1 Bakaga 10 - La Sainte Bible en Langue Yipunu

Kaga jimugetu jiSaba uweʼ ewendi ombu Salomon

¹ Kaga jimugetu jiSaba amagulu diduma diSalomon. Kabogu amawenda ombu Salomon uyemu weliga na bivu biranga.

² Amatola o Jerusalem na yinombu yineni yibasalitsi na basamo abamabeganga bima bimbunga jiboti na lora tsipuela tsipuela na mamamanyi madufunu duneni. Amawenda ombu Salomon na amamuwivula bivu abimaba nandi.

³ Salomon amawagula bivu biandi biotsu, vasamaba ne yimosi ayi asamarungula umuwagula.

⁴ Kaga jimugetu jiSaba amalaba diela diotsu diSalomon na ndagu aji amarunga,

⁵ na biguji bitavula andi na mandagu mabasalitsi bandi na bisalu na biduaru bijogu abamamusalilanga na baboyi bandi na pagu tsiandi tsiunyensa atsi amavagulilanga Fumu o Ndagu Nsambi.

⁶ Amakambulu tindi ukambulu na amatsingula kaga rie: Kabogu adi nyimagulu o bulongu buami divu dingensa mu diambu dibuneni buagu na diela diagu!

⁷ Ngaalevaganga yitu ne ngaruga nolaba na misu mami. Kabogu adi nyimagulu yika pesu. Ka muna diela di! Ka muna digumba di!

⁸ Ka muna ubueji gu uvu na batu bagu! Ka muna ubueji gu uvu na basalitsi bagu abavu va gusu agu temu tsiotsu ugulungu diela diagu!

⁹ Diboti ombu Fumu Nsambi agu oyilabingi ubueji nagu na agumaguviosa va yitsiga yibufumu yiIsrael! Fumu erondingi baIsrael kabogu amagubiatsa kaga ogu yiri gubalasanga dusungugu.

¹⁰ Va julu vana kaga jimugetu jiSaba amavega kaga Salomon tona yirieru na yibuku tsilora na dutalu duneni dubima bimbunga jiboti na mamanyi madufunu duneni. Na kala vasakalabana dutalu dubima bimbunga jiboti dumunongu eni adu kaga jimugetu jiSaba amabega.

¹¹ Makumbi mamamba makaga Hiram mamabega kxa jiOfir, mamabega na tsimbi tsipuda tsiOfir tsisanatala na mamanyi madufunu duneni.

¹² Kaga Sakanon amavayisa bisiku biyikadi yiNdagu Nsambi na bindagu andi na basambi na bangomfi na tsionyi. Tsimbi tsimunongu eni tsisanatala tsisakamuelabana te na namunyi.

¹³ Kaga Salomon wandi amavega kaga jimugetu jiSaba biotsu abi amaronda; va julu vana amamubega abi jaʼ beni amaronda umuvega. Mbana amayenagabuga o bulongu buandi, jogu na basalitsi bandi.

Busina buSalomon

¹⁴ Salomon amadila magumabeji matona tsilora mu yilima yimosi.

¹⁵ Va julu vana amadila atsi batiyitsi bamuteti na bakaga bangana na bivunda bibulongu bamamufutila.

¹⁶ Kaga Salomon amavaga kama beji tsingubu tsilora atsimabaku: ngubu ngubu kilu yisiamunu.

¹⁷ Kama virieru tsisusu tsingubu tsilora atsimabaku: ngubu ngubu kilu mosi na yibuku: kaga amatsisunsa o ndagu jimusini o Liban.

¹⁸ Kaga amavaga yitsiga vibufumu yipungi na amayikubiga tindi lora.

¹⁹ Yitsiga yiandi yibufumu yimaba na vikadi yitaka yisiamunu na yisingumunu yimaba dugongula; yiari na yiari bivitsiga bimaba na miogu: bibagunu bibeji bibimbungu bimaba yiari na yiari,

²⁰ na yigumi na bibagunu bibeji bibimbungu bimaba yiari na yiari biyikadi yieni. Vasakavagu yitsiga yimunongu eni mu bufumu buotsu bususu.

²¹ Mamoyi motsu makaga Salomon mamaba malora na lora na bipela biotsu bindagu jimusiru jiLiban bimaba bitindi lora. Ne yimosi yisamaba yilora jivema mu mbari jisamaba na tsongu va temu Salomon.

²² Kaga amaba na makumbi mamamba maTarse amamabeganga lora na lora jivema na bapungi na bakari nabambulu.

²³ Kaga Salomon amaba muneni uviolila bakaga botsu nesi busina nesi diela.

²⁴ Batu botsu bamarondanga ulabana na Salomon uyegulungu diela adi Nsambi amamuvega.

²⁵ Yilima na yilima batu bamamubeyilanga milendu amimaba bima bilora jivema nesi bilora na biduaru na bitogulu na bima bimbunga jiboti na bakabala na babuni.

²⁶ Salomon amagukiga makalu na bakabala: amaba na tosini na kama jina tsimakalu nayigumi natosini beji tsibakabala aba bamosi bamakelusu o Jerusalem na basusu o misiengi ami amakelisilanga makalu mandi.

²⁷ Kaga amafunisa lora jivema o Jerusalem nderi ubuayila mondi, dedi mosi na miri misedera.

²⁸ Salomon amadililanga bakabala bandi o Egypte; yinombu yibadyitsi bamuteti bakaga bamayebasumbilanga kaga.

²⁹ Dikalu diinosi dimapalusu o Egypte na dufimu dukama yisiamunu tsimbongu, kabala mosi kama na magumaranu mambongu. Badyitsi beni bamuteti bamabega biwelimina usumbisa ombu bakaga baHitt na baSyrie.