Taruparea̧ Ma̧ȩ 3 - Biblia Pume

Pearä cjo̧ro̧rëreji̧ri̧ pumȩ pio judiro̧ jiadarëreji̧ri̧diro̧jo̧ȩ Ütë tjamo̧ ja̧ ma̧ȩ oa

¹ Ado Jeova Ütë judi chirirä cjo̧ro̧ji̧ri̧ pio ji̧ri̧ chjö̧na̧i̧ oa pareaparërea̧ ji̧, jabechji̧ po pio judi o ji̧ri̧iä ji̧dë u̧i̧ oëadëmȩrȩ cjo̧ro̧rëremȩde. Chirirä cjo̧ro̧ji̧ri̧ pio ji̧ri̧iä ji̧dë u̧i̧ järimȩrȩ cjo̧ro̧rëremȩde, o ji̧ri̧ u̧i̧pe ni̧bärea̧mi̧ dari̧. Ado ja̧dëa ji̧ ado cja̧rȩmo̧ doremȩrä po pio judi, oëadëmȩ tjamo̧ pio judi ja̧di ta̧rëri̧ iëno̧ë ta̧rërëremȩdejȩ iei̧ ji̧: —"Tjadoräpȩ cjiamȩ to üdë cja̧rȩmȩrȩ juradëpea̧de" ¿tjamo̧ri̧ yo̧dëa̧di Ütë tjamo̧ judi? —yo̧mȩrȩ iëno̧ë ta̧rëa̧dejȩ.

² Ado iei̧ jini̧ dëbë yo̧a̧nȩjȩ po ju̧i̧iäpȩmo̧: —Tjadoro cjiamȩ to üdë, jabechji̧ a̧ro̧rȩ jurapea̧ maeade chjö̧na̧i̧rȩ. Ja̧di yo̧a̧ oa ta̧rërequede.

³ Jabo cja̧rȩmȩrȩ juradëpea̧de jabo. Tjado tjoräpȩ cjiamȩ to pio judi juradëpea̧de. Peaja̧di ga̧re taradëpea̧de. “Jabechji̧ mȩnȩro̧ pio jiro jurarea̧ oa jura̧rä judi, ja̧boa̧mi̧ dari̧ cjiadiäpanȩrȩ” yo̧mȩrȩ yo̧a̧rea̧diibe Ütë tjamo̧ judi. Pio judimo̧rȩ juradëpea̧de —yo̧yi̧rȩ dëbë yo̧rëreyi̧nȩjȩ po ju̧i̧iäpȩmo̧.

⁴ Jabo po üdë u̧i̧pë ni̧bämȩrȩ dëbë yo̧rëremȩdejȩ iei̧ ji̧: —Jabo cjäri̧ manȩro̧, ja̧boa̧mi̧ dari̧ cjiadiädëpanȩro̧.

⁵ Jabo damȩ, mȩnȩro̧ pio jiro jurarea̧ oa jurarä judi, jabechji̧ Ütë tjamo̧ pio judimi̧ dari̧ cjiadiäpanȩro̧. Ado pio ju̧i̧ tjamo̧ri̧ dabadi Ütë tjamo̧ judi. 'Aja̧, pumȩ judiro̧ pio jiro jurarea̧ oa jurarä judi, jabechji̧ pio cüdë dabami̧ dari̧ dabapadiro̧da, chjai̧dëbo dabaji̧ri̧rȩ cjo̧ro̧padiro̧da’ quëna̧ dabadi. Ado pio ju̧i̧iä china̧chjaparȩa̧diji̧ pio jiro to oa, mȩnȩro̧ pio jënȩmi̧ dari̧ cjiadiächea oa —yo̧mȩrȩ u̧i̧pe yo̧rëremȩdejȩ iei̧ ji̧.

⁶ Ado iei̧ jini̧ pio jiro ma̧ȩ oa ta̧rë ëte, 'Aja̧, tjamo̧ yo̧ jirodicoada, jurarea̧ cho üdë chjacjiamȩdida, cho goae tjamo̧ jirodida, pio ju̧i̧ jurarä judi jabechji̧ chjö̧na̧i̧ oa dabayi̧rȩ cjörötäreyi̧quëda, ja̧di tara jurapea̧ chiacuni̧da' quënayi̧pea̧nȩ. Ado pio ju̧i̧iä mu̧i̧ täarëreyi̧nȩjȩ jurarea̧ china̧chja oa. Ado jura ëte goë yürürëreyi̧nȩjȩ jibëa̧ üi̧ oa peaja̧di. Ado pio judiborë jurarëremȩdejȩ.

