Techaronichȩche Ma̧ȩ 2 3 - Biblia Pume

Pio jibë chjiari goë cjo̧dëtä eamȩrȩ yo̧rëremȩdejȩrȩ Pablo judi

¹ Ado yaba̧ ca̧ oti̧, cjiadiärea̧ ma̧ȩ oa go̧ȩpe chjadümȩrȩ pio ibë chjiari goë cjo̧dëtä earea̧ro̧dibe, ibëa̧ Ano̧mȩ ja̧ ma̧ȩ üdë pio dibëa̧ chjarerä baärërea̧mi̧ chjaodëri̧ chjuchjupechä baätä. Aja̧, pio ju̧i̧ ja̧ ma̧ȩ üdë tüdüa̧ oa cjiami̧ dari̧ cjiachea oa jabo oëra̧ti̧ oa chjädëri̧ a̧ra̧ano̧a̧ oa cjiapea̧ oa, goë cjo̧dëtä earea̧ro̧dibe pumȩ no̧i̧dërë quëna̧rea̧ dapea̧ oa, Ano̧mȩ ja̧ ma̧ȩ üdë ba chiaparȩa̧ oa cjiami̧ dari̧ cjiapea̧ oa.

² Ado a̧ro̧rȩ pumȩ chjai̧dë ja̧ chja̧oeri pio judiri go̧dürea̧ dapea̧ oa peaja̧di goë cjo̧dëchji̧vä Ütë tjamo̧ pio ju̧i̧iä. Jabechji̧ judiro̧ quëna̧ji̧ri̧rȩ cjo̧ro̧tärea̧ ji̧, oëadëji̧ri̧rȩ ma̧i̧ dari̧ japadiro̧ibe.

³ Jabo ibë ütëbo oa japaräbo, jabechji̧ Ano̧mȩ pio judi yo̧a̧mi̧ japamȩde. Ado pio ju̧i̧iä chjadëri̧ ju chiaparȩpadiibe. Ado chjadëri̧ jidapadiibe peaja̧di. Aja̧, Ichiae judi ibë japachea oa, chjadëri̧ jidapadiibe.

⁴ Ado chjuari̧ quëna̧rea̧ro̧jo̧ȩ ibëa̧ Ano̧mȩ ju̧i̧ pio dibë chjiari. 'Aja̧, chjadëri̧ a̧dodiji̧ri̧da, a̧ro̧rȩ a̧ra̧ano̧a̧ ma̧ȩrä cjo̧ro̧pea̧ oa a̧dodiji̧ri̧da, ji̧dë ma ta̧rëdiäpea̧ ji̧ a̧dodiji̧ri̧da' quëna̧ jo̧rȩtarea̧ro̧jo̧ȩ baebaeami̧ dari̧ jo̧rȩtarea̧ decjiari̧.

⁵ Jabechji̧ Ano̧mȩ pio judi ji̧dë u̧i̧ dabarea̧ yürütädidibe Ütërë ea̧ pio ju̧i̧ chjiari. Ado ji̧dë u̧i̧ dabarea̧ yürütädidibe peaja̧di Quiricho pio ju̧i̧ chjiari, judi ma̧ chjua jo̧rȩtariä cjo̧ro̧rërea̧ pio ju̧i̧ chjiari.

Chumi̧dëri̧ cjiadëchji̧vä

⁶ Ado yaba̧ ca̧ oti̧, ibëa̧ Ano̧mȩ Jechu Quiricho pio ju̧i̧ ja̧ quȩrä yo̧tarea̧ro̧dibe chumi̧dëri̧ cjiaji̧ri̧ pio ji̧ri̧ chjiari. Danȩrȩ, quëna̧ji̧ri̧ pio judiro̧ chumi̧dëri̧ cjiaji̧ri̧rȩ cjo̧ro̧rä judi, ja̧bepariä cjo̧ro̧dërä judi, jabechji̧ ëba cjiadëchji̧jȩrȩ. Tjamo̧ davä. A̧ro̧rȩ a̧ra̧ano̧a̧ ma̧ȩrä cjo̧ro̧dëji̧ri̧ pio ji̧ri̧, jabechji̧ ëba cjiadë machji̧jȩrȩ.

