Jechurë Na̧rȩrërea̧ Ma̧ȩ 22 - Biblia Pume

¹ Ja̧dëa ji̧ a̧dërämȩ ja̧ mu̧i̧tjoi̧ üdë ji̧dë u̧i̧ na̧rȩtämi̧ cjiamȩrȩ na̧rȩa̧dique bea oa, bucho ana̧ cjo̧ro̧rea̧ yürümȩ ui oa. Ütë ja̧ charea̧ri pio judiri ca̧mȩ oa, tatachjari̧ ca̧mȩ oa na̧rȩa̧dique, Oveja pëi̧ chjamȩmi̧ da pio ju̧i̧ ja̧ charea̧ri pio judiri ca̧mȩ oa.

² No̧ tjomo̧ ca̧remȩde bea üdë. Tjamo̧ baämȩ no̧ tjoro ca̧remȩde bë ma̧ri̧räpȩ. Ado to üdë, bucho ana̧ cjo̧ro̧rea̧ yürümȩ to üdë, bea yuroro cjiaremȩde bea dëbëribo. Ado gupënȩ nö̧tai̧ chiade jurarea̧ oa, ichi chjö̧na̧i̧ yo̧a̧ri̧ co ui nö̧ta. Ado to pjö̧da üdë, chjaparȩrea̧ to pjö̧dami̧ dade. Chiriräpȩti̧ oa cjo̧ro̧ji̧ri̧ pio ji̧ri̧ ja̧de, pio judiro̧ chjadëri̧ cjo̧ro̧pea̧ oa, gitodë maearë cjo̧ro̧pea̧ oa.

³ Ado eami̧ti̧ china̧chja üdë, Ütë tjamo̧ pio ju̧i̧iä jabechji̧dëmȩ üdë, Ütë tjamo̧ ju̧i̧iä goaedëmȩ üdë, jabechji̧ bë ma̧ri̧räpȩ yu̧a̧rea̧ dadëpade. Jabo chjadë maearë yu̧a̧rea̧ dapade. Ado pio ju̧i̧iä Ütë ja̧ charea̧ üdë pio ju̧ri̧pȩde, bë ma̧ri̧räpȩ ju̧ri̧. Ado Oveja pëi̧ chjamȩmi̧ da pio ju̧i̧ ja̧ charea̧borë pio ju̧ri̧pȩ cjiade. Ado charea̧rä chaji̧ri̧ pio ji̧ri̧ ja̧ mu̧i̧tjoi̧ pio judiro̧ chjacjiamȩri̧ jo̧rȩtapadiro̧jȩrȩ.

⁴ Ado Ütë ja̧ dacho oa irä dapadiro̧jo̧ȩ, ba dëbë daji̧ri̧rȩ. Ado ju̧i̧ ja̧ quȩ üdë go̧ȩpea̧ oa cjiapade jibëa̧ daitoro.

⁵ Ado gȩnȩ decjiaji̧ri̧rȩ cjo̧ro̧padirȩ. 'Jabechji̧ genȩpea̧dida, ca̧ tataparea̧ oa cjitëparȩno̧täremȩcuni̧da’ quëna̧ jo̧rȩtadëpadirȩ. Jabo do decjiaräbo, jabechji̧ chjadëri̧ cjo̧ro̧rea̧ dapadirȩ Ano̧mȩ Ütë pio ju̧i̧iä. Aja̧, pio ju̧i̧iä tata marä cjo̧ro̧padirȩ, chjadëri̧ da mirerea̧ daji̧ri̧rȩ. Ado chiri ütë cjo̧ro̧ji̧ri̧mi̧ dari̧ cjo̧ro̧padirȩ bucho ana̧, chiri ütëdëpe bagarea̧ decjiari̧.

Jechu judi ma̧na̧padiibe

⁶ Ja̧dëa ji̧ mu̧i̧tjoi̧ judi yo̧a̧dique: —Pio yoa ma̧ȩ üdë tjamo̧i̧ cjiari̧ baäde —yo̧a̧dique—. Chjuari̧ quëna̧pea̧de. Jabechji̧ ma̧diä ma̧diä cjia tänȩdërea̧ ma̧ȩde. Aja̧, ibëa̧ Ano̧mȩ Ütë judi pio yoa ma̧ȩ oa chjadüa̧dique pio mȩaiäpȩmo̧ yürüpea̧ oa. Tjamo̧ davä. Ano̧mȩ Ütë judi, Tjo tjamo̧ oa yürüa̧mȩ judi, Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧ ma̧ȩ yürüa̧mȩ pio judi, chjadüa̧dique pio mȩaiäpȩmo̧ chjadëri̧ na̧rȩpea̧ oa, pio mȩaiäpȩmo̧ chjadëri̧ ni̧bä chjaopea̧ oa. Jabechji̧ jibëa̧ mu̧i̧tjoi̧ judiro̧ dabadëchea oa, japamitë boi̧chji̧ chjätä ëte ma̧na̧pea̧ pio ju̧i̧ chjiari dabadëchea oa, chjadüa̧dique. Aja̧, ja̧di ta̧rëri̧ yo̧a̧dique mu̧i̧tjoi̧ üdë.

