Techaronichȩche Ma̧ȩ 4 - Biblia Pume

Ütë tjamo̧ ju̧i̧ ma̧ chiadëri̧ cjiaparȩrea̧mi̧ dari̧ cjo̧ro̧täreji̧ri̧rea̧rȩ

¹ Ado yaba̧ ibëa̧ oti̧, Ano̧mȩ Jechu pio ju̧i̧ ja̧ quȩrä chi̧dëeatarea̧ro̧dibe mȩnȩro̧ pio ibëiä dabapea̧mi̧ cjo̧ro̧tä. Jabechji̧ pio ibëiä dabapea̧nȩrȩ Ütë tjamo̧ ju̧i̧iäpȩmo̧ ma̧ chiadëri̧ cjiaparȩji̧ri̧rȩ cjo̧ro̧pea̧ ji̧. Ado dëdë, ja̧di dari̧ cjo̧ro̧nȩrȩ, jabo ji̧dë u̧i̧ järitä earea̧ro̧dibe.

² Jabechji̧ a̧ro̧rȩ dibë a̧ra̧ano̧rërea̧ ma̧ȩ pio ju̧i̧ dabanȩrȩ. Pio jiro ma̧ȩ oa yürürëreji̧ri̧rea̧ro̧dibe Ano̧mȩ Jechu pio judi yo̧a̧ oa.

³ Jabechji̧ china̧chjari̧ tutia̧ oa cjiami̧ dari̧ cjo̧ro̧tä eadidibe Ütë tjamo̧ judi mȩnȩro̧ china̧chja pio ji̧ri̧ baë ëba mo̧a̧chea oa, mȩnȩro̧ chjai̧dëri̧ jo̧rȩtachea oa.

⁴ Jabechji̧ mȩnȩro̧, oari nö̧tarë chjadëri̧ dabatäreji̧ri̧nȩrȩ dibëa̧ iei̧ pio ji̧ chjadëri̧ mitëpea̧ ji̧, chjadëri̧ ëbapea̧ ji̧. Tjamo̧ davä. Chjai̧dë oa mirea̧ oa cjiarea̧ decjiari̧, oëra̧diärea̧ decjiari̧ ëbapea̧ ji̧ chjadëri̧ dabatäreji̧ri̧nȩrȩ, chjai̧dëri̧ japadëji̧ri̧rȩ.

⁵ Jabo ja̧di dari̧ ëbadëdirȩ Ütë tjamo̧ ju̧i̧ dabadëji̧ri̧ judiro̧. Jabechji̧ jibëa̧ icjararä chjai̧dëri pio judiri cjitëmȩ maeara̧ jo̧rȩta̧ oaiä, jabechji̧ ëba mo̧a̧rea̧ pio ju̧i̧mo̧i̧ jo̧rȩtaji̧ri̧rȩ ëbadirȩ. Jabo ja̧di dari̧ jo̧rȩtaji̧ri̧rȩ ëbadëtäreji̧ri̧nȩrȩ mȩnȩro̧.

⁶ Jabechji̧ dibëa̧ omȩ ja̧ iei̧ ji̧ bae ëba mo̧a̧rea̧ decjiari̧ chjadëri̧ ëbatäreji̧ri̧nȩrȩ, china̧chja pio ji̧ baë mitërea̧ decjiari̧. Jabechji̧ Ütë tjamo̧ judi acji tai̧rea̧mi̧ dari̧ bape chjaomȩde. Ado pio ju̧i̧iä chi̧dëeatarea̧ro̧dibe mȩnȩro̧ uapai̧ ta̧rëri̧ ta̧rë ja̧botä pio dibë bape chjaochea oa. Jabechji̧ pio ju̧i̧ chjiari jabërä yo̧rëreji̧ri̧rea̧ro̧dibe peadë.

⁷ Jabechji̧ a̧ro̧rȩ chjai̧dëri̧ cjo̧ro̧pea̧ oa mitëdërëremȩdiibe Ütë tjamo̧ judi, jabo coëma cjiari̧ cjo̧ro̧pea̧ oa mitëa̧diibe.

