1 Bakaga 19 - La Sainte Bible en Langue Yipunu

Elie ana murima utsira

¹ Achab amatsingula mugatsi andi Jezabel motsu ama Elie amavaga na nana amabokisila babiyitsi botsu baBaal.

² Jezabel amatinda yilumbi ombu Elie uyemutsingula rie: Bansambi bakilisi na mangolu mogu motsu pa mugesa va diweru diedidi ngoguvayila dedi mosi nana gumavayila babiyitsi beni!

³ Elie anogulu dionyi amagaangu na goma na amarina. Amatola o Bercheba aguvu o Juda, avana amasila musalitsi andi.

⁴ Jaʼ beni amayenawenda yilumbu yimfuimbila o kumu; mbana amayetsana va tsi mugeneta. Avana amaronda ufuila na amavosa rie: Vana dedi! Fumu tsie bongi muvumu ami, ngaa uwelimina ufu nana bataji bami bamafuila?

⁵ Amasilama na amawenda yilu va tsi mugeneta. Mbana yiansa yimamurambusa na yimamuruma rie: Relama, ji.

⁶ Anogengila amalaba dipa digeyi va julu mamanyi na tsuva mamba. Amaji na amanu mbana amamuesilama.

⁷ Yiansa yiFumu yimamueruga yimamurambusa na yimamuruma rie: Relama, ji mu mbari guki na muendu usakama.

⁸ Amasimbuga, amaji na amanu; amawendanga na mangolu ama biguji bieni bimamuvega te na magumana mabilumbu na magumana mamikolu; mbana amatola o mukongu uNsambi o Horeb.

Nsambi amalengasana murima uElie

⁹ Anotola o Horeb avana amakotila o dilima na amasilimina guna. Mbana Fumu amamuwivula rie: Elie yi guivayi vava?

¹⁰ Amawagula rie: Nyimabanganga na yiusila yineni ugusalila Fumu Nsambi Mabadi mu mbari baIsrael bamakubula pangini agu na bamapansa binyensulu biagu bipagu na bamaboka babiyitsi bagu; nyimasiala pinsa na berondi umboka.

¹¹ Fumu amamuruma rie: Pala, wenda o julu mukongu yerelama va gusu ami! Nyuvioga. Ne Fumu akavioga vamaleba mungudi uneni agumarakula nesi mikongu nobula mamanyi; Fumu asamaba mu mungudi. Mungudi unovioga vamaba disisana dibutamba: Fumu asamaba mu disisana dibutamba

¹² Disisana dibutamba dinovioga vamaba muji; Fumu asamaba mu muji. Muji unovioga vamagulunu diufi digeyi.

¹³ Ava Elie amadigululu amakegumba yinsi na yijungi yiandi na amapala va dikotulu didilima. Amagulu diufi adimamuwivula rie: Elie yi guivayi vava?

¹⁴ Amawagula rie: Nyimabanganga na yiusila yineni ugusalilaFumu Nsambi Mabadi mu mbari baIsrael bamakubula pangini agu na bamapansa binyensulu biagu bipagu na bamaboka babiyitsi bagu; nyimasiala pinsa na berondi umboka.

¹⁵ Fumu amamuruma rie: Manisila muendu agu o kumu te na gutola O Damas; ava gutolila gukabiatsa Hazael kaga jiSyrie!

¹⁶ Gukabiatsa Jehu muana dibaala uNimchi kaga jiIsrael wandi; gukabiatsa Elisee muana dibaala uChafat muisi Abel-Mehola mubiyitsi va yivinga yiagu.

¹⁷ Diulabana yiri jandi agurina uboku na Hazael, Jehu omuboka; na jandi agurina uboku na Jehu, Elisee omuboka.

¹⁸ Tumba nyusila yisambuali yitosini tsibabaala o Israel, diwendi rie: botsu abasamakutimina nesi ufifa Baal.

Elie utubula etubuli Elisee uba yivinga yiandi

¹⁹ Elie amagusuga vana na amarasuna Elisee muana dibaala uChafat agumafutsanga nungi. Bamasalisanga magumabeji na ngombi jina, jaʼ beni Elisee amawendisa abosita. Elie amabambana nandi na amamugumba yi-jungi yiandi.

²⁰ Elisee amasila bangombi bandi na amaduka Elie mbangu na amamutsingula rie: Nsingisi uleyeganina taji ami na nguji ami mbana nyuguduka. Elie amamuruma rie: Gabuga o yisalu yiagu. Nyimaguwivula yima?

²¹ Elisee anogabuga amayebonga bangombi babeji aba amavagula pagu tsiunyensa na amasalisa miri amimatungulu bangombi ulambisila nyama tsibangombi atsi amavega batu bandi uji. Mbana amaretsama na amaduka Elie ubanganga musalitsi andi.