Timoteo Ma̧ȩ 1 3 - Biblia Pume

Ja̧di dari̧ cjo̧ro̧täreji̧ri̧dirȩ tjamo̧ jidaji̧ri̧ judiro̧

¹ Tjamo̧i̧ cjiari̧ yo̧requedemȩ Timoteo. Eami̧ pumȩrȩ quëna̧ji̧ri̧ pio ji̧ri̧ tjamo̧ jidamȩtämi̧ cjiarä judi, ja̧beparea̧ ba chia tjamo̧ oa eade.

² Ado pio ju̧i̧iä yo̧requedemȩ. Pio jiro ja̧beparea̧ oa ja̧bepatämi̧ cjiamȩ judi, chjadëri̧ cjo̧ro̧täremȩde. Tjamo̧ davä. Ütë tjamo̧ ju̧i̧ quëna̧ji̧ri̧ pio ji̧ri̧ jidatämi̧ cjiamȩ judi chjadëri̧ cjo̧ro̧täremȩde. O judiro̧ pio jȩaiäpȩmo̧ aeno̧rea̧mi̧dëri̧ cjo̧ro̧täremȩde. Aja̧, jibëa̧ iei̧ pio ji̧mo̧ jo̧rȩtatäremȩdejȩ, a̧de ëba mo̧a̧rea̧ decjiari̧. Tüdüa̧rämo̧ cjo̧ro̧mi̧ dari̧ cjo̧ro̧täremȩde davä, ma̧i̧ dari̧ japarea̧ decjiari̧. Ado jibëa̧ icjararä chjai̧dë pio ju̧i̧ boadärämi̧ dari̧ goatäremȩdejȩ. Ado chjadëri̧ ütarë jo̧rȩtarea̧ chiamȩrȩ cjo̧ro̧täremȩde. Ado jënȩ cja̧rȩmȩ co daba dadëa̧ pumȩ pio ji̧ri̧ ba chia datäremȩdejȩrȩ. Ado jibëa̧ bëräpȩ go̧düdärärä judi, jabechji̧ chjadëri̧ jȩatäremȩdejȩrȩ. Chjadëri̧ ëba cjo̧ro̧täremȩdejȩrȩ. Ado Ütë tjamo̧ ja̧ ma̧ȩ oa a̧ra̧ano̧rea̧ chiatäremȩde.

³ Ado yu̧i̧pe järi̧ a̧dë chjäte jaradëtäremȩde. Chjaodëri̧ ma̧ cjüëtope bagadëtaremȩde. Jabechji̧ jibëa̧ pumȩ pio ji̧ri̧ chjaodëri̧ cjae cjae guadëtäremȩdejȩrȩ, jabo ma̧ chjua datäremȩdejȩrȩ, ba chia jo̧rȩtamȩrȩ. Ado chjadëri̧ ni̧bä chjaomȩtäremȩde. Ado chjaodëri̧ goëdëri̧ cjiape bagadëtäremȩdejȩrȩ o ji̧ri̧. Ado peaja̧di chëre goaradëtäremȩde. Jabechji̧ chëre maea oa jo̧rȩtamȩrȩ cjo̧ro̧dëtäremȩde.

⁴ Ado chjadëri̧ jidatäremȩdejȩrȩ jibëa̧ iei̧ pio ji̧, jibëa̧ bori̧ pio ji̧ri̧. Chjadëri̧ a̧ra̧ano̧täremȩdejȩrȩ. Chjadëri̧ a̧dotäremȩdejȩrȩ pio jȩa chjadëri̧ ta̧rëdiärea̧mi̧ dari̧, pio jȩaiäpȩmo̧ ba chia jo̧retarea̧mi̧ dari̧.

⁵ Jabechji̧ jibëa̧ pumȩ ji̧ri̧ chjadëri̧ jidarea̧ dadërä judi, jibëa̧ bori̧ ji̧ri̧ chjadëri̧ jidapea̧ ji̧ dabadërä judi, ¿yö̧ta dari̧ jidarea̧ dapadejȩrȩ Ütë tjamo̧ ja̧ a̧doparea̧ oa? Cjäri̧ madejȩ, chjadëri̧ jidarea̧ dadëpadejȩ.

⁶ Ado danȩ, tjamo̧ jidamȩ pio judi pea quëna̧mȩdëtäremȩde. Jabechji̧ pea quëna̧mȩ pio judi mitëdëpea̧de. Jabechji̧ pea quëna̧mȩ pio judi chjaodëri̧ oëra̧ jo̧rȩtapai̧ dade. ‘Aja̧, o ji̧ri̧ u̧i̧ ba chiamȩ oa mitëa̧diro̧coada’ quëna̧pai̧ dade chjaodëri̧. Jabechji̧ Ichiae judi jibëa̧ chji̧rämo̧ jo̧rȩtatarërea̧mi̧ jo̧rȩtapai̧ dade peaja̧di. Ado Ichiae pio judi oëra̧diäa̧rërea̧mi̧ oëra̧diäpai̧ dade peaja̧di. Pio ju̧i̧iä mitëdëpea̧de.

