1 Bakaga 17 - La Sainte Bible en Langue Yipunu

Mubiyitsi Elie ubiga ebiyi dungosu dunsala

¹ Elie muisi Tichebe agumaba muisi Galaad amatsingula Achab rie: Fumu Nsambi Israel agu nyivu musalitsi andi, jaʼ beni ejabi! Nyigutsinguli rie: Bilima biebibi ne disala ne mfula bigomuenoga pa ngobiruma.

Elie utsana etsani va mugula mujamba Kerit

² Fumu amatsingula Elie mambu memama rie:

³ Relama, wenda o yiari ayi wisi epalili gukayesuema va mugula mujamba Kerit agusungasana na Jourdain.

⁴ Gunuanganga mamba mamujamba na nyuruma bakavanga ugubungulanga.

⁵ Elie amayenawenda na amavaga nana Fumu amavosila, amayevaga mulaku va mugula mujamba Kerit agusungasana na Jourdain.

⁶ Bakavanga bamamubeyilanga mapa na banyama kedi na tsisiga na amanuanganga mamba mamujamba.

Elie utsana etsani ombu mukuili o Sarepta

⁷ Tumba mua bilumbu binovioga mua mujamba eni umakamuga mu mbari mfula jisamamuenoganga.

⁸ Mbana Fumu amatsingula Elie rie:

⁹ Relama, weʼ o Sarepta aguvu o Sidon, yetsana guna. Nyimaruma mugetu aguvu mukuili ugubungulanga.

¹⁰ Kabogu Elie amarelama na amayenawenda o Sarepta. Ava amatolila va dikotulu dimusiengi amalaba mugetu agumaba mukuili, ubola eboli mikansu. Amamunengila na amamuvonda rie: Kokolu tsiagu yembongila mua mamba monu.

¹¹ Amayemabonga. Elie amamuemuvonda rie: Kokolu tsiagu peyi mua yibuku yidipa.

¹² Mukuili amawaka rie: Fumu Nsambi agu, jaʼ beni ejabi! Ngaa na yima yilambu, nyina yika mua pesu fufu mu saku na mua pesu matsi mu tsuva. Laba nyiboli bibuku bibeji bimikansu mbana nyukota uyelamba; jetu na muana ami udibaala tuji va julu vana yika ufu tufu.

¹³ Elie amamutsingula rie: Guyalaba keri, kota yelamba nana gubanovosila. Dimosi buandi, lepayila dipa digeyi, gukayidipega; mbana gukavaga dindeʼ beni na dimuana agu udibaala.

¹⁴ Fumu Nsambi Israel jandi rie: Fufu ajivu mu saku jigosuka na matsi amavu mu tsuva magosiegama, via te na Fumu onoyisa mfula.

¹⁵ Mukuili amawenda na amavaga nana Elie amavosila. Basamagambu na biguji yitsingu yineni, jogu na Elie wandi.

¹⁶ Fufu ajimaba mu saku jisamasuka na matsi amamaba mu tsuva masamasiegama via, nana Elie amavosila Fumu.

Elie urambusa erambusi muana umukuili o dufu

¹⁷ Mambu meni manovioga muana udibaala umukuili amabela. Buali buandi bumaranga tindi uranga te na amafu.

¹⁸ Nguji muana amawivula Elie rie: Mubiyitsi Nsambi, diambu yi divu va gari jetu nagu? Gumaruga ombu gami uyitangimisa mabi mami noyibokisa muana ami?

¹⁹ Elie amamuwaka rie: Peyi muana agu. Amamubonga va tulu mugetu, amamumatisa o yibuku ayi julu ayi amatsaninanga na amamusiliga va tangi andi.

²⁰ Mbana amasambila Fumu rie: Fumu Nsambi ami tsie gulasa mukuili egugu maguga nobokisa muana andi, jandi agumandila o ndagu andi?

²¹ Amagudimina muana kumbu yirieru ava amasambililanga Fumu rie: Fumu Nsambi ami kokolu tsiagu, rambusa muana egugu!

²² Fumu amagulu dusambu duElie na muana amarambuga o dufu.

²³ Elie amabonga muana amamusundusa o ndagu na amamugabusa ombu nguji andi. Elie amavosa rie: Laba, muana agu aji monyu.

²⁴ Mugetu eni amatsingula Elie rie: Mbana nyimatsiyisa yiri ndeʼ guvu mubiyitsi uNsambi na motsu ama guivosi mavu mambu maFumu.