Tito 3 - Biblia Pume

Ja̧di dari̧ cjo̧ro̧täreji̧ri̧dirȩ quëna̧ji̧ri̧ judiro̧

¹ Chjadëri̧ jo̧rȩta tänȩjȩrȩ quëna̧ji̧ri̧ pio ji̧ri̧, judiro̧ chiri ütë cjo̧ro̧ji̧ri̧ pio ji̧ri̧ chjadëri̧ ta̧rëdiätä. Tjamo̧ yo̧ji̧ri̧ pio ji̧ri̧bo chjadëri̧ ta̧rëdiätäreji̧ri̧diro̧jȩrȩ jiadarea̧ decjiari̧. Pio ji̧ri̧ ja̧ chja̧oerä cjo̧ro̧dirȩ. Ado pio ju̧i̧iä järitäreji̧ri̧dirȩ chjadëri̧ japapea̧ ji̧.

² Ado o ji̧ri̧ chjiari chjai̧dëri̧ ni̧bädëtäreji̧ri̧dirȩ. Ma̧ȩra̧ pio ju̧ri̧ra̧ dëbë ni̧bätadëtäreji̧ri̧dirȩ, jabo ma̧ chjua jo̧rȩtaji̧ri̧rȩ datäreji̧ri̧diro̧jȩrȩ, ba chia daji̧ri̧rȩ. Jabechji̧ chjadëri̧ cjo̧ro̧täreji̧ri̧dirȩ, pumȩ ütëbo oa ea tjamo̧ji̧ri̧rȩ. Aja̧ Tito, chjadëri̧ chi̧dëeajȩrȩ judiro̧ ja̧di dari̧ cjo̧ro̧pea̧ ji̧.

³ Danȩ, a̧ro̧rȩ pearä judi quëna̧dërërea̧ ji̧, peaja̧di chjai̧dëri̧ cjo̧ro̧rëreji̧ri̧rea̧rȩ japëtaraji̧ri̧mi̧ darë. Ütë tjamo̧ ju̧i̧ ta̧rëdiädëji̧ri̧rȩ cjo̧ro̧rëreji̧ri̧rea̧rȩ. U̧i̧pea̧ oa cjiaji̧ri̧rȩ oëra̧diä chjaorëreji̧ri̧rea̧rȩ. Ibëa̧ icjararä chjai̧dë üdë boadäräa̧ oa cjiami̧ dari̧ cjo̧ro̧rëreji̧ri̧rea̧rȩ, chjai̧dë ja̧ mu̧i̧tjoi̧mi̧ dari̧. Goaeri̧ tararea̧ pio ju̧i̧mo̧i̧ jo̧rȩtaji̧ri̧rȩ cjo̧ro̧rëreji̧ri̧rea̧rȩ, airi̧ cjia airi̧ cjia cjo̧ro̧tämi̧ cjiaji̧ri̧rȩ. Ado ibëa̧ chji̧ üdë, jabechji̧ chjai̧dë maeara̧ yu̧i̧a̧ oa cjiami̧ dari̧ cjiarëremȩde. Ji̧dë ma quëbaji̧ri̧rȩ jo̧rȩtarëreji̧ri̧rea̧rȩ ma̧ cjüëtüji̧ri̧rȩ. Aja̧, pumȩ judiro̧ ërecjiarëreji̧ri̧diro̧ibe, ado a̧ro̧rȩ pio ji̧ri̧iäpȩmo̧ bapë ërecjiarëreji̧ri̧rea̧ro̧jȩrȩ.

Chjätä Tänȩmȩ pio judi chjätärea̧ yürürëremȩdiibe

⁴ Jaboti̧ri̧ japarëremȩdiibe ibë Chjätä Tänȩmȩ Ütë pio judi. Jabechji̧ a̧dë chjäte chjadëri̧ japamȩrȩ ana̧ri̧ na̧rȩrëremȩdiibe jënȩ ea̧ pio ju̧i̧, jënȩ chjamȩrȩ japea̧ pio ju̧i̧.