⁷ Ado tjamo̧ jidamȩ pio ju̧i̧ chjiari chjadëri̧ jo̧rȩtatäreji̧ri̧dirȩ quëna̧dëji̧ri̧ pio judiro̧borë. ‘Aja̧, pumȩ chjadëdida’ quëna̧rä judi goadi goadi ya̧dëpadiro̧jo̧ȩ. 'Jabo pumȩ chjadëdëdida’ quëna̧rä judi, dëdë, goadi goadi ya̧pai̧ dadiro̧jo̧ȩ chjaodëri̧. Ado pio ju̧i̧ goë goë ta̧rëa̧ oaiä, Ichiaerë u̧i̧pea̧ oa cjiapai̧ dade, puërä choë cjatämi̧ dari̧.

Ja̧di dari̧ cjo̧ro̧täreji̧ri̧dirȩ a̧doji̧ri̧ judiro̧

⁸ Ado a̧doji̧ri̧ judiro̧ peaja̧di dari̧ cjo̧ro̧täreji̧ri̧dirȩ. Pumȩ judiro̧ ‘Pumȩ chjadëdiro̧da, ba chiadiro̧da, quëna̧rea̧mi̧ dari̧ cjo̧ro̧täreji̧ri̧dirȩ. Ado chjara chia ni̧bädë matäreji̧ri̧dirȩ. Ado yu̧i̧pe järi̧ a̧dë chjäte jaraji̧ri̧dëtäreji̧ri̧dirȩ. Peaja̧di chëre goaradëtäreji̧ri̧dirȩ.

⁹ Ado goadia̧ oa cjiarërea̧ ma̧ȩ pio ju̧i̧ chjuari̧ quëna̧ji̧ri̧rȩ cjo̧ro̧täreji̧ri̧dirȩ, Ütërë daba tänȩrërea̧ ma̧ȩ pio ju̧i̧. Ado chji̧ chjadëra̧ jo̧rȩtaji̧ri̧rȩ cjo̧ro̧täreji̧ri̧dirȩ, cjo̧dërë tüe baämi̧ dari̧ jo̧rȩtarea̧ decjiari̧.

¹⁰ Jabo a̧domȩ pio ju̧i̧ mitërä, jëreeaji̧ri̧rȩ mitëpea̧de, jabo chjadëri̧ ütarë da ëte mitëpea̧de. ‘Aja̧, ja̧di dari̧ cjo̧ro̧dida, ado quëna̧ji̧ri̧ pio ji̧ri̧ ja̧di dari̧ a̧dodiji̧ri̧da’ quëna̧ jo̧rȩtapea̧de jabërä. Ado ja̧dëa ji̧ judi chjadëri̧ japarä judi, judi tjamo̧ri̧ nö̧tarä judi, dëdë, mitëpea̧de.

¹¹ Ado a̧doji̧ri̧ ja̧ ivi jini̧ro̧ peaja̧di dari̧ cjo̧ro̧täreji̧ri̧ni̧rȩ. ‘Jabechji̧ ivi chjadëni̧ro̧da, ba chia jo̧rȩtadiro̧ji̧ri̧da, o ji̧ri̧iäpȩmo̧ goadi ya̧dë madiro̧da, o ji̧ri̧iäpȩmo̧ aechide yo̧dë madiro̧da’ quëna̧rea̧mi̧ dari̧ cjo̧ro̧täreji̧ri̧ni̧rȩ. Jabechji̧ tüdüa̧rämo̧ cjo̧ro̧mi̧ dari̧ cjo̧ro̧täreji̧ri̧ni̧rȩ, chjadëri̧ na̧rȩriä cjo̧ro̧ji̧ri̧rȩ. ‘Aja̧, jibëa̧ ja̧beparea̧ oa chjadëri̧ ja̧bepani̧ro̧da, jënȩro̧ yo̧a̧mi̧ japani̧ro̧da" quëna̧rea̧mi̧ dari̧ cjo̧ro̧täreji̧ri̧ni̧rȩ.

¹² Ado a̧doji̧ri̧ judiro̧, jabechji̧ cja̧rȩmȩ iei̧ pio ji̧mo̧ ëbatäreji̧ri̧dirȩ. Ado jibëa̧ bori̧ pio ji̧ri̧ chjadëri̧ jidatäreji̧ri̧diro̧jȩrȩ, jibëa̧ iei̧ pio ji̧bo, jibëa̧ bërä cjo̧ro̧ji̧ri̧ ütëbo oa.

