Ütararea̧ Ma̧ȩ 14 - Biblia Pume

Icharaita judiro̧ ma̧ȩ goaedë tjamo̧ oa yo̧rëreji̧ri̧dirȩ

¹ Ado Canaa̧räpȩ jäa̧ji̧ri̧ judiro̧ orë ma̧ȩ chjádë oa yürüa̧ oaiä icharaita judiro̧ ütëborë ana̧ri jo̧rȩtaji̧ri̧pe bagarëreji̧ri̧dirȩ, tjamo̧rämi̧ cjiaji̧ri̧rȩ. Järi tjamo̧dëji̧ri̧rȩ ejaro cjiaji̧ri̧pea̧dirȩ gȩnȩ yoa.

² Ado pio ju̧i̧iä Moiche pio ju̧i̧iäpȩmo̧ ma̧ȩ goaedë oa yo̧rëreji̧ri̧diro̧jo̧ȩ, Aro̧ pio ju̧i̧iäpȩmo̧bo. “Jabechji̧ ji̧dë u̧i̧ chjadëtäremȩde a̧ro̧rȩ Ejitoräpȩ ja̧boa̧rä judi” yo̧a̧diro̧jȩrȩ. “Ji̧dë u̧i̧ chjadëtäremȩde a̧ro̧rȩ pio yoa chiri maearäpȩ ja̧boa̧rä judi.

³ ¿Tjana̧ japapea̧ oa pio jiro chiriräpȩ ëba jätämi̧ cjiadiibe Jeova judi? Ma̧i̧ dari̧ japadiibe. Ado a̧ro̧rȩ pio ju̧ri̧pȩ acji jäji̧ri̧ oa jabechji̧ ja̧bo tänȩpadiro̧ibe chjaodëri̧. Ado ibëa̧ ivi pio ji̧ri̧, ibëa̧ bori̧ pio ji̧ri̧ baë goa baäpadiro̧jȩrȩ. Jabo cjäri̧ made, japarea̧mi̧dëde. A̧ro̧rȩ pio ju̧ri̧pȩ järea̧mi̧dëde. Pio ju̧i̧iä ado chjereno̧ baätäreji̧ri̧rea̧rȩ Ejitoräpȩ“ yo̧a̧dirȩ. “Jabechji̧ a̧ro̧rȩ pio ju̧ri̧pȩ ado chjereno̧ baärä judi, ¿ji̧dë u̧i̧ chjadëdëtäremȩde? Dëdë, ji̧dë u̧i̧ chjadëtäremȩde.“

⁴ Ado jibëa̧ dëbëti̧ra̧ chia yo̧ji̧ri̧rȩ ja̧di ta̧rëri̧ yo̧ji̧ri̧pea̧dirȩ: “Danȩrȩ, Moiche pio ju̧i̧ a̧dë jo̧rȩtaji̧ri̧rȩ ado cja̧rȩmo̧ oa ano̧ mire mitëtäreji̧ri̧rea̧ro̧jo̧ȩ. Aja̧, ibë chjadëri̧ ëba baäpea̧ oa, Ejitoräpȩ ju̧ri̧ chjadëri̧ ëba baäpea̧ oa ado cja̧rȩmo̧ oa mitëtäreji̧ri̧rea̧rȩ.“ Ja̧di ta̧rëri̧ yo̧ji̧ri̧pea̧dirȩ.

⁵ Pio ju̧i̧ ta̧rëa̧ oaiä, Moiche judi, Aro̧borë icharaita ütëbo ja̧ dëbëräpȩ juchatura̧ tjätjäpë china̧därärëreji̧ri̧dirȩ jibëa̧ daito oa daburäpȩ yuro, icharaita pio ji̧ri̧ chjiari bücjüri̧ cjia tjamo̧ji̧ri̧rȩ.

⁶ Ado Jochue judi, Care judi, peaja̧di chiri oa ütarë dariä tai̧reji̧ri̧ pio judiro̧ mu̧i̧ quira̧diro̧jo̧ȩ jibëa̧ chjibo oa, a̧dë chjäte gitori̧ jo̧rȩtaji̧ri̧rȩ.

⁷ Ado yo̧a̧diro̧jȩrȩ icharaita ji̧ri̧ ütëborë ta̧rëri̧: Jabo danȩrȩ, a̧rorȩ ütarë daea̧ chiri üdë a̧dë chjäte chjadëde.

