Jechurë Na̧rȩrërea̧ Ma̧ȩ 3 - Biblia Pume

Jechu judi ma̧ȩ yürürëremȩde Charade quȩmȩ bë ma̧ri̧räpȩ a̧dopaji̧ri̧ ja̧ oa

¹ Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Charade quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧ chiareconȩ. Ado cja̧ȩta̧ra̧ ichiri yo̧a̧ri̧ büë oa peaja̧di goarequede ca̧ ichirä. Aja̧, pio judirequede. Ado pio judimȩrȩ tjamo̧ri̧ dabarequede pio dibë chjiari. Danȩrȩ, bëdüa̧ oa cjiami̧ dari̧ cjo̧ro̧nȩrȩ jabo cjäri̧ manȩrȩ, ja̧boa̧mi̧ dari̧ cjianȩrȩ.

² Jabechji̧ mȩnȩro̧ Ütë tjamo̧ ja̧ ma̧ȩrä tüdüa̧mi̧ darä cjo̧ro̧rërea̧ ji̧, chjadëri̧ na̧rȩji̧ri̧rȩ cjo̧ro̧rërea̧ ji̧, ju baebaeami̧ dari̧ cjiadiäji̧ri̧pea̧nȩrȩ. Jabechji̧ ja̧bopea̧ querediämi̧ dari̧ cjiade mȩnȩro̧ quëna̧ üdë. Jabechji̧ dae chjaodidibe Ütë tjamo̧ judi coëma cjiari̧ cjo̧ro̧dëji̧ri̧ oa.

³ Pio ju̧i̧iä yo̧requededibe. Jabechji̧ chjereno̧ jo̧rȩtachji̧vä mȩnȩro̧ pearä ta̧rërërea̧ pio ju̧i̧, a̧ra̧ano̧ji̧ri̧ judiro̧ a̧ra̧ano̧a̧ pio ju̧i̧. Aja̧, mȩnȩro̧ ta̧rëa̧ ma̧ȩ pio ju̧i̧ ta̧rëdiächji̧jo̧ȩ. Ado putu jura̧ a̧dë chami̧ dari̧ ano̧ mire jo̧rȩtachji̧vä, mȩnȩro̧ chjai̧dëri̧ japea̧ pio ju̧i̧ japë ano̧ji̧ri̧rȩ. Jabo mȩnȩro̧ chjere jo̧rȩtadërä judi, bëdüa̧mi̧ dari̧ ano̧ mire cjo̧ro̧dërä judi, jabechji̧ chjaodëri̧ acji go̧düdäräparequededibe garümȩ üdë acji go̧düdärärëmi̧ cjiari̧. ‘Aja̧, pio jiro doro acji jana̧padiibëda’ quëna̧rea̧mi̧dëri̧ acji go̧düdäräparequededibe.

⁴ Jabo mȩnȩro̧ orë, Charaderäpȩ cjo̧ro̧ji̧ri̧ judiro̧ orë, jabechji̧ dibëa̧ chjibo oa i gȩrȩ chiadëmi̧ dari̧ cjo̧ro̧ji̧ri̧pea̧nȩrȩ, chjibo oa joami̧ dari̧ japea̧ oaiä. Ado pio ju̧i̧iä nö̧taji̧ri̧rȩ pio coadi tai̧panȩrȩ, ca̧ jadü maearë. Tjamo̧ davä. Chjibo bërebëreai̧ra̧ ina̧ oa cjiaji̧ri̧rȩ ji̧mo̧ tai̧parea̧rȩ mȩnȩro̧ Ütë ja̧ ma̧ȩrä cjo̧ro̧a̧ pio ju̧i̧iä, mȩnȩro̧ mö̧na̧ jidë ta̧rëa̧ pio ju̧i̧iä.