⁷ Ado judi ni̧bäa̧ duri oa, Jechu judi yo̧a̧de. Ja̧di ta̧rëri̧ yo̧mȩrȩ yo̧a̧de: —Ta̧rëchji̧vä. Cüdë ma̧na̧pea̧ ji̧ querediä tjamo̧de —yo̧a̧de—. Ado pio yoa joërä go̧ȩpea̧ oa cjiamȩ ma̧ȩ oa ta̧rëdiämȩ judi, ma̧na̧pea̧ japamitë pio ju̧i̧ chjiari daba tänȩmȩ ma̧ȩ oa ta̧rëdiämȩ pio judi, jabechji̧ a̧dë chäte ma̧ chiadëri̧ cjiamȩrȩ cjo̧ro̧pade —yo̧a̧de Jechu judi.

⁸ Danȩrȩ ca̧ oti̧, Juan pio judirequede cüdë. Ado pio yoa chjö̧na̧i̧ oa ta̧rëa̧requede. Daea̧requede. Ca̧ dachora̧ daea̧requede. Ado chjö̧na̧i̧ oa ta̧rë ëte, ju chatura̧ cjiadäräa̧requede coa na̧rȩremȩ mu̧i̧tjoi̧ pio ju̧i̧ ja̧ dëbëräpȩ pio ju̧i̧ chjacjiamȩri̧ jo̧rȩtapea̧ oa.

⁹ Jabo yo̧a̧dique: —Cjäri̧ macoe, ja̧di dari̧ japadëcoe —yo̧a̧dique—. Pio mȩnȩmi̧ da mu̧i̧tjoi̧requede. Ütërë ea jana̧ chjadüa̧ oa ni̧bäji̧ri̧ pio judiro̧mi̧ da mu̧i̧tjoi̧requede. Aja̧, pio yoa joërä go̧ȩpea̧ oa cjiamȩ ma̧ȩ pio ju̧i̧ ta̧rëdiäji̧ri̧ pio judiro̧mi̧ da mu̧i̧tjoi̧requede cüdë. Ado pio ju̧i̧iä yo̧requedemȩ. Ja̧di dari japadëcoe, jabo Ütë tjamo̧ pio ju̧i̧iäpȩmo̧ ma chjacjiamȩri̧ jo̧rȩtajo̧ȩ —yo̧a̧dique.

¹⁰ Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dique a̧dërimȩ mu̧i̧tjoi̧ üdë: —Danȩ, pio yoa ma̧ȩ üdë, cüdë mȩa pea yürüa̧ ma̧ȩ üdë goadidëpea̧de —yo̧a̧dique—. Aja̧, goadidëpea̧de jabo yo̧pea̧de. Jabechji̧ cüdë mȩa yo̧a̧ üdë ma̧na̧pea̧ üdë querediä tjamo̧ tara, chjaodëri̧ ma̧na̧na̧ra̧mi̧ dari̧ ma̧na̧pa tara, jabechji̧ goadidëpea̧de.

¹¹ Ado danȩ, chjai̧dë oa jape chjaoji̧ri̧ judiro̧ ji̧dë ma chjai̧dëri̧ japatämi̧ cjiarä judi, jabechji̧ ji̧dë ma chjai̧dëri̧ jape cjiatädirȩ. Ado a̧dë chjäte idi̧ dari̧ jo̧rȩtariä cjo̧ro̧ji̧ri̧ judiro̧ ja̧di dari̧ ji̧dë ma cjo̧ro̧tämi̧ cjiarä judi, jabechji̧ ja̧di dari̧ cjo̧ro̧tädirȩ jënȩro̧ jo̧rȩta̧mi̧. Jabo coëma cjiari̧ cjo̧ro̧ji̧ri̧ pio judiro̧, jabechji̧ ji̧dë ma coëma cjiari̧ cjo̧ro̧täreji̧ri̧dirȩ. Ado china̧chjari̧ tutia̧ oa cjiami̧ dari̧ cjo̧ro̧ji̧ri̧ pio judiro̧ peaja̧di ji̧dë ma china̧chjari̧ tutia̧ oa cjiami̧ dari̧ cjo̧ro̧täreji̧ri̧dirȩ —yo̧a̧dique mu̧i̧tjoi̧ üdë.