⁸ Jurarea̧ ji̧ra̧ tjamo̧ oa yürümȩde. Ado Jeova judi ibë cjäri̧ri̧ cjia darä judi, jabechji̧ pio jiro chiri oa chjadëri̧ yürüpadiibe. Chjadëri̧ a̧dopadiibe davä pio ju̧ri̧pȩ cjo̧ro̧ji̧ri̧ pio ji̧ri̧ goae tarari̧ boadäräpea̧ oa.

⁹ Jaboti̧ri̧ japadëchji̧vä jabo. Jeova pio ju̧i̧iäpȩmo̧ ërecjiaji̧ri̧rȩ a̧dë chjäte jiadadëchji̧vä. Ado ju̧ri̧pȩ cjo̧ro̧ji̧ri̧ pio ji̧ri̧ uapadëchji̧vä. Jabechji̧ chjaodëri̧ boadärärea̧ daparea̧ro̧jȩrȩ. Jabechji̧ pio ibëdimȩde Jeova judi. Jabo judiro̧, cjäri̧ madirȩ, jibë a̧domȩ pio ju̧i̧ chiadë maeadirȩ. Jibë jidamȩ pio ju̧i̧ chiadë madirȩ. Ja̧di tara uaparea̧mi̧dëde.“ Aja̧, ja̧di ta̧rëri̧ yo̧ji̧ri̧rȩ yo̧tarëreji̧ri̧diro̧jȩrȩ icharaita pio ji̧ri̧iäpȩmo̧ Jochue judi, Care pio judiborë.

¹⁰ Jabo cjäri̧ madiro̧jȩrȩ, icharaita judiro̧ ta̧rë ja̧bodëa̧diro̧jȩrȩ. Jochue judi ja̧di ta̧rëri̧ ni̧bä chjaoa̧räbo, jabechji̧ icharaita judiro̧ ano̧ mire jo̧rȩtadëa̧dirȩ. Judiro̧ pio ji̧ri̧ chjadëri̧ ta̧rë ja̧botärea̧ ji̧, cjäri̧ madiro̧jȩrȩ, pio ji̧ri̧ ja̧bo tänȩpea̧ pio ju̧i̧ chjiari ni̧bä chjaoji̧ri̧pea̧dirȩ ütëborë. Aja̧, Joche pio ju̧i̧iäpȩmo̧, Care pio ju̧i̧iäpȩmo̧ ta̧dëra̧ pio ju̧ri̧ra̧ ae jabo tänȩrea̧ jo̧rȩtaji̧ri̧pea̧dirȩ. Jabo ma̧i̧ dari̧ japatärea̧ ji̧, Jeova pio judi chjaodëri̧ tuti japamȩrȩ idëparëremȩde dëbëdiärea̧ jo̧räpȩ ju̧ri̧, a̧dë chjäte tatari̧ cjiamȩrȩ.

¹¹ Ado Jeova pio judi yo̧a̧dejȩ Moiche ju̧i̧iäpȩmo̧: —¿Napai̧rä yuro badë jo̧rȩtapadiro̧coe pio jiro pumȩ judiro̧? ¿Napai̧rä yuro ji̧dë ma chjuari̧ jiadapadiro̧coe pio coaiäpȩmo̧ chjadëri̧ quëna̧tärea̧ ji̧? Danȩ, cüdë ana̧ri̧ na̧rȩa̧räbo, cüdë ana̧ri̧ tuti japea̧räbo, jabechji̧ chjuari̧ quëna̧dëdiro̧coe. Pio ju̧i̧iä iëno̧ë ta̧rërequedemȩ. ¿Napai̧rä yuro ja̧di dari̧ japapadiro̧coe?

¹² Danȩ, gito ana̧ri̧ tara tänȩparequedejȩrȩ yuroparea̧mi̧ dari̧, chiri chjadëräpȩ yu̧a̧därärea̧mi̧dëri̧. Jabo pio mȩa ano̧ mire mitëparequedemȩ. Ado na̧ea̧ri ja̧ji̧ri̧ judiro̧ icharaita ji̧ri̧ u̧i̧ ji̧ra̧papadirȩ. Ji̧ri̧ u̧i̧ to̧bami̧ dari̧ cjo̧ro̧padirȩ. Uapadëji̧ri̧rȩ cjo̧ro̧padirȩ, oëadëji̧ri̧rȩ —yo̧a̧dejȩ.