⁷ Jabechji̧ pio mȩnȩro̧ chjadëri̧ dabatäreji̧ri̧nȩrȩ pio ibë cho̧rëdiäpea̧ ji̧. Jabechji̧ a̧ro̧rȩ dibëa̧ chjarerä cjo̧ro̧rërea̧ ji̧, chumi̧dëri̧ cjiaji̧ri̧ oa dadërëreji̧ri̧renȩro̧ibe, jabo ji̧dë ma ja̧bepe cjiaji̧ri̧ oa darëreji̧ri̧renȩro̧ibe.

⁸ Ado a̧ro̧rȩ eami̧ pumȩ oaiä jurarea̧ oa mitëa̧ ji̧, jabechji̧ badëri̧ yürütä cjo̧dëdëa̧rea̧ro̧jo̧ȩ, jabo chërera̧ gatë ëte mitërëreji̧ri̧rea̧ro̧jo̧ȩ. Jabechji̧ doromo̧dë jabo gȩnȩräbo u̧ri̧ jäcjiaji̧ri̧rȩ ja̧bepe chjaorëreji̧ri̧rea̧rȩ ibëa̧ jurarea̧ oa gatëpea̧ oa, pio dibëiä badëri̧ jurachea oa.

⁹ Jabo danȩrȩ ca̧ oti̧, a̧ro̧rȩ pio dibëiä jura̧rä judi, mȩnȩro̧ järätäa̧rä ja̧ oa badëri̧ jura̧rä judi, a̧ro̧rȩ pio dibëiä jurarea̧ oa cjo̧dëa̧rä judi, jabechji̧täremȩde jabo. Danȩrȩ ca̧ oti̧, a̧ro̧rȩ Ütë tjamo̧ ja̧ oa ja̧bepa tara, jabechji̧ chjadëtäremȩde. Jabo ja̧di dari̧ japadëa̧rea̧rȩ ca̧ oti̧. Jabechji̧ dibë chjadëri̧ na̧rȩpea̧ oa ja̧di dari̧ japadëa̧rea̧rȩ mȩnȩro̧ ibë chjadëri̧ cho̧rëdiäpea̧ oa.

¹⁰ Danȩrȩ ca̧ oti̧, a̧ro̧rȩ pio dibë nöta ëba cjo̧ro̧rërea̧ ji̧, pio yoa ma̧ȩ oa yürürëreji̧ri̧rea̧ro̧dibe. "Aja̧, ja̧bepadëri̧ cjiamȩ pio ju̧i̧ ëba juradëchji̧jo̧ȩ" yo̧ji̧ri̧rȩ yo̧rëreji̧ri̧rea̧ro̧dibe. Ado peaja̧di dari̧ japapea̧de.

¹¹ Jabo danȩrȩ ca̧ oti̧, pio dibë chjiari ta̧rërea̧rȩ. "Aja̧, pio mȩnȩro̧, orë chumi̧dëri̧ cjiaji̧ri̧rȩ cjo̧ro̧vedirȩ" yo̧a̧ oa ta̧rërea̧rȩ ca̧ oti̧. "Pio judiro̧ jibëa̧ oa chjadëri̧ ütarariä ja̧bepatärea̧ ji̧, cjapiri̧ ja̧bepe chjaotärea̧ ji̧, ja̧bepadë madirȩ, jabo o ji̧ri̧ ja̧ maea oa jo̧rȩte chjaodirȩ. Bë tai̧ chjaodirȩ o ji̧ri̧ ja̧ maea oa jo̧rȩtaji̧ri̧rȩ. Jabechji̧ jibëa̧ oa chjadëri̧ ja̧bepatärea̧ ji̧, tja̧reparȩmi̧ dari̧ japadiro̧jȩrȩ ja̧bepatämi̧ cjiaji̧ri̧ pio ji̧ri̧". Aja̧ ibëa̧ oti̧, pio ju̧i̧ yo̧a̧ oa ta̧rërea̧rȩ pio dibë chjiari.

¹² Ado ja̧di dari̧ cjo̧ro̧ji̧ri̧ pio ji̧ri̧iäpȩmo̧ to̧bari̧ chi̧dëearea̧ro̧jȩrȩ Ano̧mȩ Jechu Quiricho pio ju̧i̧ ja̧ quȩrä. Jabechji̧ jibëa̧ maea oa chjadëri̧ ütarariä ja̧bepatädirȩ chumi̧dëri̧ cjiarea̧ decjiari̧. Aja̧, jibëa̧ pio ju̧i̧ cjapiri̧ ja̧bepatädirȩ o ji̧ri̧ ja̧ oa jo̧rȩtarea̧ decjiari̧. Jibëa̧ ichi jura̧ pio ju̧ri̧ra̧ ja̧bepaji̧ri̧rȩ boatädirȩ jibëa̧ jurarea̧ oa. Aja̧, Jechu ja̧ quȩrä chi̧dëeatarea̧ro̧dibe.

