Tito 2 - Biblia Pume

Ütama̧i̧ pio ji̧ri̧ chi̧dëeapea̧dirȩ

¹ Chjadëri̧ a̧ra̧ano̧vä Tito. Tjamo̧i̧ cjiari̧ baämȩ ma̧ȩ pio ju̧i̧mo̧i̧ a̧ra̧ano̧pea̧ chiarenȩ.

² Ado chjadëri̧ chi̧dëeajȩrȩ ütama̧i̧ pio ji̧ri̧, jënȩro̧ chjadëri̧ cjo̧ro̧tä. Jabechji̧ chjadëri̧ cjo̧ro̧täreji̧ri̧dirȩ o judiro̧ ba chia darea̧mi̧ dari̧. Jibëa̧ icjararä chjai̧dë pio ju̧i̧ boadärämi̧ dari̧ goatäreji̧ri̧diro̧jo̧ȩ, chjai̧dë üdë boadärärea̧mi̧dëri̧. Chjuari̧ quëna̧ji̧ri̧rȩ ta̧rëdiätäreji̧ri̧diro̧jo̧ȩ Ütë tjamo̧ ja̧ ma̧ȩ oa. Ado jibëa̧ oti̧ ji̧ri̧ ea tjamo̧täreji̧ri̧diro̧jȩrȩ. Ma̧ chjua jo̧rȩtariä cjo̧ro̧täreji̧ri̧dirȩ. Aja̧, ja̧di dari̧ cjo̧ro̧täreji̧ri̧dirȩ ütama̧i̧ judiro̧.

Ütai̧ pio ji̧ri̧ chi̧dëeapea̧ni̧rȩ

³ Ado ütai̧ jini̧ro̧ peaja̧di dari̧ cjo̧ro̧täreji̧ri̧ni̧rȩ. Chjadëri̧ cjo̧ro̧täreji̧ri̧ni̧rȩ Ütë tjamo̧ judi ma̧ chiadëri̧ cjiape järea̧mi̧ dari̧. Aja̧, chjadëri̧ a̧ra̧ano̧jȩrȩ Tito. Ado ütai̧ ji̧ni̧ro̧ jibëa̧ pumȩ pio ji̧ri̧iäpȩmo̧ aechide yo̧ji̧ri̧rȩ ma̧ȩ chjádë yürüdëtäreji̧ri̧ni̧rȩ pio ji̧ri̧ chjiari. Ado ërü goaradëtäreji̧ri̧ni̧rȩ jabo jabechji̧, chjadëri̧ cjo̧ro̧täreji̧ri̧ni̧rȩ, o ji̧ri̧iäpȩmo̧ tjamo̧i̧ cjiari̧ baämȩ ma̧ȩ pio ju̧i̧ a̧ra̧ano̧ji̧ri̧rȩ.

⁴ Jabechji̧ ütai̧ pio jini̧ro̧ dabapa tänȩtäreji̧ri̧ni̧ro̧jȩrȩ ivi pëi̧ chja pio ji̧ri̧. Jibëa̧ üi̧ pio ju̧i̧ tjamo̧ri̧ eapea̧ ji̧, jibëa̧ bori̧ pio ji̧ri̧ tjamo̧ri̧ eapea̧ ji̧, pio ji̧ri̧ chjadëri̧ jidapea̧ oa dabapa tänȩtäreji̧ri̧ni̧ro̧jȩrȩ.

⁵ Aja̧, tüdüa̧mi̧ darä cjo̧ro̧pea̧ oa, jibëa̧ icjararä chjai̧dë pio ju̧i̧ boadärämi̧ dari̧ goapea̧ oa, a̧dë oëadëri̧ cjiadëyi̧rȩ cjo̧ro̧pea̧ oa, chjadë maea oa jo̧rȩtapea̧ oa chjadëri̧ dabapa tänȩtäreji̧ri̧ni̧ro̧jȩrȩ. Jabechji̧ jibëa̧ bëräpȩ chjadëri̧ ja̧bepapea̧ ji̧, chjaji̧ri̧rȩ cjo̧ro̧pea̧ ji̧, jibëa̧ üi̧ pio ju̧i̧ ja̧ chja̧oerä chjadëri̧ cjo̧ro̧pea̧ ji̧, dabapa tänȩtäreji̧ri̧ni̧ro̧jȩrȩ. Ado ivi pëi̧ chja jini̧ro̧ chjadëri̧ dabapea̧ oaiä, jini̧ro̧ coëma cjiari̧ cjo̧ro̧ oaiä, ‘Aja̧, Ütë tjamo̧ ja̧ ma̧ȩ üdë badëdëdida jabo ba chiadida’ quëna̧ jo̧rȩtapadirȩ davä o judiro̧ ‘Ütë ja̧ ma̧ȩ üdë badëdida’ quëna̧tärea̧ ji̧. Tjamo̧ davä, Ütë ja̧ pumȩ judiro̧ coëma̧ cjiari̧ cjo̧ro̧ji̧ri̧ oa dae chjao oaiä, jabechji̧ quëna̧dëji̧ri̧ pio judiro̧ badë jo̧rȩtadëpadiro̧jo̧ȩ Ütë ja̧ ma̧ȩ oa.

