Timoteo Ma̧ȩ 1 1 - Biblia Pume

Taruparea̧ Ma̧ȩ

¹ Pablo quȩmȩrequede cüdë. Ibë Chjätä Tänȩmȩ Ütë pio judi yo̧a̧ oa, Jechu Quirichorë chjadüa̧requede. Ado ibë jidatarea̧ yürümȩ pio judiborë yo̧a̧ oa, Jechurë chjadüa̧requede cüdë, Jechu Quiricho pio judiborë yo̧a̧ oa.

² Pio yoa ma̧ȩ oa go̧ȩpe chjadürequedemȩ Timoteo, ca̧ ja tjamo̧ oa. Jabechji̧ pio cüdë a̧ra̧ano̧a̧ oaiä, quëna̧mȩpea̧renȩ. Ja̧di tara jarequedemȩ. Ibëa̧ Ama̧i̧ Ütë judi, ibëa̧ Ano̧mȩ Jechu Quiricho pio judiborë chjamȩ yürütädiro̧mȩ. Aja̧, cjäri̧ri̧ cjia jo̧rȩtatädiro̧mȩ, mȩnȩ ma̧ chjupi̧ cjiari̧ jo̧rȩtarea̧mi̧ dari̧.

Ja̧di dari̧ japapea̧de oëra̧ a̧ra̧ano̧ji̧ri̧ pio ji̧ri̧ chjiari

³ Danȩ Timoteo, cüdë Machedonia quȩmȩräpȩ järërea̧ ji̧, chi̧dëea̧requedemȩ Epjechoräpȩ cjiadiätä, pumȩ pio ji̧ri̧ chjadëri̧ a̧dopea̧ oa. Ado yaba̧ ado chjereno̧ chi̧dëearequedemȩ ca̧ ja. Jabechji̧ Epjechoräpȩ cjiadiävä oëra̧ a̧ra̧ano̧ji̧ri̧ pio ji̧ri̧ to̧bari̧ chi̧dëeapea̧ oa. Judiro̧ oëra̧ a̧ra̧ano̧chea oa, judiro̧ teracabari̧ a̧ra̧ano̧chea oa, jabechji̧ to̧bari̧ chi̧dëeajȩrȩ, judiro̧ a̧de a̧ra̧ano̧chea oa.

⁴ Danȩ, teracaba oa jo̧rȩtaji̧ri̧rȩ ni̧bä chjaodëtäreji̧ri̧dirȩ. Jibëa̧ ütëti̧rea̧ judiro̧ yo̧rërea̧ duri pio ju̧i̧, tjamo̧i̧ cjiari̧ baädëmȩ ma̧ȩ pio ju̧i̧ ji̧dë ma ni̧bä chjaodëtäreji̧ri̧diro̧jo̧ȩ. Tjamo̧ davä. Jibëa̧ tarurea̧ pio ji̧ri̧ ja̧ quȩ oa, no̧mȩ cjo̧ro̧rëreji̧ri̧ pio ji̧ri̧rea̧ ja̧ quȩ oa, no̧mȩri ja̧ go̧ȩpea̧ oa cjiarërea̧ quȩ oa ji̧dë ma ni̧bä chjaodëtäreji̧ri̧dirȩ. Jabechji̧ pio ju̧i̧ chjiari ana̧ri̧ ni̧bä chjaoa̧ üdë a̧dodë madejȩrȩ jabo no̧dë oa jä tänȩmi̧ dari̧ japadejȩrȩ, judiro̧ jibëa̧ dëbëti̧ra̧ chia goëdëri̧ cjiape bagari̧. Ado pio jiro ma̧ȩ teracaba üdë Ütë tjamo̧ ja̧ oa ji̧dë u̧i̧ chjadëri̧ ta̧rëdiäpea̧ oa a̧dodëpadejȩrȩ jabo Jechu pio ju̧i̧ chjuari̧ quëna̧ oaiämo̧i̧ chjadëri̧ a̧doa̧ oa cjiapadirȩ. Pio ju̧i̧iä badë oa ni̧bä chjaodëtäreji̧ri̧dirȩ.

