Jechurë Na̧rȩrërea̧ Ma̧ȩ 6 - Biblia Pume

Oveja pëi̧ chjamȩmi̧ da pio judi mu̧i̧ ia̧dejȩ ji̧cha̧parea̧ pio ju̧i̧

¹ Ja̧dëa ji daea̧reconȩ Oveja pëi̧ chjamȩmi̧ da pio ju̧i̧. Puria̧ oa cjiamȩ go̧ȩ i oa, ji̧cha̧parea̧ cja̧rȩmȩ oa mu̧i̧ iamȩ oa daea̧reconȩ. Cja̧ȩta̧ra̧ ichiri yo̧a̧ri̧remȩde ji̧cha̧parea̧ üdë, ado cja̧rȩmȩ oa mu̧i̧ iamȩ oa daea̧reconȩ. Ado judirä, chjaodëri̧ ta̧rëa̧reconȩ cja̧rȩmȩ oa, jibëa̧ icjara nö̧tai̧ oa dacho chiamȩ cja̧rȩmȩ oa. Mai̧ dari̧ dörö eami̧ ta̧rëri̧ ni̧bämȩ oa ta̧rëa̧reconȩ ado cja̧rȩmo̧ ju̧i̧iäpȩmo̧ ni̧bämȩ oa. —Jana̧vä —yo̧a̧mȩ oa ta̧rëa̧reconȩ.

² Ado daea̧reconȩ yae bërebërea oa. Ado uë buë chamȩ pio ju̧i̧bo daea̧reconȩ chjibato aramȩ oa. Ado cja̧rȩmȩrȩ yürüa̧ oa yuarea̧ ba chia oa yuaremȩde, chiri ütë cjo̧ro̧mȩrȩ yuami̧ da oa. Ado acji tai̧pea̧ oa go̧düdäräa̧de o ji̧ri̧iäpȩmo̧ goae tarari̧ boadäräpea̧ oa.

³ Ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Ado cja̧rȩmo̧ ji̧cha̧parea̧ pio ju̧i̧ mu̧i̧ iamȩ oa daea̧reconȩ. Cja̧rȩmȩ ji̧cha̧parea̧ pio ju̧i̧ mu̧i̧ iaremȩrȩ mu̧i̧ ia̧dejȩ ado cja̧rȩmo̧ oa. Ado pio ju̧i̧ mu̧i̧ ia ëte, jibëa̧ icjara nö̧tai̧ oa dacho chiaji̧ri̧ judiro̧ ado cja̧rȩmo̧rȩ ëna̧diämȩrȩ yo̧a̧dique, ja̧di ta̧rëri̧ yo̧mȩrȩ: —Jana̧vä —yo̧a̧dique.

⁴ Ado jämȩrȩ chjaodëri̧ daea̧reconȩ ado cja̧rȩmo̧ yae oa, cjo̧dë gärimȩmi̧ da oa, yae coëcoëa oa. Ado uë buë chamȩ pio ju̧i̧bo daea̧reconȩ. Ado cja̧rȩmȩrȩ yürüa̧ oa conȩdarea̧ oa chiamȩpea̧de pio jiromȩ üdë, yaerä buë chamȩ judi. Chiri nö̧tai̧ oa cjo̧ro̧ji̧ri̧ judiro̧ chjadëri̧ ëba cjo̧ro̧dëpea̧ oa, o ji̧ri̧iäpȩmo̧ acji tai̧ chjaopea̧ oa, jibëa̧ dëbëti̧ra̧ chia ja̧bo tänȩpea̧ oa, conȩdarea̧ chiamȩpea̧de. Ado cja̧rȩmȩrȩ yürüa̧ oa ja̧bo tänȩrea̧ go̧a̧ti̧ oa aramȩpea̧de, dëbëribo jo̧dë chiamȩ tjapënȩ jujuai̧ oa.