¹² Ado ja̧dëa ji̧ Jechu judi ado yo̧a̧de. —Danȩrȩ, ta̧rëchji̧coe —yo̧a̧de—. Cüdë ma̧na̧pea̧ üdë querediä tjamo̧de. Ado cüdë ma̧na̧rä, chjadëri̧ japaji̧ri̧ pio ji̧ri̧ ba ano̧parequedejȩrȩ. Ado chjai̧dëri̧ japaji̧ri̧ pio ji̧ri̧ bape chjaoparequedejȩrȩ peaja̧di.

¹³ Danȩrȩ, pearämȩ pio judimȩrȩ cjiarequede, yuropadëmȩrȩ cjiamȩ üdë. Jabechji̧ tarupadëmȩrȩ cjiarequede bucho ana̧mȩrȩ —yo̧a̧de Jechu judi.

¹⁴ Aja̧ ca̧ oti̧, jibëa̧ ina̧rea̧ oa igȩrȩ chiadëmi̧ dari̧ joaji̧ri̧ pio judiro̧, jabechji̧ a̧dë chjäte ma̧ chiadëri̧ cjiapadirȩ. Ado bucho ana̧ cjo̧ro̧rea̧ yürümȩ to ja̧ jurarea̧ pio ju̧i̧ dapadirȩ. Ado pio ju̧i̧iä bë ma̧ri̧räpȩ yu̧a̧rea̧ dapadirȩ.

¹⁵ Jabo bë ma̧ri̧ dairäpȩ cjiadiäa̧ji̧ri̧ pio judiro̧, cjäri̧ madirȩ, yu̧a̧rea̧ dadëpadirȩ. Tjamo̧ davä. A̧dë chjäte chjai̧dëra̧ mirea̧ oa cjiami̧ dari̧ cjiaji̧ri̧ pio judiro̧, yo̧to̧ra̧ daeeaji̧ri̧ judiro̧, chjere chjadürea̧ chiaji̧ri̧ judiro̧, china̧chja pio ji̧ idi̧ dari̧ baë ëba mo̧a̧rea̧ goaraji̧ri̧ judiro̧, pumȩ ji̧ri̧ ja̧bo tänȩji̧ri̧ judiro̧, pumȩrȩ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩtaji̧ri̧ judiro̧, ma̧ȩ chjádë yürü chjaoji̧ri̧ pio judiro̧, cjäri̧ madirȩ, yu̧a̧rea̧ dadëpadirȩ.

¹⁶ Ja̧dëa ji̧ Jechu judi ado ni̧bäa̧de quëna̧ji̧ri̧ ütëbodärä oa. Ja̧di ta̧rëri̧ yo̧mȩrȩ yo̧a̧diibe: —Danȩrȩ, Jechu pio judirequede. Ado ca̧ mu̧i̧tjoi̧ pio ju̧i̧ chjadüa̧reconȩ pio dibëiäpȩmo̧ ma̧ȩ yürüpea̧ oa. Aja̧, quëna̧ji̧ri̧ pio ji̧ri̧iäpȩmo̧ yürüpea̧ oa, a̧dopaji̧ri̧ pio ji̧ri̧iäpȩmo̧ yürüpea̧ oa chjadüa̧reconȩ. Danȩrȩ, Davi pio judiri ja̧mȩrequede. Ado peaja̧di doparä go̧dümȩ büëmi̧ dari̧ cjiarequede. Aja̧, pio ju̧i̧mo̧i̧ ma̧ȩ oa yo̧a̧diibe Jechu judi.

¹⁷ Ado ja̧dëa ji̧ ta̧rëa̧reconȩ Tjo tjamo̧ pio ju̧i̧. Aja̧, Oveja pëi̧ chjamȩmi̧ da pio ju̧i̧ ja̧ iei̧payi̧ pio ji̧ nö̧ta ni̧bämȩ oa ta̧rëa̧reconȩ. Ado Jechu pio ju̧i̧iäpȩmo̧ ni̧bäji̧ri̧ oa ta̧rëa̧requedejȩrȩ judi jo̧ȩra̧pe ma̧na̧tä. Aja̧, ja̧di ta̧rëri̧ ni̧bäji̧ri̧ oa ta̧rëa̧requedejȩrȩ: —Ma̧na̧vä —yo̧a̧diro̧jo̧ȩ. Ado Tjo tjamo̧ judi Oveja pëi̧ chjamȩmi̧ da pio ju̧i̧ ja̧ iei̧payi̧ pio ji̧ nö̧ta ji̧dë u̧i̧ yo̧ji̧ri̧rȩ ja̧di ta̧rëri̧ yo̧a̧dirȩ: —Aja̧, ado eami̧ pumȩrȩ pio yoa ma̧ȩ oa ta̧rëmȩ pio judi peaja̧di dari̧ yo̧tädejȩ Jechu pio ju̧i̧iäpȩmo̧. Aja̧, “Ma̧na̧vä” yo̧tädejȩ. Ado eami̧ pumȩ üdë ui ja̧borä judi, jabechji̧ jarera̧täde bucho ana̧ cjo̧ro̧rea̧ yürümȩ ui pio ju̧i̧ jarapea̧ oa. Aja̧, badëri̧ jarera̧täde —yo̧a̧dirȩ.

