Timoteo Ma̧ȩ 1 4 - Biblia Pume

Na̧e chiapea̧ chiarea̧rȩ oëra̧ a̧ra̧ano̧ji̧ri̧ pio ji̧ri̧ chjiari

¹ Danȩ, chjadë maeari̧ yo̧diibe Tjo tjamo̧ judi cjiadiäa̧ japamitërä cjo̧ro̧paji̧ri̧ pio ji̧ri̧ chjiari. O judiro̧ putu jura̧ a̧dë chami̧ dari̧ jiadapadiro̧jo̧ȩ tjamo̧i̧ cjiari̧ baämȩ ma̧ȩ pio ju̧i̧. Jabechji̧ yaröcarë yürüa̧ ma̧ȩ pio ju̧i̧ ano̧ mire ta̧rë ja̧bopadiro̧jo̧ȩ. Aja̧, yaröcarë u̧i̧pea̧ duri pio ju̧i̧ ano̧ mire ba chia jo̧rȩtapadiro̧jo̧ȩ teracaba a̧ra̧ano̧rea̧ pio ju̧i̧.

² Pio jiro a̧ra̧ano̧rea̧ üdë chjuchjuti̧mi̧ baäpade davä teracabari̧ a̧ra̧ano̧ji̧ri̧ pio ji̧ri̧iä. Aja̧, ma̧ȩ tjamo̧i̧ cjia oa a̧ra̧ano̧cji̧ quëna̧ japaji̧ri̧rȩ u̧i̧papadiro̧jȩrȩ pumȩ ji̧ri̧, ma̧ȩ chjádë maea oa yürüji̧ri̧rȩ. Jabechji̧ chji̧ cotomi̧ daji̧ri̧rȩ u̧i̧pe u̧i̧pe a̧ra̧ano̧padirȩ, 'chjai̧dëri̧ japaquëda' quëna̧ jo̧rȩtadëji̧ri̧rȩ.

³ “Aja̧, iei̧ ëba̧ üdë chjadëdëde” yo̧padirȩ. "Ado pio jiro jurarea̧ üdë china̧chjade. Juradëpea̧de” yo̧padirȩ peaja̧di. Jabo cjäri̧ madirȩ, teracabari̧ a̧ra̧ano̧dirȩ. Eami̧ jurarea̧ üdë china̧chja ma ja̧didë, jabo jurapea̧ maeade. Ado quëna̧ji̧ri̧ judiro̧, tjamo̧i̧ cjiari̧ baämȩ ma̧ȩ pio ju̧i̧ dabaji̧ri̧ pio judiro̧, jabechji̧ chjadëri̧ dabadirȩ jurarea̧ pio ju̧i̧ chjiari. ‘Aja̧, pio jiro jurarea̧ üdë chjadëdida, Ütërë pareapea̧ oa cjiadida, chjadëri̧ yürüa̧diibëda, jurapea̧ oa yürüa̧diibëda’ quëna̧ jo̧rȩtaji̧ri̧rȩ jurapai̧ dadiro̧jo̧ȩ davä, eami̧ jurarea̧ oa. Jabechji̧ china̧chja ma ja̧didë.

⁴ Jabechji̧ Ütë tjamo̧ judi pareaparërea̧ jurarea̧ chjö̧na̧i̧rȩ chjadë maea tara, 'jabechji̧ chjadëri̧ yürüa̧diibëda' quëna̧ jo̧rȩtaji̧ri̧rȩ juratäreji̧ri̧rea̧ro̧jo̧ȩ, 'orëmo̧ china̧chja jirodida' quëna̧rea̧ decjiari̧.

⁵ Jabechji̧ a̧ro̧rȩ eami̧ jurarea̧ oa jura̧ ji̧, 'jabechji̧ Ütë tjamo̧ judi chjadëri̧ yürüa̧diibëda, ado pio judi yo̧a̧mi̧ jurapea̧dida' quëna̧ jo̧rȩtaji̧ri̧rȩ ni̧bärea̧ro̧jo̧ȩ. Ado ja̧di dari̧ japea̧ oaiä, jabechji̧ chjadëde davä jurapea̧ oa, 'juradëpea̧dida' quëna̧rea decjiari̧.

