Jechurë Na̧rȩrërea̧ Ma̧ȩ 9 - Biblia Pume

Tjarari̧ pjurarea̧ uapai̧ da tjamo̧ üdë jabë pjärämȩde

¹ Ado jadüchiami̧ mu̧i̧tjoi̧rȩ jibëa̧ pjurarea̧ra̧ pjurarërea̧ ji̧, ado cja̧rȩmo̧rȩ ano̧ mire pjura̧dejȩ jibëa̧ra̧. Ado a̧dëri pio judiri cjatäa̧ duri oa daea̧reconȩ büëmi̧ da cjiamȩ pio ju̧i̧. Ado cja̧rȩmȩrȩ yürüa̧ oa mitëa̧dejȩ joë ya coërea̧ oa, a̧dë chjäte urëdi puë oa areiapea̧ oa, daburäpȩmȩ puë oa areiapea̧ oa.

² Ja̧dëa ji̧ büëmi̧ da cjiamȩ pio judi areia̧dejȩ tutia̧ oa cjiaremȩ puë oa. Ado puëri pio judiri cjitëremȩde ma̧i̧ dari̧ chjämȩ üdë uëräpȩmo̧, tjado ana̧ oa acjürüa̧ chjämi̧ dari̧. Ado pio ju̧i̧iä chjadëri̧ da mirerea̧mi̧dëpea̧de. Do oa darea̧mi̧dëpea̧de.

³ Ado chjäri pio judiri go̧dü chjaoreji̧ri̧dirȩ tagarami̧ da judiro̧ no̧i̧dërë, ütararea̧mi̧dërë. Ado guarea̧ chiaji̧ri̧pea̧dirȩ chjiaarami̧ dari̧. Ë chiaji̧ri̧pea̧dirȩ. Cja̧rȩmȩrȩ yürüa̧ oa ja̧di dari̧ chiaji̧ri̧pea̧dirȩ.

⁴ Ado cja̧rȩmȩrȩ yo̧a̧ oaiä conȩdadëa̧diro̧jo̧ȩ cärä oa, to oa, eami̧ti̧ toi̧ oa. Jabo pumȩ pio ji̧ri̧mo̧i̧, jibëa̧ daitoro Ütë ja̧ go̧ȩ chiadëreji̧ri̧ pio ji̧ri̧mo̧i̧ conȩdareji̧ri̧diro̧jȩrȩ.

⁵ Pumȩ pio ji̧ri̧ ja̧bo tänȩrea̧ dadëa̧diro̧jȩrȩ, jabomo̧ conȩdae chjaoreji̧ri̧diro̧jȩrȩ cja̧rȩichimo̧ gupënȩ nö̧ta. Ado ji̧ri̧iäpȩmo̧ gua̧ üdë, chjiaararë gua̧ oa gitomi̧ tarari̧ gitoremȩde.

⁶ Ado pio jiro doro pumȩ judiro̧ tjamo̧ri̧ ja̧botämi̧ cjiaji̧ri̧rȩ cjo̧ro̧padirȩ. Jabechji̧ ja̧borea̧ pio ju̧i̧ cho̧rë jämi̧ dari̧ japapadirȩ jo̧ȩra̧pe ja̧bopea̧ oa. Jabo cjäri̧ madejȩrȩ, puarë chjaodëri̧ a̧dë cjitëdiämi̧ dari̧ japapadejȩrȩ ja̧borea̧ üdë. Jabechji̧ ja̧borea̧ dadëpadirȩ.

⁷ Ado tagarami̧ da pio judiro̧, jabechji̧ yaemi̧ dareji̧ri̧dirȩ. Danȩrȩ, guadia üdë jibëa̧ yaera̧ acji tai̧rä, jabechji̧ chjadëri̧ ina̧ oa cjiade yae üdë chiparari pjatëra̧ judi chjadëri̧ jida̧ oa cjiapea̧ oa, chjito̧ra̧ aea̧ oa cjiachea oa. Peaja̧dimi̧ dari̧ ina̧ oa cjiareji̧ri̧dirȩ taragami̧ da pio judiro̧. Ado peaja̧di orora̧ japea̧ oa cjiamȩ pachecherea̧ oa yuareji̧ri̧dirȩ, chiri ütërë yuami̧ dari̧. Ado jibëa̧ dacho üdë, jibëa̧ chamacho üdë, jabechji̧ pumȩ chamachomi̧ dari̧ cjiaremȩde. Aja̧, pumȩ dachorë cjiami̧ dari̧ cjiaremȩde.

