Taruparea̧ Ma̧ȩ 47 - Biblia Pume

Jacobo judi bëparëremȩde Goche quȩmȩräpȩ

^1-2 Ado ja̧dëa ji̧ Joche judi jibëa̧ oti̧ cja̧rȩichimo̧ maea oa mitë ëte, ëba järëremȩdejȩrȩ pjarao̧ pio ju̧i̧iäpȩ. Ado pio ju̧i̧iäpȩ go̧düdärä ëte, ja̧di ta̧rëri̧ yo̧rëremȩdejȩ ütë oa: —Ca̧ pumȩ judiro̧ ma̧na̧dirȩ. Ca̧ ama̧i̧ judi, ca̧ oti̧ judiro̧ ma̧na̧dirȩ Canaa̧ quȩmȩ chiriri pio judiri. Goche quȩmȩräpȩdirȩ yaba̧. Jibëa̧ baca oa, jibëa̧ oveja oa ma̧ȩ ma̧na̧dirȩ. Aja̧, jibëa̧ oa, chjö̧na̧i̧ oa goa ma̧na̧dirȩ —yo̧mȩrȩ yo̧rëremȩdejȩ pjarao̧ ju̧i̧. Ado ja̧dëa ji̧ na̧rȩa̧dejȩrȩ jibëa̧ pumȩ ji̧ri̧ pjarao̧ pio ju̧i̧iäpȩmo̧.

³ Ado pjarao̧ judi pio ji̧ri̧ daea̧ oaiä, jabechji̧ iëno̧ë ta̧rërëremȩdejȩrȩ Joche ja̧ oti̧ pio ji̧ri̧iä: —Aja̧, ¿tjana̧ ja̧bepe cjiaji̧ri̧rȩ cjo̧ro̧nȩrȩ mȩnȩro̧? Ado dëbë yo̧ji̧ri̧rȩ yo̧a̧diro̧jo̧ȩ: —Tjana̧ ja̧bepe cjiadë, danȩ ibëa̧ ütë, oveja jidaji̧ri̧rȩ ja̧beparea̧rȩ. Ibëa̧ ütëti̧rȩ ja̧beparërea̧mi̧ ja̧beparea̧rȩ. Na̧ mu̧i̧tjoi̧mi̧ darë ja̧beparea̧rȩ oveja buba oa —yo̧a̧diro̧jo̧ȩ—.

⁴ Canaa̧ quȩmȩ chiriräpȩ cjo̧ro̧rëreji̧ri̧rȩ pio yoa chiri oa ano̧ mire cjo̧ro̧ji̧ri̧pea̧rea̧rȩ. Jabo ma̧na̧mi̧ ma̧na̧dëa̧rea̧rȩ, jabomo̧ cjo̧rȩra̧pea̧rea̧rȩ. Ta̧mȩcho̧ ja̧boji̧ri̧rȩ cjo̧ro̧a̧ oaiä, jurarea̧ decjia oaiä, jabechji̧ pio jauëräpȩmo̧ ma̧na̧rea̧rȩ. Ibëa̧ oveja ja̧ oa cärä decjia oaiä, ibëa̧ baca ja̧ oa cärä decjia oaiä, jabechji̧ pio jauëräpȩmo̧ ma̧na̧rea̧rȩ. Cjäri̧ri̧ cjia daibe ütë. Goche quȩmȩ chiriräpȩ cjo̧ro̧rea̧ yürütäremȩrenȩibe —yo̧ji̧ri̧rȩ yo̧rëreji̧ri̧diro̧jo̧ȩ pjarao̧ ju̧i̧.