¹³ Danȩrȩ ca̧ oti̧, mȩnȩro̧ coëma cjiari̧ cjo̧ro̧pea̧ pio ju̧i̧iä järidëpe bagadëchji̧vä. Järätä järätä cjo̧ro̧mi̧ dari̧ cjo̧ro̧dëchji̧vä, jabo ji̧dë ma järiji̧ri̧rȩ cjo̧ro̧chji̧vä.

¹⁴ Ado eami̧ quëna̧mȩ judi pio yoa ma̧ȩ oa ta̧rë ja̧bodërä judi, a̧ro̧rȩ go̧ȩpe chjadüa̧ ma̧ȩ oa ta̧rëdiädërä judi, 'jabechji̧ pio judidida, ëba cjiadëpea̧dida, pio ju̧i̧ a̧dë jachi cjiapea̧dida' quëna̧ dachji̧jo̧ȩ, judi idëri̧ cjiape jäpea̧ oa.

¹⁵ Jabo pio jiro pumȩ pio ju̧i̧ chjiari oëra̧ jo̧rȩtadëchji̧vä, jabo chjadëri̧ chi̧dëeachji̧jo̧ȩ, 'ibëa̧ omȩdida' quëna̧ jo̧rȩtaji̧ri̧rȩ. 'Aja̧, ibë eadëmȩ pio judidida, ibë dëbëpe chjaomi̧ dari̧ japamȩ pio judidida' quëna̧ dadëchji̧jo̧ȩ, jabo pio dibëdi ja̧mȩmi̧ da oa chi̧dëeachji̧jo̧ȩ judi goaedë oa chjätächea oa.

Cjiadiärea̧ Ma̧ȩ

¹⁶ Ado yaba̧ ma̧ chjupi̧ cjiari̧ jo̧rȩtarea̧ yürümȩ pio judi, ibëa̧ Ano̧mȩ pio judi ji̧dë ma yürütädidibe ma̧ chjupi̧ cjiari̧ jo̧rȩtarea̧ pio ju̧i̧. Aja̧, mȩnȩro̧ eami̧ oa chjätärä, mȩnȩro̧ eami̧ doro chjätärä, jabechji̧ ji̧dë ma chjadëri̧ yürütädidibe mȩnȩro̧ chji̧ goaera̧ jo̧rȩtarea̧mi̧ dari̧. Ado peaja̧di ji̧dë ma ëba cjiatädidibe Ano̧mȩ judi ütëbo oa.

¹⁷ Danȩrȩ ca̧ oti̧, pio cüdë, Pablo pio judimȩrȩ, ca̧ ichira̧ go̧ȩparequede pio yoa ma̧ȩ oa. Aja̧, pio dibë jeapea̧ oa, pio yoa ma̧ȩ oa go̧ȩparequede. Ado mȩnȩro̧ pio yoa ma̧ȩ oa ütarë daea̧ oaiä, 'Aja̧, Pablo pio judi tjamo̧ri̧ go̧ȩpea̧diji̧da, jabechji̧ ja̧di da cjiari̧ go̧ȩpadida, jibëa̧ go̧ȩ üdë ja̧di da cjiadida' quëna̧ dabapea̧ oa go̧ȩparequede. Jabechji̧ cüdë eami̧ ma̧ȩ oa go̧ȩpe chjadürä, ca̧ ichira̧ go̧ȩparequede pumȩ judiro̧ chjadëri̧ dabapea̧ oa, 'Aja̧, Pablo ja̧ go̧ȩdida, pio ju̧i̧ ja̧ ma̧ȩ tjamo̧dida' quëna̧ dabapea̧ oa.

¹⁸ Jabechji̧ ibëa̧ Ano̧mȩ Jechu Quiricho pio judi cjäri̧ri̧ cjia jo̧rȩtamȩrȩ chjadëri̧ a̧dotädidibe dibë ütëbo oa. Aja̧, pio ju̧i̧mo̧i̧ ma̧ȩ oa go̧ȩpe chjadürequededibe. Cjo̧ro̧ cjiachji̧ibe, Pablo.