⁵ Pio ju̧i̧iä yo̧requedemȩ Timoteo. To̧bari̧ chi̧dëeajȩrȩ. Jibëa̧ dëbëti̧ra̧ chia ea tjamo̧ji̧ri̧rȩ cjo̧ro̧tä chi̧dëeajȩrȩ. Danȩ, ¿tjana̧ri cjitëde tjamo̧ri̧ ea̧ üdë? Tjana̧ridë, jabechji̧ coëma cjiari̧ jo̧rȩtarea̧ chji̧ri pio judiri cjitëde. Cjo̧dërë tüe baämi̧ dari̧ jo̧rȩtadëmȩ chji̧ri pio judiri cjitëde. Yadë maeara̧ quëna̧mȩ chji̧ri pio judiri cjitëde. Ado ja̧di dari̧ eaji̧ri̧rȩ cjo̧ro̧täreji̧ri̧dirȩ.

⁶ Jabo a̧ra̧ano̧ji̧ri̧ judiro̧ orë, cjäri̧ madirȩ, judiro̧ ja̧di dari̧ cjo̧ro̧tärea̧ ji̧, chji̧ chjadëra̧ jo̧rȩtatärea̧ ji̧, jibëa̧ pumȩ pio ji̧ri̧ eaji̧ri̧rȩ cjo̧ro̧tärea̧ ji̧, ja̧di dari̧ cjo̧ro̧dëdirȩ. Ado ja̧di dari̧ cjo̧ro̧dëa̧ oaiä, ma̧i̧ dari̧ oëra̧diäa̧dirȩ, badë ma̧ȩ maea oa ni̧bä chjaorea̧ jo̧rȩtaji̧ri̧rȩ. Ado teracaba maea oa ni̧bä chjaoa̧ pio ju̧i̧iä, jabechji̧ taria̧ oa cjiami̧ dari̧ cjiaji̧ri̧pea̧dirȩ.

⁷ Jabechji̧ Moicherë go̧ȩparërea̧ ma̧ȩ pio ju̧i̧ a̧ra̧ano̧ji̧ri̧tämi̧ cjiaji̧ri̧pea̧dirȩ. Jabo judiro̧ chjadëri̧ a̧ra̧ano̧tärea̧ ji̧, jabë dabapadëa̧ ma̧ȩ pio ju̧i̧ to̧bari̧ a̧ra̧ano̧tadirȩ. Jabo cjäri̧ madirȩ, chjadëri̧ dabadëdirȩ. Urëdi oa jo̧rȩtadëdirȩ. Pio ju̧i̧iä teracaba maea oa a̧ra̧ano̧ chjaodirȩ.

Moicherë go̧ȩparërea̧ ma̧ȩ üdë, chjai̧dëri̧ japamȩ ja̧de

⁸ Danȩ, Moicherë go̧ȩparërea̧ ma̧ȩ üdë, ichi chjö̧na̧i̧ ma̧ȩ üdë ‘chjadëdida, ma̧ȩ coëmadida’ quëna̧ dabarea̧rȩ. Jabo danȩ, chjadëri̧ a̧ra̧ano̧pea̧de. Oëra̧ a̧ra̧ano̧dëpea̧de. Jabechji̧ pio jiro ma̧ȩ üdë, ‘Aja̧, ja̧di dari̧ a̧ra̧ano̧pea̧dida, ja̧di dari̧ ja̧bepapea̧dida, quëna̧dëmȩ pio ju̧i̧iäpȩmo̧ ja̧di dari̧ jo̧rȩta tänȩpea̧dida’ quëna̧ jo̧rȩtamȩrȩ a̧ra̧ano̧pea̧de.