¹³ Jabo Moiche judi dëbë yo̧mȩrȩ yo̧rëremȩdejȩ Jeova pio ju̧i̧iäpȩmo̧: —Jabo danȩ, na̧ jauëchja pio oaiä go̧dü tänȩrëremȩrenȩ pio jiro pumȩ ji̧ri̧ Ejito chiriri pio judiri. Aja̧, mȩnȩ go̧dü tänȩa̧ pumȩ pio judiro̧dirȩ. Jabo ji̧ri̧ ütëbo oa ja̧bo tänȩrä judi, chjaodëri̧ goë ta̧rëpadirȩ davä Ejitoräpȩ cjo̧ro̧ji̧ri̧ judiro̧.

¹⁴ Ado ja̧dëa ji̧ ma̧ȩ chjadüpadiro̧jȩrȩ pio yoa chiriräpȩ cjo̧ro̧ji̧ri̧ pio ji̧ri̧iäpȩmo̧, Canaa̧räpȩ cjo̧ro̧ji̧ri̧ pio ji̧ri̧iäpȩmo̧. Aja̧, judiro̧ dabadëchea oa ma̧ȩ chjadüpadiro̧jȩrȩ. Jabo danȩ ca̧ Ütë, pio yoaiäpȩ cjo̧ro̧ji̧ri̧ pio judiro̧ peadëri ja̧ ta̧rëji̧ri̧pea̧dirȩ davä pio mȩa chjiari. Peadë ta̧rëji̧ri̧pea̧dirȩ Jeova pio ju̧i̧ chjiari, pio ibëdi cjiamȩ Ütë pio ju̧i̧ chjiari. 'Aja̧, jibëa̧ Ütë üdë goadidëmȩdida jabo jabechji̧, chjadë maearä cjiamȩdida, uëräpȩmo̧ cjiamȩ go̧a̧ra̧ ë jujuarä cjiamȩdida, icharaita ja̧ uërä ju̧ri̧ cjiadärädida' quëna̧ ta̧rëji̧ri̧pea̧dirȩ pio mȩa chjiari. 'Aja̧, Jeova judi doro ëba baädiji̧ri̧da, go̧a̧ra̧ ërä cjiamȩrȩ yabo ëba baädiji̧ri̧da, ado gȩnȩrä cjo̧dë gärimȩrä cjiamȩrȩ ano̧ mire yabo ëba baädiji̧ri̧da, uëräpȩmo̧ cjiamȩ gärimȩ jujuarä cjiamȩrȩ ano̧ mire yabo ëba baädiji̧ri̧da' quëna̧ ta̧rëji̧ri̧pea̧ maeadirȩ ca̧ Ütë.

^15-16 Jabo danȩ, mȩnȩ yaba̧ icharaita pio ji̧ri̧ ütëbo oa chjaodëri̧ ja̧bo tänȩrä judi, jabechji̧ pio mȩa chjiari jabërä goë goë ta̧rëa̧ji̧ri̧ pio judiro̧ oëra̧ yo̧pai̧ dadirȩ pio mȩa chjiari. Tjamo̧ davä. Canaa̧räpȩ cjo̧ro̧ji̧ri̧ judiro̧, ado oëra̧ti̧ oa cjo̧ro̧ji̧ri̧ pumȩ judiro̧, pio mȩa chjiari goë ta̧rëa̧ji̧ri̧ pio judiro̧, dëdë, oëra̧ jo̧rȩtaji̧ri̧rȩ badë oa yo̧pai̧ dadirȩ pio mȩa chjiari. Jabechji̧ mȩnȩ na̧ pumȩ ji̧ri̧ chjaodëri̧ ja̧bo tänȩrä judi, 'Jabo cjäri̧ madida, Jeova judi ju chia tjamo̧dëdida, jënȩ yo̧rërea̧bea chiri pio ju̧i̧ tjamo̧ri̧ yürürea̧ dadëa̧diji̧ri̧da, pio ju̧i̧iä chiri maearäpȩji̧ri̧ oa ja̧bo tänȩa̧diji̧ri̧da, chiri chjadë oa yürütärea̧ ji̧ tjamo̧ri̧ yürürea̧ dadëa̧diji̧ri̧da, jabechji̧ jauëchja tjamo̧dëdida' quëna̧ jo̧rȩtaji̧ri̧rȩ yo̧pai̧ dadirȩ davä pio mȩa chjiari.