Cjiadiärea̧ Ma̧ȩ

¹⁸ Danȩrȩ, Juan pio judirequede cüdë. Ado pio cüdë uapai̧ ta̧rëri̧ yo̧ë cji̧därequededibe pio yoa ma̧ȩ oa ta̧rëji̧ri̧ pio ji̧ri̧iäpȩmo̧. Danȩrȩ, pio yoa ma̧ȩ üdë, jabechji̧ ji̧dë duri oa japamitë chjätä ëte ma̧na̧pea̧ pio ju̧i̧ chjiari ma̧ȩde. Pumȩ judiro̧ ji̧dë duri oa chjätäpea̧ pio ju̧i̧ chjiari ma̧ȩde. Ado pio ju̧i̧iä uapai̧ ta̧rëri̧ yo̧ë cji̧därequededibe ca̧ oti̧. Ado danȩrȩ, pio yoa ma̧ȩ üdë a̧de yo̧dëpea̧de. Ado eami̧ pumȩ üdë pio yoa ma̧ȩ oa a̧de yo̧rä judi, peaja̧di a̧de yürüpadejȩ Ütë tjamo̧ judi conȩdarea̧ pio ju̧i̧, pio yoa ma̧ȩrä go̧ȩpea̧ oa cjiamȩ conȩdarea̧ pio ju̧i̧.

¹⁹ Ado eami̧ pumȩ judi pio yoa ma̧ȩ oa tutimi̧ dari̧ japarä judi, ‘orë ta̧rë ja̧bodëpea̧dida’ quëna̧rä judi, peaja̧dimi̧ dari̧ japajadejȩ. Jabechji̧ bucho ana̧ cjo̧ro̧rea̧ yürümȩ to ja̧ jurarea̧ oa chjadëri̧ juratärea̧ ji̧, tutimi̧ dari̧ japajadejȩ jurarea̧mi̧dëri̧. Ado Ütë tjamo̧ ja̧ bë ma̧ri̧räpȩ chjadëri̧ yu̧a̧tärea̧ ji̧, cjäri̧ made, dairäpȩ cjiadiämi̧ dari̧ cjiadiäpade, Ütë tjamo̧ judi tutimi̧ dari̧ japea̧ oaiä. Tjamo̧ davä ca̧ oti̧, pio yoa ma̧ȩ pio ju̧i̧ chjiari yo̧requededibe. Jabechji̧ a̧de yo̧dëpea̧de. Go̧ȩpea̧ oa cjiamȩ ma̧ȩ pio ju̧i̧ uëri̧ a̧de yo̧dëpea̧de. Ado peaja̧di, ‘Aja̧, orë ba chiadë maeadida’ quëna̧dëpea̧de.

²⁰ Ado Jechu Quiricho judi pio yoa ma̧ȩ pio ju̧i̧ chjiari tjamo̧ri̧ dabamȩ pio judi yo̧diibe: —Danȩrȩ, cüdë pio dibëiäpȩ go̧düdäräpea̧ ji̧ querediä tjamo̧de. Aja̧, tjamo̧i̧ cjiari̧ yo̧requededibe. Aja̧, pio ju̧i̧mo̧i̧ yo̧diibe Jechu judi jënȩ chjaodëri̧ ma̧na̧pa tara. Ado peaja̧di jo̧rȩtarequede cüdë. Ma̧na̧täde. Jo̧ȩra̧pe ma̧na̧täibe Ano̧mȩ Jechu judi. Ja̧ditäde.

²¹ Aja̧ ca̧ oti̧, ibëa̧ Ano̧mȩ Jechu pio judi yürüa̧ oa chjadëri̧ cjiana̧ra̧tädidibe Ütërë cjäri̧ri̧ cjia da̧ pio judi, Ütë tjamo̧ ja̧ pumȩ pio ji̧ri̧iäpȩmo̧. Aja̧, pio ju̧i̧mo̧i̧ ma̧ȩ oa go̧ȩpe chjadürequededibe. Ja̧ditäde. Dibëa̧ omȩ, Juan