1 Bakaga 18 - La Sainte Bible en Langue Yipunu

Disukusulu didungosu dunsala

¹ Bilumbu bipuela binovioga, diwendi rie: mu yilima ayimurieru yidungosu dunsala Fumu amatsingula Elie rie: Wenda ombu kaga Achab mbana nyunoyisa mfula.

² Elie amawenda uyekelasa ombu Achab. Dungosu dunsala dumaranga tindi uranga o Samarie.

³ Achab amaruma mutu unengila Obadia agumaba sefu jindagu kaga. Obadia amaba tindi mutu Nsambi.

⁴ Ava Jezabel kaga jimugetu amabokisila babiyitsi baFumu, Obadia amabonga kama jibabiyitsi aba amasuega magumaramaranu o malima, amabaveganga mapa na mamba.

⁵ Achab amanengila Obadia rie: Tʼwendi yiari na yiari o bileka biotsu ne mijamba miotsu; tanguji tulaba bisinga biwelimina ulisila bakabala na baburu yiri biruitsi bigomuefu.

⁶ Bamagabana bulongu mutu mutu amalinganga o yiari yiandi; Achab amawenda pinsa o nsila jimosi na Obadia amawenda pinsa o nsila jisusu.

⁷ Ava Obadia amabila muna nsila amabenguna na Elie. Obadia amamujaba, amagudama va tsi nowivula rie: Je Fumu ami, ndeʼ la Elie?

⁸ Amamuwaka rie: Nyiina, wenda yetsingula fumu agu Achab rie: Elie uruga eruyi!

⁹ Obadia amawivula rie: Dibi yi nyimavaga yiri gukwakisa ombu Achab agumbokisa?

¹⁰ Fumu jaʼ beni ejabi vagaa dilongu nesi bufumu abu fumu ami asamasindiga batu uyenaguromba; pa bamamutsingula rie: Elie agatsi, amalevisanga nesi bakaga nesi batu pesi rie: Ngensa gusamamulaba?

¹¹ Mbana gutuma rie: Wenda yetsingula fumu agu rie: Elie uruga eruyi?

¹² Mbana nyinogusuga Yinyunyi yiFumu ogubega yiari yisusu ayi ngojaba; nyinoyetsingula Achab, jandi ogubika mbana nyuboku diuleba nyiji tindi mutu Nsambi ubanda va bungebi buami.

¹³ Basamagutsingula adi nyimavaga ava Jezabel amabokisila babiyitsi baFumu?

¹⁴ Namunyi guitumi rie: Wenda yetsingula fumu agu rie: Elie uruga eruyi! Jandi omboka.

¹⁵ Tumba Elie amavosa rie: Fumu mabadi agu nyivu musalitsi andi jaʼ beni ejabi! Namunyi nyulabana na Achab.

Elie va gusu Achab

¹⁶ Obadia amayebengusana Achab na amamutsingula diotsu. Kabogu Achab amayebengusana Elie.

¹⁷ Yika Achab elabilili Elie amamuwivula rie: Je ndeʼ aguirombisi baIsrael maguga?

¹⁸ Elie amawaka rie: Tsiri menu oyirombisi baIsrael maguga; tumba jenu na mukuta agu dumabusa maruma maFumu na dumaduka Baal.

¹⁹ Tsie gukiyi baIsrael botsu ombu gami o mukongu uCarmel na kama jina na magumaranu mababiyitsi baBaal wandi na kama jina tsibabiyitsi baAstarte abejangingi va mosi na kaga jimugetu.

Elie na babiyitsi baBaal o mukongu uCarmel

²⁰ Achab amatinda bilumbi ombu bifumba biIsrael biotsu na amagukiga babiyitsi beni o mukongu uCarmel.

²¹ Mbana Elie amarelama va gusu batu botsu na amawivula rie: Te na temu yi dubanganga na mirima mibeji? Pa Fumu avu Nsambi mudukianu! Pa Baal mudukianu! Batu basamamuwaka diambu.

²² Elie amatsingula batu rie: Nyimasiala pinsa mu babiyitsi baFumu na vavu kama jina na magumaranu mababiyitsi baBaal.

²³ Batuveyi balumi babeji babangombi; babiyitsi baBaal bakasola mulumi ogu umosi, bakagusasa na bakagusunsa va julu mikansu tsiri ubangisa muji; menu nyubonga mulumi ngombi ususu na nyugusunsa va julu mikansu tsiri umibangisa muji.

²⁴ Mbana sambilanu nsambi enu Baal. Menu nyusambila Fumu. Nsambi aguvu tindi ngensa owagula na muji. Batu botsu bamawaka rie: Diwelimina!

