Jechurë Na̧rȩrërea̧ Ma̧ȩ 5 - Biblia Pume

Oveja pëi̧ chjamȩmi̧ da pio ju̧i̧ chjiari ma̧ȩ

¹ Ado mire damȩrȩ daea̧requede cja̧rȩmȩ go̧ȩ i go̧a̧ti̧ oa, puria̧ oa cjiamȩ oa. Ütërë charea̧ ba chiaräpȩ chamȩ pio ju̧i̧ ja̧ ichirä daea̧reconȩ mu̧i̧ chjuari goa chamȩ oa. Go̧ȩpea̧ oa chiaremȩde dëbëribo. Ado tata yo̧ uira̧ gu̧ro tänȩa̧ oa cjiaremȩde. Aja̧, 7 co gu̧ro tänȩ ëte yo̧ra̧ tutia̧ oa cjiaremȩde. Ji̧cha̧parȩa̧ oa cjiaremȩde jare baärea̧mi̧dëri̧. Ado tata yo̧ra̧ gu̧ro tänȩa̧ nö̧ta oa acji cjaeäa̧ oa cjiaremȩde 7 ji̧cha̧ra̧. Aja̧, pio jiro go̧ȩ i puria̧ oa cjiamȩ pio ju̧i̧ daea̧reconȩ tata yo̧ra̧ tutia̧ oa cjiamȩ oa.

² Ja̧dëa ji̧ a̧dërimȩ mu̧i̧tjoi̧ pio ju̧i̧ daea̧reconȩ, ju chia tjamo̧mȩ oa. Ado goae tarari̧ ni̧bämȩrȩ ja̧di ta̧rëri̧ yo̧remȩde jachipadärärea̧mi̧ dari̧: —¿Chjiarë nö̧tade pio yoa go̧ȩ i oa mu̧i̧ iapea̧ oa? —iëno̧ë ta̧rëa̧de—. ¿Chjiade a̧dë chjäte ba chiamȩ judi pio yoa go̧ȩ i oa mu̧i̧ ipea̧ oa? ¿Chjiarë nö̧tade ji̧cha̧parea̧ pio ju̧i̧ mu̧i̧ iapea̧ ji̧ —yo̧a̧de.

³ Jabo cjäri̧ made, eami̧ oa mu̧i̧ iapea̧ oa dadärädëa̧de. Jabechji̧ a̧dëräpȩji̧ri̧ judiro̧ nö̧tadëa̧dirȩ. Ado chiriräpȩ cjo̧ro̧ji̧ri̧ judiro̧ peaja̧di nö̧tadëa̧diro̧jo̧ȩ. Ado dabu ëteräpȩji̧ri̧ pio judiro̧borë nö̧tadëa̧diro̧jo̧ȩ.

⁴ Ado pio ju̧i̧iä ana̧ri̧ ejaro cjiamȩpea̧requede, gito ana̧ri̧ jo̧rȩtamȩrȩ. Jabechji̧ eami̧ üdë mu̧i̧ iarea̧ dadëa̧ oaiä, eami̧ üdë pio ju̧i̧ mu̧i̧ ipea̧ oa nö̧tadëa̧ oaiä, jabechji̧ ejaro cjiamȩpea̧requede.

⁵ Jabo ja̧dëa ji̧ tjamo̧ yo̧mȩ pio judi cja̧rȩmȩrȩ cjatäcjie jo̧rȩtarea̧mi̧ dari̧ yo̧a̧dique. Ja̧di ta̧rëri̧ yo̧a̧dique: —Danȩ, ejaro cjiadëvä —yo̧a̧dique—. Jabechji̧ pa̧rȩmȩmi̧ damȩ pio judi nö̧tadejȩ puria̧ oa cjiamȩ go̧ȩ pio ju̧i̧ mu̧i̧ iapea̧ oa. Tjamo̧ davä. Juda quȩmȩ buba pio judiri ja̧mȩ judi, ibëa̧ taru ba chiamȩ pio judiri ja̧mȩ judi, Davirea̧ pio judiri ja̧mȩ pio judi nö̧tadejȩ. Jabechji̧ boadäräa̧mȩ pio judide. Ado pio ju̧i̧iä jabechji̧, mu̧i̧ iapai̧ dadejȩ davä ji̧cha̧parea̧ oa, 7 oa. Tjamo̧ davä. Puria̧ oa cjiamȩ go̧ȩ i pio ju̧i̧ mu̧i̧ iapai̧ dadejȩ —yo̧a̧dique.