¹⁷ Pio ju̧i̧iä goë cjo̧dëtarequedemȩ Jeova. Jabechji̧ ana̧ri̧ na̧rȩibe na̧ jauëchja pio ju̧i̧. Pio yoaiäpȩ cjo̧ro̧ji̧ri̧ pumȩ judiro̧ ütëborë pio mȩaiäpȩmo̧ chjacjiamȩri̧ jo̧rȩtapea̧ oa ana̧ri̧ japavä mȩnȩ yo̧rërea̧mi̧.

¹⁸ Danȩ Jeova, ja̧di ta̧rëri̧ yo̧mȩrȩ yo̧rëremȩrenȩ mȩnȩ no̧mȩ yo̧a̧ ji̧. “Aja̧, Jeova pio judirequede“ yo̧rëremȩrenȩ. “Ado chjai̧dëri̧ japaji̧ri̧ pio ji̧ri̧ bape chjaoparequedejȩrȩ. Gitori̧ bape chjaoparequedejȩrȩ jibëa̧ bori̧bo, jibëa̧ jadama̧i̧bo, jibëa̧ taru pio ji̧ri̧bo" yo̧rëremȩrenȩ. Jabo danȩ ca̧ Ütë, mȩnȩ yo̧ë cji̧dämȩrȩ yo̧a̧ ji̧ peaja̧di yo̧rëremȩrenȩ. “Aja̧, chjaodëri̧ ërecjiape bagadëmȩrequede” yo̧rëremȩrenȩ. “Pumȩ ji̧ri̧, jabechji̧ ma̧ chjua damȩrȩ cjäri̧ri̧ cjia darequedejȩrȩ, ea tjamo̧mȩrȩ" yo̧rëremȩrenȩ. "Coa ta̧rëdiädëräbo, coa jiadaräbo, jabechji̧ chjai̧dëri̧ japamȩ pio ju̧i̧ duridëparȩmi̧ dari̧ japareconȩ" yo̧ë cji̧dämȩrȩ yo̧rëremȩrenȩ.

¹⁹ Aja̧ Jeova, ja̧di ta̧rëri̧ yo̧rëremȩrenȩ. Ado pio ju̧i̧iä jabechji̧, pio jiro pumȩ ji̧ri̧ chjadëri̧ duridëparȩmi̧ dari̧ japatä eamȩrȩ goë cjo̧dëtarequedemȩ. Mȩnȩ ma̧ chjua damȩrȩ ea̧ tara, mȩnȩ a̧dë chjäte cjäri̧ri̧ cjia damȩ tara, jabechji̧ duridëparȩmi̧ dari̧ japajȩrȩ. Aja̧, mȩnȩ ji̧ri̧ duridëparȩmi̧ dari̧ japarërea̧mi̧, judiro̧ Ejito chiriri pio judiri go̧düa̧ri ja̧ babui̧ra̧ duridëparȩmi̧ dari̧ japarërea̧mi̧ japajȩrȩ ado chjereno̧ —yo̧mȩrȩ goë tuti ni̧bärëremȩdejȩ Jeova pio ju̧i̧iäpȩmo̧ Moiche judi icharaita pio ji̧ri̧ chjiari.

Jeova judi bape chjaorëremȩdejȩrȩ icharaita ji̧ri̧ judiro̧ chjai̧dëri̧ japea̧ ba oa

²⁰ Ado Jeova judi dëbë yo̧rëremȩdejȩ Moiche ju̧i̧: —Jabechji̧de ado ja̧di. Mȩnȩ coa cjo̧dëa̧mi̧ duridëparȩmi̧ dari̧ japaparequedejȩrȩ jabechji̧.

²¹ Jabo tjamo̧ri̧ yo̧rea̧ oa yo̧requedemȩ jabo. Danȩ, ji̧dë ma cjo̧ro̧mȩ Ütë pio judirequede, cjo̧ro̧dëpe bagarea̧ decjiari̧ cjiamȩ üdë. Ado pio judimȩrȩ na̧rȩ chjaoa̧requede davä ca̧ jauëchja oa chiriräpȩti̧ oa pumȩ judiro̧ pio coa chjiari chjadëri̧ dabapea̧ oa.