⁸ Ja̧di tara uapai̧ ta̧rëri̧ ta̧rë ja̧bochji̧vä. Ado eami̧ pumȩrȩ a̧ro̧rȩ a̧ra̧ano̧rërea̧ pio ju̧i̧ ta̧ra̧ puë chiadëmȩmi̧ dari̧ jiadarä judi, jabechji̧ pio ibë tjamo̧ri̧ jiadadëdiibe jabo Ano̧mȩ pio ju̧i̧ jiadadejȩ, Ütë tjamo̧ pio ju̧i̧. Aja̧, Tjo tjamo̧ oa pio dibëiäpȩmo̧ yürürëremȩ pio ju̧i̧ jiadadejȩ.

⁹ Ado yaba̧ dibëa̧ oti̧ ji̧ri̧ eapea̧ pio ju̧i̧ chjiari go̧ȩpe chjadütärea̧ ji̧, jabechji̧ go̧ȩpadëparea̧rȩ mȩnȩro̧ chjadëri̧ dabapea̧ tara Ütë tjamo̧ pio ju̧i̧iä. Tjamo̧ davä. Ütë tjamo̧ pio judi dabapa tänȩa̧ oaiä chjadëri̧ dabapea̧nȩrȩ davä dibëa̧ dëbëti̧ra̧ chia eapea̧ ji̧.

¹⁰ Jabechji̧ ja̧di dari̧ eaji̧ri̧rȩ cjo̧ro̧nȩrȩ peadëri ja̧. Aja̧, Machedonia quȩmȩ chiriräpȩ quëna̧ji̧ri̧ ütëbodärä oa eaji̧ri̧rȩ cjo̧ro̧nȩrȩ dibëa̧ oti̧ pio ji̧ri̧. Jabechji̧ eadëji̧ri̧rȩ cjo̧ro̧ ma ja̧didë jabo eaji̧ri̧rȩ cjo̧ro̧nȩrȩ. Jabo danȩrȩ ca̧ oti̧, ji̧dë u̧i̧ eachji̧vä. Ji̧dë u̧i̧ eatä chi̧dëearea̧ro̧dibe, mȩnȩro̧ ji̧dë ma eapea̧ ji̧ dibëa̧ oti̧ pio ji̧ri̧.

¹¹ Ado järichji̧vä dibëa̧ maea oa japapea̧ ji̧. Jabechji̧ chji̧ goaera̧ jo̧rȩtaji̧ri̧rȩ dibëa̧ maea oa jo̧rȩtachji̧vä, cjiadiämi̧ tarari̧ jo̧rȩtaji̧ri̧rȩ. Ado o ji̧ri̧ chjiari ji̧dë ma iëno̧ iëno̧ ta̧rë cjiadëchji̧vä, jabo jabechji̧ dibëa̧ oa jo̧rȩtaji̧ri̧rȩ ja̧bepachji̧vä dibëa̧ ichira̧.

¹² Ado mȩnȩro̧ ja̧di dari̧ cjo̧ro̧a̧ oaiä, jabechji̧ quëna̧dëji̧ri̧ pio judiro̧borë ba chia dapadiro̧dibe. Ado mȩnȩro̧ chjadëri̧ ja̧bepea̧ oaiä, chjö̧na̧i̧ti̧ oa cjäri̧ ja̧boji̧ri̧rȩ cjo̧ro̧dëpanȩrȩ.

Ano̧mȩ judi jana̧pea̧ pio ju̧i̧ chjiari go̧ȩparëremȩde Pablo judi

¹³ Ado danȩrȩ ibëa̧ oti̧, Jechu ju̧i̧ quëna̧ji̧ri̧rȩ ja̧borëreji̧ri̧ pio ji̧ri̧ chjiari dabadëji̧ri̧rȩ cjo̧ro̧tä eadërea̧ro̧dibe. Jabechji̧ jidatarea̧ chiadëji̧ri̧ pio judiro̧ odai̧ tarari̧ jo̧rȩtami̧ jo̧rȩtachea oa, chjadëri̧ dabatä earea̧ro̧dibe mȩnȩro̧ coëma cjiari̧ jo̧rȩtapea̧ oa.