⁶ Ado ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Ütërë chamȩ ba chiaräpȩmȩ oa daea̧reconȩ cjiamȩ oa. Ado jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ tjoro tänȩa̧diro̧jo̧ȩ jibëa̧ yuro nö̧tai̧ oa cjiari̧. Ado tjamo̧ yo̧ji̧ri̧ judiro̧ peaja̧di tjoro tänȩa̧diro̧jo̧ȩ ta ütëbo jadüchiami̧rȩ, 24rë. Ado Oveja pëi̧ chjamȩmi̧ da pio ju̧i̧ daea̧ ji̧, ja̧bo tänȩa̧ oa cjiami̧ da oa daea̧reconȩ. Ado yatë chiaremȩde cja̧ȩta̧ra̧ ichiri yo̧a̧ri̧ oa. Ado dacho chiaremȩde peaja̧di cja̧ȩta̧ra̧ ichiri yo̧a̧ri̧ oa. Ado pio jiro dacho üdë, jabechji̧ Tjo tjamo̧ pio ju̧i̧ chjiari na̧rȩrea̧de. Aja̧, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chjiari na̧rȩrea̧de. Ado pio jiro Tjo tjamo̧ pio judi peadë chjadüa̧ oa cjiade chiriräpȩti̧ oa Ütë tjamo̧ pio judi chjadüa̧ ju̧i̧iä.

⁷ Ado Oveja pëi̧ chjamȩmi̧ da pio judi jäa̧de go̧ȩ i puria̧ oa cjiamȩ pio ju̧i̧ mitëpea̧ oa. Charea̧ ba chiaräpȩ chamȩ pio ju̧i̧ ja̧ ichirämȩ oa mitëa̧dejȩ, mu̧i̧ chjuari ja̧ ichirämȩ oa.

⁸ Ado pio ju̧i̧ mitëa̧ nö̧ta, jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ tjätjäpë china̧däräa̧dirȩ. Ado tjamo̧ yo̧ji̧ri̧ pio judiro̧borë, ta ütëbo jadüchiami̧rȩ tjätjäpë china̧däräa̧dirȩ. Aja̧, Oveja pëi̧ chjamȩmi̧ da pio ju̧i̧ ja̧ dëbëräpȩ tjätjäpë china̧däräa̧dirȩ, carecare guarea̧mi̧ da oa goaji̧ri̧rȩ. Ado peaja̧di tachja oa goareji̧ri̧dirȩ. Orora̧ japea̧ tachja oa goareji̧ri̧dirȩ goaeri̧ pjȩa̧mȩ cäarea̧ pio ju̧i̧ tjuri cjiari̧ chiamȩ oa. Ado goaeri̧ pjȩa̧mȩ cäarea̧ üdë, jabechji̧ Ütë ja̧ pumȩ judiro̧ pio jȩaiä goë cjo̧dëa̧ pio judimi̧ dade.

⁹ Ado go̧a̧reji̧ri̧dirȩ go̧a̧rea̧ peaja̧ oa, judiro̧ cja̧rȩmȩ co go̧a̧dërërea̧ pio ju̧i̧. Ado ja̧di ta̧rëri̧ go̧a̧ji̧ri̧pea̧dirȩ: “Aja̧, pio mȩnȩmo̧rȩ nö̧tarenȩ ji̧cha̧parea̧ pio ju̧i̧ mu̧i̧ iapea̧ ji̧. Pio mȩnȩmo̧rȩ nö̧tarenȩ puria̧ go̧ȩ i oa mu̧i̧ iapea̧ ji̧. Jabechji̧ ja̧bo tänȩa̧ oa cjiarëremȩrenȩ. Ado mȩnȩ ano̧ mire ja̧boa̧ oaiä, jabechji̧ na̧ goera̧ pio ju̧ri̧ra̧ gatërëremȩrenȩ pumȩ no̧i̧dë tjamo̧ oa Ütë tjamo̧ ja̧ oa. Aja̧, chiri nö̧tai̧ oa cjo̧ro̧ji̧ri̧ pumȩ pio ji̧ri̧ gatërëremȩrenȩ. Ado cja̧rȩmo̧ jo̧rȩtarea̧ chiaji̧ri̧ pumȩ pio ji̧ri̧, ado cja̧rȩmo̧ ma̧ȩ oa ni̧bäji̧ri̧ pumȩ pio ji̧ri̧, ado cja̧rȩmo̧ taruri ja̧ pumȩ pio ji̧ri̧ gatërëremȩrenȩ Ütë tjamo̧ ja̧ oa.

¹⁰ Ado pio mȩnȩ tänȩa̧ oaiä, jabechji̧ o ji̧ri̧ chjiari goë tuti ja̧bepaji̧ri̧pea̧dirȩ, Ütërë yo̧a̧ chja̧oerä ja̧bepapea̧ oa, chiri nö̧ta oa tjamo̧ yo̧ji̧ri̧rȩ cjo̧ro̧pea̧ oa.” Aja̧, ja̧di ta̧rëri̧ yo̧ji̧ri̧rȩ go̧a̧reji̧ri̧dirȩ Oveja pëi̧ chjamȩmi̧ da pio ju̧i̧iäpȩmo̧.

