Techaronichȩche Ma̧ȩ 2 2 - Biblia Pume

Ano̧mȩ judi acji ma̧na̧rea̧ do üdë ma̧na̧pade

¹ Ado yaba̧ ca̧ oti̧, ma̧ȩ yürütämi̧ cjiarequededibe ibëa̧ Ano̧mȩ Jechu Quiricho pio judi ibë jana̧pea̧ pio ju̧i̧ chjiari, a̧ro̧rȩ pio ju̧i̧iäpȩ a̧dopapea̧ pio ju̧i̧ chjiari.

² Danȩrȩ ca̧ oti̧, mȩnȩro̧ pumȩrȩ yo̧a̧ oa goë goë ta̧rërä judi, "Aja̧, Ano̧mȩ judi ma̧na̧pea̧ do üdë peadë tarupea̧de" yo̧a̧ oa goë goë ta̧rërä judi, jabechji̧ chjaodëri̧ bücjüri̧ cjiape bagadëchji̧vä. Ado o judiro̧, "Aja̧, Pablo judi go̧ȩpe chjadüa̧ pio ju̧i̧ irä goarequede. Dabarequede Jechu judi ma̧na̧pea̧ pio ju̧i̧ chjiari" yo̧rä judi, ta̧rë ja̧bodëchji̧jo̧ȩ. Ado eami̧ pumȩ üdë, "Aja̧, Ütërë pea ea jana̧ chjadüa̧ oa dabarequede. Jabechji̧ Ano̧mȩ judi ma̧na̧pea̧ do üdë peadë tarupea̧diibe" yo̧a̧ oa ta̧rërä judi, jabechji̧ ana̧ri̧ jo̧rȩtadëchji̧vä. Ma̧i̧ dari̧ uapadëchji̧vä. 'Aja̧, ma̧ȩ tjamo̧pamȩ jirodida' quëna̧dëchji̧vä.

³ Ma̧ȩ chjádë yürüji̧ri̧ pio ji̧ri̧iä u̧i̧pea̧ oa cjiadëchji̧vä. Jabechji̧ pio jiro do üdë jabë ma̧na̧na̧ra̧rea̧mi̧dëdiibe. Jabechji̧ Ano̧mȩ judi ma̧na̧pea̧ do üdë ma̧na̧bea yaboi̧, chiri nötai̧därä oa cjo̧ro̧ji̧ri̧ pumȩ pio judiro̧ bubati̧rȩ ana̧ri̧ jiadapadiro̧jo̧ȩ Ütë tjamo̧ ju̧i̧. Ado peaja̧di a̧dë chjäte chjadëdëmȩ pio judi na̧rȩa̧ oa cjiapade, Ütë tjamo̧ pio ju̧i̧ ji̧dë ma dëbëpe chjaomȩ pio judi. Tjamo̧ davä. Pio jiro do üdë jabëi̧ na̧ra̧bea yaboi̧, pio jiro pumȩ chjadëdërë na̧rȩa̧ oa cjiapade. Aja̧, pio jiro do üdë ma̧na̧bea yaboi̧, no̧mȩ tjamo̧ri ja̧ cjo̧dë tja ana̧räpȩ aeno̧pea̧ maearë tutia̧ oa cjiarëremȩ pio judi na̧rȩa̧ oa cjiapade.

⁴ Ado jiro pumȩ judi ana̧ri̧ dëbëpe chjaopadejȩ Ütë tjamo̧ pio ju̧i̧. 'Aja̧, ütëquëda, eami̧ti̧ ütë ju̧i̧ u̧i̧ ütëquëda, ca̧ea̧ ma̧na̧ri̧ japea̧ oa ütëpea̧quëda, o ji̧ri̧ u̧i̧ ba chia tjamo̧mȩrȩ cjiaquëda' quëna̧ jo̧rȩtamȩrȩ cjo̧ro̧pade. Ado Ütë tjamo̧ ja̧ bëräpȩ ju̧ri̧ yu̧ë chadärä ëte "Ütë tjamo̧ pio judirequede" yo̧mȩrȩ yo̧pade, a̧dë chjäte ma̧i̧ dari̧ japamȩrȩ.

⁵ Danȩrȩ ca̧ oti̧, ¿jo̧rȩtadënȩrȩ? Cüdë pio dibë nö̧ta jabë ëba cjo̧ro̧rërea̧ ji̧, dibë pio jiro ma̧ȩ oa ni̧bä chjaorërea̧ ji̧, ¿jo̧rȩtadënȩrȩ?

⁶ Dëdë, jo̧rȩta jironȩrȩ. Ado cüdë dibë yo̧a̧ pio ju̧i̧iä peaja̧di dabanȩrȩ cjiadiä tänȩmȩ pio ju̧i̧ chjiari. 'Jabechji̧ pio jiro pumȩ üdë cjiadiä tänȩmȩ pio ju̧i̧iä cjiadiäa̧ oa cjiadida' quëna̧ dabanȩrȩ. Jabechji̧ ütara̧ doromo̧ na̧rȩa̧ oa cjiapade.

⁷ Jabo pio jiro pumȩ üdë jabë na̧rȩa̧ oa cjiadëräbo, jabechji̧ pio ju̧i̧ ja̧ jo̧rȩtarea̧ chjadëdë üdë goadi ja̧bepami̧ dari̧ ja̧bepade oëra̧ti̧ oa pumȩ judiro̧ Ütë tjamo̧ pio ju̧i̧ dëbëpe chjaopea̧ oa, ma̧ȩ chjadë oa jiadapea̧ oa. Ado ja̧di dari̧ ja̧beparërea̧mi̧ ji̧dë ma goadi ja̧bepapade, Ütë tjamo̧ pio judi ütara̧rä yuro, pio judi cjiadiä tänȩmȩ pio ju̧i̧ mitëa̧rä yuro.

⁸ Ado ja̧dëa ji̧ cjiadiä tänȩmȩ pio judi decjiapea̧rä, jabechji̧ a̧dë chjäte chjadëdë pumȩ pio judi na̧rȩa̧ oa cjiapade. Tjamo̧ davä. Ütë tjamo̧ pio ju̧i̧ ji̧dë ma dëbëpe chjaomȩ pio judi, ma̧ȩ chjadë chjö̧na̧i̧ oa jiadamȩ pio judi na̧rȩa̧ oa cjiapade. Jabo Ano̧mȩ Jechu judi ma̧na̧rä, jibëa̧ yara̧ pjuramȩrȩ ja̧bo tänȩpadejȩ chjaodëri̧. Tjamo̧ davä. Jechu judi ma̧na̧rä, a̧dë chjäte tatari̧ cjiamȩ jauëchjarea̧ra̧ ma̧na̧rä, goarijärea̧mi̧ dari̧ ja̧bo tänȩpadejȩrȩ, ju chiadëpe bagarea̧mi̧ dari̧.

⁹ Jabo Jechu judi pio jiro pumȩ oa ja̧bo tänȩbea yaboi̧, jabechji̧ Ichiae ja̧ jauëchjara̧ pio ju̧ri̧ra̧ ana̧ri̧ na̧rȩ chjaopadejȩrȩ pumȩ ji̧ri̧iäpȩmo̧ pio ji̧ri̧ u̧i̧papea̧ oa. Jabechji̧ japadai̧ da pio ju̧i̧, eami̧ti̧ na̧rȩrea̧ pio ju̧i̧ na̧rȩcji̧ quëna̧ japamȩrȩ u̧i̧pe u̧i̧pe na̧rȩ chjaopadejȩrȩ, jauëchja cjiari̧ japamȩrȩ.

¹⁰ 'Aja̧, ana̧ri̧ u̧i̧patäquiji̧ri̧da, chjai̧dëri̧ japatäquiji̧ri̧da' quëna̧ jo̧rȩtamȩrȩ dami̧ti̧ u̧i̧parea̧ra̧ pio ju̧ri̧ra̧ na̧rȩ chjaopadejȩrȩ aeno̧pea̧ maea oa cjiaji̧ri̧ pumȩ pio ji̧ri̧. Coëma cjiari̧ baämȩ ma̧ȩ oa ta̧rë ja̧bodëji̧ri̧ pio ji̧ri̧, chjätärea̧ ma̧ȩ oa quëna̧dëji̧ri̧ pio ji̧ri̧ na̧rȩ chjaopadejȩrȩ.

¹¹ Ado judiro̧ quëna̧dëa̧ oaiä, jabechji̧ Ütë tjamo̧ pio judi tänȩa̧ oa tjamo̧rämi̧ cjiapadiro̧jo̧ȩ teracaba pio ju̧i̧.

¹² Jabechji̧ judiro̧ aeno̧pea̧ maearë cjiapea̧ oa, judiro̧ coëma cjiari̧ aechide yo̧a̧ oa cjiapea̧ oa ja̧di dari̧ japapadejȩrȩ Ütë tjamo̧ judi. Jabechji̧ judiro̧ coëma cjiari̧ baämȩ ma̧ȩ pio ju̧i̧ quëna̧dëa̧ tara, judiro̧ chjai̧dë goaraji̧ri̧rȩ cjo̧ro̧a̧ tara, jabechji̧ ja̧di dari̧ japapadejȩrȩ Ütë tjamo̧ judi.

Chjuari̧ cjiatädirȩ quëna̧ji̧ri̧ judiro̧

¹³ Danȩrȩ ca̧ oti̧, Ütë tjamo̧ ju̧i̧ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ pio dibëiä, ibëa̧ Ano̧mȩrȩ ea chja̧oerä cjo̧ro̧ji̧ri̧ pio ji̧ri̧iä. 'Aja̧, Ütë tjamo̧ judi chjadëri̧ japea̧diji̧ri̧da' quëna̧ jo̧rȩtaji̧ri̧rȩ ma̧ chiadëri̧ cjiari̧ jo̧rȩtarea̧ro̧jo̧ȩ. Jabechji̧ pearä judirä mitërëremȩdidibe Ütë tjamo̧ judi mȩnȩro̧ chjätärea̧ dapea̧ oa, mȩnȩro̧ Tjo tjamo̧ pio ju̧i̧iä china̧chjari̧ tutia̧ oa cjiapea̧ oa, mȩnȩro̧ coëma cjiari̧ baämȩ ma̧ȩ pio ju̧i̧ quëna̧pea̧ oa.

¹⁴ Aja̧, ja̧di dari̧ chjätärea̧ dapea̧ oa ëna̧diärëremȩdidibe ma̧ȩ chjadëi̧ pio ju̧i̧iä, a̧ro̧rȩ ma̧ȩ chjadëi̧ pio ju̧i̧ a̧ra̧ano̧a̧ oaiä. ¿Jabo tjana̧ japea̧ oa ëna̧diärëremȩdidibe? Tjana̧ japea̧dë, jabechji̧ mȩnȩro̧ dibëa̧ Ano̧mȩ Jechu Quiricho pio ju̧i̧ nöta ëba cjiapea̧ oa, pio ju̧i̧ nöta ba chia tjamo̧räpȩ ëba cjiapea̧ oa ëna̧diärëremȩdidibe.

¹⁵ Pio ju̧i̧iä yo̧tarequededibe ca̧ oti̧. Chjuari̧ cjiami̧ dari̧ cjiachji̧vä. Jabechji̧ mȩnȩro̧ pio ibëiä irä ta̧rëa̧ pio ju̧i̧, coëma cjiari̧ baämȩ ma̧ȩ pio ju̧i̧, a̧ro̧rȩ dibë go̧ȩpe chjadüa̧ pio ju̧i̧ chjuari̧ quëna̧chji̧vä.

^16-17 Ado yaba̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe. Jabechji̧ ibëa̧ Ano̧mȩ Jechu Quiricho judi, ibëa̧ Ama̧i̧ Ütë pio judiborë järiparȩtädiro̧dibe mȩnȩro̧ cjatäcjie jo̧rȩtarea̧mi̧ dari̧, mȩnȩro̧ chji̧ goaera̧ jo̧rȩtarea̧mi̧ dari̧. Jabechji̧ pio ibë ea tjamo̧ji̧ri̧rȩ cjäri̧ri̧ cjia darëreji̧ri̧diro̧ibe. Ado pio pio ibë cjäri̧ri̧ cjia daji̧ri̧rȩ bucho ana̧ järirea̧ yürürëreji̧ri̧diro̧ibe, ma̧diä tänȩrea̧ decjiari̧ jidatarea̧ chjadë pio ju̧i̧bo. Ado pio judiro̧, jabechji̧ chjadëri̧ järiparȩtädiro̧dibe dibëa̧ chji̧rä. Ado ju chiaparȩtädiro̧dibe peaja̧di mȩnȩro̧ chjadë maea oa japariä cjo̧ro̧pea̧ oa, mȩnȩro̧ chjadë maea oa ni̧bäriä cjo̧ro̧pea̧ oa.