1 Bakaga 1 - La Sainte Bible en Langue Yipunu

Adonia uronda erondi uba kaga

¹ Kaga David amanuna tindi ununa; bamamugumbanga matsanda ne nana asamagulungu yiusila.

² Basalitsi bandi bamamutsingularie: Tugurombila tsiemi, akatsananga nagu ogubuyisanga nobundamanga nagu; mbana gugomuegulu yiotsi.

³ Kabogu bamaromba muana mugetu uboti mu bulongu buotsu buIsrael na bamadila Abichag muisi Chounem agu bambega ombu kaga.

⁴ Muana mugetu eni amaba tindi muboti. Amakelisanga kaga na amamusalilanga; tumba kaga asamafubana yitsiga nandi.

⁵ Va temu eni Adonia muana dibaala agu Haguie amaburila David amakematisa na dunangu te na amavosa rie: Menu nyuba kaga! Na amakerombila dikalu na babeyitsi badikalu na magumaranu mababaala abamarelanga va gusu andi.

⁶ Mu nsanunu andi jiotsu taji andi asamamusiembanga rie: Dibandu yi guivayili nana? Va julu vana Adonia amaba tindi muboti, amaba yiduki yiAbsalom.

⁷ Amamoga na Joab yivunda yibagora agumaba muana dibaala uSerouia na Abiatar, muvagulitsi upagu; jogu bamawarisa kingu jiAdonia.

⁸ Tumba muvagulitsi upagu Sadoc na Benaya muana dibaala uYoyada na Natan mubiyitsi na Chimei na Rei na bagora abamakelisa David basamaba kingu mosi na Adonia.

Natan na Batcheba bewarisi bukaga buSalomon

⁹ Yilumbu yimosi Adonia amavaga feta jineni na amabokisa bindombu na bangombi na mivogulu mivonga va Dimanyi Dipuelili adivu va mugula uEn-Roguel; amanengila baana bataji bandi botsu na baana bakaga David na baneni baJuda botsu abamaba basalitsi bakaga.

¹⁰ Tumba asamanengila Natan agumaba mubiyitsi nesi Banaya nesi bagora abamakelisa kaga nesi muana taji andi Salomon.

¹¹ Mbana Natan amawivula Batcheba nguji Salomon rie: Gusamagulu yiri Adonia muana dibaala uHaguie aka kaga diuleba fumu etu David asamadijaba?

¹² Kabogu kululuati yiri jenu na muana agu Salomon dudila monyu.

¹³ Wenda ombu kaga David, gukamuwivula rie: Aa kaga, gusamandevila pesi rie: Muana agu Salomon oruma va yivinga yiami notsana va yitsiga yiami yibufumu?

¹⁴ Gulu, ava gubila vana guvosa na kaga, meʼ beni nyuwarisa kingu agu.

¹⁵ Batcheba amakota ombu kaga. David amanuna tindi ununa na Abichag muisi Chounem amamusalilanga.

¹⁶ Batcheba amagudama va gusu kaga. Kaga amamuwivula rie: Diambu yi?

¹⁷ Amamuwagula rie: Aa Fumu, gusamandevila pesi mu diina diFumu Nsambi agu ava gumaposila rie: Muana agu Salomon orumanga va yivinga yiami notsananga va yitsiga yiami yibufumu?

¹⁸ Kabogu kaga, gugejabi yiri Adonia erumi?

¹⁹ Amabokisa bangombi na mivogulu mivonga na bindombu bipuela; amanengila baana bagu botsu na Abiatar muvagulitsi upagu na Joab yivunda yibagora tumba agaanengila muana agu Salomon.

²⁰ Aa fumu ami, baIsrael botsu begugengili ubalasa aguvinga va yitsiga yiagu yibufumu.

²¹ Tumba o nsima dufu duagu jetu na muana ami Salomon tuba na tindi diambu.

²² Uvosa mbe akivosa na kaga, Natan mubiyitsi amakota.

²³ Bamatsingula kaga rie: Natan mubiyitsi la janduʼgu! Anokotaamagudama va gusu kaga.

²⁴ Natan amawivula kaga rie: Je Adonia orumanga va yivinga yiagu notsananga va yitsiga yiagu yibufumu?

²⁵ Atsivindama namunyi na atsibokisa bangombi na mivogulu mivonga na bindombu bipuela; amanengila baana bagu botsu na bivunda bibagora na Abiatar muvagulitsi upagu. Baji vana uji beji; unu benu va mosi nandi na uvosa bevosi rie: Adonia abi kaga!

²⁶ Tumba agaanengila ne menu aguvu musalitsi agu nesi Sadoc muvagulitsi upagu nesi Benaya muana dibaala uYoyada nesi muana agu Salomon.

²⁷ Je gumaruma diambu diedidi? Nyilabi uvura yiri gumavinsa mutu va yivinga yiagu tsiri utujabisa.

David utubula etubuli Salomon uba kaga va yivinga yiandi

²⁸ Kaga David amawaka rie: Ndengililianu Batcheba. Amamuekota ombu kaga.