Jechu Quiricho pio ju̧i̧ ja̧ mu̧i̧tjoi̧ chjadë üdë ja̧di dari̧ japapea̧de

⁶ Danȩ Timoteo, cüdë go̧ȩpea̧ ma̧ȩra̧ pio ju̧ri̧ra̧ chjadëri̧ chi̧dëeapea̧ chiarenȩjȩrȩ ibëa̧ oti̧ ji̧ri̧, chi̧dëea ano̧rea̧ decjiari̧. Jabechji̧ mȩnȩ ja̧di dari̧ japamȩrȩ cjo̧ro̧rä judi, mȩnȩ Ütë ja̧ ma̧ȩ pio oaiä mairi̧ cjiami̧ dari̧ cjo̧ro̧rä judi, mȩnȩ pio jiro ma̧ȩ oa chjuari̧ quëna̧mȩrȩ ta̧rëdiärä judi, jabechji̧ chjadëri̧ ja̧bepamȩrenȩ Jechu Quiricho ja̧ oa.

⁷ Ado danȩ, ütëti̧rea̧ judiro̧ yo̧rërea̧ duri pio ju̧i̧ chjiari jo̧rȩtadëvä, jabo jabechji̧ aene aene ta̧rëvä. Jabechji̧ judiro̧ yo̧rërea̧ ma̧ȩ üdë badë maeade. Ado a̧dodë madimȩ Ütë tjamo̧ pio ju̧i̧iäpȩmo̧ chjuari̧ quëna̧pea̧ ji̧. Ado pio ju̧i̧iä jabechji̧, judiro̧ yo̧rërea̧ pio ju̧i̧ jo̧rȩtadëvä, jabo ji̧dë ma järiri̧ dabapavä Ütërë yo̧a̧mi̧ japapea̧ ji̧.

⁸ A̧ro̧rȩ ibëa̧ icjara oa ju to̧baparȩrä judi, ba chiade. Jabo danȩ, ji̧dë u̧i̧ ba chiade davä, ibëa̧ tjo oa ju to̧baparȩmi̧ dari̧ japapea̧ ji̧. Ja̧di tara chjadëri̧ dabapavä Timoteo. Chjadëri̧ dabapavä Ütë ja̧ ma̧ȩ maeara̧ jo̧rȩtariä cjo̧ro̧pea̧ ji̧, na̧ tjo üdë to̧bari̧ cjiami̧ dari̧ cjiapea̧ oa. Jabechji̧ ja̧di dari̧ cjo̧ro̧rä judi, tjamo̧ri̧ a̧dopadimȩ pio yoa chiri oa cjo̧ro̧pea̧ ji̧, a̧dëräpȩ cjo̧ro̧pea̧bo.

⁹ Aja̧ Timoteo, cüdë pio yabo yo̧a̧ ma̧ȩ üdë, na̧ tjo oa ju chiaparȩmi̧ dari̧ japapea̧ pio ju̧i̧ chjiari yo̧a̧ ma̧ȩ üdë, jabechji̧ tjamo̧i̧ cjiari̧ baäde. Ado pumȩ judiro̧ ütëbodärärë acji cjaeä ta̧rë matäreji̧ri̧diro̧jo̧ȩ.

¹⁰ Ado pio ju̧i̧iä a̧ro̧rȩ nö̧tarä yuro to̧bari̧ ja̧bepe cjiarea̧rȩ Ütë tjamo̧ ja̧ oa cjiadiärea̧ decjiari̧. Jabechji̧ ja̧bodëmȩ Ütë pio ju̧i̧ ma̧ chjua jo̧rȩtaji̧ri̧rȩ jidata oaiä, pumȩ ütëbodärä oa chjätärea̧ yürütämi̧ cjiamȩ pio ju̧i̧ jidata oaiä, jabechji̧ järiri̧ cjiari̧ ja̧beparea̧rȩ pio ju̧i̧ ja̧ oa, goaedë oa chjätäräbo. Jabechji̧ quëna̧ji̧ri̧ pio ji̧ri̧ tjamo̧ri̧ chjätä tänȩtämi̧ cjiamȩ pio ju̧i̧ jidataji̧ri̧rȩ ja̧beparea̧rȩ.

¹¹ Aja̧ Timoteo, pio yoa ma̧ȩ oa tobari̧ a̧ra̧ano̧jȩrȩ, ji̧dë ma chi̧dëeamȩrȩ.