⁵ Pio judirimȩ marë chjätärea̧ yürürëremȩdiibe a̧ro̧rȩ chjadëri̧ japea̧ pio ju̧i̧iädë. Jabechji̧ Ütërë cjäri̧ri̧ cjia jo̧rȩta̧ pio ju̧i̧iämo̧i̧ chjätärea̧ daea̧rea̧rȩ. Ado ibëa̧ tjo oa joami̧ dari̧ japarëremȩdiibe Tjo tjamo̧ ja̧ jauëchja pio oaiä. Ado ja̧di dari̧ japea̧ oaiä, jabechji̧ ado nö̧ria̧ oa cjiadiäa̧rea̧rȩ. Tjamo̧ davä. Pumȩ pea chja mape bagarëreji̧ri̧rea̧rȩ Tjo tjamo̧ ja̧ jauëchja pio ju̧i̧iä.

⁶ Jabechji̧ pio ju̧i̧ yürürëremȩdiibe Ütë tjamo̧ judi ibëa̧ icjararä bëpapea̧ oa. Jabechji̧ ibë Chjätä Tänȩmȩ Jechu Quiricho pio judi chjadëri̧ tuti japea̧ oaiä, yürürëremȩdiibe Tjo tjamo̧ pio ju̧i̧. Chjamȩrȩ yürüa̧diibe davä, a̧dë chjäte chjadëri̧ yürürea̧mi̧ dari̧.

⁷ Ja̧di dari̧ japarëremȩdiibe Ütë tjamo̧ judi a̧ro̧rȩ jabechji̧parȩa̧ oa cjiapea̧ oa, jënȩ cjäri̧ri̧ cjia da̧ pio ju̧i̧iä jabechji̧parȩa̧ oa cjiapea̧ oa. Ado pio ju̧i̧iä bucho ana̧ cjo̧ro̧pea̧ ji̧ jidataji̧ri̧rȩ cjo̧ro̧rea̧rȩ yaba̧, bucho ana̧ cjo̧ro̧rea̧ chiaji̧ri̧rȩ.

⁸ Aja̧ Tito, tjamo̧dë yo̧dërequedemȩ, jabo tjamo̧i̧ cjiari̧ yo̧requedemȩ. Quëna̧pea̧ ma̧ȩ maea oa yo̧requedemȩ. Pio jiro ma̧ȩ oa a̧ra̧ano̧pea̧ ji̧ ji̧dë ma järitä earequedemȩ Tito. ‘Aja̧, chjadëri̧ dabapea̧mȩrȩ a̧ra̧ano̧quëda’ quëna̧mȩrȩ to̧bari̧ a̧ra̧ano̧tajȩrȩ. Ütë tjamo̧ ju̧i̧ quëna̧ji̧ri̧ pio ji̧ri̧ chjadëri̧ a̧ra̧ano̧jȩrȩ jibëa̧ chji̧rä urëdi oa chadiärea̧mi̧ dari̧. Judiro̧ ta̧ra̧ puë chiaji̧ri̧mi̧ dari̧ cjo̧ro̧tä, Ütë tjamo̧ ja̧ oa chjadëri̧ ja̧bepë yürütä a̧ra̧ano̧jȩrȩ chjadëri̧. Ja̧di dari̧ japea̧ üdë ba chiade. Ja̧di dari̧ japea̧ üdë chjadëri̧ a̧dodejȩrȩ ütëbodärä oa.

Oëra̧ a̧ra̧ano̧ji̧ri̧ pio ji̧ri̧ chjiari go̧ȩpea̧de Pablo judi

⁹ O judiro̧ ni̧bä tänȩdëpea̧dirȩ. Cjapiri̧ cjia tänȩjȩrȩ. Badë maea oa ni̧bä chjaodirȩ, o ji̧ri̧ a̧dorea̧mi̧dë maea oa. Badë oa ni̧bä chjaodirȩ dëbëpe chjaomi̧ dari̧. Jibëa̧ ütëti̧rea̧ ja̧ quȩ ji̧ra̧ tjamo̧ oa ana̧ri̧ jo̧rȩtaji̧ri̧rȩ ütarë ni̧bä chjaodirȩ. Tjarari̧ bubape bagami̧ dari̧ tuti ni̧bä chjaodirȩ. Moicherë go̧ȩparërea̧ ma̧ȩ pio ju̧i̧ chjiari dëbëpe chjaomi̧ dari̧ ni̧bätadirȩ. Ëba ni̧bä chjaodëjȩrȩ. Ta̧rë ja̧bodëjȩrȩ.

