Techaronichȩche Ma̧ȩ 2 - Biblia Pume

Ja̧di dari̧ ja̧beparëremȩde Pablo judi Techaronichȩcheräpȩ

¹ Danȩrȩ ca̧ oti̧, a̧ro̧rȩ pio dibëiäpȩ järërea̧ ji̧, jabechji̧ ba chiari̧ ja̧beparea̧ darëreji̧ri̧rea̧rȩ. Jabechji̧ pio dibë chjadëri̧ a̧dorea̧ daea̧ oaiä, badëri̧ jädëa̧rea̧rȩ. Pio ju̧i̧ tjamo̧ri̧ dabanȩrȩ.

² Jabo a̧ro̧rȩ pio dibëiäpȩ jabë jädärädëa̧rä, conȩdarëreji̧ri̧diro̧ibe Pjiriporäpȩ cjo̧ro̧ji̧ri̧ judiro̧. Jabechji̧ a̧ro̧rȩ a̧ra̧ano̧a̧ pio ju̧i̧iä, gitoi̧ dari̧ bide cjaeärëreji̧ri̧diro̧ibe. Ado ya̧ea̧diro̧ibe idëri̧ cjiape järi̧. Ado a̧ro̧rȩ järidëpe jätärea̧ ji̧, jabechji̧ chjadëri̧ a̧dorëremȩdiibe ibëa̧ Ütë judi a̧ro̧rȩ ju to̧bape jäpea̧ oa, a̧ro̧rȩ uapadëji̧ri̧rȩ a̧ra̧ano̧pea̧ oa. Ado ibë chjadëri̧ a̧doa̧ oaiä pio dibëiäpȩmo̧bo a̧ra̧ano̧rea̧ darëreji̧ri̧rea̧ro̧dibe. Pumȩ no̧i̧dërë dëbëpe chjaoa̧räbo, a̧ro̧rȩ ado chjereno̧ tarapai̧ daräbo, jabechji̧ Ütë ja̧ ma̧ȩ chjadëi̧ pio ju̧i̧ ni̧bä chjaorea̧ darëreji̧ri̧rea̧ro̧dibe, oëadëri̧ cjiaji̧ri̧mi̧ dari̧ a̧ra̧ano̧ji̧ri̧rȩ.

³ Ado a̧ro̧rȩ dibë a̧ra̧ano̧a̧ chjö̧na̧i̧rȩ tjamo̧i̧ cjiari̧ baä maeade. Jabechji̧ dibë u̧i̧patämi̧ cjiaji̧ri̧rȩ a̧ra̧ano̧dëa̧rea̧ro̧dibe. Ado dibëiä eami̧ oa baë mitërea̧ jo̧rȩtadëa̧rea̧rȩ, jabo jabechji̧ chjadëri̧ jo̧rȩtaji̧ri̧rȩ a̧ra̧ano̧rëreji̧ri̧rea̧ro̧dibe, u̧i̧parea̧ decjiari̧.

⁴ Jabechji̧ Ütë tjamo̧ pio judi tänȩa̧ oa a̧ra̧ano̧rëreji̧ri̧rea̧ro̧dibe. 'Aja̧, ütarë daea̧ oa cjiadiro̧da, jabechji̧ ma̧ȩ chjadëi̧ pio ju̧i̧ a̧ra̧ano̧tä eaquiji̧ri̧da, pio jiro ja̧beparea̧ oa yürütäremȩquiji̧ri̧da' quëna̧ jo̧rȩtamȩrȩ yürürëremȩdiibe. Ado pio ju̧i̧iä Ütërë yo̧a̧ pio ju̧i̧mo̧i̧ a̧ra̧ano̧rea̧ro̧dibe. Jabechji̧ pumȩ judiro̧ pio ibë chjiari chjacjiamȩri̧ ni̧bäpea̧ oa a̧ra̧ano̧dërea̧rȩ, jabo Ütë tjamo̧ pio ju̧i̧mo̧i̧ jo̧rȩtaji̧ri̧rȩ a̧ra̧ano̧rea̧rȩ, pio ju̧i̧iäpȩmo̧ ma ma̧ chiadëri̧ cjiaparȩpea̧ oa. Jabechji̧ pio judi ibëa̧ chji̧ oa cjacjarë damȩ tara, 'Aja̧, ja̧di dari̧ jo̧rȩtaji̧ri̧rȩ ja̧bepadiro̧da' quëna̧ dabamȩ tara, jabechji̧ pio ju̧i̧mo̧i̧ jo̧rȩtaji̧ri̧rȩ ja̧bepatämi̧ cjiarea̧rȩ.