⁵ Ja̧dëa ji̧ daea̧reconȩ Oveja pëi̧ chamȩmi̧ da pio ju̧i̧. Ado cja̧rȩmo̧ ji̧cha̧parea̧ oa mu̧i̧ ia̧mȩ oa daea̧reconȩ. Aja̧, yo̧a̧ri̧ oa mu̧i̧ iaremȩrȩ mu̧i̧ ia̧dejȩ ado cja̧rȩmo̧ oa. Ado ja̧dëa ji̧ jibëa̧ icjara nö̧tai̧ oa dacho chiaji̧ri̧ judiro̧ ado cja̧rȩmo̧rȩ ja̧di ta̧rëri̧ yo̧a̧dique: —Jana̧vä —yo̧a̧dique. Ado jämȩrȩ daea̧reconȩ ado cja̧rȩmo̧ yae oa, bureburea oa. Ado uë buë chamȩ pio ju̧i̧bo daea̧reconȩ. Mö̧reda̧rea̧ oa mu̧i̧mȩ oa daea̧reconȩ.

⁶ Ado ja̧dëa ji̧ ni̧bämȩ pio ju̧i̧ ta̧rëa̧reconȩ ado cja̧rȩmo̧ oa. Jibëa̧ icjara nö̧tai̧ oa dacho chiaji̧ri̧ ja̧ chjarerä ni̧bämȩ pio ju̧i̧ ta̧rëa̧reconȩ. Ado ja̧di ta̧rëri̧ yo̧mȩ oa ta̧rëa̧reconȩ: —Jurarea̧ üdë jabëdiäpade —yo̧a̧de—. Jadi tara nö̧tadëpade. Cja̧rȩmȩ do ja̧bepea̧ ba üdë nö̧tadëpade jurarea̧ oa gatëpea̧ ji̧. Tirigo oa gatëpea̧ ji̧, cja̧rȩmȩ mö̧reda̧ gatëpea̧ ji̧ nö̧tadëpade. Ado chebada quȩmȩ jurarea̧ oa, tjarari̧ mö̧reda̧ oa gatëpea̧ ji̧ peaja̧di nö̧tadëpade. Jabo yo̧ üdë ba chiape jädëpade. Jabechji̧ ba chiaparȩdëpea̧de judi. Ado uvara̧ japea̧ ërü üdë peaja̧di ba chiaparȩdëpea̧de. Pio judimo̧rȩ ba chiaparȩdëpea̧de —yo̧a̧de.

⁷ Ja̧dëa ji̧ Oveja pëi̧ chjamȩmi̧ da pio ju̧i̧ ado daea̧reconȩ. Puria̧ go̧ȩ irä cjiamȩ ji̧cha̧parea̧ pio ju̧i̧ mu̧i̧ ia̧mȩ oa daea̧reconȩ. Tjarari̧ oa mu̧i̧ iaremȩrȩ mu̧i̧ ia̧dejȩ ado cja̧rȩmo̧ oa. Ado ja̧dëa ji̧ jibëa̧ icjara nö̧tai̧ oa dacho chiaji̧ri̧ judiro̧ cja̧rȩmȩrȩ, jabë ni̧bädëmȩ pio judi yo̧a̧dique. Ja̧di ta̧rëri̧ yo̧a̧dique: —Jana̧vä —yo̧a̧dique.