⁵ Ja̧dëa ji̧ pjarao̧ judi yo̧a̧dejȩ Joche ju̧i̧: —Danȩ, na̧ ama̧i̧ judi, ado na̧ oti̧ judiro̧ pio jauëräpȩmo̧ ma̧na̧ tara, pio mȩa nö̧ta ëba cjo̧ro̧pea̧ oa ma̧na̧ tara,

⁶ jabechji̧ mȩnȩ jo̧rȩtami̧ mitëvä chiri chjadë tjamo̧ oa na̧ pumȩ judiro̧ chjadëri̧ cjo̧ro̧pea̧ oa. Aja̧, chiri chjadë tjamo̧ oa mitëtäremȩrenȩ na̧ pumȩ ja̧ oa. Jabechji̧ cjo̧ro̧tädirȩ Goche quȩmȩ chiriräpȩ ju̧ri̧. Ado danȩ, judiro̧ orë baca oa jidapea̧ ji̧ chjadëri̧ dabarä judi, jabechji̧ ca̧ea̧ pio ju̧i̧bo tjamo̧ jidaji̧ri̧rȩ ja̧bepatäreji̧ri̧diro̧jo̧ȩ —yo̧mȩrȩ yo̧rëremȩdejȩ Joche ju̧i̧ pjarao̧ judi.

⁷ Ja̧dëa ji̧ Joche judi jibëa̧ ama̧i̧ oa ëba järemȩrȩ na̧rȩrëremȩdejȩ pjarao̧ ju̧i̧. Ado Jacobo judi pjarao̧ pio ju̧i̧ ba chia damȩrȩ jea̧dejȩ.

⁸ Ado pjarao̧ judi iëno̧ë ta̧rëa̧dejȩ: —Danȩ, ¿napai̧ ui goamȩrȩ cjo̧ro̧renȩ?

⁹ Ado Jacobo judi dëbë yo̧mȩrȩ yo̧a̧dejȩ: —Napai̧dë, jabechji̧ 130 ui maea oa goarequede ji̧ra̧ tjamo̧dë oa. Jabo ca̧ ütëti̧rea̧ judiro̧, ja̧diri̧mo̧i̧ ui goaji̧ri̧rȩ cjo̧ro̧dërëreji̧ri̧dirȩ jabo ui ji̧ra̧ tjamo̧ji̧ri̧rȩ cjo̧ro̧rëreji̧ri̧di̧rȩ. Ado cüdë ui ji̧ra̧dëa̧ cjo̧ro̧a̧ nö̧ta, jabechji̧ oëra̧ti̧ oa chjätäti̧ cjiamȩrȩ cjo̧ro̧rëremȩrequede chjai̧dë pio ju̧i̧ tara chjaomȩrȩ —yo̧mȩrȩ dëbë yo̧rëremȩdejȩ pjarao̧ ju̧i̧ Jacobo judi.

¹⁰ Ado Jacobo judi pjarao̧ pio ju̧i̧ chjadëri̧ jea ëte, chjadëri̧ cjo̧ro̧pea̧ ma̧ȩ oa ni̧bä ëte, jabechji̧ baärëremȩde.

¹¹ Ado ja̧dëa ji̧ Joche judi, pjarao̧ pio judi tänȩa̧ oa yürürëremȩdejȩrȩ jibëa̧ pumȩ ji̧ri̧ chiri chjadë tjamo̧ oa, judiro̧ chjadëri̧ cjo̧ro̧pea̧ oa. Ado pio ju̧i̧iä Joche ja̧ ama̧i̧ judi, ado ju̧i̧ ja̧ oti̧ pio judiro̧borë, jabechji̧ jibëa̧ chiri oa goaji̧ri̧pea̧dirȩ. Aja̧, Goche quȩmȩräpȩ jibëa̧ chiri oa goaji̧ri̧pea̧dirȩ, Damecheräpȩ.

¹² Ado ja̧dëa ji̧ Joche judi jurarea̧ oa yürürëremȩdejȩrȩ jibëa̧ pumȩ ji̧ri̧. Jibëa̧ ama̧i̧ pio ju̧i̧, jibëa̧ oti̧ pio ji̧ri̧ yürürëremȩdejȩrȩ, jibëa̧ bori̧bo. Aja̧, ütëborë chjadëri̧ jurapea̧ oa yürürëremȩdejȩrȩ.