⁵ Jabechji̧ boadärärea̧ daji̧ri̧ pio judiro̧ ja̧di dari̧ ina̧ oa cjiapadirȩ bërebëreara̧. Ado ji̧ri̧ ja̧ quȩ oa duridëparȩdëpareconȩ. Tjamo̧ davä. Bucho ana̧ cjo̧ro̧rea̧ joërä go̧ȩpea̧ oa cjia̧ pio ju̧i̧ duridëparȩdëpareconȩ, jabo ji̧dëri̧ pio ju̧i̧ chjiari ni̧bäpareconȩ ca̧ Amai̧ pio ju̧i̧iä, a̧dëriji̧ri̧ mu̧i̧tjoi̧ pio ji̧ri̧iäbo.

⁶ “Danȩrȩ, ta̧rë puë chiami̧ dari̧ cjo̧ro̧ji̧ri̧ pio judiro̧ ütëborë chjadëri̧ acji cjaeä jo̧rȩtaji̧ri̧rȩ ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ oa a̧doparea̧ oa.” Aja̧ Juan, pio ju̧i̧mo̧ go̧ȩpe chjadütä earequedemȩ Charade quȩmȩräpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Ja̧di ta̧rëri̧ yo̧mȩrȩ ma̧ȩ yürüa̧dique Jechu judi Charade quȩmȩräpȩ a̧dopaji̧ri̧ ja̧ oa.

Jechu judi ma̧ȩ yürürëremȩde Pjiradepjia quȩmȩ bë ma̧ri̧räpȩ a̧dopaji̧ri̧ ja̧ oa

⁷ Ja̧dëa ji̧ cüdë daea̧ üdë, ji̧dë u̧i̧ yo̧mȩrȩ ja̧di ta̧rëri̧ ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Pjiradepjia quȩmȩ bë ma̧ri̧räpȩ tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, chjai̧dëra̧ mirea̧ oa cjiadëmȩ pio judirequede. Tjamo̧i̧ cjiari̧ cjiamȩ pio judirequede. Ado Davi quȩmȩrea̧ ütë pio ju̧i̧ ja̧ joë ya coërea̧ pio ju̧i̧ goarequede. Ado pio ju̧i̧iä cüdë eami̧ tuti cararea̧ joë ya oa chjuari̧ tuti cararä judi, jabechji̧ chjuari̧ tuti cara̧ oa cjiapade, ado cja̧rȩmo̧rȩ areiarea̧ decjiari̧. Ado cüdë eami̧ tuti cararea̧ joë ya oa areiarä judi, jabechji̧ chjuari̧ tuti cararea̧mi̧dëri̧ areia̧ oa cjiapade. Jabechji̧ cüdë ütärë jo̧rȩta̧mi̧ japadärärea̧ chiarequede, ado cja̧rȩmo̧rȩ dëbëparea̧ decjiari̧.

⁸ Ado danȩrȩ, tjamo̧ri̧ dabarequede pio dibë chjiari. ‘Aja̧, jadi dari̧ cjo̧ro̧diro̧da, ja̧di dari̧ jo̧rȩtadiro̧da’ quëna̧ dabarequededibe. Ado mȩnȩro̧ dibëa̧ tjoro ju chiarea̧ dadëräbo, mȩnȩro̧ järätä järätä jo̧rȩta̧räbo, jabechji̧ ca̧ ma̧ȩrä cjo̧ro̧nȩrȩ. Ütë tjamo̧ judi yo̧a̧mi̧ japaji̧ri̧rȩ cjo̧ronȩrȩ. Ado pio ju̧i̧iä areia̧reconȩ joë ya̧mi̧ da oa dibëa̧ yaboräpȩ, ado cja̧rȩmo̧rȩ tuti cararea̧mi̧dëri̧.