⁷ Ado judiro̧ pio ju̧i̧ jureno̧ ëte, 'Cjäri̧ maa̧ro̧da, i maeaa̧ro̧da, abürea̧ decjiadiibëda, idi̧dadida’ quëna̧ jo̧rȩtaji̧ri̧pea̧dirȩ chjaodëri̧, ja̧di dari̧ quëna̧dërërea̧ ji̧. Ado pio ju̧i̧iä mitërëreji̧ri̧dirȩ igera quȩmȩ to pjö̧da oa, abürea̧ oa cara ëte abüpea̧ oa.

⁸ Ja̧dëa̧ ji̧ ji̧dë duri oa ji̧täpea̧rä, pumȩ judiro̧ Jeova Ütë pio ju̧i̧ ta̧rëa̧ oaiä, tjadoro tai̧mȩ oa ta̧rëa̧ oaiä, jabechji̧ uapaji̧ri̧rȩ a̧dë jäenotea̧diro̧jo̧ȩ to chjarerä goadipea̧ oa.

⁹ Jabo Jeova Ütë judi ëna̧diämȩrȩ ëna̧diärëremȩdejȩ üi̧ ju̧i̧: —Ada̧, ¿tjana̧räpȩnȩ? —yo̧mȩrȩ ëna̧diäa̧dejȩ.

¹⁰ Ado dëbë yo̧a̧dejȩ Ada̧ judi: —Jabechji̧ mȩnȩ tjadoro tai̧mȩ oa ta̧rë oaiä, uapamȩpea̧requede —yo̧a̧dejȩ—. Jabechji̧ cüdë chäte oaiä, uapamȩpea̧requede. Jabechji̧ idëri̧ cjiamȩpea̧ oaiä, a̧dë goaditea̧requedemȩ —yo̧mȩrȩ dëbë yo̧rëremȩdejȩ Ada̧ judi.

¹¹ Jabo Jeova Ütë judi ado iëno̧ë ta̧rëa̧dejȩ Ada̧ ju̧i̧: —¿Jabo chjiarë yo̧a̧ oaiä ‘chätequëda’ quëna̧mȩpea̧renȩ? Cüdë juradëtä yo̧tea̧ pio ju̧i̧ ¿juradëa̧nȩ? —iëno̧ë ta̧rëa̧dejȩ.

¹² Ado Ada̧ judi dëbë yo̧mȩrȩ ja̧di ta̧rëri̧ dëbë yo̧a̧dejȩ: —Jabo danȩ, mȩnȩ coa yürüa̧ iei̧ pio jini̧ goë yürüa̧ni̧que. Mȩnȩ juradëtä yo̧tea̧ pio ju̧i̧ goë yürüa̧ni̧que. Ja̧di tara jura̧reconȩ —yo̧mȩrȩ aeno̧a̧dejȩ iei̧ ji̧iäpȩmo̧.

¹³ Ado ja̧dëa ji̧ Jeova Ütë pio judi ano̧ mire iëno̧ë ta̧rëa̧dejȩ iei̧ ji̧: —¿Jabo tjana̧ japatä ja̧di dari̧ japea̧mȩ? —yo̧a̧dejȩ. Ado iei̧ jini̧ dëbë yo̧a̧nȩjȩ: —Porë u̧i̧pe ni̧bäa̧ pio ju̧i̧iä jura̧reconȩ —yo̧yi̧rȩ aeno̧a̧nȩjȩ po ju̧i̧iäpȩmo̧.

Ma̧ȩ yürürëremede Ütë tjamo̧ judi bape chjaopea̧ pio ju̧i̧ chjiari

¹⁴ Ja̧dëa̧ ji̧ Jeova Ütë pio judi ma̧ȩ yürürëremȩdejȩ po pio ju̧i̧iäpȩmo̧, ja̧di ta̧rëri̧ yo̧mȩrȩ: —Danȩ, yo̧requedemȩ —yo̧a̧dejȩ—. O ji̧ri̧iäpȩmo̧, chirirä cjo̧ro̧ji̧ri̧ pio ji̧ri̧iäpȩmo̧ ja̧di dari̧ yo̧dërequejȩrȩ jabo pio mȩaiäpȩmo̧ ma yo̧requedemȩ —yo̧a̧dejȩ—. Danȩ, mȩnȩ chjai̧dëri̧ japea̧ tara, peaja̧di chjai̧dëri̧ cjo̧ro̧parenȩ. Ja̧di tara pio yaba̧mȩri ja̧ acä maeara̧ coë jämȩrȩ cjo̧ro̧parenȩ, dabu pjo̧no̧ pio ju̧i̧ jurari̧. Ja̧di dari̧ cjo̧ro̧parenȩ mȩnȩ ja̧boa̧rä yuro.