⁸ Ado jämȩrȩ daea̧reconȩ yae oa, naenaeami̧ da oa, uapai̧ da oa. Ado uë buë chamȩ pio ju̧i̧bo daea̧reconȩ “Ja̧borea̧” quȩmȩ pio ju̧i̧. Ado ju̧i̧ ja̧ jadü pio ju̧i̧bo daea̧reconȩ ju̧i̧ ja̧ duriräpȩ cjiamȩ oa. Aja̧, “Ja̧boa̧ji̧ri̧ judiro̧ tutia̧ oa cjiamȩräpȩ” quȩmȩ pio ju̧i̧ daea̧reconȩ. Ado cja̧rȩmȩrȩ yürüa̧ oa ja̧bo tänȩrea̧ chiaji̧ri̧pea̧dirȩ chiriräpȩti̧ oa cjo̧ro̧ji̧ri̧ pumȩ no̧i̧dë tjamo̧ oa ja̧bo tänȩpea̧ oa. Pio judiro̧ tänȩa̧ oaiä, jibëa̧ dëbëti̧ra̧ chia ja̧bo tänȩa̧dirȩ pumȩ judiro̧ orë. Ado o judiro̧ ja̧boa̧dirȩ ta̧mȩcho̧ ja̧boa̧ oaiä. Ado o judiro̧ ja̧boa̧dirȩ gito oaiä. Ado o judiro̧ chirirä cjo̧ro̧ji̧ri̧ pio ji̧ri̧iä ja̧boa̧dirȩ uapai̧ daji̧ri̧ pio ji̧ri̧iä, chjuaji̧ri̧ pio ji̧ri̧iä. Aja̧, pio judiro̧ tänȩa̧ oaiä, no̧i̧dë tjamo̧rȩ ja̧boa̧dirȩ. Danȩrȩ, 4 mil pumȩmi̧ dari̧ cjiarërea̧ ji̧, jabechji̧ 1 milmi̧ dari̧ ja̧boa̧dirȩ.

⁹ Ja̧dëa ji Oveja pëi̧ chjamȩmi̧ da pio ju̧i̧ daea̧reconȩ ado. Puria̧ go̧ȩ irä cjiamȩ ji̧cha̧parea̧ pio ju̧i̧ mu̧i̧ ia̧mȩ oa daea̧reconȩ. Jadüchiami̧ oa mu̧i̧ iaremȩrȩ ado cja̧rȩmo̧ oa mu̧i̧ ia̧mȩ oa daea̧reconȩ. Ado ja̧dëa ji̧ quëna̧ji̧ri̧ ja̧ tjo pio ji̧ri̧ daea̧requedejȩrȩ. A̧dëräpȩ cjiamȩ yürürea̧ mechja ëteräpȩ ju̧ri̧ daea̧requedejȩrȩ tjo no̧i̧dë oa. Judiro̧ Ütë tjamo̧ ja̧ ma̧ȩrä cjo̧ro̧rërea̧ oaiä, ju̧i̧ ja̧ ma̧ȩ oa a̧ra̧ano̧rërea̧ oaiä, jabechji̧ ja̧bo tänȩa̧ oa cjiarëreji̧ri̧dirȩ. Ado pio ji̧ri̧ ja̧ tjo oa daea̧requedejȩrȩ.

¹⁰ Ado to̧bari̧ ëna̧diäji̧ri̧ oa ta̧rëa̧requedejȩrȩ, ja̧di ta̧rëri̧ yo̧ji̧ri̧ oa: —Aja̧, Ano̧mȩ tjamo̧renȩ —yo̧a̧dirȩ—. Ado mȩnȩ jo̧rȩta̧mi̧ japarenȩ ado cja̧rȩmo̧rȩ dëbëparea̧ decjiari̧. Jabechji̧ a̧dë chjäte jauëchjamȩrenȩ. A̧dë chjäte chjadërenȩ. Ado a̧dë chjäte coëma cjiari̧ japamȩrenȩ, oëra̧ japarea̧ decjiari̧. Aja̧, mȩnȩ yo̧a̧mi̧ japamȩrenȩ ji̧dëdiä ni̧bärea̧ decjiari̧. Jabo ¿na̧pai̧rä yuro jidatapea̧de Ütë? —yo̧a̧diro̧jo̧ȩ—. ¿Naparä bape chjaoparenȩjȩrȩ chirirä cjo̧ro̧ji̧ri̧ pio ji̧ri̧? ¿Na̧parä bape chjaoparenȩjȩrȩ pio ibë ja̧bo tänȩa̧ ba oa? —ni̧bäji̧ri̧ oa ta̧rëa̧requedejȩrȩ.