^22-23 Ado pio cüdë tjamo̧ri̧ yo̧rea̧ oa yo̧mȩrȩ yo̧requede davä pio jiro pumȩ pio ji̧ri̧ chjiari. Jabechji̧ yu̧a̧rea̧ yürüdëparequedejȩrȩ. Tjamo̧ davä. Pio jiro pumȩ judiro̧ cja̧rȩmȩrȩ yu̧a̧tärea̧ ji̧, cüdë jibëa̧ ütëti̧rea̧ pio ji̧ri̧iäpȩmo̧ yo̧ë cji̧därërea̧ chiriräpȩ yu̧a̧tärea̧ ji̧, cjäri̧ madirȩ, yu̧a̧rea̧ dadëpadirȩ. Jabechji̧ cüdë a̧dë chjäte tatari̧ cjiari̧ na̧rȩ chjaoa̧ ji̧ irä daea̧dirȩ. Ado cüdë Ejitoräpȩ jauëchja cjiari̧ na̧rȩrërea̧ ji̧ peaja̧di irä daea̧dirȩ. Ado chiri maearäpȩ ju̧ri̧, cüdë pio ji̧ri̧ chjiari ji̧dë ma tuti yürüa̧ ji̧, peaja̧di irä daea̧dirȩ. Ji̧dë ma irä daea̧dirȩ. Jabo irä dae chjaoa̧räbo, cjäri̧ madiro̧coe, quëna̧dëdiro̧coe. Ji̧dë ma jiada̧diro̧coe. Pio ju̧i̧iä jabechji̧, pio jiro chiri oa yu̧a̧rea̧ yürüdëparequedejȩrȩ. Jabechji̧ eami̧rȩ pio coa ta̧rëdiädëmȩ pio judi yu̧a̧dëpade bucho ana̧.

²⁴ Jabo Care judi, ca̧ mu̧i̧tjoi̧ pio judi, jabechji̧ tjaoëpai̧ dari̧ jo̧rȩtade. Aja̧, ca̧ ma̧ȩrä cjo̧ro̧mȩde peadëri ja̧. Pio ju̧i̧iä yu̧a̧rea̧ yürüpareconȩ jënȩ ütarë daea̧ chiri pio ju̧i̧. Ado pio judiri ja̧ji̧ri̧ pio judiro̧, jabechji̧ pio ju̧ri̧pȩ cjo̧ro̧rea̧ dapadirȩ,

²⁵ Aja̧, amarechitarë cjo̧ro̧mȩräpȩ ju̧ri̧, cananeorë cjo̧ro̧mȩräpȩ ju̧ri̧ cjo̧ro̧rea̧ dapadirȩ, ya̧mi̧ chjarerä a̧rȩmȩ chirirä. Jabo icharaita judiro̧ orë, jabechji̧ jaco cuchupë baätä earequedejȩrȩ ui coëcoëaräpȩmo̧. Jabechji̧ chiri maearäpȩmo̧ baätädirȩ judiro̧ jana̧rea̧ duriräpȩmo̧ —yo̧mȩrȩ yo̧rëremȩdejȩ Moiche ju̧i̧iäpȩmo̧, icharaita pio ji̧ri̧iäpȩmo̧bo.

²⁶ Ado Jeova judi ji̧dë u̧i̧ yo̧mȩrȩ a̧de yo̧rëremȩdejȩ Moiche ju̧i̧iäpȩmo̧, Aro̧ pio ju̧i̧iäpȩmo̧bo. Ja̧di ta̧rëri̧ yo̧mȩrȩ yo̧rëremȩdejȩrȩ:

²⁷ —Danȩrȩ, ji̧dë ma ma̧ȩ goaedëti̧ oa ni̧bä chjaodiro̧coe pio jiro icharaita judiro̧ chjadëdërë. ¿Napai̧rä yuro ja̧di tärëri̧ ni̧bäji̧ri̧rȩ aeno̧padiro̧coe pio coaiäpȩmo̧? A̧dë chjäte ma̧i̧ dari̧ jape chjaodiro̧coe.