⁵ Ado pio ju̧i̧iä dibë a̧ra̧ano̧a̧ ji̧, jabechji̧ goaeri̧ ni̧bädëa̧rea̧ro̧dibe. Dibëa̧ chëre oa baë mitëpea̧ oa gari̧pe gari̧pe a̧ra̧ano̧dëa̧rea̧ro̧dibe. Ado a̧ro̧rȩ ja̧di dari̧ japea̧ pio ju̧i̧ chjiari tjamo̧ri̧ dabadiibe Ütë tjamo̧ judi.

⁶ Ado a̧ro̧rȩ a̧ra̧ano̧a̧ ji̧, 'jabechji̧ ibë ta̧rë chaji̧ri̧ pio judiro̧ ba chia jo̧rȩtapea̧ chiadiro̧ibëda, ado o judiro̧borë ba chia jo̧rȩtapea̧ chiadiro̧ibëda' quëna̧ji̧ri̧rȩ a̧ra̧no̧dëa̧rea̧ro̧dibe. Jabo danȩrȩ, Jechu Quiricho pio judi ibë chjadüa̧ tara, pio ibë tjamo̧ yo̧rea̧ yürüa̧ tara, jabechji̧ chjadëtäremȩde a̧ro̧rȩ yo̧a̧rä judi, jabechji̧ "Ba chia dachjiibe" yo̧a̧rä judi.

⁷ Jabo cjäri̧ marea̧ro̧dibe, ja̧di ta̧rëri̧ yo̧dëa̧rea̧ro̧dibe, jabo jabechji̧, joji̧ri̧mi̧ dari̧ japarëreji̧ri̧rea̧ro̧dibe chuchu yürüji̧ri̧mi̧ dari̧. Aja̧, ma̧ chjua daji̧ri̧rȩ jidarëreji̧ri̧rea̧ro̧dibe bücjüi̧ idaji̧ri̧mi̧ dari̧.

⁸ Jabechji̧ pio dibë ea tjamo̧ tara, mȩnȩro̧ pio ibëiä goae tjamo̧ tara, järi tjamo̧rërëreji̧ri̧rea̧rȩ pio dibë ana̧ri̧ a̧dopea̧ oa. Goe chiari̧ ja̧bopai̧ dari̧ cjiaräbo cjiadiäa̧rea̧rȩ dibë a̧ra̧ano̧pea̧ oa. Tjamo̧ davä. Dibë ea tjamo̧ tara, ja̧boa̧rä yuro cjiadiäa̧täreji̧ri̧rea̧rȩ Ütë ja̧ ma̧ȩ chjadëi̧ pio ju̧i̧ a̧ra̧ano̧pea̧ oa, dibë chjadëri̧ a̧dopea̧ oa. 'Jabechji̧ ba chia tjamo̧diro̧ca̧da' quëna̧ jo̧rȩtaji̧ri̧rȩ darëreji̧ri̧rea̧ro̧dibe.

⁹ Ado danȩrȩ ca̧ oti̧, ¿jo̧rȩtadënȩrȩ? A̧ro̧rȩ dibëa̧ chjarerä ana̧ri̧ ja̧beparërea̧ ji̧ ¿jo̧rȩtadënȩrȩ? Doromo̧dë oa jabo gȩrȩräbo ja̧bepe cjiarëreji̧ri̧rea̧rȩ ibëa̧ chëre oa boapea̧ oa. Jabechji̧ pio dibëiä cjo̧dëtärea̧ ji̧, cjäri̧ marea̧rȩ, ibëa̧ oa ja̧beparëreji̧ri̧rea̧rȩ ibëa̧ jurarea̧ oa gatëpea̧ oa. Tjamo̧ davä. A̧ro̧rȩ Ütë ja̧ ma̧ȩ chjadëi̧ oa a̧ra̧ano̧rërea̧ ji̧, ja̧di da maeari̧ ja̧bepe cjiarëreji̧ri̧rea̧rȩ pio dibëiä cjo̧dëchea oa.