¹⁵ Ado pio cüdë tänȩa̧ oa, iei̧ pio ji̧ eadëmȩrȩ cjo̧ro̧parenȩ. Ado iei̧ pio ji̧ni̧ peaja̧di mȩa eadëyi̧rȩ cjo̧ro̧panȩ. Jabechji̧ iei̧ pio judiri ja̧ji̧ri̧ judiro̧ na̧ea̧ri ja̧ji̧ri̧ pio pio ji̧ri̧ nö̧ta ji̧dë ma dëbëpe chjaomi̧ dari̧ japapadirȩ. Ado iei̧rȩ arapea̧ oa cjiapamȩ pio judi cja̧rȩmȩrȩ goae tarari̧ gu̧na̧mi̧ dari̧ japapadimȩ na̧ tjübë oa. Ado mȩnȩ yo̧dë juimi̧ dari̧ japaparemo̧nȩ pio ju̧i̧ ja̧ ta ärä oa —yo̧mȩrȩ yo̧rëremȩdejȩ po ju̧i̧iäpȩmo̧ Ütë tjamo̧ judi.

¹⁶ Ado po ju̧i̧iäpȩmo̧ ma̧ȩ yürüa̧ duri oa, iei̧ pio ji̧iäpȩmo̧ ano̧ mire yo̧rëremȩdejȩ: —Damȩ, cüdë tänȩa̧ oa gitori̧ cjo̧ro̧pamȩ boma̧i̧yi̧ oaiä —yo̧a̧dejȩ—. Jabechji̧ gitoi̧ dari̧ arapamȩ mȩnȩ boi̧chji̧ ji̧ ararä. Ado damȩ, mȩnȩ mȩa ëbamȩ üdë na̧ chja̧oerä cjo̧ro̧ tänȩtä ea tjamo̧räbo, cjäri̧ madi, na̧ chja̧oerä cjo̧ro̧dëpadi jabo pio ju̧i̧ ja̧ chja̧oerämo̧ cjo̧ro̧pamȩ pio mȩnȩ —yo̧mȩrȩ yo̧rëremȩdejȩ iei̧ ji̧iäpȩmo̧ Ütë tjamo̧ judi.

¹⁷ Ado ja̧dëa ji̧ üi̧ pio ju̧i̧iäpȩmo̧ ano̧ mire yo̧rëremȩdejȩ: —Jabechji̧ mȩnȩ na̧ iei̧ yo̧a̧ oa ta̧rë japea̧ pio ju̧i̧iä, cüdë "juradëtä" yo̧tea̧ pio ju̧i̧ jura̧ oaiä, jabechji̧ chjai̧dëri̧ japea̧renȩ —yo̧a̧dejȩ—. Ado pio ju̧i̧iä jabechji̧, chiri nö̧tarë chjai̧dëri̧ cjiadiäpadimȩ yaba̧ ca̧ ërecjia̧ üdë chiriräpȩmo̧ acji cjatäa̧ oaiä. Aja̧, mȩnȩ dabu pio ju̧i̧iä badëri̧ juratärea̧ ji̧, chiri pio oaiä badëri̧ juratärea̧ ji̧, jabechji̧ badëri̧ juradëparenȩ jabo chjaori̧ juraparenȩ. Järätäa̧rä ja̧ oa juraparenȩ. Ichi pjürüpe järi̧ ja̧bepë taraparenȩ na̧ jurarea̧ oa boapea̧ oa. Jabechji̧ mȩnȩ ja̧boa̧rä yuro järätäpe järi̧ ja̧bepaparenȩ chjao tjamo̧ri̧. Jabechji̧ pio cüdë tänȩa̧ oaiä, chiri üdë chjuamȩpea̧dimȩ yaba̧.

¹⁸ Ado pio ju̧i̧iä chiri üdë daäö̧ cärä oa chiadërërea̧ ji̧, jabechji̧ chiapadejȩ. Ado oro oro oa chiapade peaja̧di, babarë oabo. Ta guarea̧ o̧ to oa chiapade peaja̧di. Ado danȩ, mȩnȩ chirirä ja̧ oa, gärä ja̧ oa boa ta̧i̧mȩrȩ juraparenȩ.

¹⁹ Ado u go̧dü cjiamȩrȩ ja̧bepaparenȩ na̧ jurarea̧ oa boapea̧ oa. Jabechji̧ mȩnȩ ja̧boa̧rä yuro järätäpe järi̧ ja̧bepapea̧ chiarenȩ na̧ tjado oa. Ado mȩnȩ ja̧boa̧rä, jabechji̧ na̧ icjararemȩ üdë ado chjereno̧ dabupe jäpade daburëremȩ üdë. Jabechji̧ dabu pio judiri ja̧mȩrenȩ. Ado mȩnȩ ja̧boa̧rä, ado chjereno̧ dabupe jäparenȩ —yo̧mȩrȩ yo̧rëremȩdejȩ Ada̧ ju̧i̧ Ütë tjamo̧ judi.

