Jechurë Na̧rȩrërea̧ Ma̧ȩ 8 - Biblia Pume

Oveja pëi̧ chjamȩmi̧ da pio judi cjiadiäa̧mȩ pio ju̧i̧ mu̧i̧ ia̧dejȩ ji̧cha̧parea̧ pio ju̧i̧

¹ Oveja pëi̧ chjamȩmi̧ darë cja̧ȩta̧ra̧ ichiri cja̧rȩmȩ ji̧cha̧parea̧ pio ju̧i̧ mu̧i̧ ia̧ duri oa, cjiadiäa̧mȩ pio ju̧i̧ mu̧i̧ ia̧dejȩ. Go̧ȩ irä puria̧ oa cjiamȩ pio ju̧i̧ mu̧i̧ ia̧dejȩ. Ado pio ju̧i̧ mu̧i̧ ia̧ ji̧, chjaodëri̧ cjapi mapea̧de a̧dëräpȩ ju̧ri̧. Jabechji̧ a̧dëräpȩji̧ri̧ pio judiro̧ ütëbodärärë cjapi maeari̧ cjiadiäa̧dirȩ japamitë boi̧chji̧, ütara̧ tjomo̧, media ora nö̧ta.

² Ja̧dëa ji̧ daea̧requede a̧dëräpȩ cjiamȩ ja̧ mu̧i̧tjoi̧ oa, cja̧ȩta̧ra̧ ichiri yo̧a̧ri̧ oa. Ütë tjamo̧ ja̧ dëbëräpȩ ji̧dë ma cjiaji̧ri̧ oa daea̧requedejȩrȩ. Ado cja̧rȩmȩrȩ yürüa̧ oa, goaji̧ri̧pea̧dirȩ jibëa̧ pjurarea̧ oa.

³ Ja̧dëa ji̧ ado cja̧rȩmo̧ mu̧i̧tjoi̧ oa daea̧requede. Yürürea̧ mechjaräpȩ jäa̧mȩ oa daea̧reconȩ. Ado tachja oa goaremȩde, oro maeara̧ japea̧ oa cjiamȩ tachja oa. Ado cja̧rȩmȩrȩ yürüa̧ oa, goaeri̧ pjȩa̧ caärea̧ ji̧ra̧ oa goaremȩde jibëa̧ tachjarä. Ado jiro goeri̧ pjȩa̧ cäarea̧ra̧ miremi̧ dari̧ japea̧dejȩ. Aja̧, Ütë tjamo̧ ja̧ pumȩ judiro̧ Ütë pio ju̧i̧iäpȩmo̧ ni̧bäa̧ra̧ pio ju̧ri̧ra̧ miremi̧ dari̧ japea̧dejȩ. Ja̧dëa̧ ji̧ cäë yürüa̧dejȩ tachjarä, yürürea̧ mechjaräpȩ. Orora̧ japea̧ oa cjiamȩ mechjarä cäë yürüa̧dejȩ, Ütë ja̧ charea̧ ja̧ dëbëräpȩ cjiamȩ mechjarä.

⁴ Ado uëräpȩmo̧ cjitëdiäa̧de chjä üdë, goaeri̧ pjȩa̧mȩ chjä üdë. Ütë ja̧ pumȩ judiro̧ Ütë pio ju̧i̧iäpȩmo̧ ni̧bäa̧ pio ju̧i̧ nö̧ta cjitëdiäa̧de tachjari, a̧dërämȩ ja̧ mu̧i̧tjoi̧ pio ju̧i̧ ja̧ ichirä goa̧ tachjari pio judiri.

⁵ Ja̧dëa ji̧ mu̧i̧tjoi̧ üdë goaeri̧ pjea̧ cäarea̧ cjo̧dë tjaremȩ pio ju̧i̧ mitëa̧dejȩ, mechjarä ja̧remȩ pio ju̧i̧. Ado mitë ëte, ae cjaräa̧dejȩ tachjarä. Ado ja̧di dari̧ japa ëte, aechidea̧dejȩ a̧dëri pio judiri daburäpȩmo̧. Aja̧, Ütë tjamo̧ ja̧ charea̧ dëbëräpȩ cjiamȩrȩ a̧eno̧a̧dejȩ daburäpȩmo̧. Ado chjaodëri̧ cjitëdiäa̧de ma̧i̧ dari̧ bërepe chjaoa̧ üdë. Oëra̧ti̧ oa bërepe chjaoremȩde ma̧i̧ ta̧rëri̧ dörö eari̧. Ado dabu üdë janö̧padëmȩrȩ cjiarërea̧ ji̧, jö̧nö̧ jö̧nö̧pai̧ maeari̧ cjiamȩpea̧de.

Jadüchiami̧ mu̧i̧tjoi̧ judiro̧ pjura̧dirȩ jadüchiami̧ pjurarea̧ oa

⁶ Ado a̧dëräji̧ri̧ mu̧i̧tjoi̧ judiro̧ cja̧ȩta̧ra̧ ichiri yo̧a̧ri̧rȩ jëdano̧reji̧ri̧dirȩ jibëa̧ pjurarea̧ oa pjurapea̧ ji̧.