⁹ Jabechji̧ coëma cjiari̧ cjo̧ro̧ji̧ri̧ pio ji̧ri̧ ja̧ oa go̧ȩpea̧ oa cjiadërëremȩde ichi chjö̧na̧i̧ ma̧ȩ üdë, jabo chjai̧dëri̧ cjo̧ro̧ji̧ri̧ pio ji̧ri̧ ja̧ oa go̧ȩpea̧ oa cjiarëremȩde. Tjamo̧ davä. Jiadamȩ pio ju̧i̧ ja̧ oa, ta̧ra̧ puë chiadëmȩ pio ju̧i̧ ja̧ oa go̧ȩpea̧ oa cjiade. Ütë tjamo̧ ju̧i̧ uapadëmȩ ja̧ oa, Ütë tjamo̧ pio ju̧i̧iäpȩmo̧ ji̧dë ma chjai̧dëri̧ japamȩ ja̧ oa, Ütë tjamo̧ ju̧i̧iäpȩmo̧ chjacjiamȩri̧ jo̧rȩtadëmȩ ja̧ oa, Ütë tjamo̧ ju̧i̧ eadëmȩ pio ju̧i̧ ja̧ oa go̧ȩpea̧ oa cjiade. Tjamo̧ davä. Jäjäa pio ju̧i̧ ja̧bo tänȩmȩ ja̧ oa, jojini̧ pio ji̧ ja̧bo tänȩmȩ ja̧ oa go̧ȩpea̧ oa cjiade. Aja̧, jibëa̧ pumȩ ji̧ri̧ ja̧bo tänȩmȩ pio ju̧i̧ ja̧ oa go̧ȩpea̧ oa cjiade Moicherë go̧ȩparërea̧ ma̧ȩ üdë.

¹⁰ Ado jibëa̧ iei̧dë i̧a bae ëba mo̧a̧mȩ ja̧ oa, jibëa̧ üi̧dë oa baë ëba mo̧a̧yi̧ ja̧ oa, jibëa̧ io oa goaramȩ ja̧ oa, jibëa̧ io i̧a goarayi̧ ja̧ oa go̧ȩpea̧ oa cjiade Moicherë go̧ȩparërea̧ ma̧ȩ üdë. Tjamo̧ davä. Pumȩ ji̧ri̧ baë goa baämȩ ja̧ oa, pio ji̧ri̧ chjiari chëre oa baë cjo̧dëmȩ ja̧ oa, ma̧ȩ chjádë yürümȩ ja̧ oa, jibëa̧ pumȩ ji̧ri̧ chjiari ma̧ȩ chjádë yürümȩ ja̧ oa, go̧ȩpea̧ oa cjiade davä, Moicherë go̧ȩparërea̧ ma̧ȩ üdë, tjamo̧i̧ cjiari̧ baämȩ a̧ra̧ano̧rea̧ ma̧ȩ pio ju̧i̧ jiadamȩ ja̧ oa.

¹¹ Ado pio jiro a̧ra̧ano̧rea̧ ma̧ȩ üdë ji̧mo̧ baäde davä, cüdë a̧ra̧ano̧a̧ ma̧ȩ pio ju̧i̧ nö̧ta. Ji̧mo̧ baäde ma̧ȩ chjadëi̧ pio ju̧i̧ nö̧ta. Ado pio jiro ma̧ȩ oa a̧ra̧ano̧mȩrȩ cjo̧ro̧requede, ma̧ȩ chjadëi̧ pio ju̧i̧. Tjamo̧ davä. Pio jiro ma̧ȩ ba chiati̧ oa a̧ra̧ano̧pea̧ oa yürürëremȩdique Ütë tjamo̧ judi. Ado pio jiro ma̧ȩ ba chiati̧ oa yürürëremȩ pio judi ji̧dë ma̧ chjacjiamȩri̧ ni̧bäpea̧de, yuroparea̧ decjiari̧.

