Techaronichȩche Ma̧ȩ 3 - Biblia Pume

Pablo judi chjadürëremȩdejȩ Timoteo ju̧i̧ Techaronichȩcheräpȩ

^1-2 Jabo a̧ro̧rȩ pio dibëiä ma̧ȩ ta̧rëdëa̧ oaiä, ado pio dibë ana̧ri̧ jo̧rȩte chjaoa̧ oaiä, 'jabechji̧ ibëa̧ omȩ Timoteo pio ju̧i̧ chjadütäreji̧ri̧a̧ro̧ju̧i̧da, ado a̧ro̧rȩ Atena bë ma̧ri̧räpȩ a̧dë cjiadiätäreji̧ri̧a̧ro̧da, ibëa̧ma̧i̧ cjiadiätäreji̧ri̧a̧ro̧da' quëna̧ jo̧rȩtaji̧ri̧rȩ chjadürëreji̧ri̧rea̧ro̧jo̧ȩ dibë ju chiaparȩpea̧ oa, mȩnȩro̧ Ütë tjamo̧ ju̧i̧ ji̧dë u̧i̧ chjuari̧ quëna̧pea̧ oa, mȩnȩro̧ järäjäräami̧ dari̧ cjo̧ro̧chea oa. Aja̧, Ütë tjamo̧ ja̧ mu̧i̧tjoi̧ pio ju̧i̧, Timoteo pio ju̧i̧, Quiricho pio ju̧i̧ chjiari ma̧ȩ chjadëi̧ oa a̧ra̧ano̧mȩ pio ju̧i̧ chjadüa̧rea̧ro̧jo̧ȩ pio dibë chjadëri̧ a̧dopea̧ oa.

³ Jabechji̧ mȩnȩro̧ conȩda̧ oa cjia̧ oaiä järidëpe jächea oa, Ütë tjamo̧ ja̧ ma̧ȩ oa putu jura̧ a̧dë chami̧ dari̧ jiadachea oa, jabechji̧ chjadüa̧rea̧ro̧jo̧ȩ dibë chjadëri̧ a̧dopea̧ oa. Tjamo̧ davä. Conȩda̧ pio ju̧i̧ tarapai̧ darea̧rȩ ca̧ oti̧. 'Jabechji̧ ja̧di dari̧ tarapai̧ daa̧ro̧da' quëna̧ dabarëreji̧ri̧nȩrȩ peadëri ja̧.

⁴ Ado peaja̧di ta̧rëri̧ yo̧ chjaorëreji̧ri̧rea̧ro̧dibe a̧ro̧rȩ pio dibë nö̧ta cjo̧ro̧rërea̧ ji̧. "Aja̧, conȩda̧ pio ju̧i̧ tarapai̧ darea̧rȩ" yo̧rëreji̧ri̧rea̧ro̧dibe jabërä. Ado yaba̧ chjai̧dë oa chjätäa̧ oaiä, 'jabechji̧ tjamo̧ri̧ yo̧rëreji̧ri̧diro̧ibëda' quëna̧ dabaji̧ri̧pea̧nȩrȩ.

⁵ Ado mȩnȩro̧ conȩda̧ pio ju̧i̧ tara̧ oaiä, ado a̧ro̧rȩ pio dibëiä ma̧ȩ ta̧rëdëa̧ oaiä, jabechji̧ bücjüri̧ cjia tjamo̧pea̧requededibe. Pio ju̧i̧iä chjadüa̧reconȩ Timoteo ju̧i̧ pio dibë chjiari chjadëri̧ ta̧rëpea̧ oa. 'Aja̧, yö̧ta dari̧ quëna̧diro̧da, Ichiaerë chjai̧dëri̧ japa tänȩa̧ oa quëna̧dëji̧ri̧pe bagapai̧ dadiro̧da, a̧ro̧rȩ badëri̧ ja̧beparea̧mi̧ dari̧ u̧i̧papai̧ dadiji̧ri̧da' quëna̧ jo̧rȩtamȩrȩ chjadüa̧reconȩ pio dibëiä chjadëri̧ ta̧rëpea̧ oa.

⁶ Jabo yaba̧ pea ma̧na̧na̧ra̧diibe Timoteo judi. Pio dibëiäpȩ järëremȩrȩ ma̧ȩ goae oa chia ma̧na̧na̧ra̧diibe pio dibë chjiari. "Aja̧, Ütë tjamo̧ pio ju̧i̧ chjuari̧ quëna̧diro̧jo̧ȩ" yo̧a̧diibe. "Ado pio ju̧i̧ ea tjamo̧ji̧ri̧rȩ cjo̧ro̧dirȩ jibëa̧ oti̧ pio ji̧ri̧bo" yo̧a̧diibe. "Ado pio dibë, jabechji̧ cjäri̧ri̧ cjia jo̧rȩtadiro̧dibe" yo̧a̧diibe. "Ado mȩnȩro̧ pio ji̧ri̧iäpȩmo̧ odai̧ tarari̧ jo̧rȩtami̧ odai̧ tarari̧ jo̧rȩtadiro̧dibe peaja̧di" yo̧a̧diibe. Aja̧, ja̧di ta̧rëri̧ ni̧bä chjaoa̧diibe pio dibë chjiari.