²⁵ Elie amaruma babiyitsi baBaal rie: Solanu jenu beni mulumi ngombi umosi, reyilanu ugukunsa mu mbari duvu bapuela, lesambilanu nsambi enu; tumba duyabangisa muji.

²⁶ Bamabonga mulumi ngombi agu bamabavega na bamagukunsa pagu; bamasambila Baal ubandila kedi te na muangulu, bamavosanga rie: Baal, tuwaguli! Tumba vasamaba nesi diufi nesi kabusulu. Bamadumuganga va gusu yinyensulu yipagu ayi bamarunga.

²⁷ Ava muangulu Elie amabadesa rie: Gamuganga tindi ugamuga mu mbari avu nsambi; diambu disusu etasi vo yisalu yisusu esali vo aji o ulinga vo tanguji aji yilu, vengu dumurambusa.

²⁸ Bamagamuga tindi ugamuga na bamavaga motsu nana bifu biogu bimabila, bamanemasana na majenga na makongu te na malungu mamawitama.

²⁹ Muangulu unovioga bamamuesambilanga te na diweru dipagu. Tumba vasamaba nesi diufi nesi kabusulu; mutu asamabawagula.

³⁰ Mbana Elie amatsingula batu botsu rie: Bambananu! Batu botsu bamabambana. Elie amarungulila yinyensulu yipagu ayimapansiga.

³¹ Amabonga yigumi na mamanyi mabeji, diwendi rie: dedi na dutalu dubifumba bibategula baJacob agu Fumu amatsingula rie: Diina diagu diuba Israel.

³² Amarungisila yinyensulu yipagu yiFumu na mamanyi meni. Amatsiengisa yinyensulu yipagu musilulu udonga uwelimina uwitila magumarieru mambuta tsimamba.

³³ Amadukasana mikansu, amasasa mulumi ngombi na amagusunsa va julu mikansu.

³⁴ Mbana amaruma rie: Basanu tsuva jina tsimamba na mawitilianu va julu pagu jiunyensa na mikansu. Bamadivaga. Elie amaruma rie: Buesanu! Bamabuesa. Amamueruma rie: Muebuesanu! Bamamuebuesa.

³⁵ Mamba mamawitamanga utsiengila yinyensulu yipagu te na musilulu umabasa mamba.

³⁶ Diweru adi amavagula pagu mubiyitsi Elie amabambana na yinyensulu yipagu na amavosa rie: Fumu Nsambi Abraham na Isaac na Jacob! Batu bajabi namunyi yiri ndeʼ guvu Nsambi o Israel na bajabi yiri nyivu musalitsi agu na nyimasala bisalu biebibi biotsu na musuga agu!

³⁷ Kwaguli Fumu, kwaguli yiri batu bebaba bojaba yiri la ndeʼ Fumu aguvu Nsambi na ndeʼ guirondi ubagabusa ombu gagu!

³⁸ Muji Fumu umabonduga na umasielasana pagu jiunyensa na mikansu na mamanyi na butamba na umakamusa mamba amamaba mu musilulu.

³⁹ Ava batu botsu bamalabila dionyi, bamagudama va tsi na bamagamuga rie: Fumu avu Nsambi! Fumu avu Nsambi!

⁴⁰ Elie amaruma rie: Gaanganu babiyitsi baBaal; ne umosi ayarina! Bamabagaanga. Elie amababega o mujamba Quichon agu amayebatabusila miuru.

Mfula jimamuenoga

⁴¹ Elie amaruma Achab rie: Wenda yeji nonu; mu mbari nyigulu bidumi bimfula.

⁴² Achab amawenda uyeji nonu. Tumba Elie amawenda o julu mukongu uCarmel na amagudama va tsi.

⁴³ Mbana amaruma musalitsi andi rie: Mata, gengila o yiari yimubu. Musalitsi amamata, anogengila amavosa rie: Gugaa yima! Elie amamuruma yisambuali yikumbu rie: Muemata.

⁴⁴ Kumbu ajimusambuali amavosa rie: Nyilabi mua dimungi adimati o mubu adivu nana murima-dikaka. Elie amamuruma rie: Wenda yetsingula Achab rie: Kunsa dikalu na vindama yiri mfula jigogusikiga.

⁴⁵ Mua pesu temu julu jimapindusu na mamungi na punga jimagumba na mfula jineni jimanoga. Achab amanangama mu dikalu diandi na amawenda o Jizreel.

⁴⁶ Fumu amaba na Elie; amawarisa tsanda na mangolu maFumu amawenda mbangu va gusu Achab te na amatola o dikotulu diJizreel.