⁷ Ja̧dëa ji̧ pjuradërërea̧ ji̧, tarupë pjura̧dejȩ jibëa̧ pjurarea̧ra̧ cja̧rȩmȩrȩ. Ado a̧dëri pio judiri chjaodëri̧ acji cjatäa̧de daburäpȩmo̧ uapai̧ da üdë. Cjümȩ cho chacharë acji cjatäa̧de cjo̧dëborë. Goera̧ mirea̧ oa cjiamȩrȩ acji cjatäa̧de. Ado chiri no̧i̧dë tjamo̧rȩ baë tüe baäa̧ oa cjiaremȩde, tobo, jabo o oamo̧ oa. Ado cärä chja̧chja̧remȩ üdë, cärä uchjaremȩ üdë, cjäri̧ made, jiro decjiapea̧de.

⁸ Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Cja̧rȩmȩrȩ pjuraremȩrȩ ado cja̧rȩmo̧rȩ ano̧ mire pjura̧dejȩ. Ado chjaodëri̧ ya̧mi̧ boi̧dëti̧mi̧ darë, cjo̧dë chiarë choa̧de ui ana̧räpȩ. Cja̧rȩmȩrȩ aeno̧a̧ oa cjatäa̧de ui ana̧räpȩ ju̧ri̧.

⁹ Ado uiremȩ üdë orë chjaodëri̧ goe mapea̧de. Ado ui ana̧räpȩ cjo̧ro̧remȩ cho̧ üdë peaja̧di ja̧boa̧de no̧i̧dërë. Jabo orëmo̧rȩ ja̧bodëa̧de. Ado ui ana̧rä pjurëremȩ chara ana̧ üdë, cjäri̧ made, chami̧a̧de no̧i̧dërë chjadëdëpe bagarea̧mi̧ dari̧. Tjamo̧ davä. No̧i̧dërë chamia̧de, jabo ütëbodërë.

¹⁰ Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Yo̧a̧ri̧ mu̧i̧tjoi̧rȩ jibëa̧ oa pjurarërea̧ ji̧, ado cja̧rȩmo̧rȩ ano̧ mire pjura̧dejȩ jibëa̧ra̧. Ado chjaodëri̧ büë boi̧dërë, goae tarari̧ gäri cjitëdiäa̧mȩ üdë, a̧dëri pio judiri acji cjatäa̧de uiräpȩmo̧ oëra̧ti̧ oa. Aja̧, dürü oa, tja oa, bea oa acji cjatäa̧dejȩ ui ji̧ra̧ tjamo̧ oa, jabo o oamo̧ oa. Dürü chjö̧na̧i̧ oa acji cjatädëa̧de, jabo o oamo̧ oa. Ado bea oa peaja̧di acji cjatäa̧de o oamo̧ oa. Ado tjaräpȩ peaja̧di acji cjatäa̧de, jabo o oamo̧ oa.

¹¹ Ado pio jiro büë üdë, quȩ chiaremȩde. Aja̧, “Ëcara” yo̧rea̧ quȩ chiaremȩde. Tjamo̧ davä. “Ëcara” yo̧a̧diro̧jo̧ȩ. Ado pio jiro büë üdë uiräpȩmo̧ acji cjatäa̧ oaiä, ëcara tjamo̧pea̧de ui üdë, uapai̧ da tjamo̧ri̧. Jabechji̧ ui ji̧ra̧rȩ ëcara mape baga̧de, jabo orëmo̧rȩ. Ado pumȩ judiro̧ pio ju̧i̧ jara̧ oaiä, noi̧dërë ja̧boa̧dirȩ.

¹² Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Tja̧ra̧ri̧ mu̧i̧tjoi̧rȩ jibëa̧ oa pjurarërea̧ ji̧, ado cja̧rȩmo̧rȩ ano̧ mire pjura̧dejȩ jibëa̧ra̧. Ado chjaodëri̧ ae chadäräa̧ oa cjiaremȩde do üdë, gupënȩ üdë, büë üdë. Ado aechadäräa̧ oa cjia̧ oaiä, do üdë chjadëri̧ tatarërea̧ ji̧, tatadëpe baga̧de. Pearä ütararërea̧mi̧ tatadëpe baga̧de. Jabechji̧ jadüchiami̧ ora nö̧ta bagönȩ mapea̧de chjadëri̧ tatarërea̧ ji̧. Ado peaja̧di dari̧ japea̧de gupënȩ üdë, büë üdë. Aja̧, gȩnȩrä chjadëri̧ tatarërea̧ ji̧, jadüchiami̧ ora nö̧ta tatadëpea̧de, eami̧ oa da mirerea̧mi̧dëri̧.

¹³ Ja̧dëa ji̧ pua oa daea̧requede iu puami̧ da oa. Uë tjamo̧ oa pjo̧a̧ baämȩ oa daea̧reconȩ. Ado to̧bari̧ ea cjiamȩrȩ yo̧a̧de: —A̧dëräpȩmȩ ja mu̧i̧tjoi̧ judiro̧ pjurapea̧ ji̧ jabë pjärämȩde. Aja̧, tjarari̧ pjurarea̧ra̧ jabë pjurapea̧de. Ado a̧dë chjäte uapai̧ dari̧ bape chjaopadejȩrȩ pumȩ ji̧ri̧. Tjamo̧ davä. Pio jiro pjurarea̧ra̧ pjura̧ oa cjiarä, pumȩ judiro̧ gito ana̧ tjamo̧ri̧ jo̧rȩtaji̧ri̧rȩ ejaro cjiapadirȩ, i ma̧na̧guraji̧ri̧rȩ. Aja̧, ja̧di ta̧rëri̧ yo̧mȩ oa ta̧rëa̧reconȩ.