¹¹ Ja̧dëa̧ ji̧ mire damȩrȩ chjaodëri̧ ta̧rëa̧requedejȩrȩ a̧dëriji̧ri̧ mu̧i̧tjoi̧ no̧i̧dëti̧ oa, go̧a̧ji̧ri̧ oa. Aja̧, ütararea̧mi̧dë buba oa ta̧rëa̧requedejȩrȩ Ütë ja̧ charea̧ yuroti̧ oa cjiaji̧ri̧ oa, a̧dë chjäte ji̧ra̧ti̧ oa. Ado Oveja pëi̧ chjamȩmi̧ da pio ju̧i̧iäpȩmo̧ go̧a̧ji̧ri̧ oa ta̧rëa̧requedejȩrȩ. Ado jibëa̧ icjara nö̧tai̧ oa dacho chiaji̧ri̧ judiro̧ jadüchiami̧rȩ peaja̧di go̧a̧reji̧ri̧dirȩ, tjamo̧ yo̧ji̧ri̧ pio judiro̧borë.

¹² Ado to̧bari̧ go̧a̧ji̧ri̧ oa, goae tarari̧ go̧a̧ji̧ri̧ oa, ta̧rëa̧requedejȩrȩ, ja̧di ta̧rëri̧ go̧a̧ji̧ri̧ oa: "Aja̧, Oveja pëi̧ chjamȩmi̧ da judi, ja̧bo tänȩa̧ oa cjiarëremȩ pio judi nö̧tade chjacjiamȩri̧ ni̧bäpea̧ oa. Jabechji̧ a̧dë chjate jauëchjamȩde. Pareapamȩde. Ano̧mȩ pio judide. Ado a̧dë chjäte dabamȩde. Pio ju̧i̧iä chjacjiamȩri̧ jo̧rȩtapea̧de. Pio ju̧i̧iä chjacjiamȩri̧ ni̧bäpea̧de. Jabechji̧ Pareapamȩ tjamo̧ pio judide. A̧dë chjäte ju chiamȩ pio judide. A̧dë chjäte tatari̧ cjiamȩ pio judide. Ado pio ju̧i̧iä, dëdë, ji̧dë ma chjacjiamȩri̧ jo̧rȩtapea̧de." Aja̧, ja̧di ta̧rëri go̧a̧reji̧ri̧diro̧jo̧ȩ Oveja pëi̧ chjamȩmi̧ da pio ju̧i̧iäpȩmo̧.

¹³ Ado o ji̧ri̧ peaja̧di ta̧rëa̧requedejȩrȩ cjo̧ro̧ji̧ri̧ ütëbodäräti̧ oa. Ütë tjamo̧ pio ju̧i̧iäpȩmo̧ go̧a̧ji̧ri̧ oa ta̧rëa̧requedejȩrȩ. Daburo cjo̧ro̧ji̧ri̧ pio ji̧ri̧, a̧dëräpȩ cjiaji̧ri̧ pio ji̧ri̧, dabu ëteräpȩ cjiaji̧ri̧ pio ji̧ri̧ ta̧rëa̧requedejȩrȩ, ui ëteräpȩ cjiaji̧ri̧ pio ji̧ri̧bo. Ütëbodäräti̧ oa ta̧rëa̧requedejȩrȩ Ütë tjamo̧ ju̧i̧iäpȩmo̧ go̧a̧ji̧ri̧ oa. Ja̧di ta̧rëri̧ go̧a̧reji̧ri̧dirȩ: “Ütërë charea̧räpȩ chamȩ pio ju̧i̧iäpȩmo̧ go̧a̧rea̧ro̧jo̧ȩ. Ado Oveja pëi̧ chjamȩmi̧ da pio ju̧i̧iäpȩmo̧bo go̧a̧rea̧ro̧jo̧ȩ. Ji̧dë ma chjacjiamȩri̧ jo̧rȩtaji̧ri̧rȩ ni̧bäpea̧de pio ji̧ri̧iäpȩmo̧, a̧dë chjäte tatari̧ cjiaji̧ri̧ pio ji̧ri̧iäpȩmo̧. Bucho ana̧ ba chia jo̧rȩtapea̧de a̧dë chjäte ju chiaji̧ri̧ pio ji̧ri̧iäpȩmo̧. Pio ji̧ri̧iäpȩmo̧ bucho ana̧ chjacjiamȩri̧ jo̧rȩtapea̧de, jo̧rȩtadëpe bagarea̧ decjiari̧.” Aja̧ ja̧di ta̧rëri̧ go̧a̧ji̧ri̧ oa ta̧rëa̧requedejȩrȩ.

¹⁴ Ado jibëa̧ icjara nö̧tai̧ oa dacho chiaji̧ri̧ pio judiro̧ jadüchiami̧rȩ go̧a̧ duri oa ja̧di ta̧rëri̧ yo̧a̧dirȩ jibëa̧ dëbëti̧ra̧ chia: “Aja̧, a̧ro̧rȩ pio yabo go̧a̧mi̧ cjiatäde Ütë tjamo̧ judi” yo̧a̧dirȩ. Ado tjamo̧ yo̧ji̧ri̧ judiro̧ ta ütëbo jadüchiami̧rȩ ju chatura̧ tjätjäpë china̧däräa̧dirȩ jibëa̧ daito oa daburäpȩ yuro, chjacjiamȩri̧ jo̧rȩtaji̧ri̧rȩ.