⁹ Ado danȩrȩ, ana̧ri̧ jo̧rȩtadëchji̧vä dibë conȩdareji̧ri̧ pio ji̧ri̧ chjiari. Jabechji̧ pio ji̧ri̧ chjiaribo dabarequedejȩrȩ. Danȩrȩ, judiorë ara̧ oa cjiadirȩ, jabo cjäri̧ madirȩ, judio tjamo̧dëdirȩ jabo Ichiae ja̧ pumȩdirȩ. Ado pio ju̧i̧iä badë dadiro̧dibe. Jabo ütara̧ doro badë dadëpadiro̧dibe, jabo dibëa̧ dëbëräpȩ ju chatura̧ tjätjäpë china̧därä tänȩparequedejȩrȩ jibëa̧ daito oa daburäpȩ yuro, ‘ba chiadiro̧da’ quëna̧rea̧mi̧ dari̧. Ado dibëa̧ ta yuroräpȩ china̧ji̧ri̧rȩ cjiarä, jabechji̧ coëma cjiari̧ jo̧rȩtapadirȩ pio dibë chjiari. ‘Aja̧, Ütë tjamo̧ judi ea tjamo̧diji̧ri̧da, ba chia dadiji̧ri̧da’ quëna̧ jo̧rȩtapadirȩ pio dibë chjiari.

¹⁰ Ado danȩrȩ, mȩnȩro̧ ca̧ ma̧ȩrä chjadëri̧ cjo̧ro̧a̧ oaiä, mȩnȩro̧ goaedë chjätäa̧räbo chjuari̧ quëna̧ oaiä, Ütë tjamo̧ pio ju̧i̧ jaepepami̧ dari̧ japadëa̧ oaiä, jabechji̧ chjadëri̧ jidaparequededibe, mȩnȩro̧ a̧dë chjäte chjai̧dëri̧ chjätächea oa. Tjamo̧ davä. Cüdë chiri nö̧tai̧ oa cjo̧ro̧ji̧ri̧ ütëbodärä oa a̧dë chjäte ma̧i̧ da conȩdarea̧ra̧ bape chjaoro, chiriräpȩti̧ oa cjo̧ro̧ji̧ri̧ pio ji̧ri̧ ana̧ri̧ ütararä, jabechji̧ chjadëri̧ boea̧ oa cjiami̧ dari̧ cjia tänȩparequededibe, mȩnȩro̧ chjadëri̧ cjo̧ro̧rea̧mi̧ dari̧.

¹¹ Danȩrȩ, chjaodëri̧ jana̧parequede. Ado pio ju̧i̧iä jabechji̧, ji̧dë ma ta̧rëriä dopachji̧vä mȩnȩro̧ dabapea̧ ma̧ȩ pio ju̧i̧. Aja̧, mitë ano̧mi̧ dari̧ japarea̧ decjiari̧ ta̧rëdiächji̧vä mȩnȩro̧ chjadëri̧ ba ano̧a̧ oa cjiapea̧ oa, ado cja̧rȩmo̧rȩ dibë tja̧reparȩchea oa, mȩnȩro̧ badëri̧ cjiadiämi̧ dari̧ cjiachea oa.

¹² Ado pio cüdë tänȩa̧ oa boadärärea̧ daji̧ri̧ pio judiro̧, jabechji̧ jo̧ taru yuimi̧ dari̧ cjiapadirȩ Ütë tjamo̧ ja̧ bëräpȩ, pio judiri go̧dürea̧ decjiari̧. Ado pio ji̧ri̧ ja̧ irä go̧ȩpajarequede ca̧ Ütë ja̧ quȩ oa. Ado ju̧i̧ uëri ado cja̧rȩmo̧ quȩ oa a̧de go̧ȩpajarequede. Tjamo̧ davä. Ca̧ Ütë ja̧ bë ma̧ri̧ pio ju̧i̧ ja̧ quȩ oa, a̧dëri pio judiri birapamȩ bë ma̧ri̧ pio ju̧i̧ ja̧ quȩ oa peaja̧di a̧de go̧ȩpajarequede dibëa̧ irä, Jerucharȩ bë ma̧ri̧ pea chja pio ju̧i̧ ja̧ quȩ oa. Ado ju̧i̧ uëri ca̧ quȩ peaja̧ pio ju̧i̧bo a̧de go̧ȩpajarequede dibëa̧ irä.

