Jechurë Na̧rȩrërea̧ Ma̧ȩ 7 - Biblia Pume

Ütë tjamo̧ judi mitëa̧dejȩrȩ Icharai pio judiri ja̧ buba oa

¹ Ado pio ju̧i̧ daea̧ duri oa, ano̧ mire daea̧requedejȩrȩ a̧dëriji̧ri̧ mu̧i̧tjoi̧ ji̧ri̧, jadüchiami̧ oa. Daburäpȩ cjiaji̧ri̧ oa daea̧requedejȩrȩ, chiri cotoräpȩ cjiaji̧ri̧ oa. Cja̧rȩmȩ oa daea̧reconȩ dorë cjitëmȩ chiri cotoräpȩ cjiamȩ oa. Ado cja̧rȩmo̧ oa daea̧reconȩ dorë biramȩ chiri cotoräpȩ cjiamȩ oa. Ado cja̧rȩmo̧ oa daea̧reconȩ chirina̧ cotoräpȩ cjiamȩ oa. Ado cja̧rȩmo̧ oa daea̧reconȩ chirina̧ dëbëräpȩ cjiamȩ oa. Aja̧, chiri bu nö̧ta oa cjiaji̧ri̧ oa daea̧requedejȩrȩ. Jadüchiami̧ pjaeparë pjaepachea oa tutireji̧ri̧diro̧jo̧ȩ. Aja̧, chiriräpȩmo̧ pjaepachea oa, ui ana̧räpȩmo̧ pjaepachea oa, chirirä cjiamȩ to pio ju̧i̧iäpȩmo̧ pjaepachea oa tutireji̧ri̧diro̧jo̧ȩ.

² Ado ja̧dëa ji̧ pio ji̧ri̧ daea̧ duri oa, ado cja̧rȩmo̧ mu̧i̧tjoi̧ oa daea̧requede, a̧dërämȩ ja̧ mu̧i̧tjoi̧ pio ju̧i̧. Dorë cjitëmȩ pio judiri ma̧na̧mȩ oa daea̧reconȩ a̧dëräpȩmo̧ buamȩ oa. Ja̧bodëmȩ Ütë pio ju̧i̧ ja̧ go̧ȩ cäarea̧mi̧ da oa goa ma̧na̧mȩ oa daea̧reconȩ. Jabechji̧ pumȩ pio ji̧ri̧ go̧ȩ cäami̧ dari̧ japapea̧ oa goa ma̧na̧remȩdejȩ. Ado judi goae tarari̧ ëna̧diäa̧dejȩrȩ daburopȩmo̧ cjiaji̧ri̧ mu̧i̧tjoi̧ pio ji̧ri̧iäpȩmo̧. Aja̧, chiri oa ana̧ri̧ conȩdami̧ dari̧ japaji̧ri̧ pio ji̧ri̧iäpȩmo̧ goae tarari̧ ëna̧diäa̧dejȩrȩ, ui ana̧ pio ju̧i̧ conȩdami̧ dari̧ japaji̧ri̧ pio ji̧ri̧iäpȩmo̧.

³ Ado ja̧dëa ji̧ a̧dërämȩ ja̧ mu̧i̧tjoi̧ pio judi yo̧a̧dejȩrȩ: —Jabo cjäri̧ ma, jabëchji̧vä —yo̧a̧dejȩrȩ—. Jabë chiri oa chjai̧dëparȩdëpea̧de —yo̧a̧dejȩrȩ—. Ui ana̧ üdë jabë conȩdami̧ dari̧ japadëpea̧de. Chirirä cjo̧ro̧mȩ to oa peaja̧di jabë japadëpea̧de. Jabechji̧ Ütë tjamo̧ ja̧ pumȩ mu̧i̧tjoi̧ pio ji̧ri̧ go̧ȩ cäami̧ dari̧ japapea̧de yabochja. Aja̧, pio ji̧ri̧ ja̧ daitoro go̧ȩ cäami̧ dari̧ japapea̧de yabochja. Pio ji̧ri̧ go̧ȩ cäadäräa̧rämo̧ japapea̧de —yo̧mȩrȩ yo̧a̧dejȩrȩ conȩdarea̧ chiaji̧ri̧ mu̧i̧tjoi̧ pio ji̧ri̧.