¹⁰ Ado eami̧rȩ pumȩ judi tjamo̧i̧ cjiari̧ a̧ra̧ano̧dërä judi, quëna̧ji̧ri̧ judiro̧ tjarari̧ bubape bagami̧ dari̧ tuti a̧ra̧ano̧rä judi, to̧bari̧ chi̧dëeajo̧ȩ a̧ra̧ano̧dëtä. Ado mȩa ta̧rë ja̧bodërä judi, ado yo̧jo̧ȩ. Ado mȩaiä yo̧a̧ri̧ co ta̧rë ëte jiade ta̧rë marä judi, jabechji̧, ‘jadü cjiarea̧mi̧dëpea̧dida, jäe dadëpea̧dida’ quëna̧ jo̧rȩtajo̧ȩ.

¹¹ Ja̧di dari̧ japamȩ pio ju̧i̧ chjiari chjadëri̧ daba jironȩ. Ji̧dë ma chjai̧dëri̧ japamȩde. No̧bo jämi̧ dari̧ cjo̧ro̧tärea̧ ji̧, no̧dëräpȩ a̧dë jämi̧ dari̧ cjo̧ro̧de. Dabamȩborë chjai̧dëri̧ japamȩde. ‘Aja̧, chjai̧dëri̧ japamȩquëda, jabo jabechji̧dida, ta̧rëdiädëpaquëda’, quëna̧ jo̧rȩtamȩrȩ cjo̧ro̧de, bape chjaorea̧ tarapamȩrȩ.

Cjiadiärea̧ Ma̧ȩ

¹² Danȩ, ca̧ pumȩ ju̧i̧. cja̧rȩmȩ oa chjadüpareconȩ pio mȩaiäpȩ. Jabo Aretema quȩmȩ pio ju̧i̧ chjadüdërä judi, jabechji̧ chjadüpareconȩ Tiquico quȩmȩ pio ju̧i̧. Ado danȩ, cüdë chjadüpea̧ judi pio mȩaiäpȩ go̧düdäräa̧rä, jabechji̧ järi tjamo̧mȩrȩ jätä eatarequedemȩ Nicopori quȩmȩräpȩ, pio coa nö̧ta dëbëdiäpea̧ oa. Jabechji̧ pio ju̧ri̧pȩ cjiadiätämi̧ cjiarequede ui nöta chjöchja tjamo̧dëpea̧rä yuro.

¹³ Ado danȩ, ibëa̧ pumȩ judiro̧ Quereta quȩmȩ chiriri pio judiri baäpea̧ querediäji̧ri̧ oa, jabechji̧ chjadëri̧ a̧dojȩrȩ mȩnȩ nö̧tarä yuro. Aja̧, Chena quȩmȩ pio ju̧i̧, o ji̧ri̧ chjiari goë tuti ni̧bämȩ pio ju̧i̧ chjadëri̧ a̧dojo̧ȩ, Aporo quȩmȩ pio ju̧i̧bo. Jabechji̧ judiro̧ no̧ro jabëdiächea oa a̧dojȩrȩ.

¹⁴ Ado danȩ, ibëa̧ oti̧ judiro̧ ütëborë chjadëri̧ dabapatäreji̧ri̧dirȩ o ji̧ri̧iäpȩmo̧ chjadëri̧ a̧dopea̧ ji̧. Aja̧, järi tjamo̧tädirȩ cjäri̧ ja̧boji̧ri̧ pio ji̧ri̧ chjadëri̧ a̧dopea̧ ji̧. Jabechji̧ ja̧di dari̧ japaji̧ri̧ judiro̧ ba chia tjamo̧ oa ja̧bepadirȩ. Ado ja̧di dari̧ a̧doa̧ oaiä, jabechji̧ jurarea̧ torë ji̧ra̧ri̧ chiadëmȩmi̧ dari̧ cjiadiädëpadirȩ.

¹⁵ Danȩ Tito, pio coa nö̧ta cjo̧ro̧ji̧ri̧ ütëbodärärë cjäri̧ri̧ cjiari̧ jo̧rȩtadiro̧dibe. Ado ibë eaji̧ri̧ pio ji̧ri̧, a̧ro̧rȩ quëna̧mi̧ quëna̧ji̧ri̧ pio ji̧ri̧ cjäri̧ri̧ cjiari̧ jo̧rȩtarea̧ro̧jȩrȩ peaja̧di. Aja̧, yo̧jȩrȩ. Aja̧, ibëa̧ Ano̧mȩ Jechu pio judi cjäri̧ri̧ cjia datädidibe ütëbodärä oa. Pio ju̧i̧mo̧ go̧ȩparequedemȩ Tito. Cjo̧ro̧cjiaibe. Na̧ omȩ, Pablo.