⁸ Ado jibëa̧ cö̧ üdë, iei̧ ja̧ cö̧mi̧ daremȩde. Ado jibëa̧ jo̧dë üdë, pa̧rȩmȩ jo̧dëmi̧ daremȩde.

⁹ Ado jibëa̧ maito üdë, jabechji̧ ina̧ oa cjiaremȩde i tëquërë chiamȩ imi̧ dara̧, chjiparari pjatëmi̧ dara̧. Ado jibëa̧ pjö̧datora̧ pjo̧a̧ ji̧, mai̧ dari̧ ea cjiaremȩde. Jabechji̧ yae chara no̧i̧dërë bärä eami̧ ta̧rëri̧ earemȩde ado chjereno̧. Tjamo̧ davä. Yae chara no̧i̧dërë acji jana̧ji̧ri̧ pio ji̧ri̧ jo̧ȩra̧pe dëbëpe chjaopea̧ oa bärä eami̧ ta̧rëri̧ earemȩde.

¹⁰ Ado cüdë yo̧a̧mi̧ ado yo̧requededibe. Chjia chiadirȩ. Guarea̧ chiadirȩ. Guarea̧ ë chiadirȩ. Ado chjiaararë gura arëmi̧ cjiari̧ gura apai̧ dadirȩ davä pumȩ ji̧ri̧, cja̧rȩichimo̧ gupënȩ nö̧ta.

¹¹ Ado jibëa̧ ütë oa chiadirȩ. Ado pio ju̧i̧ ja̧ chja̧oerä cjo̧ro̧dirȩ. Ado a̧dë chjäte puë urëdi oa tjamo̧ jidamȩ mu̧i̧tjoi̧ pio judide jibëa̧ ütë üdë. Aja̧, pio judide. Ado quȩ chiade. Ado Ebereo ma̧ȩra̧ jibëa̧ quȩ yo̧a̧ ji̧, jabechji̧ “Abado̧” yo̧rea̧de. Ado Giriego ma̧ȩra̧ yo̧a̧ ji̧, "Apoyo̧" yo̧rea̧de. Ado jibëa̧ quȩ üdë, “Co̧nȩdamȩ” yo̧rea̧de.

¹² Aja̧, mu̧i̧tjoi̧ üdë pjurarea̧ra̧ pjura̧ oaiä, go̧düdäräa̧dirȩ tagarami̧ da judiro̧. Pio judide pearä ma̧na̧pamȩ bape chjaomȩ üdë. Jabo jabëde. Pjärämȩ china̧de. Yo̧a̧ri̧ pjurarea̧rȩ jabëde.

¹³ Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Cja̧rȩichimo̧ mu̧i̧tjoi̧rȩ jibëa̧ pjurarea̧ra̧ pjurarërea̧ ji̧, ado cja̧rȩmo̧rȩ ano̧ mire pjura̧dejȩ. Ado chjaodëri̧ ta̧rëa̧reconȩ cja̧rȩmȩrȩ ni̧bämȩ oa. Ütërë chamȩ yabori cjiamȩ mechjari pio judiri ma̧na̧mȩ ma̧ȩ oa ta̧rëa̧reconȩ, orora̧ japea̧ oa cjiamȩ mechjari pio judiri. Pio jiro mechja üdë jadüchiami̧ bu chiaremȩde, a̧ boi̧chji̧ chiami̧ dari̧. Ado pio jiro buri pio judiri ea jana̧ri̧ ni̧bämȩ oa ta̧rëa̧reconȩ.

