Jechurë Na̧rȩrërea̧ Ma̧ȩ 4 - Biblia Pume

A̧dëräpȩ ju̧ri̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩte chjaodiro̧jo̧ȩ

¹ Ado pio ju̧i̧ daea̧ duri oa, cja̧rȩmȩrȩ ano̧ mire na̧rȩa̧dique a̧dëräpȩmo̧. Ado chjaodëri̧ daea̧requede joë ya oa, areië cjiamȩ oa. Ado coa ni̧bäremȩ pio judi ado ni̧bäa̧dique. Pjurarea̧ üdë goae tarari̧ ea cjiami̧ ta̧rëri̧ ni̧bäa̧dique. Ado ja̧di ta̧rëri̧ yo̧a̧dique: —Buavä jauëräpȩmo̧ —yo̧a̧dique—. Jabechji̧ chjadëri̧ na̧rȩparequedemȩ. Mȩnȩ pea daea̧ pio judi chjätäa̧ duri oa ma̧na̧pamȩ pio ju̧i̧bo na̧rȩparequedemȩ yaba̧, cjiadiäa̧mȩ pio ju̧i̧. Buavä —yo̧a̧dique.

² Ado chjaodëri̧ cjiana̧ra̧dique Tjo tjamo̧ judi. Ado pio ju̧i̧ ja̧ chja̧oerä cjiamȩrȩ chjaodëri̧ daea̧reconȩ charea̧ ba chia oa, a̧dëräpȩmȩ oa. Ado cja̧rȩmȩrȩ charemȩde charea̧rä.

³ A̧dë chjäte tatari̧ cjiamȩ oa daea̧reconȩ jibëa̧ chamacho oa. Jabechji̧ coëcoëari̧ tatamȩ oa, chja̧chja̧ri̧ tatamȩ oa daea̧reconȩ, ta̧dë ba chia tjamo̧mi̧ dari̧ tatamȩ oa. Ado ju̧i̧ ja̧ charea̧ yuroti̧ oa cjiamȩ oa daea̧reconȩ jochebürüri oa. Cja̧rȩmȩ codë go̧a̧ti̧ cjiamȩ oa, a̧dë chjäte chacjiamȩri̧ tatamȩ oa daea̧reconȩ, chja̧chja̧ri̧ tatamȩ oa, emerada quȩmȩ ta̧dë ba chiami̧ da oa.

⁴ Ado ütërë charea̧ ji̧ra̧ tjamo̧ oa peaja̧di daea̧requede ado cja̧rȩmo̧ oa. Ütë ja̧ charea̧ yuroti̧ oa cjiamȩ oa daea̧requede 24 charea̧ oa. Ado pio jiro charea̧rä chaji̧ri̧ oa daea̧requedejȩrȩ tjamo̧ yo̧ji̧ri̧ pio ji̧ri̧, yabo baäji̧ri̧mi̧ da pio ji̧ri̧. Chjibo bërebëreara̧ ina̧ oa cjiaji̧ri̧ oa daea̧requedejȩrȩ. Yuaji̧ri̧ oa, oro chjipararira̧ japea̧ pachecherea̧ oa yuaji̧ri̧ oa, uë chari̧ yuaji̧ri̧ oa daea̧requedejȩrȩ, chiri ütë cjo̧ro̧mȩrȩ yuami̧ dari̧ yuaji̧ri̧ oa.

⁵ Ado Ütë ja̧ charea̧ri pio judiri oëra̧ti̧ oa bërepe chjaoremȩde ma̧i̧ da dörö eari̧. Ado charea̧ dëbëräpȩ ju̧ri̧ daea̧requede cjo̧dë gärimȩ to ji̧ra̧ oa, cja̧ȩta̧ra̧ ichiri yo̧a̧ri̧ oa. Aja̧, pio ji̧ri̧ daea̧requedejȩrȩ cja̧ȩta̧ra̧ ichiri yo̧a̧ri̧ na̧rȩrea̧ oa, Ütë tjamo̧ pio ju̧i̧ ja̧ na̧rȩrea̧ oa.

⁶ Ado Ütë ja̧ charea̧ dëbëräpȩ ju̧ri̧ daea̧requede ui ana̧mi̧ da oa, chjäte darea̧mi̧ da oa, mo̧tea pjatërë tatari̧ cjiami̧ da oa. Ja̧dëa ji̧ daea̧requedejȩrȩ jadüchiami̧ oa, jibëa̧ icjara nö̧tai̧ oa dacho chiaji̧ri̧ pio ji̧ri̧. Ütë tjamo̧ ja̧ charea̧ yuro nö̧tai̧ oa cjiaji̧ri̧ oa daea̧requedejȩrȩ. Ütararea̧mi̧dëri̧ chiareji̧ri̧dirȩ jibëa̧ dacho oa. Ji̧ra̧ tjamo̧ oa, jibëa̧ icjara nö̧tai̧ oa dacho chiareji̧ri̧dirȩ yabori, apëribo.