¹³ Ado a̧doji̧ri̧ judiro̧ quëna̧ji̧ri̧ pio ji̧ri̧iäpȩmo̧ chjadëri̧ a̧dorä judi, jabechji̧, ‘ba chia tjamo̧diro̧da, chjadëri̧ ja̧bepadiro̧da, ibë chjadëri̧ a̧dodiro̧ibëda’ quëna̧ jo̧rȩtaji̧ri̧rȩ dapadiro̧jȩrȩ. Ado a̧doji̧ri̧ judiro̧ quëna̧ji̧ri̧ ji̧ri̧iäpȩmo̧ chjadëri̧ a̧doa̧ oaiä, jabechji̧ ji̧dë u̧i̧ chjuari̧ quëna̧rea̧ dapadiro̧jo̧ȩ Jechu Quiricho pio ju̧i̧.

Goadia̧ oa cjiarërea̧ ma̧ȩ pio ju̧i̧ daba tänȩrëremȩdiibe Ütë tjamo̧ judi

¹⁴ Cüdë mȩaiäpȩ jo̧ȩra̧pe go̧düdärätämi̧ cjiamȩborë go̧ȩpe chjadürequedemȩ ma̧ȩ oa.

¹⁵ Jo̧ȩra̧pe jäe datämi̧ cjiarequedemȩ jabo jo̧ȩra̧pe go̧düdärärea̧ dadërä judi, jabechji̧ cüdë go̧ȩpe chjadüa̧ ma̧ȩ pio oaiä dabarea̧ daparenȩ. Tjamo̧ davä. Cüdë pio yoa ma̧ȩ oa chjadüa̧ oaiä, ‘Aja̧, ja̧di dari̧ cjo̧ro̧täreji̧ri̧diro̧da, Ütë tjamo̧ ja̧ pumȩ judiro̧ ja̧di dari̧ cjo̧ro̧täreji̧ri̧diro̧da’ quëna̧ dabarea̧ daparenȩ. Danȩ Timoteo, Ütë tjamo̧ ja̧ pumȩ judiro̧ ja̧bodëmȩ Ütë pio ju̧i̧ ja̧ a̧doparea̧ maearea̧rȩ. Ado pio ibëiä, a̧dopaji̧ri̧ pio ji̧ri̧iä, jabechji̧ a̧rë a̧ra̧mi̧ dari̧ cjiade tjamo̧i̧ cjiari̧ baämȩ ma̧ȩ üdë. Jabechji̧ pio ibëiä to̧bari̧ ni̧bäa̧ oa cjia̧ oaiä, pio ibëiä a̧ra̧ano̧a̧ oa cjia̧ oaiä, pio ibëiä chjadëri̧ jida̧ oa cjia̧ oaiä, jo̧ taru yuimi̧ dari̧ cjiarea̧rȩ, pio jiro ma̧ȩ oa a̧rë a̧ra̧mi̧ dari̧ japaji̧ri̧rȩ.

¹⁶ Ado a̧ro̧rȩ Jechu Quiricho pio ju̧i̧ chjiari quëna̧ üdë, ‘jabechji̧ a̧dë chjäte ba chiadida’ quëna̧ dabarea̧rȩ. Jabechji̧ pio jiro ma̧ȩ üdë goadia̧ oa cjiami̧ dari̧ cjiarërea̧ ji̧, chjadëri̧ daba tänȩrëremȩdiibe Ütë tjamo̧ judi. Aja̧, pio yoa ma̧ȩ oa dabapa tänȩrëremȩdiibe. Ta̧rëchji̧vä: "Quiricho judi a̧dëräpȩrëremȩrȩ birarëremȩde pumȩpapea̧ oa. Ado Tjo tjamo̧ pio judi daba tänȩrërea̧ oaiä, ‘Aja̧, Quiricho judi cja̧rȩmȩ co chjai̧dëri̧ japadëa̧dida, coëma cjiari̧ cjo̧ro̧mȩdida’ quëna̧ dabarea̧mi̧ dapea̧de. Ado pumȩ chjarerä cjo̧ro̧mȩpea̧mȩ oa darëreji̧ri̧diro̧jo̧ȩ a̧dëräpȩ mu̧i̧tjoi̧ judiro̧. Ado pio ju̧i̧ chjiari ma̧ȩ üdë to̧bari̧ a̧ra̧ano̧a̧ oa cjiarëremȩde chiri nö̧tai̧ oa cjo̧ro̧ji̧ri̧ pio ji̧ri̧ ja̧ chjarerä. Ado a̧ra̧ano̧a̧ oa cjiadiäa̧ oaiä, jabechji̧ no̧i̧dë tjamo̧rȩ quëna̧ji̧ri̧pea̧dirȩ. Ado ja̧dëa ji̧ ütara̧ doro, Ütë tjamo̧ judi ado chjereno̧ cjitë tänȩrëremȩdejȩ a̧dëräpȩ baäpea̧ oa."