¹⁴ Ado ni̧bämȩ judi ja̧di ta̧rëri̧ yo̧mȩrȩ yo̧a̧dejȩ a̧dërämȩ ja̧ mu̧i̧tjoi̧ pio ju̧i̧iäpȩmo̧, pea pjuraremȩ pio ju̧i̧iäpȩmo̧: —Danȩ, jareno̧jȩrȩ yaröca ji̧ri̧, jadüchiami̧ oa —yo̧a̧dejȩ—. Bea Eupjarate quȩmȩ yuroräpȩ cjiadirȩ. Aja̧, pio jiro bea ba chia yuroropȩ cjiadirȩ. Ado tabüa̧ oa cjiaji̧ri̧ pio ji̧ri̧ jareno̧jȩrȩ. Aja̧, ja̧di ta̧rëri̧ yo̧mȩrȩ yo̧a̧dejȩ pjuramȩ pio ju̧i̧iäpȩmo̧.

¹⁵ Ado pio ju̧i̧iä a̧dërämȩ ja̧ mu̧i̧tjoi̧ pio judi pio jiro yaröca jadüchiami̧ oa jare chjadüa̧dejȩrȩ bea yuroro cjiaji̧ri̧ pio ji̧ri̧. Jabechji̧ pio ju̧ri̧pȩ china̧chjari̧ tutia̧ oa cjiareji̧ri̧dirȩ peadëri ja̧. Ütara̧ uirä go̧dü tänȩpea̧ oa, ütara̧ gupënȩrä jare chjadüpea̧ oa china̧chjari̧ tutia̧ oa cjiarëreji̧ri̧dirȩ ütara̧ doro acji tai̧mi̧ dari̧ japa tänȩpea̧ oa. Tjamo̧ davä. Pumȩ no̧i̧dë tjamo̧ oa ja̧bo tänȩpea̧ oa, a̧dë chjäte ji̧ra̧ oa ja̧bo tänȩpea̧ oa, china̧chjari̧ tutia̧ oa cjiarëreji̧ri̧dirȩ peadë tjamo̧ri ja̧. Ado a̧dërämȩ ja̧ mu̧i̧tjoi̧ pio judi jare chjadüa̧ oaiä, chjaodëri̧ go̧düa̧dirȩ.

¹⁶ Ado pio ji̧ri̧ ja̧ chja̧oerä cjiareji̧ri̧ guadia pio judiro̧ a̧dë chjäte ji̧ra̧reji̧ri̧dirȩ. Ado pio jiro guadia pio ji̧ri̧ chjiari ta̧rëa̧requede. Aja̧, “yaerä buë chaji̧ri̧dirȩ” yo̧a̧ oa ta̧rëa̧requede pio ji̧ri̧ chjiari. “Aja̧, a̧dë chjäte ji̧ra̧dirȩ. No̧i̧dë tjamo̧dirȩ. Aja̧ 200 millondirȩ yo̧a̧ oa ta̧rëa̧requede pio ji̧ri̧ chjiari.

¹⁷ Ado pio coa chjadëri̧ na̧rȩa̧ oaiä, jabechji̧ daea̧requedejȩrȩ. Yaemi̧ da pio ji̧ri̧ daea̧requede, yaemi̧ darä buë chaji̧ri̧ pio ji̧ri̧bo. Ado uë chaji̧ri̧ judiro̧ maito jidarea̧ oa ina̧reji̧ri̧dirȩ, chjiparari pjatë chiamȩ jidarea̧ oa. Coëcoëara̧, cjo̧dëmi̧ dara̧ ina̧reji̧ri̧diro̧jo̧ȩ. Peaja̧di tütüari̧ cjiaji̧ri̧ oa daea̧requedejȩrȩ ta̧dë ba chiami̧ da oa, jachi̧to quȩmȩ ta̧dë ba chiami̧ da oa. Ado yaemi̧ da pio ji̧ri̧ ja̧ tjübë üdë pa̧rȩmȩ tjübëmi̧ daremȩde. Ado ji̧ri̧ ja̧ yari pio judiri cjitëremȩde cjo̧dë üdë chjä cjiari̧. Ado achupjere quȩmȩ üdë peaja̧di cjitëremȩde jibëa̧ yari, a̧dë chjäte cjüëtüri̧ tümȩ üdë.

