Jechurë Na̧rȩrërea̧ Ma̧ȩ 20 - Biblia Pume

Jechu judi a̧dëri pio judiri birapade pio yoa chirirä tjamo̧ yo̧mȩrȩ cjo̧ro̧pea̧ oa mil ui nö̧ta

¹ Ja̧dëa ji̧ a̧dëräpȩ cjiamȩ ja̧ mu̧i̧tjoi̧ oa daea̧reconȩ ado cja̧rȩmo̧ oa, joë ya coërea̧ goamȩ oa, a̧dëri pio judiri biramȩ oa. Aja̧, a̧dë chjäte urëdi puë oa tuti cararea̧ joë ya pio ju̧i̧ coërea̧ goamȩ oa daea̧reconȩ. Peaja̧di chjiparari ca̧i̧ go̧a̧ti̧ oa mu̧i̧mȩ oa, chatu chiamȩ chjiparari chacha tjamo̧ oa mu̧i̧mȩ oa daea̧reconȩ.

^2-3 Ado chjaodëri̧ mitëa̧dejȩ chjö̧ri̧mi̧ damȩ pio ju̧i̧. Tjamo̧ davä. No̧mȩ tjamo̧ri ja̧ cjiarëremȩ po ana̧ pio ju̧i̧, tjamo̧ aechide yo̧mȩ pio ju̧i̧ mitëa̧dejȩ Ichiae pio ju̧i̧. Ado chjiparari chatu chiamȩra̧ yurë cji̧däa̧dejȩ. Mil ui nö̧ta chaäa̧ oa cjiapea̧ oa yurë cji̧däa̧dejȩ. Ado ja̧dëa ji̧ a̧dë chjäte urëdi puëräpȩ aeno̧a̧dejȩ. Ado ja̧di dari̧ japa ëte, tuti cararea̧ pio ju̧i̧ chjuari̧ tuti cara̧dejȩ coërea̧ra̧. Ja̧dea̧ ji̧, go̧ȩ oa cji̧därëmȩdejȩ tuti cararea̧rä. Aja̧, ja̧di dari̧ japarëmȩde, ‘china̧chjadida, are goëdëpea̧dida’ quëna̧ dapea̧ oa japea̧dejȩ. Tjamo̧ davä. Ichiae judi chiriräpȩti̧ oa cjo̧ro̧ji̧ri̧ pumȩ pio ji̧ri̧ ji̧dë ma u̧i̧pe chjaochea oa, chjuari̧ tutia̧dejȩ. Jabo dëdë, mil ui chjätä ëte, go̧dürea̧ dapade jabo. Go̧dürea̧ dapade. Japamitë boi̧chji̧ ma go̧dürea̧ dapade, japamitë ana̧dëri̧.

⁴ Ja̧dëa ji̧ daea̧requede charea̧ ji̧ra̧ oa, ütërë charea̧ ba chia tjamo̧ oa. Ado pio jiro charea̧rä chaji̧ri̧ pio ji̧ri̧ daea̧requedejȩrȩ. Cja̧rȩmȩrȩ yürüa̧ oa ütarë bape chjaorea̧ chiaji̧ri̧pea̧dirȩ. Jabo pio ji̧ri̧mo̧ dadëa̧requede, jabo pumȩ tjo ji̧ra̧ oa daea̧requede peaja̧di. Ja̧bo tänȩa̧ oa cjiareji̧ri̧ pio ji̧ri̧, jibëa̧ tjübë decjiari gürü oa tuti gu̧na̧ oa cjiareji̧ri̧ pio ji̧ri̧ daea̧requedejȩrȩ peaja̧di. Tjamo̧ davä. Jechu judi daba tanȩa̧ ma̧ȩ pio ju̧i̧ a̧ra̧ano̧a̧ oaiä, Ütë tjamo̧ ja̧ ma̧ȩ pio ju̧i̧ a̧ra̧ano̧a̧ oaiä, gürü coto tänȩa̧diro̧jȩrȩ. Aja̧, judiro̧ chirirä cjo̧ro̧mȩmi̧ da pio ju̧i̧iäpȩmo̧ chjacjiamȩri̧ jo̧rȩtadëa̧ oaiä, judiro̧ chirirä cjo̧ro̧mȩ pio judimi̧ dari̧ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩtadëa̧ oaiä, judiro̧ chirirä cjo̧ro̧mȩmi̧ da pio ju̧i̧ chjiari ütararea̧ go̧ȩ oa chiadëa̧ oaiä, jabechji̧ ja̧bo tänȩa̧diro̧jȩrȩ. Tjamo̧ davä. Jibëa̧ daitoro cji̧däpea̧ ji̧ yürüdëa̧ oaiä, jibëa̧ ichirä cji̧däpea̧ oa yürüdëa̧ oaiä ja̧bo tänȩa̧diro̧jȩrȩ. Ado pio judiro̧ ja̧boa̧reji̧ri̧rȩ bëdüa̧ oa cjiadiäa̧dirȩ chiri ütë cjo̧ro̧ji̧ri̧rȩ ja̧bepapea̧ oa Quiricho pio ju̧i̧ nö̧ta, japamitë ana̧ nö̧ta, cja̧rȩmȩ mil ui nö̧ta.

⁵ Ado pio jiro pumȩ judiro̧ bëdüa̧ üdë, yabo baämȩ bëdürea̧de. Jabo ja̧boa̧ji̧ri̧ judiro̧ orë, ji̧dë duri oa bëdüpadirȩ. Japamitë ana̧ chjätä ëte, bëdüpadirȩ mil ui chjätä ëte.