²⁹ Kaga amaleva pesi rie: Fumu agumakwaka kalala na munyongu ami uotsu ejabi!

³⁰ Dedi mosi nana nyimagulevila pesi na diina diFumu Nsambi Israel rie: Muana agu Salomon orumanga va yivinga yiami na otsananga va yitsiga yiami yibufumu, adina nyimueleva namunyi.

³¹ Batcheba amagudama va gusu kaga na amavosa rie: Fumu ami David abi kaga te na mutubu!

³² Kaga David amaruma rie: Ndengililianu Sadoc muvagulitsi upagu na Natan mubiyitsi na Benaya muana dibaala uYoyada. Jogu bamawagula kaga.

³³ Mbana kaga amabaruma rie: Gukiga bagora abavu kingu mosi nami, matisanu muana ami Salomon va buru ami; dukayemubega o Guihon.

³⁴ Avana Sadoc muvagubtsi upagu na Natan mubiyitsi bomubiatsila kaga jiIsrael. Dukasiyisa mumbanda na dukavosa rie: Salomon abi kaga!

³⁵ Dukayenamudukanga te na oyetsana va yitsiga yiandi yibufumu, jandi orumanga va yivinga yiami. Na musuga ami jandi oba sefu jibaIsrael na jibaJuda.

³⁶ Benaya muana dibaala uYoyada amawaka kaga rie: Anana! Adina Fumu Nsambi agu erondi!

³⁷ Fumu abi na Salomon nana amabila nagu, aroyisi yitsiga yiandi yibufumu ne uviolila yitsiga yiagu.

Salomon amabiatsu kaga

³⁸ Mbana Sadoc muvagulitsi upagu amawenda na Natan mubiyitsi na Benaya muana dibaala uYoyada na baCrete na baPeletie jogu botsu bamamatisa Salomon va buru jikaga David na bamamubega o Guihon.

³⁹ Sadoc muvagulitsi upagu amabonga disiyi dimatsi o Ndagu Yibenguna na amamawitila Salomon. Bamasiyisa mumbanda mbana batu botsu bamagamuga rie: Salomon abi kaga!

⁴⁰ Batu botsu bamayenamudukanga, bamayenasiganga dimbika na bamasangila na migamu te na butamba bumaregama.

Salomon utanda etandi Adonia

⁴¹ Adonia amagulu nduku eni na botsu abamanengulu bamajigulu va temu aji bamamanina uji. Joab anogulu diufi dimumbanda amawivula rie: Dibandu yi musiengi uotsu yika nduku na nduku?

⁴² Uvosa mbe akivosa ava Jonatan muana dibaala uAbiatar muvagulitsi upagu amatolila. Adonia amavosa rie: Kota mu mbari ndeʼ wandi guvu mutu uwelimina kabogu guiruyi na misamu miboti.

⁴³ Yonatan amawaka Adonia rie: Tsiri nana. Kaga David, aguvu fumu etu, amatubula Salomon kaga va yivinga yiandi.

⁴⁴ Kaga amaruma Sadoc muvagulitsi upagu na Natan mubiyitsi na Benaya muana dibaala uYoyada na baCrete na baPeletie umumatisa va julu buru andi.

⁴⁵ Sadoc muvagulitsi upagu na Natan mubiyitsi bamamubiatsa kaga o Guihon. Avana batu botsu usangila besangili na bisi musiengi wandi. Adina divu dibandu dinduku aji dutsigulu.

⁴⁶ Va julu vana, Salomon amatsana va yitsiga yibukaga.

⁴⁷ Basalitsi bakaga batsiruga uyisangila va mosi na kaga David, bamavosa rie: Nsambi agu aroyisi diina diSalomon ne uviolila diina diagu na aroyisi yitsiga yibufumu buandi ne uviolila ayiagu! Mbana kaga amamuesilama va tangi andi

⁴⁸ na amavosa rie: Diboti ombu Fumu Nsambi Israel agumapega yivinga namunyi va yitsiga yibufumu buami na amasingisa umulaba!

⁴⁹ Botsu abamanengulu na Adonia bamakambulu; bamaretsama na mutu mutu amayenapansiganga.

⁵⁰ Adonia amalaba Salomon goma; jaʼ wandi amaretsama amawenda mbangu uyegaanga masiyi mayinyensulu yipagu.

⁵¹ Bamayetsingula Salomon rie: Guluati Adonia egulabi goma amagaanga masiyi mayinyensulu yipagu na evosi rie: Ngogusuga vava te na nyugulu yiri kaga Salomon agomboka!

⁵² Salomon amavosa rie: Pa avu na murima usunda ngomuvayila diambu tumba pa avu mumbini aboku.

⁵³ Mbana kaga Salomon amasindiga batu abamamusundusa va yinyensulu yipagu. Amayegudama va gusu kaga Salomon mbana Salomon amamuruma rie: Wenda o ndagu agu.