¹³ “Danȩrȩ, ta̧rë puë chiami̧ dari̧ cjo̧ro̧ji̧ri̧ judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ oa a̧doparea̧ oa.“ Aja̧ Juan, pio ju̧i̧mo̧ go̧ȩpe chjadütä earequedemȩ Pjiradepjia quȩmȩräpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Pjiradepjia quȩmȩräpȩ a̧dopaji̧ri̧ ja̧ oa.

Jechu judi ma̧ȩ yürürëremȩde Daodichea quȩmȩ bë ma̧ri̧räpȩ a̧dopaji̧ri̧ ja̧ oa

¹⁴ Ja̧dëa ji̧ coa ni̧bämȩ judi, ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Daodichea quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Aja̧, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, ‘Ja̧ditäde’ quȩmȩ pio judirequede. Pio coaiä tjamo̧i̧ cjiari̧ cjiade Ütë tjamo̧ ja̧ ma̧ȩ üdë. Pio judi yo̧a̧mi̧ japadärämȩrequede a̧dë chiquirea̧ decjiari̧. Jabechji̧ judi pearä judirä pareaparërea̧ üdë pio coaiämo̧i̧ taruparëremȩde. Ado pio judimȩrȩ ma̧ȩ yürürequededibe.

¹⁵ Danȩrȩ, pio dibë chjiari tjamo̧ri̧ dabarequede. Quëna̧ji̧ri̧borë ji̧dë ma chjaocjiami̧ dari̧ cjo̧ro̧nȩrȩ. Mȩnȩro̧ pio coa chjuari̧ jiadadëji̧ri̧borë, jiadarenȩro̧coe. Mȩnȩro̧ pio coa eadë eadë jo̧rȩtadëji̧ri̧borë, ea tjamo̧dërenȩro̧coe. Ado ja̧di dari̧ cjo̧ro̧a̧ üdë goae tjamo̧dëde coaiä.

¹⁶ Pio ju̧i̧iä ägo̧düchämi̧ tarari̧ jo̧rȩta tänȩrenȩro̧coe. Jabechji̧ pio coa chjiari järidënȩrȩ, jabo peaja̧di chjuari̧ jiadadënȩro̧coe. Jabechji̧ chjaocjiami̧ dari̧ japanȩrȩ. Ma̧i̧ dari̧ pjȩa̧pea̧mȩmi̧ danȩrȩ. Goae tjamo̧mi̧ dari̧ cjiarä judi, chjadëtäremȩde. Jabo cjäri̧ manȩrȩ, ma̧i̧ dari̧ pjȩa̧pea̧mȩmi̧ danȩrȩ. Pio ju̧i̧iä a̧rȩ pjuino̧mi̧ dari̧ japajarequededibe.

¹⁷ Danȩrȩ, mȩnȩro̧ pio dibë chjiari coëma cjiari̧ jo̧rȩtatärea̧ ji̧, goaeri̧ yo̧nȩrȩ. ‘Aja̧, ji̧ra̧ri̧ goamȩmi̧ dari̧ cjo̧ro̧requede’ yo̧nȩrȩ. ‘Aja̧, ca̧ea̧ üdë goëje ji̧ra̧ tjamo̧pe jädique. Ca̧ea̧ üdë dae jädique jabëdiärea̧ dejiari̧’ yo̧nȩrȩ. Jabo cjäri̧ manȩrȩ, a̧dë chjäte cjari̧dari̧ cjo̧ro̧mi̧ dari̧ cjo̧ro̧nȩrȩ. Ji̧ra̧ri̧ goaji̧ri̧mi̧ dari̧ cjo̧ro̧dënȩrȩ, jabo chjö̧na̧i̧ti̧ oa cjäri̧ ja̧boji̧ri̧mi̧ dari̧ cjianȩrȩ. Jabechji̧ chätemi̧ dari̧ cjianȩrȩ. Da cotomi̧ dari̧ cjianȩrȩ. Tjamo̧ davä. Ja̧di dari̧ cjo̧ro̧nȩrȩ, jabo mȩnȩro̧ pio dibë chjiari na̧e chiatärea̧ ji̧, cjäri̧ manȩrȩ, dabadënȩrȩ. ‘Jaeboa̧ro̧da, jabechji̧a̧ro̧da’ quëna̧ jo̧rȩtanȩrȩ.