¹⁰ Pio ju̧i̧ tjamo̧ri̧ dabanȩrȩ mȩnȩro̧. Jabechji̧ dibëa̧ dachoro cjo̧ro̧rëreji̧ri̧rea̧rȩ. Ado Ütë tjamo̧ pio judiborë dabade pio ibë chjiari. Jabechji̧ dibëa̧ dacho cjo̧ro̧rërea̧ ji̧, chjai̧dë oa japadëji̧ri̧ oa, jabo coëma cjiari̧ cjo̧ro̧ baäji̧ri̧ oa dae chjaorenȩro̧ibe, pumȩ judiro̧ pio ibëiäpȩmo̧ poë aechide yo̧rea̧mi̧dëri̧ cjo̧ro̧ cjiaji̧ri̧ oa. Aja̧ ca̧ oti̧, ja̧di dari̧ cjo̧ro̧ji̧ri̧rȩ na̧rȩriä cjo̧ro̧rëreji̧ri̧rea̧ro̧dibe quëna̧ji̧ri̧ pio ji̧ri̧.

¹¹ Jabechji̧ jäjäa judi jibëa̧ u̧ri̧ ji̧ri̧ japami̧ dari̧ chi̧dëea̧rea̧ro̧dibe pumȩ nö̧tai̧ oa. Ma̧ chiadëri̧ cjiape järea̧mi̧ dari̧ ju chiaparȩa̧rea̧ro̧dibe. Ado mȩnȩro̧, 'Aja̧, tjamo̧ri̧ yo̧diro̧ibëda, ja̧di dari̧ japea̧diro̧ibëda' quëna̧ dabanȩrȩ.

¹² Aja̧, ji̧dë ma chi̧dëearëreji̧ri̧rea̧ro̧dibe mȩnȩro̧ järi tjamo̧pe jäpea̧ oa. Ado babui̧ra̧ chjichjipami̧ dari̧ ni̧bärëreji̧ri̧rea̧ro̧dibe peaja̧di mȩnȩro̧ cjatäcjie jo̧rȩtarea̧ dapea̧ oa. "Aja̧, Ütë tjamo̧ ju̧i̧iäpȩmo̧ ma̧ chiadëri̧ cjiaparȩrea̧mi̧ dari̧ cjo̧ro̧chji̧vä" yo̧tarëreji̧ri̧rea̧ro̧dibe. Jabechji̧ pio judi tjamo̧de dibë ëna̧diäa̧mȩ judi. Ëna̧diärëremȩdidibe jënȩ yo̧a̧ chja̧oeräpȩ cjiatä a̧dë chjäte tatari̧ cjiamȩräpȩ.

Ja̧di dari̧ cjo̧ro̧rëreji̧ri̧dirȩ Techaronichȩcheräpȩ quëna̧ji̧ri̧ judiro̧

¹³ Ado pio ju̧i̧iä ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ ju̧i̧ mȩnȩro̧ quëna̧ji̧ri̧pea̧ tara. Jabechji̧ mȩnȩro̧ pearä ta̧rërërea̧ ji̧, 'jabechji̧ Ütë tjamo̧ ja̧ ma̧ȩdida, pumȩ ja̧ ma̧ȩdëdida, jabo Ütë tjamo̧ pio ju̧i̧ ja̧ ma̧ȩdida' quëna̧ jo̧rȩtaji̧ri̧rȩ quëna̧ji̧ri̧pea̧nȩrȩ. Tjamo̧ davä. Ütë tjamo̧ ja̧ ma̧ȩ pio ju̧i̧ quëna̧ji̧ri̧pea̧nȩrȩ ado cja̧rȩmo̧ ma̧ȩdë oa. Ado pio jiro ma̧ȩ üdë, jabechji̧ chjadëri̧ a̧do chjaorëremȩdidibe mȩnȩro̧ tjaoëpai̧ dari̧ cjo̧ro̧pe järea̧mi̧ dari̧.