Oari pëi̧ chja pio ji̧ri̧ chi̧dëeapea̧dirȩ

⁶ Peaja̧di chi̧dëeajȩrȩ oari pëi̧ chjaji̧ri̧ pio ji̧ri̧. Judiro̧ chjadëri̧ cjo̧ro̧pea̧ oa chi̧dëeajȩrȩ, judiro̧ tüdüa̧mi̧ darä cjo̧ro̧pea̧ oa, judiro̧ ütarë jo̧rȩta ëte chjadë pio ju̧i̧ mitëpea̧ oa.

⁷ Ado pio mȩnȩ o ji̧ri̧iäpȩmo̧ chjadëri̧ na̧rȩpea̧ oa, jabechji̧ chjadëri̧ jape chjaomȩrȩ na̧rȩriä cjo̧ro̧täremȩrenȩ. Tito. Tjamo̧ davä. Pio mȩa cho̧rëdiärea̧mi̧ dari̧ cjo̧ro̧täremȩrenȩ chjadëri̧. Ado mȩnȩ a̧ra̧ano̧ro, jabechji̧ ya maeara̧ a̧ra̧ano̧dëtäremȩrenȩ, jabo coëma cjiari̧ cjo̧ro̧mȩrȩ na̧rȩriä a̧ra̧ano̧täremȩrenȩjȩrȩ. Jabechji̧ mȩnȩ cjo̧ro̧a̧ üdë ji̧mo̧ baätäremȩde mȩnȩ a̧ra̧ano̧a̧ pio ju̧i̧ nö̧ta.

⁸ Chjadëri̧ a̧ra̧ano̧vä Ütë tjamo̧ ja̧ ma̧ȩ oa oëra̧ a̧ra̧ano̧rea̧ decjiari̧. ‘Jabo cjäri̧ madida, oëra̧ a̧ra̧ano̧mȩdida’ quëna̧rea̧mi̧dëri̧ a̧ra̧ano̧täremȩrenȩ. Ja̧di dari̧ a̧ra̧ano̧a̧ oaiä, jabechji̧ ibë eadëji̧ri̧ pio judiro̧ aechide ni̧bärea̧ dadëpadiro̧mȩ. Judiro̧ aechide ni̧bätärea̧ ji̧, jabechji̧ mau maearë cjiadiäpadirȩ idëri̧ cjiaji̧ri̧rȩ.

Pumȩ ja̧ mu̧i̧tjoi̧ pio ji̧ri̧bo chi̧dëeapea̧

⁹ Peaja̧di chi̧dëeatä earequedemȩ pumȩrȩ gatëa̧ oa cjo̧ro̧ji̧ri̧ mu̧i̧tjoi̧ pio ji̧ri̧, quëna̧ji̧ri̧ pio ji̧ri̧. Jabechji̧ jibëa̧ ano̧mȩ pio ju̧i̧ chjadëri̧ ta̧rëdiätäreji̧ri̧diro̧jo̧ȩ, nö̧tadäräri̧ ja̧bepë yürüji̧ri̧rȩ. Jabechji̧ ana̧mȩ judi, 'A̧ja̧, chjadëri̧ ja̧bepadiro̧da quëna̧rea̧mi̧ dari̧ ja̧bepë yürütäreji̧ri̧diro̧jo̧ȩ. Ado jibëa̧ ano̧mȩ pio ju̧i̧iäpȩmo̧ ya coëri̧ dëbë ni̧bädëtäreji̧ri̧diro̧jo̧ȩ.

