1 Bakaga 16 - La Sainte Bible en Langue Yipunu

¹ Mbembu Fumu jimatsingulu mubiyitsi Yehou muana dibaala uHanani mu diambu diBacha rie:

² Nyimagubonga mu difufundu na nyimaguvaga sefu jibatu bami baIsrael; tumba gumaduka bifu biJeroboam na gumarombisa batu bami baIsrael uvaga masumu nonyoyisa na masumu mogu.

³ La dibandu nyugutsiemusila na mukuta agu uotsu, nyuguvayila dedi mosi nana nyimavayila Jeroboam muana dibaala uNebat.

⁴ Muisi ndagu agu agufuila o musiengi oligu na bamondi na mutu agu agufuila o musiru ododu na batsoli.

⁵ Misamu miotsu misusu biBacha na motsu ama amavaga mamasonugu mu Dibuku diBisalu bibaKaga baIsrael.

⁶ Bacha amafu na amatsigu o Tirsa. Ela muana andi udibaala amaruma va yivinga yiandi.

⁷ Mubiyitsi Yehou muana dibaala uHanai amavosila Fumu utsingula Bacha na mukuta andi mambu motsu ama bamavaganga unyoyisa Fumu: bamamunyoyisa na bisalu biogu; bamabagunu na mukuta uJeroboam va julu vana bamaboka mukuta uotsu uJeroboam.

Ela, kaga jiIsrael

⁸ Magumabeji na bilima bisiamunu bidurumu duAsa kaga jiJuda, Ela muana dibaala uBacha amarumanga Israel o Tirsa. Amaruma bilima bibeji.

⁹ Zimri yivunda yiandi yibagora agumaruma dikabu dimosi dimakalu amamutungila fundu. Ela amaba o Tirsa, amanuanganga nolanganga o ndagu Arsa agumaba sefu jindagu kaga o Tirsa.

¹⁰ Zimri amakota, amamudimba na amamuboka mu yilima yimagumabeji na yisambuali bidurumu duAsa kaga jiJuda na amarumanga va yivinga yiandi.

¹¹ Anoba kaga na anotsana va yitsiga yiandi yibufumu amabokisa mukuta uotsu uBacha, asamarinisa ne mutu andi umosi nesi taji andi na nguji nesi mbatsi.

¹² Zimri amabokisa mukuta uotsu uBacha nana mubiyitsi Yehou amavosila Fumu mu diambu diBacha,

¹³ motsu mana mamalabana mu mbari Bacha na muana andi Ela bamavaga masumu ama bamarombisa baIsrael uvaga wandi va julu vana bamanyoyisa Fumu Nsambi Israel na bakosi bogu.

¹⁴ Misamu misusu miEla na motsu ama amavaga mimasonugu mu Dibuku diBisalu bibaKaga baJuda.

Zimri, kaga JiIsrael

¹⁵ Yilima yimagumabeji na yisambuali bidurumu duAsa o Juda, Zimri amaruma yisasmbuali yibilima o Tirsa. Bagora bamavaga milaku miogu o Guibeton musiengi ubaPhilistin.

¹⁶ Bagora abamatsana guna bamagulu musamu rie: Zimri amatunga fundu na amabokisa kaga! Muna yilumbu yieni baIsrael botsu bamasola Omri kaga jibaIsrael agumaleba yivunda yibagora.

¹⁷ Omri na baIsrael botsu bamarambuyila va Guibeton na bamayetumuna bisi Tirsa.

¹⁸ Zimri anolaba yiri musiengi umabongu amakota o ndagu kaga na amakenyensa na ndagu.

¹⁹ Anana amafuila mu diambu dimabi ama amavaga ava amavayila amasamalasa Fumu ubueji, amaduka bifu biJeroboam na amakevega uvaga masumu ama Jeroboam amarombisa baIsrael uvaga.

²⁰ Misamu misusu miZimri na fundu aji amatunga mimasonugu mu Dibuku diBisalu bibaKaga baIsrael.

²¹ Kabogu baIsrael bamakegaba makabu mabeji; dikabu dimosi dimaronda uvaga Tibni muana dibaala uGuinat kaga na dikabu disusu dimaronda uvaga Omri kaga.

²² Abamadukanga Omri bamaviolila abamadukanga Tibni muana dibaala uGuinat.

Omri, kaga jiIsrael

²³ Magumarieru na yilima yimosi bidurumu duAsa o Juda, Omri amarumanga baIsrael. Amarumanga yigumi na bilima bibeji. Amaruma bilima bisiamunu o Tirsa,

²⁴ amasumba mukongu uSamarie ombu Semer; amafuta tosini yisiamunu tsimbongu; amarungisa musiengi va julu mukongu agu amaluga Samarie dedi na diina diSemer, agumaleba fumu mukongu.

²⁵ Omri amavaga amasamalasa Fumu ubueji, amavaga mabi uviolila bakaga botsu abamamureyila.

²⁶ Amaduka bifu biotsu biJeroboam muana dibaala uNebat naamavaganga masumu ama Jeroboam amarombisa baIsrael uvaga wandi na va julu vana bamanyoyisa Fumu Nsambi Israel na bakosi bogu.

²⁷ Misamu misusu miOmri na motsu ama amavaga mimasonugu mu Dibuku diBisalu bibaKaga baIsrael.

²⁸ Omri amafu na amatsigu o Samarie, muana andi udibaala Achab amarumanga va yivinga yiandi.

Achab, kaga jiIsrael

²⁹ Achab muana dibaala uOmri amarumanga o Israel yilima yimagumarieru na yinana bidurumu duAsa kaga jiJuda. Achab muana dibaala uOmri amarumanga baIsrael magumabeji na bilima bibeji o Samarie.

³⁰ Achab muana dibaala uOmri amavaga amasamalasa Fumu ubueji uviolila bakaga botsu abamamureyila.

³¹ Asamagukuyila bumasumu maJeroboam muana dibaala uNebat tumba amawela Jezabel muana mugetu uEtbaal kaga jibaSidon wandi va julu vana amakota muyitsa uBaal.

³² Amarungila Baal ndagu nesi yinyensulu yipagu o Samarie,

³³ na amavaga kosi jiAstarte. Achab amavaga mabi uviolila bakaga botsu baIsrael abamamureyila, amanyoyisa Fumu Nsambi Israel.

³⁴ Va temu andi Hiel muisi Bethel amarungulila Jericho; amabokisa Abiram tsomi andi ava amarungisila yibuga; amabokisa Segoub marina mandi ava amavayila maguyi nana Josue muana dibaala uNoun amavosila Fumu.