¹¹ Ado ja̧dëa ji̧ cja̧rȩmȩrȩ yürüa̧ oa ina̧rea̧ bërebërea oa mitëa̧dirȩ. Ado ja̧dëa ji̧ cja̧rȩmȩrȩ dëbë yo̧a̧ oa ta̧rëa̧dirȩ. “Aja̧, jabë pjärämȩde” yo̧a̧dejȩrȩ. “Jabë bape chjaodëpea̧de. Jabechji̧ ma̧ chjua jidachji̧jȩrȩ. Jëreeadëchji̧vä. Ja̧bo tänȩa̧ oa cjiapaji̧ri̧ judiro̧ jabë pjärämȩdirȩ orë. Pio dibë ja̧bo tänȩa̧mi̧ peaja̧di ja̧bo tänȩpadiro̧jȩrȩ o ji̧ri̧, Ütë tjamo̧ ja̧ mu̧i̧tjoi̧ pio ji̧ri̧. Ütë tjamo̧ ja̧ ma̧ȩ oa ta̧rëdiäji̧ri̧rȩ cjo̧ro̧ oaiä ja̧bo tänȩpadiro̧jȩrȩ. Jabo jabë ja̧bodëa̧dirȩ. Jabo judiro̧ orë ütara̧mi̧ ja̧boa̧rä, jabechji̧ bape chjaopea̧de pio dibë ja̧bo tänȩa̧ ba oa.” Ja̧di ta̧rëri̧ yo̧a̧mȩ oa ta̧rëa̧diro̧jo̧ȩ cja̧rȩmȩ oa, tjo maearë cjiaji̧ri̧ judiro̧.

¹² Ja̧dëa̧ ji̧ Oveja pëi̧ chjamȩmi̧ da pio ju̧i̧ daea̧reconȩ ado. Ado cja̧rȩmo̧ ji̧cha̧parea̧ oa mu̧i̧ia̧mȩ oa daea̧reconȩ. Cja̧rȩichimo̧ oa mu̧i̧ iaremȩrȩ mu̧i̧ ia̧dejȩ ado cja̧rȩmo̧ oa. Ado mu̧i̧ ia̧ duri oa, a̧dë chjäte jö̧nö̧jö̧nö̧pai̧ cjiari̧ cjiaremȩde chiri üdë, a̧dë üdë. Ado ma̧i̧ dari̧ jö̧nö̧jö̧nö̧pai̧ cjiari̧ cjia̧ oaiä, jabechji̧ do üdë chjadëri̧ mo̧ërërea̧ ji̧, chjaodëri̧ bagönȩ mapea̧de da mirerea̧mi̧dëri̧. Ado gupënȩ üdë, chjaodëri̧ coëcoëa mapea̧de goe chiami̧ dari̧.

¹³ Ado büë üdë a̧dëräpȩ cjiarërea̧ ji̧, jabechji̧ chjaodëri̧ gu̧roa̧de daburäpȩmo̧. Aja̧, toro baramȩ jurarea̧ pio ju̧i̧ gu̧ro tänȩrëmi̧ cjiari̧, ma̧i̧ da pjaepamȩrȩ toro baramȩ jurarea̧ pio ju̧i̧ gu̧ro tänȩrëmi̧ cjiari̧ gu̧ro tänȩa̧dejȩ büë oa.

¹⁴ Ado a̧dë iremȩ üdë, cjäri̧ made, chjaodëri̧ puria̧ oa cjiami̧ dari̧ cjiamȩpea̧de, a̧dë i decjiape bagari̧. Ado ya̧mi̧ nö̧tarë charërea̧räpȩ chadëpe baga̧de. Jabechji̧ ya̧mi̧rȩ chadëmȩräpȩ ano̧ mire chamȩpea̧de. Ado ui ana̧ tjoro chamȩ chiri üdë, peaja̧di ado cja̧rȩmo̧räpȩ ano̧ mire chamȩpea̧de.