¹⁸ Ado pio jiro conȩdarea̧ üdë cjitë oaiä, yaemi̧ daji̧ri̧ pio ji̧ri̧ ja̧ yari pio judiri cjitëa̧mȩ conȩdarea̧ pio oaiä, jabechji̧ ütararea̧mi̧dërë ja̧boa̧dirȩ pumȩ judiro̧. Tjamo̧ davä. Cjo̧dë pio oaiä, chjä pio oaiä, achupjere quȩmȩ pio oaiä, pumȩ no̧i̧dëti̧rȩ ja̧boa̧dirȩ chiriräpȩti̧ oa cjo̧ro̧ji̧ri̧ judiro̧. Aja̧, a̧dë chjäte ji̧ra̧rȩ ja̧boa̧dirȩ, jabo ütëbodërë.

¹⁹ Jabechji̧ pio jiro yaemi̧ da pio judiro̧ jibëa̧ yara̧ pio ju̧ri̧ra̧ mai̧ dari̧ japapai̧ dareji̧ri̧dirȩ, jibëa̧ chjiara̧ pio ju̧ri̧ra̧bo. Jibëa̧ chjia üdë, jabechji̧ pomi̧ daremȩde. Ado jiro chjia üdë, pomi̧ darë, tjübëmi̧ da oa chiaremȩde. Ado jibëa̧ chjiara̧ pio ju̧ri̧ra̧ ana̧ri̧ conȩdareji̧ri̧diro̧jȩrȩ pumȩ ji̧ri̧.

²⁰ Jabo cjiadiäa̧ pumȩ judiro̧ ano̧ mire jo̧rȩtatärea̧ ji̧, conȩdarea̧ oaiä ja̧bodëa̧ji̧ri̧ pio judiro̧ ano̧ mire jo̧rȩtatärea̧ ji̧, cjäri̧ madirȩ, ano̧ mire jo̧rȩtadëa̧dirȩ. Jënȩro̧ jëdano̧a̧ ütë oa jiadatärea̧ ji̧, jënȩro̧ irä goa̧ ta̧dë pio ju̧i̧ jiadatärea̧ ji̧, ano̧ mire jo̧rȩtadëa̧dirȩ. Yaröca pio ji̧ri̧ jo̧rȩta ano̧tärea̧ ji̧, jënȩro̧ jëdano̧a̧ ütë pio ji̧ri̧ a̧dë jo̧rȩtatärea̧ ji̧, orora̧ japea̧ ütë pio ji̧ri̧ jiadatärea̧ ji̧, jiadadëa̧dirȩ. Jabechji̧ ji̧dë ma chjacjiamȩri̧ jo̧rȩtareji̧ri̧dirȩ teracaba ütë pio ji̧ri̧, paratara̧ japea̧ ütë pio ji̧ri̧, boro̧chera̧ japea̧ ütë pio ji̧ri̧, ta̧dëra̧ japea̧ ütë pio ji̧ri̧, to maeara̧ japea̧ ütë pio ji̧ri̧. Pio ji̧ri̧ chjuari̧ jiadatärea̧ ji̧, jabechji̧ ba chia jo̧rȩtaji̧ri̧rȩ chjacjiamȩri̧ jo̧rȩtareji̧ri̧diro̧jȩrȩ teracaba maea oa. Aja̧, ta̧rërea̧ chiadëji̧ri̧ oa, darea̧ chiadëji̧ri̧ oa, tai̧rea̧ chiadëji̧ri̧ oa chjacjiamȩri̧ jo̧rȩtareji̧ri̧diro̧jȩrȩ.

²¹ Ado judiro̧ chjai̧dëri̧ japea̧ pio ju̧i̧ chjiari ano̧ mire jo̧rȩtatärea̧ ji̧, jabechji̧ ano̧ mire jo̧rȩtadëa̧dirȩ. Aja̧, pumȩ ji̧ri̧ ja̧bo tänȩa̧ pio ju̧i̧ chjiari, chjere chjadürea̧ japea̧ pio ju̧i̧ chjiari, yo̧to̧ra̧ daeea̧ pio ju̧i̧ chjiari, china̧chja pio ji̧ri̧ baë ëba mo̧a̧ pio ju̧i̧ chjiari, jënȩro̧ garüa̧ pio ju̧i̧ chjiari ano̧ mire jo̧rȩtarërea̧ ji̧, japadëa̧dirȩ.