Ütë tjamo̧ judi cjäri̧ri̧ cjiamȩrȩ darëremȩdejȩ Pablo ju̧i̧

¹² ‘Jabechji̧ ibëa̧ Ano̧mȩ Jechu Quiricho judi chjadëri̧ japea̧dicoada’ quëna̧ jo̧rȩtareconȩ. Jabechji̧ ju chiarea̧ oa yürürëremȩdique pio ju̧i̧ ja̧ oa chjadëri̧ ja̧bepapea̧ oa. ‘Aja̧, Pablo judi ca̧ ja̧beparea̧ oa chjadëri̧ ja̧bepë yürütäremȩdicoada’ quëna̧ jo̧rȩtamȩrȩ mitërëremȩdique.

¹³ Aja̧, a̧dë chjäte ma̧i̧ dari̧ japamȩ oa, pio jȩa chjiari chjai̧dëri̧ ni̧bämȩ oa, pio jȩaiäpȩmo̧ conȩdamȩmi̧ dari̧ japamȩ oa mitërëremȩdique, pio jȩaiäpȩmo̧ aeno̧ chjao ni̧bämȩmi̧ dari̧ ni̧bämȩ oa. Jaboti̧ri̧ mitërëremȩdique. Jabechji̧ cjäri̧ri̧ cjia jo̧rȩtamȩrȩ darëremȩdique quëna̧dëmȩ oa, ‘chjai̧dëri̧ jape chjaoquëda’ quëna̧dëmȩ oa.

¹⁴ Ado ibëa̧ Ano̧mȩ judi a̧dë chjäte chjadëri̧ yürümi̧ dari̧ cjäri̧ri̧ cjiamȩrȩ darëremȩdique cüdë quëna̧rea̧mi̧ dari̧, ca̧ oti̧ ji̧ri̧ ea tjamo̧rea̧mi̧ dari̧. Aja̧, ja̧di dari̧ cjia maearea̧rȩ yaba̧ Jechu Quiricho pio judiri ja̧ mapea̧ tara.

¹⁵ Tjamo̧dë yo̧dërequedemȩ, jabo tjamo̧i̧ cjiari̧ yo̧requedemȩ chjuari̧ quëna̧pea̧ ma̧ȩ pio ju̧i̧. Danȩ Timoteo, Jechu Quiricho judi a̧dëri pio judiri birarëremȩde chjai̧dëri̧ japaji̧ri̧ pio ji̧ri̧ chjadëri̧ chjätä tänȩpea̧ oa. Ado cüdë ma̧i̧ dari̧ japea̧ oaiä, a̧dë chjäte chjai̧dëri̧ jape chjaoa̧ oaiä, jabechji̧ a̧dë chjäte chjai̧dëri̧ japamȩmi̧ darë cjiadiäa̧requede cüdë.

¹⁶ Jabo jabechji̧ cjäri̧ri̧ cjiamȩrȩ darëremȩdique Ütë tjamo̧ judi. A̧dë chjäte chjai̧dëri̧ japamȩ oa mitërëremȩdique, jënȩ cjäri̧ri̧ cjia da̧ pio ju̧i̧ ana̧ri̧ na̧rȩpea̧ oa. Ado pio coa chjätärea̧ yürüa̧ oaiä, jabechji̧ eami̧ pumȩrȩ, ‘Aja̧, Pablo ju̧i̧ chjuari̧ jo̧rȩtamȩrȩ mitëa̧diji̧da, cjäri̧ri̧ cjiamȩrȩ daea̧diji̧da, a̧dë chjäte chjai̧dëri̧ japamȩbo chjätärea̧ yürüa̧diji̧da, bucho ana̧ cjo̧ro̧rea̧ yürüa̧diji̧da, ado pio ju̧i̧ chjätärea̧ yürüa̧rä judi, pio coabo chjätä tänȩpai̧ dadicoada, pio cüdëborë quëna̧täremȩquëda, jabechji̧ ma̧i̧ da chjai̧dëri̧ japamȩborë chjätäpai̧ daquëda' quëna̧pea̧ oa ana̧ri̧ na̧rȩrëremȩde Jechu Quiricho judi pio coaiä.

