Timoteo Ma̧ȩ 1 2 - Biblia Pume

Mȩnȩro̧ a̧doparä ibëa̧ Ama̧i̧ pio ju̧i̧iä goë cjo̧dëriäpea̧de

¹ A̧dë chjäte ba chia maeara̧ chi̧dëearequedemȩ Ütë tjamo̧ pio ju̧i̧iäpȩmo̧ ni̧bäpea̧ pio ju̧i̧ chjiari. Jabechji̧ mȩnȩro̧, quëna̧ji̧ri̧ pio judiro̧ Ütë tjamo̧ pio ju̧i̧iäpȩmo̧ ni̧bärä, jabechji̧ mȩnȩro̧ jabëdiächea oa cjo̧dëtäreji̧ri̧renȩro̧jo̧ȩ babui̧ra̧. Pumȩ ütëbodärä pio ji̧ri̧ chjiari goë cjo̧dëtäreji̧ri̧nȩrȩ peaja̧di. ‘Aja̧, Ütë tjamo̧ judi chjadë tjamo̧diibëda, chjadëri̧ yürüdiibëda’ quëna̧ jo̧rȩtaji̧ri̧rȩ goë cjo̧dë chjaotäreji̧ri̧renȩro̧jo̧ȩ babui̧ra̧.

² Ado chiri ütë cjo̧ro̧ji̧ri̧ pio ji̧ri̧ chjiari, chiri tjamo̧ cjo̧ro̧ji̧ri̧ pio ji̧ri̧ chjiari goë tuti cjo̧dëtäreji̧ri̧rea̧rȩ peaja̧di jibëa̧ ja̧beparea̧ oa chjadëri̧ datä a̧ro̧rȩ chjadëri̧ cjo̧ro̧rea̧ dapea̧ oa, conȩdarea̧ decjiari̧, uaparea̧ decjiari̧ cjo̧ro̧rea̧ dapea̧ oa. Aja̧, a̧ro̧rȩ Ütë tjamo̧ pio ju̧i̧ ba chia jo̧rȩtaji̧ri̧rȩ cjo̧ro̧rea̧mi̧ dari̧, a̧ro̧rȩ Ütërë yo̧a̧mi̧ japarea̧mi̧ dari̧ goë tuti cjo̧dëtäreji̧ri̧rea̧rȩ tjamo̧ yo̧ji̧ri̧ pio ji̧ri̧ chjiari, pio judiro̧ chjadëri̧ ja̧beparea̧ datä.

³ Jabechji̧ ja̧di dari̧ goë cjo̧dëpea̧ üdë chjadëde. Ado ibë chjätä tänȩmȩ Ütë pio ju̧i̧iäbo chjadëde.

⁴ Jabechji̧ pio judide pumȩ ütëbodärä oa chjätärea̧ datä eamȩ judi. Tjamo̧ davä. Ütëbodäräti̧ oa tjamo̧i̧ cjiari̧ baämȩ ma̧ȩ pio ju̧i̧ dabapadärärea̧ datä eadejȩrȩ.

⁵ Jabechji̧ Ütë tjamo̧ judi cja̧rȩmȩde. Ado tjoromȩ judi, tuti japamȩ judi peaja̧di cja̧rȩmȩde. Pumȩde. Jechu Quiricho pio judide. Pio judi tuti japarëremȩde pumȩ pio ji̧ri̧ chjiari, judiro̧ Ütë tjamo̧ pio ju̧i̧ nö̧ta ëba cjiarea̧mi̧ dari̧.

⁶ Aja̧, ütëbodärä ja̧ chjiari tuti yürürëremȩdejȩ jibëa̧ icjara oa tuti ba ano̧pea̧ oa pumȩ judiro̧ chjai̧dëri̧ japea̧ pio ju̧i̧ chjiari. Aja̧ pumȩ pio ji̧ri̧ go̧dü tänȩpea̧ oa tuti yürürëremȩdjȩ jibëa̧ icjara oa. Ado pio ju̧i̧ chjiari ma̧ȩ oa yürürëremȩdiibe ütëbodärä oa Ütë tjamo̧ judi jënȩ ütarë jo̧rȩtarërea̧ doro.

⁷ Ado pio jiro ma̧ȩ oa to̧bari̧ ni̧bäpea̧ oa mitërëremȩdique. Pio jiro ma̧ȩra̧ ja̧bepapea̧ oa mitë chjadürëremȩdique Jechu judi. Tjamo̧i̧ cjiari̧ yo̧requedemȩ Timoteo, ma̧ȩ chjádë yürüdëmȩrȩ. Jabechji̧ judiodë pio ji̧ri̧iäpȩmo̧ a̧ra̧ano̧pea̧ oa mitërëremȩdique judiro̧ tjamo̧i̧ cjiari̧ baämȩ ma̧ȩ pio ju̧i̧ quëna̧pea̧ oa.