¹⁴ Ado ja̧dëa ji̧ ca̧ oti̧, mȩnȩro̧ Ütë tjamo̧ ja̧ ma̧ȩ oa quëna̧rërea̧ ji̧, jabechji̧ conȩda̧ oa cjiarëreji̧ri̧nȩrȩ dibëa̧ chiriräpȩ cjo̧ro̧ji̧ri̧ pio ji̧ri̧iä. Peaja̧di dari̧ tararëreji̧ri̧dirȩ Jechu Quiricho pio judiri ja̧ji̧ri̧ judiro̧ Judearäpȩ ju̧ri̧. Tjamo̧ davä. Ütë tjamo̧ ja̧ a̧dopaji̧ri̧ judiro̧, Judea quȩmȩ chiriräpȩ ju̧ri̧ a̧dopaji̧ri̧ judiro̧borë conȩda̧ oa cjiarëreji̧ri̧dirȩ jibëa̧ chiriräpȩ cjo̧ro̧ji̧ri̧ judio pio ji̧ri̧iä.

¹⁵ Jabechji̧ judio judiro̧ orë ja̧bo tänȩrëreji̧ri̧diro̧jȩrȩ Ütërë ea jana̧ chjadüa̧ oa ni̧bärëreji̧ri̧ pio ji̧ri̧. Ado pio ju̧i̧ uëri Ano̧mȩ Jechu pio ju̧i̧bo ja̧bo tänȩrëreji̧ri̧diro̧jo̧ȩ orë. Ado pio ibëbo jaepe ma̧ȩrëreji̧ri̧diro̧ibe. Jabechji̧ judiro̧ japea̧ oaiä Ütë tjamo̧ pio ju̧i̧ dëbëpe chjaomi̧ dari̧ japadiro̧jo̧ȩ. Jabechji̧ pumȩ ütëbo oa dëbëpe cjiami̧ dari̧ japa maeadiro̧jȩrȩ.

¹⁶ Jabechji̧ pio ibë tja̧reparȩmi̧ dari̧ japea̧ oaiä, pumȩ ütëbo oa dëbëpe cjiami̧ dari̧ japadiro̧jȩrȩ pumȩ ütëbo oa. Jabechji̧ a̧ro̧rȩ, judiodë pio ji̧ri̧ ni̧bä chjaotärea̧ ji̧, pio judiro̧ chjätärea̧mi̧ dari̧ ni̧bä chjaotärea̧ ji̧, cjäri̧ madiro̧ibe, tuti jape chjaodiro̧ibe a̧ro̧rȩ ni̧bä chjaorea̧mi̧dëri̧. Ado ja̧di dari̧ japea̧ oaiä a̧dë chjäte ma̧i̧ dari̧ jape chjaodirȩ. Ado judiro̧ chjai̧dëri̧ jape chjaoa̧ üdë, jabechji̧ a̧dë chjäte ji̧ra̧ri̧ cjiadiäa̧de yaba̧. Pio ju̧i̧iä Ütë tjamo̧ ja̧ ërecjiarea̧ üdë pio ji̧ri̧iäpȩmo̧ acji cjatäpea̧ ji̧ querediä tjamo̧de. Acji cjatäpadejȩrȩ chjaodëri̧.

Pablo judi datämi̧ cjiadejȩrȩ Techaronichȩcheräpȩ quëna̧ji̧ri̧ pio ji̧ri̧

¹⁷ Jabo danȩrȩ ibëa̧ oti̧, a̧ro̧rȩ dibë a̧dë ma̧na̧rërea̧ ji̧, japamitë boi̧chji̧ chjätä ëte odai̧ tarari̧ jo̧rȩte chjaorëreji̧ri̧rea̧ro̧dibe darërea̧ oaiä. Ado pio ju̧i̧iä ado chjereno̧ datämi̧ cjiaji̧ri̧rȩ jäpatea̧rea̧rȩ, jabo cjäri̧ marea̧rȩ, järea̧ dadëa̧rea̧rȩ. Ado pio ju̧i̧iä dëbë dae charea̧ dadëji̧ri̧borë, jabechji̧ ana̧ri̧ jo̧rȩtarëreji̧ri̧rea̧ro̧dibe, pio dibë nö̧taji̧ri̧mi̧ dari̧ cjiaji̧ri̧rȩ.

