1 Bakaga 14 - La Sainte Bible en Langue Yipunu

Durumu duJeroboam

¹ Vana temu eni Abia muana dibaala uJeroboam amabela.

² Jeroboam amaruma mugatsi andi rie: Lerelamati duara nduaritsi jisusu yiri batu bagojaba guvu mugatsi ami; wenda o Silo. Avana Ahia mubiyitsi avu; jandi agumansingula yiri nyuba kaga jibaIsrael.

³ Bonga yigumi yimapa maneni na mapa mageyi na yirura yibuji; gukawenda ombu gandi; jandi ogutsingula adiulabana na muana.

⁴ Anana mugatsi Jeroboam amavayila; amarelama na amawenda o Silo na amakota o ndagu Ahia. Ahia asamamuelabanga mu mbari misu mandi mamatsima na budunga bubununu.

⁵ Fumu amatsingula Ahia rie: Mugatsi Jeroboam oyigulaba mu diambu dimuana andi udibaala aguibeli. Gukamuwagula kana na kana. Ava otolila ovaga nderi avu mutu ususu.

⁶ Ahia amagulu mikindu miandi ava amatolila va munu ndagu; amagamuga rie: Mugatsi Jeroboam kota; dibandu yi guivayi nderi guvu mutu ususu? Nyimarumu ugutsingula mambu maranga.

⁷ Gabuga yetsingula Jeroboam rie: Fumu Nsambi Israel jandi rie: Nyimagusola va gari batu bagu; nyimaguvaga sefu jibatu bami baIsrael;

⁸ nyimapatula David bufumu na nyimaguvega buonyi. Ne nana gugaavaga dedi na musalitsi ami David agumakelisanga maruma mami na agumandukanga na murima andi uotsu na amavaganga yika amamandasanga ubueji.

⁹ Guivayi dibi uviolila botsu abamagureyila, gumakevayila bansambi bangana na bibagunu bibudilu unyoyisa na gumandiyila nsima.

¹⁰ La dibandu nyulasila mukuta agu maguga; nyubokisa mutu uotsu aguvu uJeroboam o Israel nesi muviga nesi fumu; nyutsiemusa tindi utsiemusa mukuta agu uotsu.

¹¹ Muisi mukuta agu uotsu agufuila o musiengi oligu na bamondi agufuila o musiru ododu na batsoli. Adina Fumu amavosa.

¹² Relama, gabuga o ndagu agu. Yika guitoli o musiengi muana ofu.

¹³ BaIsrael botsu bomulila na bomutsiga; bujandi va gari baana baJeroboam agumalasa Fumu Nsambi Israel ubueji.

¹⁴ Namapapa Fumu osolila baIsrael kaga ajiubokisa mukuta uJeroboam. (Tsiri adi tuilabi nesi namunyi?)

¹⁵ Fumu otsoyisa baIsrael, boba nderi yilelenga ayitsayimi mu mamba; obapatula bulongu buboti abu amavega bataji bogu na obapansa o disimu dimosi dimujamba. Motsu mana molabana mu mbari bamavaga bakosi abamanyoyisa Fumu.

¹⁶ Oliyila baIsrael nsima mu diambu dimasumu ama Jeroboam amarombisa baIsrael uvaga.

¹⁷ Mugatsi Jeroboam amayenawenda. Amatola o Tirsa; ava amabila va yilemondi muana amafu.

¹⁸ Bamamutsiga, baIsrael botsu bamamulila nana Fumu amatsingulila musalitsi andi mubiyitsi Ahia.

¹⁹ Misamu misusu miJeroboam nana amatoyila divita na nana amaruminanga mimasonugu mu Dibuku diBisalu bibaKaga baIsrael.

²⁰ Jeroboam amarumanga magumabeji na bilima bibeji mbana amafu. Nadab muana andi udibaala amaruma va yivinga yiandi.

Durumu duRoboam kaga jiJuda

²¹ Roboam muana agu Naama muisi Ammon amaburila Salomon amarumanga o Juda. Amaba na magumana na yilima yimosi ava amabandila uruma o Jerusalem na amarumanga yigumi na yisambuali yibilima, Fumu amasola musiengi eni utsananga va gari batu bandi baIsrael.

²² Adi baJuda bamavaga disamalasa Fumu ubueji; masumu ama bamavaga bamarangisa diwavi diandi ne bataji bogu basamavaga dibi dimunongu eni.

²³ Jogu wogu bamarungisa mbura tsiduyitsu na bakosi baminongu na minongu mu julu tsimikongu miotsu no tsi tsimiri miotsu.

²⁴ Vamabanganga bimbembu mu dilongu diotsu. Bamagukulila nsoruru tsiotsu tsibisi malongu ama Fumu amabingisila baIsrael.

²⁵ Mu yilima yimuranu bidurumu duRoboam, Chichac kaga jiEgypte amayetumuna bisi Jerusalem.

²⁶ Amabonga busina buNdagu Nsambi na busina bundagu kaga. Amabonga ngubu tsiotsu tsilora atsi Salomon amavaga.

²⁷ Kaga Roboam amavinsa ngubu tsikunga na amatsivega ombu bivunda bibagora abamakelisanga ndagu kaga.

²⁸ Temu tsiotsu atsi kaga amawendanga o Ndagu Nsambi bagora bamabeganga ngubu tsiogu; mbana bamatsigabusanga o ndagu bagora.

²⁹ Misamu misusu miRoboam na motsu ama amavaganga mimasonugu mu Dibuku diBisalu bibaKaga baJuda.

³⁰ Divita dimabanganga va gari Roboam na Jeroboam.

³¹ Roboam amafu na amatsigu o musiengi uDavid. Diina dinguji andi Naama muisi Ammon. Abiam muana andi udibaala amaruma va yivinga yiandi.