1 Bakaga 12 - La Sainte Bible en Langue Yipunu

Dibuli diSichem

¹ Roboam amawenda o Sichem mu mbari baIsrael botsu bamawenda o Sichem uyemubiatsa kaga.

² Jeroboam muana dibaala uNebat amagulu misamu mbe aki o Egypte agu amarinina kaga Salomon, kabogu amatabula diambu utsananga o Egypte.

³ Bamamutindila mutu uyemunengila. Mbana Jeroboam na dibuli diotsu diIsrael bamawenda ombu Roboam na bamamutsingula mambu memama rie:

⁴ Taji agu amatsirisa yilala yietu; ndeʼ tupalisi o buviga nolengasana yilala yitsira ayi taji agu amatunangusa. Jetu tuji bakunsama ugusalilanga.

⁵ Amabatsingula rie: Wendanganu, bilumbu birieru binovioga dukamueruga. Batu bamayenawenda.

⁶ Kaga Roboam amayewivula bivunda abimatsananga na taji andi yitsingii yiandi yiotsu rie: Kabusulu yi nyugabusila batu bebaba?

⁷ Bivunda bamamuwaka rie: Pa gukevaga musalitsi ubatu bebaba na pa gubasingisa dionyi na pa gubawaka na buranga jogu boba basalitsi bagu te na mutubu.

⁸ Tumba Roboam amabusa dilongi dibivunda, amayewivula bafudu abamabanguga dibanguyila nandi.

⁹ Amabawivula rie: Kabusulu yi nyugabusila abatsikwivula ulengasanayilala ayi taji ami amabanangusa?

¹⁰ Bafudu abamabanguga dibanguyila andi bamawagula rie: Gukagabusila batu abatsigutsingula rie: Taji agu amatsirisa yilala yietu, ndeʼ tulengisini yionyiʼ. Gukabatsingula rie: Nyina bukanyi uviolila taji ami.

¹¹ Taji ami amadunangusa yilala yitsira menu nyuyiviosulila utsirisa; taji ami amadukilisa na mukasa menu nyudukilisa na bakuru.

¹² Jeroboam na batu botsu bamawenda ombu Roboam mu yilumbu yimurieru nana amabatsingulila.

¹³ Kaga amawagula batu na bukanyi. Amabusa malongi mabivunda,

¹⁴ amavosa nogu na bukanyi nana bafudu nandi bamamulonsila rie: Taji ami amatsirisa yilala yienu menu nyuviosulila uyitsirisa; taji ami amadukilisa na mikasa, menu nyudukilisa na bakuru.

¹⁵ Anana kaga amabusila adi batu bamamuwivula; dionyi dimakunsu na Fumu udugusu adi Fumu amavosa na Ahia muisi Silo mu diambu diJeroboam muana dibaala uNebat.

Bufumu bumagabu

¹⁶ BaIsrael banolaba yiri kaga amabusa diogu bamamuwaka rie: Tuna diambu na David? Tuna disiala va mosi na muana dibaala uJesse? BaIsrael gabuganu o mandagu menu! Ndeʼ mutegula uDavid kekelisa! Anana baIsrael bamagabuyila mutu mutu o ndagu andi.

¹⁷ Roboam amarumanga bubaIsrael abamatsaninanga o misiengi miJuda.

¹⁸ Mbana kaga Roboam amasindiga Adoram agumakotisanga batu o buviga ombu baIsrael; tumba jogu botsu bamamutindila mamanyi te na amafu. Kaga Roboam amalensa unangama mu dikalu urina o Jerusalem.

¹⁹ Anana baIsrael basusu bamakakinina na baDavid mutubu.

²⁰ BaIsrael basusu banogulu yiri Jeroboam amagabuga bamamunengila o yibenguna yiogu na bamamubiatsa kaga jiIsrael. Buyifumba yiJuda abamasinga urumu na baDavid.

²¹ Roboam amatola o Jerusalem, amabengusana yifumba yiJuda na yifumba yiBenjamin: kama na magumidunana matosini tsibagora uyetoyisa baIsrael basusu ubagabusa o tsi durumu duRoboam muana dibaala uSalomon.

²² Tumba mbembu Nsambi jimatsingulu Chemaya mubiyitsi uNsambi rie:

²³ Tsingula Roboam muana dibaala uSalomon aguvu kaga jibaJuda botsu na baBenjamin rie:

²⁴ Fumu jandi rie: Duyawenda na duyatoga divita na baana bataji benu baIsrael! Mutu mutu agabuyi o ndagu andi mu mbari diambu diedidi dimaruyila ombu gami! Jogu bamadedila mbembu Fumu, kabogu bamayenagabuga nana Fumu amavosila.

²⁵ Jeroboam amakanda Sichem agumaba o julu mukongu uEphraim, avana amatsaninanga, anorambuga vana Sichem amayekanda Penouel.

Disumu diJeroboam

²⁶ Mbana Jeroboam amatasa rie: Temu jimatola yiri bufumu bugabuga o ndagu David.

²⁷ Pa batu bowenda o Jerusalem uyevagulila Fumu pagu tsiunyensa o Ndagu Nsambi bogabusa mirima miogu ombu Fumu nombu Roboam; bomboka na bogabuga ombu Roboam kaga jiJuda.

²⁸ Kabogu kaga anoditasa amarumisa batu uvaga baana bangombi babeji balora; mbana amatsingula batu rie: Yitsingu yineni dumawendanga o Jerusalem! BaIsrael labanu Nsambi enu, agumadupalisa o Egypte.

²⁹ Amasunsa muana ngombi o Bethel; amasunsa ususu o Dan.

³⁰ Adina dimaba dibandu dimasumu mabatu baIsrael. Yinombu yineni bamayevetsiga muana ngombi agumubeji te no Dan.

³¹ Jeroboam amarungisa mbura tsinsambi na amasingisa batu abasamaba bisi Levi uba bavagulitsi bapagu.

³² Mu yilumbu yimugumi na biranu bitsungi jimunana amavaga feta, dedi mosi na feta ajimaligungu o Juda na jaʼ beni amavagula pagu tsiunyensa va yinyensulu yipagu. Adina amavaga o Bethel yiri batu bovagulila baana babangombi aba amavaga pagu tsiunyensa. Amatsanisa bavagulitsi bapagu o Bethel va mbura tsinsambi atsiamarunga.

Yisunsulu yipagu yiBethel

³³ Mbana amawenda o yinyensulu yipagu ayi amarunga o Bethel mu yilumbu yimugumi na biranu bitsungi jimunana, tsungi aji jaʼ beni amanyensa bima bimbunga jiboti va yinyensulu yipagu ayiamarunga.