²⁰ Ja̧dea̧ ji̧ Ada̧ judi quȩparëremȩdejȩ jibëa̧ iei̧ i̧a̧. Eva quȩpea̧dejȩ. 'Aja̧, pumȩ ütëbodärärë pio ji̧iä cjo̧ro̧padiro̧da, pio ji̧iä ji̧ra̧ tjamo̧pe jäpadiro̧da, ibëa̧ jani̧ taruni̧da quëna̧padiro̧ji̧da' quëna̧ jo̧rȩtamȩrȩ Eva quȩra̧ quȩparëremȩdejȩ Ada̧ judi.

²¹ Ado Jeova Ütë judi chirirä cjo̧ro̧ji̧ri̧ pio ji̧ri̧ ja̧bo tänȩ ëte, ira̧ pio ju̧ni̧ra̧ jape yürürëremȩde ina̧rea̧ oa Ada̧ ja̧ oa, jibëa̧ iei̧ ja̧bo. Ja̧dëa ji̧ pio jiro ira̧ pio ju̧ri̧ra̧ ina̧rëremȩdejȩrȩ.

Ütë tjamo̧ judi tjadori aeno̧rëremȩdejȩrȩ

²² Ja̧dëa ji̧ Jeova Ütë pio judi jo̧rȩtamȩpea̧de. 'Jabo cjäri̧ madiro̧da, pumȩ judiro̧ pio a̧ro̧rȩ dabami̧ dari̧ dabaji̧ri̧pea̧diro̧da, chjai̧dëbo dabaji̧ri̧pea̧diro̧da yaba̧, chjadë maea oa dabarërea̧ ji̧ chjai̧dëbo dabaji̧ri̧pea̧diro̧da, ado yaba̧ pumȩ pio judiro̧ bucho ana̧ cjo̧ro̧rea̧ to ja̧ jurarea̧ oa jurachea oa, jabechji̧ dairäpȩmo̧ tutia̧ oa cjiapea̧ chiadiro̧da, jënȩro̧ bucho ana̧ ja̧bodëji̧ri̧rȩ cjo̧ro̧chea oa juradëtäreji̧ri̧diro̧da' quëna̧ jo̧rȩtamȩpea̧de Ütë tjamo̧ judi.

²³ Ja̧di tara Jeova Ütë pio judi dairäpȩmo̧ baä tänȩrëremȩdejȩrȩ pumȩ ji̧ri̧, tjadoro cjo̧ro̧rëreji̧ri̧ pio ji̧ri̧. Edȩ quȩmȩ tjado dairäpȩmo̧ baä tänȩrëremȩdejȩrȩ, ado chjereno̧ yu̧a̧rea̧mi̧dëri̧. Aja̧, aeno̧a̧dejȩrȩ tjado dairäpȩmo̧ dabu oa ja̧bepapea̧ oa. Jënȩro̧ jüdüpea̧ oa cjia̧ pio oaje ja̧bepapea̧ oa dairäpȩmo̧ aeno̧a̧dejȩrȩ.

²⁴ Ado Ütë tjamo̧ judi pumȩ ji̧ri̧ tjado dairäpȩmo̧ aeno̧ ëte, jabechji̧ tjado yabota̧ra̧ri jida tänȩrëremȩdejȩrȩ jibëa̧ jidaji̧ri̧ mu̧i̧tjoi̧ pio ji̧ri̧, a̧dëriji̧ri̧ mu̧i̧tjoi̧ pio ji̧ri̧. Ado peaja̧di tjapënȩ cjo̧dë chia oa, gärimȩ oa, jibëa̧ ma̧na̧ri̧ bara bara cjiari̧ cjia tänȩrëremȩdejȩ tjado yabota̧ra̧ri. Ado pio jiro tjapënȩ üdë, jabechji̧ oëra̧ti̧ oa mȩmȩrepariä cjiarëremȩde Ütë tjamo̧ pio judi tänȩa̧ oaiä. Jabechji̧ pumȩ judiro̧ ado chjereno̧ yu̧a̧chea oa, judiro̧ bucho ana̧ cjo̧ro̧rea̧ to ja̧ jurarea̧ oa jurachea oa, jabechji̧ cjia tänȩrëremȩdejȩ Ütë tjamo̧ judi pio jiro tjapënȩ oa. Ado jidaji̧ri̧ mu̧i̧tjoi̧ pio ji̧ri̧bo jida tänȩrëremȩdejȩrȩ aeno̧a̧ oa cjiaji̧ri̧ pio judiro̧ ado chjereno̧ yu̧a̧rea̧ dachea oa.