⁴ Ado ja̧dëa ji̧ cja̧rȩmȩrȩ yo̧a̧ oa ta̧rëa̧requede go̧ȩ cäa̧ oa cjiaji̧ri̧ pio ji̧ri̧ chjiari, Ütë ja̧ go̧ȩra̧ go̧ȩ cäa̧ oa cjiaji̧ri̧ pio ji̧ri̧ chjiari. “Aja̧, ji̧ra̧ tjamo̧padirȩ” yo̧a̧ oa ta̧rëa̧requede. “Aja̧, jibëa̧ daitoro go̧ȩ cäa̧ oa cjiaji̧ri̧ pio judiro̧ a̧dë chjäte ji̧ra̧dirȩ” yo̧a̧ oa ta̧rëa̧requede. “Aja̧, no̧i̧dë tjamo̧dirȩ. Jabechji̧ 144 mil pumȩdirȩ” yo̧a̧ oa ta̧rëa̧requede. “Aja̧, Icharai pio judiri ja̧ maeadirȩ. Icharai ja u̧ri̧ pio judiri ja̧ maeadirȩ” yo̧a̧ oa ta̧rëa̧requede.

⁵ “Aja̧, Juda quȩmȩ pio judiri ja̧ji̧ri̧ judiro̧ 12 mil pumȩ go̧ȩ cäa̧ oa cjiadirȩ” yo̧a̧ oa ta̧rëa̧requede. "Ado Rubȩ quȩmȩ pio judiri ja̧ji̧ri̧ judiro̧, peaja̧di 12 mil go̧ȩ cäa̧ oa cjiadirȩ. Ado Ga quȩmȩ pio judiri ja̧ji̧ri̧ judiro̧ peaja̧di 12 mil go̧ȩ cäa̧ oa cjiadirȩ. Tjamo̧ davä. Ja̧di maeade.

⁶ Ado Ache quȩmȩ pio judiri ja̧ji̧ri̧ judiro̧ peaja̧di 12 mil pumȩ go̧ȩ cäa̧ oa cjiadirȩ. Ado Netari quȩmȩ pio judiri ja̧ji̧ri̧ judiro̧, peaja̧di 12 mil go̧ȩ cäa̧ oa cjiadirȩ. Ado peaja̧di dari̧ cjiadiäa̧dirȩ Manache pio judiri ja̧ji̧ri̧ judiro̧. Aja̧, 12 mil go̧ȩ cäa̧ oa cjiadirȩ peaja̧di.

⁷ Ado Chimeo̧ quȩmȩ pio judiri ja̧ji̧ri̧ judiro̧, Devi quȩmȩ pio judiri ja̧ji̧ri̧ judiro̧, Ichaca quȩmȩ pio judiri ja̧ji̧ri̧ judiro̧,

⁸ Chaburo̧ quȩmȩ pio judiri ja̧ji̧ri̧ judiro̧, Joche quȩmȩ pio judiri ja̧ji̧ri̧ judiro̧, Bejami̧ quȩmȩ pio judiri ja̧ji̧ri̧ judiro̧ peaja̧di 12 mil pumȩ ji̧ri̧ go̧ȩ cäa̧ oa cjia maeadirȩ. Ja̧di maeade.“ Aja̧, ja̧di ta̧rëri̧ yo̧a̧ oa ta̧rëa̧requede.