¹⁴ Jabechji̧ a̧ro̧rȩ quëna̧ji̧ri̧pea̧ tara, Jechu judi ja̧boa̧ pio ju̧i̧ chjiari, judi bëdüa̧ pio ju̧i̧ chjiari quëna̧ji̧ri̧pea̧ tara, 'jabechji̧ ado chjereno̧ jana̧padida' quëna̧ jo̧rȩtarea̧rȩ peaja̧di. Ado judi jana̧rä, 'jabechji̧ ja̧boa̧ji̧ri̧ pio ji̧ri̧ ëba jana̧padiji̧ri̧da, pio jȩa quëna̧ji̧ri̧ pio ji̧ri̧ ëba jana̧padiji̧ri̧da, Ütërë tänȩa̧ oa ëba jana̧padiji̧ri̧da' quëna̧ dabarea̧rȩ.

¹⁵ Danȩrȩ, ibëa̧ Ano̧mȩ judi a̧ra̧ano̧rërea̧ duri pio ju̧i̧ a̧ra̧ano̧rea̧ro̧dibe. Ja̧di tara chjadëri̧ ta̧rëchji̧vä. Jabechji̧ Jechu judi jana̧pea̧ doro, a̧ro̧rȩ jabë cjo̧ro̧ji̧ri̧ pio judiro̧ yabochjarë baädëparea̧rȩ, jabo ja̧boa̧ji̧ri̧ pio judiro̧ ibëa̧ yaboi̧ baäpadirȩ Ano̧mȩ pio ju̧i̧ dëbëdiäpea̧ oa.

¹⁶ Jabechji̧ Ütë tjamo̧ ja̧ mu̧i̧tjoi̧ tjamo̧ pio judi ëna̧diäa̧rä, Ütë tjamo̧ judi pjurarea̧ pio ju̧i̧ ea cjia tänȩa̧rä, jabechji̧ Ano̧mȩ pio judi a̧dëri pio judiri birapade, goae tarari̧ ëna̧diämȩrȩ. Ado ja̧boa̧ji̧ri̧ pio ji̧ri̧ ja̧ icjara oa yabochja bëdü tänȩpadejȩrȩ. Tjamo̧ davä. Quiricho pio judiri ja̧ji̧ri̧ pio ji̧ri̧ ja̧ icjara oa yabochja bëdü tänȩpadejȩrȩ. Ado ja̧dëa ji̧ pio jȩa nö̧ta dëbëdiäpea̧ oa cjitë tänȩpadejȩrȩ.

¹⁷ Ado ja̧dëa ji̧ a̧dë cjiadiäa̧ji̧ri̧ pio ji̧ri̧bo chjaodëri̧ cjitë tänȩpadiibe. Ibëa̧ yaboi̧ baäa̧ji̧ri̧ pio ji̧ri̧ cho̧rë cjitërea̧mi̧ dari̧ cjitë tänȩpadiibe go̧a̧ra̧ ëräpȩ yuro. Ado ju̧ri̧pȩ a̧dopaji̧ri̧rȩ dëbëdiäparea̧ro̧jo̧ȩ ibëa̧ Ano̧mȩ pio ju̧i̧ a̧dë cjararäpȩ ju̧ri̧. Ado pio ju̧i̧ nö̧ta bucho ana̧ cjiadiäparea̧rȩ ibëa̧ Ano̧mȩ pio ju̧i̧ nö̧ta.

¹⁸ Ja̧di tara jabechji̧, pio jiro ma̧ȩra̧ pio ju̧ri̧ra̧ a̧dochji̧vä dibëa̧ dëbëti̧ra̧ chia mȩnȩro̧ darërea̧ oaiä a̧dë chjäte odai̧ tarari̧ jo̧rȩtachea oa.