Chiri üdë yürüdëpea̧rä judirä, jabërä boea oa cjiaremȩ jurarea̧ra̧ ano̧ mirȩ chjaorëremȩdejȩrȩ pumȩ ji̧ri̧ Joche judi

¹³ Ado chiri üdë ji̧dë ma jurarea̧ yürüdë oaiä, jabechji̧ tirigo cho decjiape bagarëremȩde. Ado ta̧mȩcho̧ ja̧bo tjamo̧ji̧ri̧rȩ cjo̧ro̧ marëreji̧ri̧dirȩ Ejitoräpȩ cjo̧ro̧ji̧ri̧ judiro̧, Canaa̧räpȩ cjo̧ro̧ji̧ri̧ pio judiro̧borë. Jabechji̧ oëra̧ti̧ oa cjo̧ro̧ji̧ri̧ judiro̧ ta̧mȩcho̧ ja̧bo ga̧re baä marëreji̧ri̧dirȩ jurarea̧ decjiapea̧ oaiä.

¹⁴ Ado jibëa̧ chërera̧ gatëtärea̧ ji̧, cjäri̧ made, chëre decjiapea̧de. Jabechji̧ pumȩ judiro̧ Joche pio ju̧i̧iä tirigo cho oa gatë chjaoa̧ oaiä, jabechji̧ pumȩ ja̧ chërerëremȩ üdë pjarao̧ ja̧ bëräpȩ boea̧ oa cjia marëremȩde.

¹⁵ Ado ja̧dëa ji̧ Canaa̧räpȩ cjo̧ro̧ji̧ri̧ ja̧ chëre üdë goarijäa̧ ji̧, ado Ejitoräpȩ cjo̧ro̧ji̧ri̧ ja̧ chëre üdë peaja̧di goarijäa̧ ji̧, jabechji̧ Joche pio ju̧i̧iäpȩ jä chjao marëreji̧ri̧dirȩ Ejitoräpȩ cjo̧ro̧ji̧ri̧ judiro̧. Ado yo̧a̧diro̧jo̧ȩ: —Danȩ, jurarea̧ yürüibe a̧ro̧rȩ ja̧bochea oa. Chëre goadëji̧ri̧pea̧rea̧rȩ. Jabechji̧ jurarea̧ oa yürüibe a̧ro̧rȩ na̧ dachoro ja̧bochea oa —yo̧a̧diro̧jo̧ȩ Joche pio ju̧i̧iäpȩmo̧.

¹⁶ Ado Joche judi dëbë yo̧a̧dejȩrȩ: —Danȩrȩ, mȩnȩro̧ chëre goadërä judi, jabechji̧ goa jana̧chji̧coe dibëa̧ baca oa, dibëa̧ oveja oa. Ano̧ mireparequededibe tirigo chora̧ —dëbë yo̧mȩrȩ yo̧rëremȩdejȩrȩ Joche judi.

¹⁷ Pio ju̧i̧iä goa järëreji̧ri̧diro̧jo̧ȩ jibëa̧ baca oa, jibëa̧ oveja oa, jibëa̧ chivo oa, jibëa̧ buro oa, jibëa̧ yae oa. Ado Joche judi ano̧ mirea̧dejȩrȩ jurarea̧ maeara̧. Ja̧di dari̧ japamȩrȩ ano̧ mirerëremȩdejȩrȩ cja̧rȩmȩ ui nö̧ta. Ado judi ja̧di dari̧ ano̧ mirea̧ oaiä jabechji̧ quirë baärea̧ darëreji̧ri̧dirȩ.

¹⁸ Ja̧dëa ji̧ japamitë chjätä ëte, ado cja̧rȩmo̧ uirä, jibëa̧ jurarea̧ üdë ado goarijäa̧rä, ado jäa̧diro̧jo̧ȩ Joche ju̧i̧iäpȩ. Ado yo̧a̧diro̧jo̧ȩ: —Danȩ, “chëre goarea̧rȩ yaba̧” yo̧rea̧mi̧dëde. Chjadëri̧ dabarenȩ ibë chjiari. Bë marea̧rȩ. Chëre decjiarea̧rȩ. Ibëa̧remȩ pio ju̧i̧ goamȩpea̧renȩ pio mȩnȩ. Ado ibëa̧ baca oa, ibëa̧ yae oa, ibëa̧ chivo oa peaja̧di goamȩpea̧renȩ mȩnȩ. Ibëa̧ chiri pio ju̧i̧mo̧i̧ goarea̧rȩ ibëa̧ icjara pio ju̧i̧bo. Ado judiri goadërea̧rȩ —yo̧a̧diro̧jo̧ȩ—.