Pumȩ buba oa daea̧de Juan judi a̧dëräpȩ

⁹ Ado pio ju̧i̧ duri oa daea̧requede pumȩ bubati̧ oa, pumȩrȩ ütararea̧mi̧dë oa. Chiri nö̧tai̧ oa cjo̧ro̧ji̧ri̧ pumȩ pio ji̧ri̧, ado cja̧rȩmo̧ jo̧rȩtarea̧ chiaji̧ri̧ pio ji̧ri̧, ado cja̧rȩmo̧ ma̧ȩ oa ni̧bäji̧ri̧ pio ji̧ri̧, ado cja̧rȩmo̧ taruri ja̧ pumȩ pio ji̧ri̧ daea̧requede, a̧dë chjäte ji̧ra̧ tjamo̧ oa. Aja̧, Ütë ja̧ charea̧ dëbëräpȩ cjiaji̧ri̧ oa daea̧requedejȩrȩ, Oveja pëi̧ chjamȩmi̧ da pio ju̧i̧ ja̧ dëbëräpȩ cjiaji̧ri̧ oa. Chjibo bërebërea maeara̧ ina̧ji̧ri̧ oa, tjotjo pjö̧dami̧ da oa ara cjiaji̧ri̧ oa daea̧requedejȩrȩ.

¹⁰ Ado goae tarari̧ ëna̧diämi̧ ta̧rëri̧ yo̧a̧dirȩ: —Chacjiamȩri̧ ni̧bätäro̧jo̧ȩ ibëa̧ Ütë oa, charea̧ ba chiaräpȩ chamȩ pio ju̧i̧ —yo̧a̧dirȩ—. Ado Oveja pëi̧ chjamȩmi̧ da pio ju̧i̧bo chjacjiamȩri̧ ni̧bätäro̧jo̧ȩ. Pio judiro̧ tjamo̧dirȩ ibë chjätärea̧ yürüa̧ji̧ri̧ judiro, a̧ro̧rȩ aeno̧a̧ oa cjiachea oa. Chjacjiamȩri̧ ni̧bätäro̧jȩrȩ —yo̧reji̧ri̧dirȩ to̧bari̧, jachipadärärea̧mi̧ dari̧.

¹¹ Ado a̧dërämȩ ja̧ mu̧i̧tjoi̧ pio ji̧ri̧ peaja̧di daea̧requedejȩrȩ ütëbodärä oa. Ütë ja̧ charea̧ pio ju̧i̧ tjoro tänȩji̧ri̧ oa daea̧requedejȩrȩ. Ado tjamo̧ yo̧ji̧ri̧ pio ji̧ri̧bo daea̧requedejȩrȩ, 24 oa. Ado jibëa̧ icjara nö̧tai̧ oa dacho chiaji̧ri̧ pio ji̧ri̧bo daea̧requedejȩrȩ. Ado judiro̧ ütëbodärärë chjaodëri̧ toboe china̧däräa̧dirȩ Ütërë chamȩ dëbëräpȩ ju̧ri̧, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ.

¹² Ado ja̧di ta̧rëri̧ yo̧ji̧ri̧rȩ yo̧a̧diro̧jo̧ȩ: —Aja̧, ji̧dë ma chjacjiamȩri̧ ni̧bäpea̧de, pumȩ judiro̧ pio yabo japea̧mi̧. Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧de. Jabechji̧ a̧dë chjäte tatari̧ cjiamȩ pio judi. A̧dë chjäte jauëchamȩ pio judi. Ado pio ju̧i̧iä ji̧dë ma chjacjiamȩri̧ jo̧retapea̧de. Jabechji̧ chjö̧na̧i̧ti̧ oa dabamȩde judi, o oamo̧i̧dë oa. Pio ju̧i̧iä jabechji̧, ji̧dë ma chjacjiamȩri̧ jo̧rȩtapea̧de. Ado pio judide ibë ji̧dë ma chjadëri̧ japamȩ judi. Ado pio ju̧i̧iä, ‘Aja̧, chjadëri̧ japea̧diibëda’ quëna̧ jo̧rȩtaji̧ri̧rȩ chjacjiamȩri̧ ni̧bäpea̧de. Jabechji̧ a̧dë chjäte ba chiamȩde. A̧dë chjäte jauëchjamȩde. Ado pio ju̧i̧iä ado cja̧rȩmo̧rȩ nö̧tadë madiro̧jo̧ȩ a̧dë chjäte ju chiamȩ pio ju̧i̧. Pio ju̧i̧iä jabechji̧ bucho ana̧ chjacjiamȩri̧ jo̧rȩtapea̧de, jo̧rȩtadëpe bagarea̧ decjiari̧. Ja̧ditäde. Aja̧, ja̧di ta̧rëri̧ go̧a̧ji̧ri̧ oa ta̧rëa̧requedejȩrȩ Ütë tjamo̧ ja̧ charea̧ yuroti̧ oa cjiaji̧ri̧ oa.