⁷ Ado a̧ro̧rȩ ja̧di ta̧rëri̧ ta̧rëa̧ oaiä, ma̧ chiadëri̧ cjia tjamo̧pea̧rea̧rȩ ibëa̧ oti̧. A̧ro̧rȩ ma̧i̧ da oa chjätäji̧ri̧borë, conȩdarea̧ pio ju̧i̧ taraji̧ri̧borë, jabechji̧ ma̧ chiadëri̧ cjiari̧ cjatäcjie jo̧rȩtarea̧rȩ pio dibë chjiari ta̧rëa̧ oaiä, "chjuari̧ quëna̧ji̧ri̧rȩ cjo̧ro̧dirȩ" yo̧a̧ oa ta̧rëa̧ oaiä.

⁸ Tjamo̧ davä. Mȩnȩro̧ Ano̧mȩ pio ju̧i̧ chjuari̧ quëna̧ji̧ri̧rȩ cjo̧ro̧a̧ oaiä, jabechji̧ ma̧ chjupi̧ cjiari̧ jo̧rȩtarea̧ darea̧rȩ, bücjüri̧ cjiarea̧ decjiari̧.

⁹ Ado pio ju̧i̧iä a̧dë chjäte ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ ju̧i̧, 'chjadë tjamo̧ri̧ japea̧diji̧ri̧da' quëna̧ jo̧rȩtamȩrȩ. Ado chji̧ goae tjamo̧ra̧ jo̧rȩtarea̧rȩ pio dibëiä, mȩnȩro̧ chjuari̧ quëna̧ oaiä.

¹⁰ Ado pio dibë ado chjereno̧ datämi̧ cjiaji̧ri̧rȩ ji̧dë ma goë cjo̧dë chjaorea̧rȩ pio dibë chjiari. Aja̧, doro, gȩnȩräbo cjo̧dë chjaorea̧ro̧jo̧ȩ pio dibëdi dëbëdiärea̧ yürütä jadü cjiarea̧mi̧ dari̧. Jabechji̧ mȩnȩro̧ Quiricho ju̧i̧ ji̧dë u̧i̧ chjuari̧ quëna̧pea̧ oa, mȩnȩro̧ quëna̧ üdë ji̧dë u̧i̧ joechjape jämi̧ dari̧ cjiapea̧ oa yürütämi̧ cjiarea̧ro̧dibe, mȩnȩro̧ jabëdiäa̧ pio ju̧i̧, mȩnȩro̧ jabë ta̧rëdëa̧ pio ju̧i̧.

¹¹ Ibëa̧ Ama̧i̧ Ütë judi, ado ibëa̧ Ano̧mȩ Jechu pio judiborë tuti japatädiro̧ibe a̧ro̧rȩ japamitë boi̧chji̧ chjätä ëte pio dibëiäpȩ jädärärea̧ dapea̧ oa.

¹² Ado chjadëri̧ a̧dotädidibe Ano̧mȩ judi pumȩ ütëbodärä oa ji̧dë u̧i̧ ea tjamo̧pe jäpea̧ ji̧. Danȩ, ea tjamo̧rea̧ro̧dibe. Ado a̧ro̧rȩ dibë eami̧ eatäreji̧ri̧nȩrȩ peaja̧di dibëa̧ dëbëti̧ra̧ chia.

¹³ Ado o ji̧ri̧iäpȩmo̧ eaji̧ri̧rȩ cjo̧ro̧a̧ oaiä, jabechji̧ ju chiaparȩmi̧ dari̧ japapatädidibe dibëa̧ chji̧rä, mȩnȩro̧ chjai̧dë ja̧ queri̧dëräpȩ cjiami̧ dari̧ cjo̧ro̧pea̧ oa, mȩnȩro̧ chjai̧dë oa miredëa̧ oa cjiami̧ dari̧ cjo̧ro̧pea̧ oa. Ado ja̧dëa ji̧ Ano̧mȩ Jechu pio judi jibëa̧ pumȩ pio ji̧ri̧ nö̧ta ma̧na̧rä, jabechji̧ coëma cjia maearë cjiadiäparea̧rȩ ibëa̧ Ama̧i̧ Ütë pio ju̧i̧ ja̧ dëbëräpȩ, pio ibë aechide yo̧rea̧mi̧dëri̧.