¹⁵ Ado chiri nö̧tai̧ oa cjo̧ro̧ji̧ri̧ pio judiro̧, cjäri̧ madirȩ, a̧dë chjäte uapaji̧ri̧pea̧dirȩ. Aja̧, jibëa̧ chji̧ üdë ododëpe bagami̧ tarari̧ cjiadiäa̧de ana̧ tjamo̧ri̧ jo̧rȩta̧ oaiä. Chiri ütë cjo̧ro̧ji̧ri̧ judiro̧, ado tjamo̧ yo̧ji̧ri̧ judiro̧, ado guadia ütëti̧ judiro̧, jabechji̧ ütëbodärärë uapa tjamo̧pea̧dirȩ, i ma̧na̧gurami̧ tarari̧ jo̧rȩtaji̧ri̧rȩ. Tjamo̧ davä. Chëre ji̧ra̧ri̧ goaji̧ri̧ judiro̧, tjamo̧ cjo̧ro̧ji̧ri̧ judiro̧ peaja̧di uapaji̧ri̧pea̧dirȩ. Ado gatëa̧ mu̧i̧tjoi̧ judiro̧, mu̧i̧tjoi̧dë pio judiro̧borë a̧dë chjäte uapaji̧ri̧pea̧dirȩ. Ado pio ju̧i̧iä uapaji̧ri̧ pio judiro̧ goaditea̧dirȩ ya̧mi̧räpȩ ju̧ri̧ Ütë tjamo̧ judi pio jibëiäpȩmo̧ dachea oa. Aja̧, ta̧dë cjararäpȩ ju̧ri̧, ta̧dë ëteräpȩ ju̧ri̧ goaditea̧dirȩ uapa tjamo̧ji̧ri̧rȩ.

¹⁶ Ado ëna̧ quira̧ti̧ cjiaji̧ri̧rȩ ëna̧tea̧diro̧jo̧ȩ ya̧mi̧ oa, ta̧dë chacha oa, ta̧rërea̧ chiadëmȩ oa. Ado ja̧di ta̧rëri̧ ëna̧diätea̧diro̧jo̧ȩ: —Goadirea̧ yürüibe. Ano̧ mire chami̧ dari̧ japachji̧vä ibë chjadëri̧ i̧äpapea̧ oa —ëna̧diätea̧dirȩ—. Ütërë charea̧räpȩ chamȩ pio judi ibë dachea oa, Oveja pëi̧ chjamȩmi̧ da pio ju̧i̧ ja̧ ërecjia̧ üdë pio ibëiäpȩmo̧ acji cjatächea oa, jabechji̧ chjadëri̧ i̧äpaibe.

¹⁷ Jabo cjäri̧ marea̧rȩ —yo̧a̧dirȩ—. Dabarea̧rȩ. Goadirea̧ decjiarea̧rȩ. Jabechji̧ Ütë ja̧ ërecjia̧ üdë na̧rȩpea̧de yaba̧. Aja̧, ütara̧ japamitërä ma̧na̧na̧ra̧diibe. Pumȩ ütëbodärä oa na̧rȩpadiibe yaba̧, jënȩ ërecjia̧ pio ju̧i̧. Ado ¿chjiade goadirea̧ dapamȩ judi? ¿Chjiade dëbëpe chjaorea̧ chiapamȩ judi? ¿Chjiade chjätärea̧ dapamȩ judi? Cjäri̧ made, japarea̧ decjiade. Aja̧, ja̧di ta̧rëri̧ yo̧ji̧ri̧rȩ ena̧diätea̧diro̧jo̧ȩ ya̧mi̧ pio ju̧i̧iäpȩmo̧ pumȩ judiro̧, uapa tjamo̧ji̧ri̧rȩ.