¹⁰ Ado jibëa̧ ano̧mȩ pio ju̧i̧iä garüdëtäreji̧ri̧dirȩ, jabo jabechji̧ chjadëri̧ ja̧bepë yürütäreji̧ri̧dirȩ, nö̧tadäräri̧ ta̧rëdiäji̧ri̧rȩ. Ado ja̧di dari̧ cjo̧ro̧a̧ oaiä, jabechji̧ chjadëri̧ na̧rȩpadiro̧jȩrȩ o ji̧ri̧. ‘Aja̧, chjadëri̧ cjo̧ro̧diro̧da, chjadëri̧ ja̧bepë yürüdiro̧da, Chjätä Tänȩmȩ Ütë pio ju̧i̧ chjiari ma̧ȩ üdë ba chia tjamo̧dida’ quëna̧rea̧mi̧ dari̧ na̧rȩpadiro̧jȩrȩ o ji̧ri̧, jënȩro̧ chjadëri̧ cjo̧ro̧a̧ oaiä.

Jënȩ cjäri̧ri̧ cjia da̧ pio ju̧i̧ na̧rȩrëremȩde Ütë tjamo̧ judi ütëbodärärë chjätärea̧ dapea̧ oa.

¹¹ Ütërë cjäri̧ri̧ cjia da̧ üdë chjadëri̧ na̧rȩa̧ oa cjiarëremȩde pumȩ ütëbodärärë chjadëri̧ chjätärea̧mi̧ dari̧.

¹² Ado Ütërë pio ibëiäpȩmo̧ cjäri̧ri̧ cjiamȩrȩ a̧doa̧ oaiä, chjadëri̧ daba tänȩdiibe Ütë tjamo̧ judi a̧ro̧rȩ chjai̧dë pio ju̧i̧ putu jura̧ a̧dë chami̧ dari̧ jiadapea̧ oa, ibëa̧ icjararä chjai̧dëri pio judiri cjitëmȩ dae ja̧borea̧ pio ju̧i̧ jiadapea̧ oa. Jabechj a̧ro̧rȩ pio yoa chirirä cjo̧ro̧a̧ nö̧ta, boadäräa̧mi̧ dari̧ goatäreji̧ri̧rea̧ro̧jo̧ȩ ibëa̧ icjararä chjai̧dë pio ju̧i̧. Coëma cjiari̧ jo̧rȩtaji̧ri̧rȩ chjadëri̧ japatäreji̧ri̧rea̧rȩ, o ji̧ri̧iäpȩmo̧ cja̧rȩmȩ ba chia maeara̧ daji̧ri̧rȩ. Ado Ütë tjamo̧ judi yo̧a̧mi̧ japatäreji̧ri̧rea̧rȩ.

¹³ Aja̧, ja̧di dari̧ japariä cjo̧ro̧täreji̧ri̧rea̧rȩ jidataji̧ri̧rȩ, ma̧ chiadëri̧ cjiaparȩrea̧ do pio ju̧i̧ jidataji̧ri̧rȩ. Jabechji̧ ibëa̧ Ütë judi, Chjätä Tänȩmȩ Jechu Quiricho pio judi ana̧ri̧ na̧rȩmȩrȩ jana̧padiibe, a̧dë chjäte tatari̧ cjiamȩrȩ. Ado pio ju̧i̧ jidataji̧ri̧rȩ cjo̧ro̧rea̧rȩ.

¹⁴ Jabechji̧ pio judide pio ibë chjiari tuti yürürëremȩ judi. Jibëa̧ icjara oa tuti yürümȩrȩ yürürëremȩde ano̧ mi̧rȩ ja̧bopea̧ oa. Ja̧di dari̧ tuti japarëremȩde a̧ro̧rȩ jare chjadüa̧ oa cjiami̧ dari̧ go̧dürea̧ datä, a̧ro̧rȩ chjai̧dë ja̧ chja̧oeri judiri go̧dürea̧ datä. Aja̧, pio ju̧i̧ ja̧ icjara oa tuti yürürëremȩde a̧ro̧rȩ pio ju̧i̧ ja̧ pumȩpe jätä, chjai̧dë gȩrȩ chiadëri̧ joami̧ dari̧ cjiatä, dami̧ti̧ chjadë oa japarea̧ järitä.

¹⁵ Ado danȩ Tito, pio jiro ma̧ȩ chjö̧na̧i̧ oa chjadëri̧ a̧ra̧ano̧jȩrȩ pio ju̧ri̧pȩ quëna̧ji̧ri̧ pio ji̧ri̧. Ju chiaparȩjȩrȩ. Ado tjamo̧ yo̧rea̧ chiamȩ tara, jabechji̧ oëra̧diäa̧ji̧ri̧ pio ji̧ri̧ to̧bari̧ chi̧dëeajȩrȩ. Jabechji̧ Ütë tjamo̧ pio judi yürüa̧ oa ja̧di dari̧ ja̧beparea̧ chiarenȩ. Ja̧di tara ja̧bepavä. Ado ba chia datädiro̧mȩ bücjü darea̧ decjiari̧.