¹⁹ Danȩ, a̧ro̧rȩ na̧ dachoro ja̧bochea oa, jabechji̧ pio ibëiä gatëtäremȩrenȩibe ibëa̧ chiri oa. Jurarea̧ra̧ pio ju̧ri̧ra̧ gatëtäremȩrenȩibe. Ado danȩ, ibëa̧ chiri üdë badëri̧ a̧rȩchea oa, jabechji̧ pio ibë ja̧bepa tänȩtäremȩrenȩibe. Pjarao̧ pio ju̧i̧ ja̧ oa ja̧bepë yürütäreji̧ri̧rea̧ro̧jo̧ȩ ibëa̧ chiriremȩ pio ju̧i̧. Ado a̧ro̧rȩ ponȩpea̧ cho oa yürütäremȩrenȩibe ji̧dëri̧ a̧ro̧rȩ chjadëri̧ ja̧bepapea̧ oa. Danȩ, a̧ro̧rȩ ja̧borä judi badëri̧ a̧rȩpade davä chiri üdë. Ja̧di tara jabechji̧, jurarea̧ oa yürüibe ibëa̧ chiri ba oa —yo̧ji̧ri̧rȩ yo̧rëreji̧ri̧diro̧jo̧ȩ Joche ju̧i̧.

²⁰ Ja̧dëa ji̧ Joche judi pumȩ ja̧ chiriremȩ oa chjö̧na̧i̧ oa gatërëremȩdejȩ pjarao̧ ja̧ oa. Ejitoräpȩ cjo̧ro̧ji̧ri̧ pio judiro̧ ütëborë gatë tänȩrëreji̧ri̧diro̧jo̧ȩ jibëa̧ chiriremȩ oa Joche pio ju̧i̧iäpȩmo̧. Jurarea̧ dadëa̧ oaiä gatë tänȩrëreji̧ri̧diro̧jo̧ȩ. Ado pio ju̧i̧iä pumȩ ja̧ chiriremȩ üdë pjarao̧ pio ju̧i̧ ja̧ mapea̧de.

²¹ Ado pio ju̧i̧iä Ejito chiri nö̧tai̧ oa cjo̧ro̧ji̧ri̧ judiro̧ pjarao̧ ja̧ mu̧i̧tjomi̧ dari̧ cjiadiäa̧ marëreji̧ri̧dirȩ pio ju̧i̧ ja̧ chiri maea oa ja̧bepea̧ oaiä.

²² Aja̧, pumȩ ja̧remȩ chiri chjö̧na̧i̧ oa gatërëremȩde Joche judi, jabo pio oamo̧ gatëdërëremȩde. Jabechji̧ o ji̧ri̧ chjiari goë tuti cjo̧dëji̧ri̧ pio ji̧ri̧ ja̧ chiri oamo̧ gatëdëa̧de, jibëa̧ ütë teracaba pio ju̧i̧iä goë tuti cjo̧dëji̧ri̧ ji̧ri̧ ja̧ chiri oa. Jabechji̧ pjarao̧ judi pio ji̧ri̧iäpȩmo̧ babui̧ra̧ ba ano̧a̧ oaiä, jënȩro̧ ja̧bepea̧ ba oa babui̧ra̧ ba ano̧a̧ oaiä, jabechji̧ jibëa̧ jurarea̧ oa gatërea̧ darëreji̧ri̧dirȩ. Ado pio ju̧i̧iä pio ji̧ri̧ ja̧ chiri oa gatë tänȩdërëreji̧ri̧diro̧jo̧ȩ.

²³ Ja̧dëa ji̧ Joche judi yo̧a̧dejȩrȩ pumȩ ji̧ri̧: —Danȩrȩ, pjarao̧ ja̧ mu̧i̧tjoi̧ mapea̧nȩrȩ yaba̧. Ado dibëa̧ chiriremȩ üdë peaja̧di pjarao̧ ja̧ chiri mapea̧de. Pio cüdë gatëa̧ oa pjarao̧ ja̧ mapea̧de, pio mȩnȩro̧borë. Ja̧di tara mitëchji̧vä pio yoa cho oa. Jabechji̧ chjadëri̧ ponȩchji̧jo̧ȩ.

