durumu dumuana andi.