¹⁸ Jabechji̧ pio dibëiäpȩ jäpatea̧rea̧rȩ ji̧ra̧ri̧ co. Ado cüdë, Pablo pio judi, dëdë, babui̧ra̧ jäpatea̧requede, jabo cjäri̧ madique, järea̧ yürüdëa̧dique Ichiae judi. Jabo jabechji̧, jäe datämi̧ cjia tjamo̧rëreji̧ri̧rea̧ro̧dibe.

¹⁹ Jabechji̧ pio dibëiä ma̧ chiadëri̧ cjiari̧ jo̧rȩtarea̧ da oaiä, pio dibëiä ana̧ri̧ jidatarea̧ da oaiä, jäe datämi̧ cjia tjamo̧rëreji̧ri̧rea̧ro̧dibe ca̧ oti̧. Danȩrȩ, Ano̧mȩ Jechu pio judi jana̧rä, jabechji̧ pio ju̧i̧ ja̧ dëbëräpȩ ji̧mo̧ ëba cjiadäräparea̧rȩ pio dibë nö̧ta. Ado pio dibë nö̧ta ji̧mo̧ ëba cjiarä, ja̧di dari̧ jo̧rȩtaparea̧rȩ pio dibë chjiari. 'Aja̧, a̧ro̧rȩ ba chjiari̧ ja̧beparëreji̧ri̧ pio judiro̧diro̧da, jabechji̧ a̧ro̧rȩ boa̧ pio judiro̧diro̧da, boarea̧ ba chia tjamo̧mi̧ dadiro̧da, ado pio ji̧ri̧iä ma̧ chiadëri̧ cjiaji̧ri̧rȩ goaeri̧ ni̧bärea̧ daa̧ro̧da, jabechji̧ pio ji̧ri̧iä jidatarea̧ chiaa̧ro̧da, ja̧bepea̧ ba oa ba ano̧rea̧ pio ju̧i̧ jidatarea̧ chiaa̧ro̧da' quëna̧ jo̧rȩtaparea̧rȩ davä Jecho ja̧ dëbëräpȩ cjiarä. Tjamo̧ davä. A̧ro̧rȩ pio dibë nö̧ta Jechu ja̧ dëbëräpȩ cjiarä, 'A̧ja̧, quëna̧rea̧ daea̧diro̧da, pio a̧ro̧rȩ a̧ra̧ano̧a̧ oaiä chjätärea̧ daea̧diro̧da, ado pio ju̧i̧iä ichi ma cjiadiämi̧ dari̧ cjiadiädëa̧ro̧da jabo pio ji̧ri̧iä goaji̧ri̧mi̧ dari̧ cjiadiäa̧ro̧da, idëri̧ cjiaji̧ri̧rȩ cjiadiädëa̧ro̧da' quëna̧ jo̧rȩtaparea̧rȩ pio dibë chjiari ca̧ oti̧.

²⁰ Tjamo̧ davä. Pio dibëiä a̧dë chjäte ma̧ chiadëri̧ cjiari̧ jo̧rȩtarea̧ darea̧rȩ. Pio dibëiä a̧dë chjäte chjacjiamȩri̧ jo̧rȩtarea̧ darea̧ro̧jo̧ȩ Ütë tjamo̧ pio ju̧i̧. 'Jabechji̧ a̧ro̧rȩ ba chiari̧ ja̧beparërea̧ pio judiro̧diro̧da, a̧ro̧rȩ ibëa̧ Ano̧mȩ ja̧ oa chjadëri̧ ja̧beparërea̧ pio judiro̧ tjamo̧diro̧da' quëna̧ jo̧rȩtarea̧ro̧dibe.