¹² Ado danȩ, o judiro̧ mȩa bücjü darä judi, mȩnȩ pea ütëpea̧mȩ oa bücjü darä judi, jabechji̧ idëri̧ cjiadëvä jabo jabechji̧, coëma cjiari̧ cjo̧ro̧vä judiro̧ cho̧rë cjo̧ro̧rea̧mi̧ dari̧. Jabechji̧ mȩnȩ chjadëri̧ ni̧bäa̧ oaiä, mȩnȩ coëma cjiari̧ cjo̧ro̧a̧ oaiä, chjadëri̧ na̧rerenȩjȩrȩ. Tjamo̧ davä. Mȩnȩ pumȩ ji̧ri̧iäpȩmo̧ tjamo̧ri̧ eamȩrȩ cjo̧ro̧a̧ oaiä, mȩnȩ Ütë ju̧i̧iäpȩmo̧ chjuari̧ quëna̧ oaiä, mȩnȩ chjai̧dëri̧ jo̧rȩtadëmȩrȩ cjo̧ro̧a̧ oaiä, jabechji̧ o ji̧ri̧ chjadëri̧ na̧rȩrenȩjȩrȩ, judiro̧ pio mȩa cho̧rëdiärea̧mi̧ dari̧.

¹³ Ado danȩ, mȩnȩro̧ a̧dopea̧mi̧ nö̧ta, jabechji̧ chjadëri̧ go̧ȩ ni̧bävä Ütë tjamo̧ ja̧ ma̧ȩ oa cüdë pio mȩaiäpȩ go̧düdäräa̧rä yuro. Aja̧, ütëborë ta̧rërea̧mi̧ dari̧ go̧ȩ ni̧bävä. Ado pio jiro ma̧ȩra̧ chjadëri̧ chi̧dëeajȩrȩ. Ado a̧ra̧ano̧jȩrȩ peaja̧di. Cüdë mȩaiäpȩ go̧düdäräa̧rä yuro chjadëri̧ a̧ra̧ano̧jȩrȩ.

¹⁴ Ado danȩ, Tjo tjamo̧ judi mȩa yürüa̧ ja̧beparea̧ra̧ pio ju̧ri̧ra̧ chjadëri̧ ja̧bepavä, daburäpȩmo̧ mu̧i̧ cürëmi̧ dari̧ japarea̧ decjiari̧. Jabechji̧ pio jiro ja̧beparea̧ oa chiamȩpea̧renȩ pio mȩa chjiari ni̧bäji̧ri̧ pio judiro̧ ni̧bärërea̧mi̧. Aja̧, Ütërë daba tänȩa̧ oa ni̧bäji̧ri̧ pio judiro̧ ni̧bärërea̧ ji̧, tjamo̧ jidaji̧ri̧ judiro̧ pio mȩa ja̧ȩ cjiadärärërea̧ ji̧, jabechji̧ pio jiro ja̧beparea̧ chiamȩpea̧renȩ Tjo tjamo̧ pio judi yürüa̧ oaiä. Ado pio ju̧i̧iä yo̧requedemȩ. Jabechji̧ a̧dë jo̧rȩtadëjo̧ȩ na̧ ja̧beparea̧ oa.

¹⁵ Ado cüdë mȩa go̧ȩpe chjadüa̧ chjö̧na̧i̧ oa goae tarari̧ ta̧rë ta̧rë japavä. Aja̧ Timoteo, cja̧rȩmȩ coëma cjiadiä maeari̧ ja̧bepavä pumȩ judiro̧ pio mȩa chjiari chjadëri̧ quëna̧pea̧ oa, ‘Aja̧, Timoteo judi chjadëri̧ ja̧bepamȩdida, dae järea̧mi̧ dari̧ ja̧bepadida’ quëna̧pea̧ oa.

¹⁶ Ado ji̧dë ma nae chiavä pio mȩa chjiari. Ado mȩnȩ ji̧dë ma coëma cjiari̧ a̧ra̧ano̧pea̧ ji̧ peaja̧di na̧e chiavä. Jabechji̧ coëma cjiari̧ baämȩ no̧ro tai̧mi̧ dari̧ cjo̧ro̧vä, tjamo̧i̧ cjiari̧ baämȩ ma̧ȩ oa acji mitëmi̧ dari̧. Jabechji̧ mȩnȩ chjadëri̧ ta̧rëdiäa̧ oaiä, jabechji̧ chjadëri̧ chjätärea̧ daparenȩ, pio mȩa ta̧rë ja̧boji̧ri̧ pio judiro̧borë.