²⁸ Danȩrȩ, ja̧di ta̧rëri yo̧tä earequededibe icharaita pio ji̧ri̧iäpȩmo̧: “Aja̧, Jeova pio judirequede cüdë,” yo̧emȩrenȩjȩrȩ. “Pearä judirä cjiarëremȩ pio judirequede, tjaoëdiä tjaoëdiäpe bagadëmȩrȩ. Ado cüdë ja̧di dari̧ cjia tara, jabechji̧ tjamo̧i̧ cjiari̧ yo̧mȩrȩ ma̧ȩ yürürequededibe teracabari̧ yo̧rea̧ decjiari̧. Danȩrȩ, mȩnȩro̧ pio yabo yo̧a̧mi̧ japaparequededibe jabechji̧. Jeova pio judimȩrȩ ni̧bärequededibe.

²⁹ Danȩrȩ, chiri maearäpȩ ju̧ri̧ ja̧bopea̧ maearë cjiadiäpanȩrȩ yaba̧, cja̧rȩmȩrȩ chjätärea̧mi̧dëri̧. Jabechji̧ mȩnȩro̧ pio coaiäpȩmo̧ ji̧dë ma ma̧ȩ goaedëti̧ oa ni̧bä chjaoa̧ oaiä, jabechji̧ pio jiro chiri chjadëräpȩ yu̧a̧rea̧ yürüdëparequededibe. Ma̧ri̧ judiro̧ ütëborë, jabechji̧ ja̧bopea̧ maeanȩrȩ chiri chjadëräpȩ yu̧a̧därärea̧mi̧dëri̧. Jabë 20 ui goadëji̧ri̧ pio judiro̧mo̧rȩ yu̧a̧rea̧ dapadirȩ.

³⁰ Tjamo̧ davä. Mȩnȩro̧ ütëborë chiri chjadë tjamo̧räpȩ yu̧a̧tärea̧ ji̧, cüdë pio dibëiäpȩmo̧ yo̧ë cji̧därërea̧ chiri pio ju̧ri̧pȩ cjo̧ro̧tärea̧ ji̧, jabechji̧ yu̧a̧rea̧ yürüdëparequededibe. Jabo pio ji̧ri̧mo̧i̧ yu̧a̧rea̧ yürüparequedejȩrȩ, Care pio ju̧i̧, Jochue pio ju̧i̧bo.

³¹ Ado dibëa̧ bori̧ pio ji̧ri̧bo chjadëri̧ yu̧a̧därärea̧ yürüparequedejȩrȩ. Danȩrȩ, mȩnȩro̧ pio yabo yo̧a̧ ji̧, 'Aja̧, ibëa̧ bori̧ pio ji̧ri̧ baë goa baäpai̧ dadiro̧jȩrȩ’ yo̧reji̧ri̧renȩrȩ Canaa̧räpȩ cjo̧ro̧ji̧ri̧ pio ji̧ri̧ chjiari. Jabo yaba̧ pio dibëiäpȩmo̧ yu̧a̧därärea̧ yürütärea̧ ju̧i̧, dibëa̧ bori̧ pio ji̧ri̧iäpȩmo̧ ma ano̧ mire yu̧a̧ tänȩparequedejȩrȩ. Aja̧, mȩnȩro̧ chjuari̧ jiada̧ chiri pio ju̧ri̧pȩ chjadëri̧ go̧düdärärea̧ yürüparequedejȩrȩ dibëa̧ u̧ri̧ pio ji̧ri̧. Ado pio ju̧ri̧pȩ goae tarari̧ cjo̧ro̧rea̧ dapadirȩ.

³² Jabo mȩnȩro̧, jabechji̧ pio yoaiäpȩ ja̧bopanȩrȩ chiri maearäpȩ, dabu nȩgȩ maearäpȩ.

³³ Ado dibëa̧ bori̧ judiro̧ chiri chjadëräpȩ chjaodëri̧ go̧düdärätärea̧ ji̧, jabechji̧ oveja jidaji̧ri̧rȩ cjo̧ro̧padirȩ 40 ui nö̧ta. Mȩnȩro̧ ca̧ ma̧ȩ oa ta̧rëdiädëa̧ oaiä, jabechji̧ gitoi̧ dari̧ chjätäti̧ cjiaji̧ri̧rȩ jidapadirȩ oveja pio ji̧ri̧, mȩnȩro̧ ütëbodärärë chiri maearäpȩ ja̧boa̧räpȩ yuro.