¹³ Ja̧dëa ji̧ tjamo̧ yo̧mȩ judi, cja̧rȩmȩrȩ ja̧di ta̧rëri̧ yo̧mȩrȩ iëno̧ë ta̧rëa̧dique: —Danȩ, pio yodëro̧je, chjibo bërebërea oa ina̧ji̧ri̧ pio judiro̧ ¿chjiadirȩ? ¿Yudiri ma̧na̧dirȩ? —iëno̧ë ta̧rëa̧dique.

¹⁴ Jabo cüdë dabadëmȩrȩ dëbë yo̧a̧reconȩ: —Cjäri̧ marequede, dabadërequede, jabo pio mȩnȩ daba jirorenȩ —dëbë yo̧a̧reconȩ. Ja̧dëa ji̧ yo̧a̧dique: —Danȩ, pio yodëro̧je a̧dë chjäte chjai̧dë pio ju̧i̧ chjätäa̧ji̧ri̧ pio judiro̧dirȩ —yo̧a̧dique—. Aja̧, ana̧ tjamo̧ri̧ tararëreji̧ri̧ pio judiro̧dirȩ jabo yaba̧ chjadëri̧ ma̧na̧rea̧ daea̧dirȩ chjadëri̧ go̧dürea̧mi̧ dari̧. Ado jibëa̧ chjibo üdë Oveja pëi̧ chjamȩmi̧ da pio ju̧i̧ ja̧ goera̧ pio ju̧ri̧ra̧ joa̧ oa cjiami̧ dari̧ cjiade, bërebërea tjamo̧pe järea̧mi̧ dari̧.

¹⁵ Pio ju̧i̧iä ji̧dë ma ja̧bepe cjiadirȩ Ütërë chamȩ dëbëräpȩ ju̧ri̧. Aja̧, do nö̧ta, gȩnȩ nö̧ta Ütë tjamo̧ ja̧ bëräpȩ cjiadirȩ pio ju̧i̧ ja̧ oa ja̧bepë yürüpea̧ oa. Ado charea̧ ba chiaräpȩ chamȩ pio ju̧i̧ ja̧ chjo̧erä cjia oaiä, jabechji̧ pio ju̧i̧ ja̧ i̧ärä cjo̧ro̧padirȩ, chjadëri̧ jida̧ oa cjiaji̧ri̧rȩ.

¹⁶ Jabechji̧ ta̧mȩcho̧ ja̧borërea̧ ji̧, ta̧mȩcho̧ ja̧bodëji̧ri̧rȩ cjo̧ro̧padirȩ yaba̧ bucho ana̧. Ado ui ja̧boji̧ri̧rȩ cjo̧ro̧rërea̧ ji̧, ui ja̧bodëpadirȩ yaba̧. Ado do üdë jibëa̧ iräpȩmo̧ mai̧ dari̧ türërea̧ ji̧, tüdëpadejȩrȩ yaba̧. Jabechji̧ eami̧ cjüëtü üdë tüdëpadejȩrȩ.

¹⁷ Jabechji̧ Oveja pëi̧ chjamȩmi̧ da pio judi chjadëri̧ jidadejȩrȩ. Tjamo̧ davä. Ütërë chamȩ yuroräpȩ cjiamȩ pio judi chjadëri̧ jidadejȩrȩ. Jabechji̧ chjadëri̧ jidamȩrȩ ëba jäpadejȩrȩ bucho ana̧ cjo̧ro̧rea̧ yürümȩ uiräpȩ, ui goaeri̧ cjitëmȩräpȩ. Ado judiro̧ ejaro cjiaji̧ri̧rȩ cjo̧ro̧rërea̧ ji̧, gito ana̧ri̧ jo̧rȩtarërea̧ ji̧, jabechji̧ tjaoëpai̧ dari̧ cjo̧ro̧rea̧ dapadirȩ Ütë tjamo̧ pio judi tuti japea̧ oaiä.