Techaronichȩche Ma̧ȩ 1 - Biblia Pume

Taruparea̧ Ma̧ȩ

¹ Pablo pio judirequede. Ado pio yoa ma̧ȩ oa go̧ȩparequede ca̧ jadü pio ji̧ri̧ nö̧ta, Chivano̧ pio ju̧i̧ nö̧ta, Timoteo pio ju̧i̧ nö̧ta. Pio ji̧ri̧ nö̧ta go̧ȩpe chjadürequededibe Techaronica bë ma̧ri̧räpȩ a̧dopaji̧ri̧ oa. Ibëa̧ Ama̧i̧ Ütë ja̧ maea oa, Ano̧mȩ Jechu Quiricho pio judiri ja̧ maea oa go̧ȩpe chjadürequededibe. Cjäri̧ri̧ cjia jo̧rȩtatädidibe Ütë tjamo̧ judi mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧.

Pablo judi, jibëa̧ jadüborë Techaronicaräpë quëna̧ji̧ri̧ pio ji̧ri̧iä ma̧ chiadëri̧ cjiari̧ jo̧rȩtarëreji̧ri̧diro̧jo̧ȩ Ütë tjamo̧ ju̧i̧

² Ji̧dë ma ma̧ chiadëri̧ cjiari̧ jo̧rȩtarea̧ro̧jo̧ȩ Ütë tjamo̧ ju̧i̧ pio dibëiä. 'Jabechji̧ Ütë tjamo̧ judi chjadëri̧ japadiji̧ri̧da, chjadë tjamo̧diji̧ri̧da' quëna̧ jo̧rȩtaji̧ri̧rȩ goë cjo̧dë chjaorea̧ro̧jo̧ȩ pio dibë chjiari.

³ Jabechji̧ mȩnȩro̧ Jechu pio ju̧i̧ chjuari̧ quëna̧ oaiä, pio ju̧i̧ ea tjamo̧ji̧ri̧rȩ cjo̧ro̧a̧ oaiä, 'jabechji̧ chjadëri̧ japadiro̧da, pio ju̧i̧ ja̧ oa ana̧ri̧ ja̧bepadiro̧da, ado jidatarea̧ chiarë cjo̧ro̧diro̧da, Ano̧mȩ Jechu Quiricho judi ma̧na̧pea̧ ji̧ ji̧dë ma jidatadiro̧da, ado pio ju̧i̧iä chjai̧dëri̧ chjätäräbo ma̧ chjua cjo̧ro̧diro̧da' quëna̧ jo̧rȩtaji̧ri̧rȩ ni̧bärea̧ro̧jo̧ȩ ibëa̧ Ama̧i̧ Ütë pio ju̧i̧.

⁴ Jabechji̧ tjamo̧ri̧ dabarea̧rȩ pio dibë chjiari ca̧ oti̧. 'Aja̧, Ütë tjamo̧ judi tjamo̧ri̧ eadiji̧ri̧da, jibëa̧pe bagapea̧ oa mitëa̧diji̧ri̧da' quëna̧ dabarea̧rȩ.

⁵ Jabechji̧ a̧ro̧rȩ ma̧ȩ chjadëi̧ pio ju̧i̧ a̧ra̧ano̧rërea̧ ji̧, a̧ro̧rȩ pio dibëiäpȩmo̧ a̧ra̧ano̧rërea̧ ji̧, jabechji̧ ma̧ȩ maeara̧ a̧ra̧ano̧dëa̧rea̧rȩ, jabo Tjo tjamo̧ ja̧ jauëchja pio ju̧i̧ na̧rȩji̧ri̧rȩ a̧ra̧ano̧rëreji̧ri̧rea̧ro̧dibe, chjuari̧ quëna̧ji̧ri̧rȩ. 'Jabechji̧ ma̧ȩ chjadëi̧ üdë tjamo̧i̧ cjiari̧ baädida, Ütë tjamo̧ ja̧ ma̧ȩdida, ado ana̧ri̧ ja̧beparea̧ chiadida' quëna̧ dabaji̧ri̧rȩ a̧ra̧ano̧rëreji̧ri̧rea̧ro̧dibe. Ado a̧ro̧rȩ dibëa̧ chjarerä cjo̧ro̧ji̧ri̧ oa, jabechji̧ dae chjaorëreji̧ri̧renȩro̧ibe mȩnȩro̧. Dibë chjadëri̧ a̧dorea̧mi̧ dari̧ cjo̧ro̧ji̧ri̧ oa dae chjaoa̧renȩro̧ibe.

⁶ Ado ja̧dëa ji̧ mȩnȩro̧ quëna̧ ji̧, cho̧rëdiäji̧ri̧pea̧renȩro̧ibe, ibëa̧ Ano̧mȩ pio ju̧i̧bo. Jabechji̧ conȩda̧ oa cjiaräbo, mȩnȩro̧ quëna̧ji̧ri̧pea̧ oaiä conȩda̧ oa cjiaräbo, jabechji̧ ma̧ chiadëri̧ cjiaji̧ri̧rȩ cjo̧ro̧nȩrȩ Tjo tjamo̧ pio ju̧i̧iä.