²⁴ Ado japamitë chjätä ëte joechjapea̧rä, jabechji̧ mitëparenȩro̧jo̧ȩ. Jabo danȩrȩ, o oa china̧chjari̧ tutipea̧de pjarao̧ ja̧ oa. Jabechji̧ mȩnȩro̧ 5 chaco mitërä judi, jabechji̧ cja̧rȩmȩrȩ yürüpea̧de pjarao̧ pio ju̧i̧iäpȩmo̧. Ado jadüchiami̧ chaco maea oa mitëpanȩrȩ. Mȩnȩro̧ jurapea̧ oa, dibëa̧ pumȩ pio ji̧ri̧ ëba jurapea̧ oa, ado chjereno̧ ponȩpea̧ oa, dibëa̧ bori̧ pio ji̧ri̧ chjadëri̧ ëba jurapea̧ oa mitëpanȩrȩ dibëa̧ pio ju̧i̧ —yo̧mȩrȩ yo̧rëremȩdejȩrȩ Joche judi.

²⁵ Ado ja̧dëa ji̧ judiro̧ dëbë yo̧a̧diro̧jo̧ȩ Joche ju̧i̧: —Aja̧, chjadëri̧ japea̧renȩibe. A̧ro̧rȩ chjadëri̧ cjo̧ro̧rea̧mi̧ dari̧ tuti japea̧renȩibe. Ado yaba̧ jabechji̧, pjarao̧ pio ja̧ mu̧i̧tjoi̧ maearë ja̧bepë yürüparea̧ro̧jo̧ȩ —dëbë yo̧ji̧ri̧rȩ yo̧rëreji̧ri̧diro̧jo̧ȩ Joche ju̧i̧.

²⁶ Ado ja̧dëa ji̧ Joche judi, jënȩ yo̧a̧ ma̧ȩ pio ju̧i̧ go̧ȩ irä go̧ȩpea̧ oa cjia tänȩrëremȩdejȩ Ejitoräpȩ cjo̧ro̧ji̧ri̧ pio judiro̧ ji̧dë ma chjadëri̧ ta̧rëdiäpea̧ oa. "Aja, pumȩ judiro̧ jibëa̧ jurarea̧ oa mitërä, jabechji̧ o oa china̧chjari̧ tutipea̧de pjarao̧ ja̧ oa" yo̧mȩ ma̧ȩ pio ju̧i̧ go̧ȩpea̧ oa cjia tänȩrëremȩdejȩ. "Aja̧, judiro̧ 5 jurarea̧ oa mitërä judi, cja̧rȩmȩrȩ yürüpea̧de pjarao̧ pio ju̧i̧iäpȩmo̧" yo̧mȩ ma̧ȩ pio ju̧i̧ go̧ȩpea̧ oa cjia tänȩrëremȩdejȩ. Ado pio jiro ma̧ȩ üdë, jabechji̧ go̧ȩpea̧ oa cjiamȩpea̧de duridëparȩrea̧mi̧dëri̧. Ado pio ju̧i̧iä Ejitoräpȩ cjo̧ro̧ji̧ri̧ pio judiro̧ pio yaba̧mi̧rä peaja̧di ta̧rëdiä madiro̧jo̧ȩ, ta̧rëdiädëpe bagarea̧ decjiari̧. Jabo o ji̧ri̧ ja̧ chiri oamo̧ mitëdërëremȩdejȩ pjarao̧ judi. Jabechji̧ teracaba ütë pio ju̧i̧iä o ji̧ri̧ chjiari goë tuti cjo̧dëji̧ri̧ pio ji̧ri̧ ja̧ chiri oa mitëdërëremȩdejȩ.

Jacobo judi ma̧ȩ yürürëremȩdejȩrȩ jibëa̧ u̧ri̧ ji̧ri̧

²⁷ Ado Icharaita judiro̧, jabechji̧ Ejitoräpȩ cjiadiärëreji̧ri̧dirȩ cjo̧ro̧pea̧ oa. Goche quȩmȩräpȩ cjo̧ro̧ji̧ri̧rȩ goaji̧ri̧pe bagarëreji̧ri̧dirȩ. Ado jibëa̧ bori̧ judiro̧ goëje ji̧ra̧pe järëreji̧ri̧dirȩ noi̧dë tjamo̧ oa no̧ri̧ji̧ri̧rȩ.