⁶ Ado yabo baämȩ bëdürea̧rä bëdüa̧ oa cjiaji̧ri̧ pio judiro̧, jabechji̧ a̧dë chjäte ma̧ chiadëri̧ cjiadirȩ. A̧dë chjäte chjadëri̧ cjiadirȩ. Jabechji̧ ji̧dë duri oa ma̧na̧mȩ ja̧borea̧ pio ju̧i̧ ja̧ chja̧oerädëdirȩ. Cjo̧dë tja ana̧räpȩmo̧ aeno̧a̧ oa cjiadëpadirȩ. Tjamo̧ davä. Ja̧di dari̧ aeno̧a̧ oa cjiadëpadirȩ, jabo Ütë tjamo̧ pio ju̧i̧ ja̧ oa ja̧bepaji̧ri̧rȩ cjo̧ro̧padirȩ, Quiricho pio ju̧i̧ ja̧bo. Aja̧, pio ji̧ri̧ ja̧ oa ja̧bepapadirȩ goë tuti ja̧bepaji̧ri̧rȩ. Jabechji̧ chiri tjamo̧ cjo̧ro̧ji̧ri̧ ütëmi̧ darë tjamo̧ yo̧ji̧ri̧rȩ cjo̧ro̧padirȩ Quiricho pio ju̧i̧ nö̧ta, japamitë ana̧ tjamo̧ nö̧ta, cja̧rȩmȩ mil ui nö̧ta.

Ichiae judi boadäräa̧ oa cjiapade ado chjereno̧ u̧i̧parea̧mi̧dëri̧

⁷ Ado japamitë tjamo̧ chjätä ëte, cja̧rȩmȩ mil ui chjätä ëte, cja̧rȩmȩrȩ tänȩa̧ oa jare chjadüa̧ oa cjiapade Ichiae judi. Chaäa̧ oa cjiamȩ puëri pio judiri go̧dürea̧ dapade.

⁸ Ado chjaodëri̧ u̧i̧papadejȩrȩ chiriräpȩti̧ oa cjo̧ro̧ji̧ri̧ pumȩ pio ji̧ri̧ ado chjereno̧. Gogo quȩmȩräpȩ cjo̧ro̧ji̧ri̧ pio ji̧ri̧, Magogo quȩmȩräpȩ cjo̧ro̧ji̧ri̧ pio ji̧ri̧ u̧i̧papadejȩrȩ a̧dopapea̧ oa, acji tai̧pea̧ oa. Aja̧, pio judi tänȩa̧ oaiä, ütararea̧mi̧dërë a̧dopapadirȩ cja̧rȩmȩräpȩ. Aja̧, ui ana̧ yuroro china̧mȩ dabumi̧ dari̧ a̧dopapadirȩ no̧i̧dë tjamo̧rȩ, ütararea̧mi̧dërë.

⁹ Ado acji jäpadirȩ Ütë ja̧ pumȩrȩ cjo̧ro̧mȩ chiriräpȩ. Ado ja̧dëa ji̧ Ütërë ea̧ bë ma̧ri̧ pio ju̧i̧ tjoro tänȩpadiro̧jo̧ȩ pio ju̧i̧ acji yu̧a̧pea̧ oa. Jabo cjäri̧ madirȩ. A̧dëri pio judiri chjaodëri̧ acji cjatäpadejȩrȩ cjo̧dë üdë, pumȩ ji̧ri̧ tüe ja̧bo tänȩpea̧ oa.

¹⁰ Ja̧dëa ji̧ Ichiae judi, pumȩ pio ji̧ri̧ ji̧dë ma u̧i̧parëremȩ pio judi cjo̧dë tja ana̧räpȩ aeno̧a̧ oa cjiapade. Tjamo̧ davä. Chirirä cjo̧ro̧mȩmi̧ da pio judi aeno̧a̧räpȩ ju̧ri̧, Ütërë ea jana̧ chjadüa̧ oa ni̧bämȩcji̧ quëna̧ japamȩrȩ aeno̧a̧räpȩ ju̧ri̧, aeno̧a̧ oa cjiapade Ichiae pio judi cjüëtü tjamo̧räpȩ, achjupjere quȩmȩra̧ pio ju̧ri̧ra̧ a̧dë chjäte cjüëtüri̧ tümȩräpȩ. Pio ju̧ri̧pȩ bucho ana̧ tutia̧ oa cjiaji̧ri̧rȩ a a ma cjiari̧ conȩda̧ oa cjiapadirȩ do yoa, gȩnȩ yoa, go̧dürea̧mi̧dëri̧.

Ütë tjamo̧ judi ütarë bape chjaodejȩrȩ pumȩ ji̧ri̧ cjiadiäa̧rä

¹¹ Ja̧dëa ji̧ daea̧reconȩ Ütërë charea̧ ba chia oa, charea̧ bërebërea oa. Ado charea̧rä chamȩ pio ju̧i̧bo daea̧reconȩ Ütë tjamo̧ pio ju̧i̧. Ado judi na̧rȩa̧ oaiä, jabechji̧ daburemȩ üdë chjaodëri̧ goarijäa̧de, a̧dë iremȩborë. Jabechji̧ pio jiro decjiape baga̧de bucho ana̧, ado chjereno̧ cjiarea̧mi̧dëri̧.

¹² Ado ja̧boa̧ji̧ri̧ pio ji̧ri̧ chjö̧na̧i̧därä oa daea̧requedejȩrȩ. Tjamo̧ cjo̧ro̧ji̧ri̧ pio ji̧ri̧, tjamo̧ cjo̧ro̧dëji̧ri̧ pio ji̧ri̧bo daea̧requedejȩrȩ. Aja̧, