Techaronichȩche Ma̧ȩ 2 1 - Biblia Pume

Taruparea̧ Ma̧ȩ

¹ Pablo quȩmȩrequede cüdë. Ca̧ jadü pio ji̧ri̧ nötamȩrȩ go̧ȩpe chjadürequededibe Timoteo quȩmȩ pio ju̧i̧ nöta, Chivano̧ quȩmȩ pio ju̧i̧ nöta. Aja̧, pio ji̧ri̧ nöta cjiamȩrȩ go̧ȩpe chjadürequededibe Techaronica quȩmȩ bë ma̧ri̧räpȩ a̧dopaji̧ri̧ oa. Ibëa̧ Ama̧i̧ ja̧ maea oa, Ano̧mȩ Jechu Quiricho pio judiri ja̧ maea oa go̧ȩpe chjadürequededibe.

² Ado Ütë tjamo̧ judi, Ano̧mȩ Jechu Quiricho pio judiborë cjäri̧ri̧ cjia jo̧rȩtaji̧ri̧rȩ datädiro̧dibe, dibë ana̧ri̧ a̧dorea̧mi̧ dari̧. Ado ma̧ chjupi̧ cjiari̧ jo̧rȩtarea̧ yürütädiro̧dibe peaja̧di.

Ütë tjamo̧ judi bape chjaopadejȩrȩ pio jȩa jiadaji̧ri̧ pio ji̧ri̧

³ Danȩrȩ ca̧ oti̧, pio dibë jo̧rȩtaji̧ri̧rȩ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧, 'chjadëri̧ a̧doa̧diji̧ri̧da' quëna̧ jo̧rȩtaji̧ri̧rȩ. Ado ja̧di dari̧ jo̧rȩtapea̧ üdë jabechji̧ chjadë tjamo̧de. Jabechji̧ mȩnȩro̧ ji̧dë u̧i̧ chjuari̧ quëna̧ji̧ri̧pe baga̧ oaiä, mȩnȩro̧ dibëa̧ pumȩ ji̧ri̧ ji̧dë u̧i̧ eaji̧ri̧pe baga̧ oaiä, dibëa̧ dëbëti̧ra̧ chia ji̧dë u̧i̧ eaji̧ri̧pe baga̧ oaiä, jabechji̧ ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ pio ju̧i̧.

⁴ Ado mȩnȩro̧ ja̧di dari̧ cjo̧ro̧ tara pio dibë chjiari ma̧ȩ goaeri̧ yo̧ chjaorea̧ro̧jȩrȩ oëra̧ a̧dopaji̧ri̧ pio ji̧ri̧. Jabechji̧ mȩnȩro̧ conȩda̧ oa cjiaji̧ri̧borë ma̧ chjua jo̧rȩtariä cjo̧ro̧a̧ oaiä, mȩnȩro̧ chjai̧dë oa chjätäji̧ri̧borë Ütë tjamo̧ pio ju̧i̧ chjuari̧ quëna̧ji̧ri̧rȩ cjo̧ro̧a̧ oaiä, jabechji̧ Üte tjamo̧ ja̧ pumȩ pio ji̧ri̧ ma̧ȩ goaeri̧ yo̧rea̧ro̧jȩrȩ pio dibë chjiari.

⁵ Ado mȩnȩro̧ chjai̧dë oa chjätäräbo chjuari̧ quëna̧rea̧ üdë, jabechji̧ Ütë tjamo̧ judi pumȩ ütëbodärä oa coëma cjiari̧ ütarapea̧ pio ju̧i̧ chjiari na̧rȩdiibe. Jabechji̧ mȩnȩro̧ ja̧di dari̧ cjo̧ro̧a̧ oaiä, 'Aja̧, yu̧a̧rea̧mi̧ dadiro̧da, cüdë yo̧a̧ chja̧oerä cjo̧ro̧pea̧räpȩ yu̧a̧rea̧mi̧ dadiro̧da, jabechji̧ judiro̧ chjai̧dë oa chjätäji̧ri̧borë chjuari̧ quëna̧diro̧da, ca̧ ma̧ȩrä cjo̧ro̧ji̧ri̧rȩ conȩda̧ oa cjiaräbo chjuari̧ quëna̧diro̧da, ado ju̧i̧iä jabechji̧ tjamo̧ri̧ yu̧a̧rea̧mi̧ dadiro̧da' quëna̧ jo̧rȩtamȩrȩ dapadidibe, coëma cjiari̧ ütaramȩrȩ.

⁶ Ado pio jiro ütararea̧ra̧ coëma cjiari̧ ütaramȩrȩ bape chjaopadejȩrȩ pio dibëiäpȩmo̧ conȩdareji̧ri̧ pio ji̧ri̧.

⁷ Ado peaja̧di cjatäcjie jo̧rȩtarea̧ yürüpadidibe. Mȩnȩro̧ ana̧ri̧ conȩda̧ oa cjiarërea̧ ji̧, cjatäcjiarea̧ yürüpadidibe, pio ibëbo. Jabechji̧ Ano̧mȩ Jechu pio judi a̧dëri judiri na̧rȩmȩrȩ birë ma̧na̧rä, judi ma̧i̧ dari̧ gäri cjitëmȩ cjo̧dë tjoro cjiamȩrȩ jibëa̧ mu̧i̧tjoi̧ pio ji̧ri̧ nö̧ta birë ma̧na̧rä, cjatäcjiarea̧ yürüpadiibe ütëbo oa. Aja̧, judi a̧dëriji̧ri̧ mu̧i̧tjoi̧ pio ji̧ri̧ nö̧ta birë ma̧na̧rä, tjamo̧ jauëchja mu̧i̧tjoi̧ pio ji̧ri̧ nö̧ta birë ma̧na̧rä, cjatäcjiarea̧ yürüpadiibe ütëbo oa.