²⁸ Ado Jacobo judi, jabechji̧ 17 ui cjo̧ro̧rëremȩde Ejitoräpȩ. Ado jiro ui chjätä ëte, 17 ui chjätä ëte, jabechji̧ 147 ui goamȩpe bagarëremȩde, ütama̧i̧ tjamo̧pe bagamȩrȩ.

²⁹ Ado cja̧rȩmo̧ doremȩrä, Icharai judi ja̧bopea̧ ji̧ querediä tjamo̧rërea̧ ji̧, jabechji̧ ma̧ȩ chjadürëremȩdejȩ jibëa̧ ja oa, Joche pio ju̧i̧. Pio jȩaiäpȩ jana̧tä eamȩrȩ ma̧ȩ chjadüa̧dejȩ. Ado ja̧dëa ji̧ jana̧mȩ oa yo̧rëremȩdejȩ ja̧di ta̧rëri̧ yo̧mȩrȩ: —Danȩ ca ja̧, mȩnȩ coa cjäri̧ri̧ cjia darä judi, jabechji̧ cüdë yo̧a̧mi̧ japavä —yo̧a̧dejȩ—. Jabechji̧ ca̧ yai taru ëtemo̧ go̧iovä na̧ ichi oa coa chjadëri̧ na̧rȩpea̧ oa. Danȩ, cuchu chiadëri̧ tjamo̧i̧ cjiari̧ yo̧tä earequedemȩ cüdë yo̧pea̧ pio ju̧i̧ nö̧tadäräri̧ ta̧rë ta̧rë japapea̧ ji̧. Danȩ, cüdë ja̧boa̧rä, jabechji̧ ca̧ icjararemȩ oa Ejitoräpȩ na̧ra̧tä eadërequedemȩ.

³⁰ Jabechji̧ ca̧ pumȩrȩ na̧ra̧ oa cjiamȩräpȩ ju̧ri̧ na̧ra̧ oa cjiatämi̧ cjiarequede cüdë. Jabechji̧ ca̧ icjararemȩ oa chia jäemȩrenȩjo̧ȩ pio ju̧ri̧pȩ na̧ra̧pea̧ oa. Aja̧, ja̧di dari̧ japatäremȩrenȩque —yo̧mȩrȩ yo̧rëremȩdejȩ joja oa Icharai judi. Ado Joche judi dëbë yo̧mȩrȩ yo̧rëremȩdejȩ jibëa̧ ama̧i̧ ju̧i̧: —Dëdë, mȩnȩ yo̧a̧mi̧ japaparequedemȩ —yo̧a̧dejȩ.

³¹ Jabo Jacobo judi chjadëri̧ yo̧tä eamȩrȩ yo̧a̧dejȩ: —Jabechji̧ cuchu chiadëri̧, tjamo̧i̧ cjiari̧ yo̧coe ano̧ mire jo̧rȩtarea̧ decjiari̧ —yo̧a̧dejȩ jäja judi. Ado pio ju̧i̧iä Joche judi yo̧a̧dejȩ jibëa̧ ama̧i̧ ju̧i̧: —Aja̧, cuchu chiadëri̧, tjamo̧i̧ cjiari̧ yo̧requedemȩ ama̧i̧, ano̧ mire jo̧rȩtarea̧ decjiari̧. Tjamo̧ davä. Mȩnȩ ja̧boa̧rä, na̧ icjararemȩ oa tjamo̧ri̧ chia jäpareconȩ na̧ pumȩrȩ na̧ra̧ oa cjiamȩräpȩ na̧ra̧pea̧ oa —yo̧a̧dejȩ. Ado Icharai judi Joche ja̧ ma̧ȩ oa ta̧rëa̧ oaiä, jabechji̧ a̧rȩrëremȩde jënȩ a̧rȩrërea̧räpȩ. Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtamȩrȩ a̧rȩrëremȩde.