⁷ Ado cja̧rȩmȩrȩ pa̧rȩmȩ coëmi̧ dari̧ cjiaremȩde. Ado cja̧rȩmo̧ üdë baca üi̧mi̧ daremȩde. Ado cja̧rȩmo̧ üdë pumȩ chamachomi̧ dari̧ cjiaremȩde. Ado cja̧rȩmo̧ üdë iu puarë pjo̧a̧ baämi̧ dari̧ cjiaremȩde.

⁸ Ado pio jiro cjo̧ro̧ji̧ri̧ judiro̧ jadüchiami̧rȩ pjö̧dato chia mareji̧ri̧dirȩ. Cja̧ȩta̧ra̧ ichiri cja̧rȩmȩ pjö̧dato oa chia mareji̧ri̧dirȩ. Ado dëdë, jibëa̧ icjara nö̧tai̧ oa dacho chiareji̧ri̧dirȩ. Tjamo̧ davä. Jibëa̧ icjara nö̧tai̧ oa ina̧ oa cjiami̧ dari̧ cjiaremȩde dacho maeara̧. Ado ji̧dë ma go̧a̧reji̧ri̧dirȩ do yoa, gȩnȩ yoa. Go̧a̧dëpe bagarea̧ decjiari̧ go̧a̧reji̧ri̧dirȩ Ütë tjamo̧ pio ju̧i̧iäpȩmo̧, chjacjiamȩri̧ jo̧rȩtaji̧ri̧rȩ. Ja̧di ta̧rëri̧ go̧a̧reji̧ri̧dirȩ: ‘A̧dë chjäte tatachjade Ütë tjamo̧ judi, ibëa̧ Ano̧mȩ judi. A̧dë chjäte ju chiamȩ pio judide. Pearämȩ pio judide. Tarupadëmȩ pio judide. Jabechji̧ cjiamȩde. Ado yuropadëmȩde. Bucho ana̧ cjiamȩde’ Aja̧, ja̧di ta̧rëri̧ go̧a̧ji̧ri̧rȩ go̧a̧reji̧ri̧dirȩ.

⁹ Aja̧, ja̧di dari̧ go̧a̧ chjaoreji̧ri̧dirȩ jibëa̧ icjara nö̧tai̧ oa dacho chiaji̧ri̧ judiro̧. Charea̧ ba chiaräpȩ chamȩ pio ju̧i̧iäpȩmo̧, bucho ana̧ cjiamȩ pio ju̧i̧iäpȩmo̧ ji̧dë ma go̧a̧reji̧ri̧diro̧jo̧ȩ, 'chjadëri̧ japea̧diibëda’ quëna̧ jo̧rȩtaji̧ri̧rȩ. Ado judiro̧ go̧a̧ ji̧,

¹⁰ tjamo̧ yo̧ji̧ri̧ pio judiro̧ 24rë ju chatura̧ tjätjäpë china̧däräa̧dirȩ jibëa̧ daito oa daburäpȩ yuro, charea̧ ba chiaräpȩ chamȩ pio ju̧i̧iäpȩmo̧. Chjacjiamȩri̧ jo̧rȩtareji̧ri̧diro̧jo̧ȩ bucho ana̧ cjiamȩ pio ju̧i̧iäpȩmo̧. Ado jibëa̧ yuarea̧ ba chia tjamo̧ oa ano̧ mire yürüa̧diro̧jo̧ȩ pio jibë u̧i̧ ba chiamȩ pio ju̧i̧iäpȩmo̧. Ado ja̧di ta̧rëri̧ yo̧ë cji̧däriä go̧a̧diro̧jo̧ȩ:

¹¹ —Ibëa̧ Ütë, ibëa̧ Ano̧mȩrenȩ —go̧a̧diro̧jo̧ȩ—. Pio mȩaiäpȩmo̧ ma chjacjiamȩri̧ jo̧rȩtarea̧mi̧ dade. Pio mȩaiäpȩmo̧ ma̧ chjacjiamȩri̧ ni̧bärea̧mi̧ dade. Tjamo̧ davä. Ba chia jo̧rȩtarea̧ro̧mȩ ‘a̧dë chjäte ju chiamȩdida’ quëna̧ jo̧rȩtaji̧ri̧rȩ. Pio mȩnȩmo̧renȩ chjö̧na̧i̧ oa pareapamȩ judi. Ado pio mȩnȩ pearä judirä ütarë jo̧rȩtarërea̧ oaiä pareapea̧ oa cjia maeade. Ado pio mȩaiämo̧i̧ quirë baä quirë baä cjiarea̧ dadirȩ cjo̧ro̧ji̧ri̧ judiro̧. Aja̧, na̧ jauëchja̧rämo̧ cjo̧ro̧rea̧ dadirȩ. Aja̧, ja̧di ta̧rëri̧ go̧a̧reji̧ri̧diro̧jo̧ȩ Ütë tjamo̧ pio ju̧i̧iäpȩmo̧, tjamo̧ yo̧ji̧ri̧ judiro̧, 24rë.