Oari judiro̧ ado ivi jini̧ro̧, ja̧di dari̧ japatäreji̧ri̧dirȩ jënȩro̧ a̧doparä

⁸ Ado mȩnȩro̧ eami̧räpȩ a̧dopea̧mi̧ nö̧ta, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa a̧dopea̧mi̧ nö̧ta, jabechji̧ oari pio judiro̧ ni̧bätä earequedejȩrȩ Ütë tjamo̧ pio ju̧i̧iäpȩmo̧. Aja̧, Ütë ja̧ ma̧ȩrä cjo̧ro̧ji̧ri̧ oari pio ji̧ri̧, jibëa̧ pumȩ ji̧ri̧ ma̧ cjüëtüri̧ jo̧rȩtadëji̧ri̧ pio ji̧ri̧, o ji̧ri̧iäpȩmo̧ ya coëri̧ ni̧bädëji̧ri̧ pio ji̧ri̧ goë ni̧bäriätä earequedejȩrȩ.

⁹ Ado quëna̧ji̧ri̧ ivi pio jini̧ro̧ a̧dopea̧mi̧ nö̧ta, jabechji̧ chjadëri̧ ina̧täreji̧ri̧ni̧rȩ. Jabechji̧ oarirë pio jibëiäpȩmo̧ dae ja̧bo dapea̧ oa ina̧dëtäreji̧ri̧ni̧rȩ, jabo chjadëri̧ ütara̧mi̧ ina̧täreji̧ri̧ni̧rȩ, o ji̧ri̧iäpȩmo̧ ana̧ri̧ na̧rȩchea oa. Jabechji̧ jibëa̧ cö̧ oa jëdano̧a̧ ji̧, jibëa̧ tjärichji oa i̧a̧ ji̧, jibëa̧ ta̧ra̧ märärea̧ oa cji̧däa̧ ji̧, 'Jaeboquëda, ana̧ri̧ na̧rȩrea̧mi̧ dari̧ japatäreyi̧quëda, chjibo ba chia maeara̧ ina̧täreyi̧quëda, orora̧bo japatäreyi̧quëda, ta̧dë ba chiara̧ a̧de i̧a̧täreyi̧quëda' quëna̧ jo̧rȩtadë matäreji̧ri̧ni̧rȩ jabo chjadëri̧ ina̧ oa cjiatäreji̧ri̧ni̧rȩ.

¹⁰ Jabechji̧ badë maeara̧ na̧rȩdëtäreji̧ri̧ni̧rȩ jabo ba chia tjamo̧ra̧ pio ju̧ri̧ra̧ na̧rȩtäreji̧ri̧ni̧rȩ jënȩro̧ chjadëri̧ japea̧ oaiä. Tjamo̧ davä. Ja̧di dari̧ cjo̧ro̧täreji̧ri̧ni̧rȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧ ivi jini̧ro̧.

¹¹ Ado ivi jini̧ro̧ a̧dopea̧ bëräpȩ ju̧ri̧, jabechji̧ cjapi ta̧rë chatäreji̧ri̧ni̧rȩ chjadëri̧ dabapapea̧ oa. A̧ra̧ano̧mȩ pio ju̧i̧ a̧dë jo̧retarea̧ decjiari̧ chjadëri̧ ta̧rë ja̧bo ta̧rë chatäreji̧ri̧ni̧rȩ ‘chjadëri̧ dabapapea̧ chiaquëda’ quëna̧ jo̧rȩtaji̧ri̧rȩ.

¹² Ado danȩ, ivi jini̧ro̧ a̧ra̧ano̧rea̧mi̧dëni̧ro̧jȩrȩ oari ji̧ri̧. Tjamo̧ yo̧ji̧ri̧ ma ja̧didë. Jabechji̧ cjapi ta̧rë chatäreji̧ri̧ni̧rȩ a̧doparea̧ bëräpȩ.

¹³ Danȩ, Ada̧ pio judi yabochjarë jüdüpea̧ oa cjiarëremȩde, Eva jini̧dë. Jabechji̧ ji̧dë duri oa jüdüpea̧ oa cjiarëreyi̧nȩ.

¹⁴ Ado Ichiae judi u̧i̧parërea̧ ji̧, Ada̧ judi u̧i̧pea̧ oa cjiadiädëa̧de, jabo Eva pio jini̧ u̧i̧pea̧ oa cjiadiärëreyi̧nȩ. Pio jini̧ chjai̧dëri̧ japarëreyi̧nȩ ta̧rëdiätärea̧ ji̧.

¹⁵ Jabo ja̧di dari̧ japea̧räbo, jabechji̧ a̧ra̧ano̧rea̧ dani̧rȩ ivi jini̧ro̧. Jabechji̧ tutia̧ oa cjiami̧ dari̧ cjiani̧rȩ jënȩro̧ ara̧ pio ji̧ri̧ a̧ra̧ano̧pea̧ oa judiro̧ chjadëri̧ ta̧rë ütëparȩa̧ oa cjiapea̧ oa. Ado jini̧ro̧ jibëa̧ bori̧ pio ji̧ri̧ a̧ra̧ano̧pea̧ oa, jabechji̧ Ütë pio ju̧i̧iäpȩmo̧ chjuari̧ quëna̧ji̧ri̧rȩ cjo̧ro̧täreji̧ri̧ni̧rȩ ütëbo oa eaji̧ri̧rȩ, Ütë ja̧ oa china̧chjari̧ tutia̧ oa cjiami̧ dari̧ cjo̧ro̧ji̧ri̧rȩ, oëadëyi̧mi̧ dari̧ cjo̧ro̧dëji̧ri̧rȩ.