³⁴ Jabechji̧ mȩnȩro̧ pio coaiäpȩmo̧ chjai̧dëri̧ japea̧ ba oa, jabechji̧ 40 ui nö̧ta goae tjamo̧dëri̧ chjätäti̧ cjia tänȩparequededibe gitoi̧ dari̧. Ado danȩrȩ, mȩnȩro̧ 40 do nö̧ta chiri chjadë oa ütarariä tai̧a̧ tara, peaja̧di 40 ui nö̧ta ano̧ mire tai̧ tänȩrequededibe chiri maearäpȩ. Chiri chjadëräpȩ ju̧ri̧ cja̧rȩmȩ do tai̧rea̧ üdë, jabechji̧ chiri maearäpȩ cja̧rȩmȩ ui nö̧ta chjätäti̧ cjiarea̧de. Pio ju̧i̧iä 40 ui nö̧ta chjätäti̧ cjia tänȩparequededibe.

³⁵ Tjamo̧ davä. Pio coaiäpȩmo̧ chjai̧dëri̧ japapea̧ oa a̧dopareji̧ri̧ pio dibëiäpȩmo̧ bape chjaoparequededibe, pumȩ chjadëdë maea oa. Tjamo̧i̧ cjiari̧ yo̧mȩrȩ ma̧ȩ yürürequededibe teracabari̧ yo̧rea̧ decjiari̧. Pio yoa chiriräpȩ ja̧bopanȩrȩ mȩnȩro̧ ütëbodärärë cja̧rȩmȩrȩ chjätärea̧mi̧dëri̧. Jabechji̧ Jeova pio judimȩrȩ ni̧bärequededibe,” yo̧tä earequededibe icharaita pio ji̧ri̧iäpȩmo̧ —yo̧mȩrȩ yo̧rëremȩdejȩrȩ Ütë tjamo̧ judi Moiche pio ju̧i̧, Aro̧ pio ju̧i̧bo. Aja̧, icharaita pio ji̧ri̧iäpȩmo̧ goë yo̧tä eamȩrȩ yo̧rëremȩdejȩrȩ.

Chiri ju̧i̧ chjiari ma̧ȩ chjádë yürüa̧ pio ji̧ri̧ ja̧bo tänȩrëremȩdejȩrȩ

³⁶ Ado Moiche judi chiri chjadë oa ütarë dapea̧ oa chjadürërea̧ oari pio judiro̧ ma̧na̧rä, cjäri̧ madirȩ, judiro̧ chjadëri̧ yo̧tärea̧ ji̧, judiro̧ tjamo̧i̧ cjiari̧ yo̧tärea̧ ji̧, ma̧ȩ chjádë maea oa yo̧rëreji̧ri̧dirȩ chiri pio ju̧i̧ chjiari. Ado judiro̧ yo̧a̧ oaiä, jabechji̧ icharaita judiro̧ ma̧ȩ goaedëti̧ oa ni̧bäji̧ri̧pea̧diro̧jo̧ȩ Jeova pio ju̧i̧iäpȩmo̧.

³⁷ Pio ju̧i̧iä Jeova judi gito ana̧ri̧ tara tänȩrëremȩdejȩrȩ. Goadi ütarariä tai̧rëreji̧ri̧ pio ji̧ri̧ gito ana̧ri̧ tara tänȩa̧dejȩrȩ. Judiro̧ chjaodëri̧ ja̧borea̧mi̧ dari̧ tara tänȩrëremȩdejȩrȩ bucho ana̧.

³⁸ Jabo yo̧a̧ri̧mo̧i̧rȩ cjiadiärëreji̧ri̧dirȩ. Aja̧, 12 oarirë järërea̧ ji̧, chiri oa ütarë dapea̧ oa tai̧rëreji̧ri̧ judiro̧ 12rërea̧ ji̧, jabechji̧ yo̧a̧ri̧mo̧i̧rȩ cjiadiäa̧dirȩ. Aja̧, Jochue pio judi, ado Care pio judi cjiadiäa̧dirȩ. Pio ji̧ri̧mo̧i̧ ja̧bo tänȩdërëremȩdejȩrȩ Jeova judi.