⁸ Ado ja̧dëa ji̧ ma̧i̧ dari̧ japamȩrȩ bape chjaopadejȩrȩ Ütë tjamo̧ ju̧i̧ dabadëji̧ri̧ pio ji̧ri̧. Aja̧, Ano̧mȩ Jechu pio ju̧i̧ chjiari ma̧ȩ chjadëi̧ oa quëna̧dëji̧ri̧ pio ji̧ri̧ bape chjaopadejȩrȩ.

⁹ Ado bucho ana̧ aeno̧a̧ oa cjiapadirȩ. Judiro̧ Ano̧mȩ Jechu pio ju̧i̧ nö̧ta ëba cjiatärea̧ ji̧, judiro̧ pio ju̧i̧ ja̧ jauëchja chjacjiamȩ oa datärea̧ ji̧, cjäri̧ madirȩ, ji̧dë ma tutia̧ oa cjiapadirȩ.

¹⁰ Aja̧, Ano̧mȩ Jechu judi pio jiro doro birë ma̧na̧rä, jabechji̧ jibëa̧ pumȩ pio judiro̧ chjacjiamȩri̧ ni̧bäpadiro̧jo̧ȩ. Tjamo̧ davä. Pio jiro doro judi birë ma̧na̧rä, china̧chjari̧ tutia̧ oa cjiaji̧ri̧ pumȩ pio judiro̧ ba chia jo̧rȩtapadiro̧jo̧ȩ, chjacjiamȩri̧ jo̧rȩtaji̧ri̧rȩ. Ado quëna̧ji̧ri̧ judiro̧ Jechu pio ju̧i̧ darä, 'chia chia, pio judidida, a̧dë chjäte chjacjiamȩri̧ cjiadida, a̧dë chjäte chjadëdida' quëna̧ jo̧rȩtaji̧ri̧rȩ dapadiro̧jo̧ȩ dacho bëremi̧ cjiami̧ dari̧ jo̧rȩtaji̧ri̧rȩ, ya yabë cjiami̧ dari̧ jo̧rȩtaji̧ri̧rȩ. Ado pio mȩnȩro̧borë quëna̧ji̧ri̧pea̧ tara, a̧ro̧rȩ a̧ra̧ano̧a̧ ma̧ȩ oa quëna̧ji̧ri̧pea̧ tara, jabechji̧ dibëa̧ chjarerämȩ pio ju̧i̧ ba chia daparenȩro̧jo̧ȩ peaja̧di, Jechu pio ju̧i̧.

¹¹ Ado pio ju̧i̧iä ji̧dë ma goë cjo̧dë chjaorea̧rȩ pio dibë chjiari ca̧ oti̧. 'Aja̧, chjadëri̧ a̧dotädiji̧ri̧da, Ütërë ëna̧diäa̧mi̧ cjo̧ro̧pea̧ oa a̧dotädiji̧ri̧da, jabechji̧ judiro̧ nö̧tadäräri̧ cjo̧ro̧pea̧ oa a̧dotädiji̧ri̧da' quëna̧ jo̧rȩtaji̧ri̧rȩ ji̧dë ma goë cjo̧dë chjaorea̧rȩ pio dibë chjiari. Ado jibëa̧ ju chiarea̧ oa peaja̧di yürütädidibe mȩnȩro̧ dami̧ti̧ chjadë oa japadärärea̧ dapea̧ oa, pio ju̧i̧ ja̧ oa eami̧ti̧ chjadë oa japadärärea̧ dapea̧ oa. Jabechji̧ eami̧ quëna̧mȩ judi jibëa̧ chji̧ra̧ jo̧rȩtarä judi, 'Aja̧, ja̧di dari̧ japatäremȩquëda, Ütë tjamo̧ pio ju̧i̧ chjuari̧ quëna̧mȩrȩ ja̧di dari̧ japatäremȩquëda, Ütë ja̧ oa japatäremȩquëda' quëna̧ jo̧rȩtarä judi, jabechji̧ ju chiarea̧ yürütädejȩ Ütë tjamo̧ judi quëna̧mȩ pio judi chjadëri̧ japadärärea̧ dapea̧ oa.

¹² Ado mȩnȩro̧ ja̧di dari̧ cjo̧ro̧a̧ oaiä, 'jabechji̧ Ano̧mȩ Jechu judi ba chiadida' quëna̧ jo̧rȩtaji̧ri̧rȩ dapadiro̧dibe pumȩ judiro̧. Ado peaja̧dimi̧ dari̧ jo̧rȩtamȩrȩ dapadidibe Jechu judi. Jabechji̧ ibëa̧ Ano̧mȩ Ütë judi pio ibë cjäri̧ri̧ cjia daea̧ oaiä, ibëa̧ Ano̧mȩ Jechu Quiricho pio judi ibë cjäri̧ri̧ cjia daea̧ oaiä, jabechji̧ ja̧di dari̧ cjo̧ro̧rea̧ darea̧rȩ.