¹⁷ Ado pio ju̧i̧iä jabechji̧, chjacjiamȩri̧ jo̧rȩtapea̧de Ütë tjamo̧ judi, yuroparea̧ decjiari̧. Aja̧, bucho ana̧ cjiamȩ Ütë pio ju̧i̧iäpȩmo̧, ja̧bodëmȩrȩ cjiamȩ Ütë pio ju̧i̧iäpȩmo̧, darea̧mi̧dëmȩ Ütë pio ju̧i̧iäpȩmo̧ ji̧dë ma chjacjiamȩri̧ jo̧rȩtapea̧de, yuroparea̧ decjiari̧. Jabechji̧ pio judimo̧rȩ cjia tara, ado cja̧rȩmo̧ ütë decjia tara, jabechji̧ ji̧dë ma ba chia jo̧rȩtapea̧de, pio ju̧i̧iäpȩmo̧ ma. Ja̧ditäde.

Pablo judi chi̧dëearëremȩdejȩ Timoteo ju̧i̧

¹⁸ Danȩ Timoteo, ca̧ jami̧ da oa yo̧requedemȩ. Jabechji̧ Ütërë daba tänȩa̧ oa ni̧bämȩ judi pio mȩa chjiari jabërä ni̧bäa̧ oaiä, jabechji̧ chi̧dëearequedemȩ mȩnȩ chjadëri̧ dëbëpe chjaomi̧ dari̧ japatä oëra̧ a̧ra̧ano̧ji̧ri̧ pio ji̧ri̧. Jabechji̧ guadia chjadërë japami̧ dari̧, chjai̧dë oa japamȩ pio ju̧i̧ dëbëpe chjaomi̧ dari̧ japatä chi̧dëearequedemȩ.

¹⁹ Ado ji̧dë ma chjuari̧ quëna̧vä Quiricho ju̧i̧. Ado ju̧i̧ uëri chjadëri̧ jidavä na̧ chji̧ oa. Jabechji̧ chjai̧dë oa japadëvä mȩnȩ cjo̧dërë tüe baämi̧ dari̧ jo̧rȩtachea oa. Jabechji̧ o judiro̧ jibëa̧ chji̧ oa chjadëri̧ jidadëa̧ oaiä, quëna̧dëji̧ri̧pea̧diro̧jo̧ȩ Quiricho ju̧i̧. ‘Aja̧, chjai̧dë pio ju̧i̧ japatäremȩquëda, chja ja̧di ca̧ chji̧ peaja̧ oa jiadatäremȩquëda’ quëna̧ jo̧rȩta̧ oaiä, quëna̧dëji̧ri̧pea̧diro̧jo̧ȩ.

²⁰ Ja̧di dari̧ japea̧dirȩ Imineo judi, ado Areja̧doro judi. Aja̧, Quiricho pio ju̧i̧ quëna̧dëji̧ri̧pea̧diro̧jo̧ȩ. Ja̧di tara dairäpȩ tutia̧ oa cjiami̧ dari̧ chjadüa̧requedejȩrȩ. Ichiae ja̧ chja̧oeräpȩ cjiarea̧mi̧ dari̧ chjadüa̧requedejȩrȩ, judiro̧ chjadëri̧ dabapapea̧ oa. ‘Aja̧, Ütë tjamo̧ pio ju̧i̧ chjiari chjai̧dëri̧ ni̧bädëpea̧dida, Ütë tjamo̧ pio ju̧i̧iäpȩmo̧ chjai̧dëri̧ ni̧bärea̧mi̧dëdida’ quëna̧ dabapapea̧ oa, chjadüa̧requedejȩrȩ.