¹⁸ Ado pio ju̧i̧iä chi̧dëearequededibe. Jabechji̧ pio coaiä oro chjami̧ da oa gatëtä yo̧tarequededibe mȩnȩro̧ tjamo̧ri̧ goaji̧ri̧mi̧ dari̧ cjo̧ro̧pea̧ oa. Peaja̧di chjibo bërebëreami̧ da pio ju̧i̧bo gatëtäreji̧ri̧nerȩ chjadëri̧ ina̧pea̧ oa, mȩnȩro̧ idi̧ dari̧ cjiami̧ dari̧ cjiachea oa. Ado dibëa̧ dacho oa joarea̧mi̧ da pio ju̧i̧bo gatëtäreji̧ri̧nȩrȩ mȩnȩro̧ chjaparȩa̧ oa cjiami̧ dari̧ cjiapea̧ oa, mȩnȩro̧ ado chjereno̧ chjadëri̧ dami̧ dari̧ cjo̧ro̧pea̧ oa.

¹⁹ Danȩrȩ, cüdë ea̧ pumȩ pio ji̧ri̧ to̧bari̧ chi̧dëearequedejȩrȩ. Cüdë ea̧ pumȩ pio ji̧ri̧ bide cjaeämi̧ dari̧ japarequedejȩrȩ. Ado pio ju̧i̧iä yo̧requededibe. Järichji̧vä. Chjere jo̧rȩtachji̧vä.

²⁰ Danȩrȩ, dibëa̧ bë dairäpȩ cjiami̧ dari̧ cjiarequede yu̧a̧rea̧ joë ya yuroräpȩ. Ado taö taö eari̧ gu̧na̧ gu̧na̧ cjiami̧ dari̧ japarequede, yu̧a̧tämi̧ cjiamȩrȩ joë ya oa. Ado eami̧ pumȩ üdë coa ta̧rërä judi, ado joë ya oa areiami̧ dari̧ japarä judi, jabechji̧ yu̧a̧mi̧ dari̧ japaparequede pio ju̧i̧ nö̧ta ëba jura chami̧ dari̧ japapea̧ oa.

²¹ Ado boadäräa̧ji̧ri̧ pio ji̧ri̧, jabechji̧ tjamo̧ yo̧rea̧ yürüparequedejȩrȩ. Danȩrȩ, pio cüdëborë boadärärea̧ daea̧requede. Ado pio ju̧i̧iä charequede ca̧ Ama̧i̧rȩ chamȩräpȩ, a̧dë chjäte ba chia tjamo̧räpȩ. Ado cüdë ba chiaräpȩ chamȩpea̧mi̧ cha tänȩparequedejȩrȩ ca̧ yuroro boadäräa̧ji̧ri̧ pio ji̧ri̧.

²² “Danȩrȩ, ta̧rë puë chiami̧ dari̧ cjo̧ro̧ji̧ri̧ pio judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ oa a̧doparea̧ oa.” Aja̧, Juan, pio ju̧i̧mo̧ go̧ȩpe chjadütä earequedemȩ Daodichea quȩmȩräpȩ a̧dopaji̧ri̧ ja̧ tjamo̧ jidamȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Daodichea quȩmȩräpȩ a̧dopaji̧ri̧ ja̧ oa.