⁷ Ado mȩnȩro̧ chjai̧dë oa chjätäräbo ma̧ chiadëri̧ cjiaji̧ri̧rȩ cjo̧ro̧ji̧ri̧pea̧ oaiä, mȩnȩro̧ cho̧rëdiärea̧mi̧ dari̧ cjo̧ro̧ji̧ri̧pea̧ oaiä, jabechji̧ goëje cho̧rëdiäji̧ri̧ mapea̧diro̧dibe Machedoniaräpȩ quëna̧ji̧ri̧ judiro̧, Acayaräpȩ quëna̧ji̧ri̧ pio judiro̧borë.

⁸ Jabechji̧ pio dibë chjiari ma̧ȩ üdë jachi tjamo̧padärärëremȩde oëra̧ti̧ oa Machidoniaräpȩ yuro, Acayaräpȩ yuro. Mȩnȩro̧ ni̧bä chjaoa̧ ma̧ȩ üdë, ibëa̧ Ano̧mȩ pio ju̧i̧ chjiari ma̧ȩ üdë, mȩnȩro̧ coëma cjiari̧ cjo̧ro̧a̧ pio ju̧i̧ chjiari ma̧ȩ üdë jachi tjamo̧padärärëremȩde. Jabechji̧ mȩnȩro̧ quëna̧ pio ju̧i̧ chjiari goë goë ta̧rëji̧ri̧pea̧ maeadirȩ davä oëra̧ti̧ oa cjo̧ro̧ji̧ri̧ judiro̧. Pio ju̧i̧iä mȩnȩro̧ quëna̧ji̧ri̧pea̧ pio ju̧i̧ chjiari yo̧dëa̧rea̧ro̧jȩrȩ. Jabechji̧ pio dibë chjiari jabërä ta̧rërërea̧ ma tara, yo̧dëa̧rea̧ro̧jȩrȩ.

⁹ Ado judiro̧ o ji̧ri̧iä ta̧rërërea̧ oaiä, jabechji̧ pio dibë chjiari ji̧dë ma ni̧bä chjaorëreji̧ri̧diro̧ibe a̧ro̧rȩ pio ju̧ri̧pȩ jäa̧ ji̧. Ado a̧ro̧rȩ pio dibëiäpȩ jäa̧ pio ju̧i̧ chjiaribo ni̧bä chjaorëreji̧ri̧diro̧ibe. Aja̧, mȩnȩro̧ ibë chjadëri̧ jea̧ pio ju̧i̧ chjiari, ibë chjadëri̧ ëba cjo̧ro̧a̧ pio ju̧i̧ chjiari ni̧bä chjaoa̧diro̧ibe peaja̧di. Ado mȩnȩro̧ pumȩrȩ jëdano̧a̧ ütë pio ju̧i̧ putu jura̧ a̧dë chami̧ dari̧ jiadarërea̧ pio ju̧i̧ chjiari, Ütë tjamo̧ pio ju̧i̧iäpȩmo̧ ano̧ mire quëna̧rërea̧ pio ju̧i̧ chjiari ni̧bä chjaoa̧diro̧ibe peaja̧di. Aja̧, mȩnȩro̧ teracaba ütëdë ja̧ oa ano̧ mire ja̧bepaji̧ri̧pea̧ pio ju̧i̧ chjiari, ja̧bodëmȩ Ütë pio ju̧i̧ ja̧ oa ja̧bepaji̧ri̧pea̧ pio ju̧i̧ chjiari ni̧bä chjaorëreji̧ri̧diro̧ibe peaja̧di.

¹⁰ Ado mȩnȩro̧ jidata̧ pio ju̧i̧ chjiari ni̧bä chjaoa̧diro̧ibe peaja̧di. 'Aja̧, jidatadiro̧da, Ütë tjamo̧ ja̧ Joja pio ju̧i̧ jidatadiro̧da, a̧dëri pio judiri ma̧na̧pea̧ ji̧ jidatadiro̧da, ja̧boa̧remȩrȩ bëdüa̧ oa cjiamȩ pio ju̧i̧ jidatadiro̧da, Ütërë bëdü tänȩa̧ pio ju̧i̧ jidatadiro̧da, Jechu pio ju̧i̧ jidatadiro̧da, Ütërë chjadüpamȩ ërecjia̧ pio ju̧i̧ tarachea oa Go̧dü Tänȩmȩ pio ju̧i̧ jidatadiro̧da' quëna̧ jo̧rȩtaji̧ri̧rȩ ni̧bä chjaorëreji̧ri̧diro̧ibe pio dibë chjiari.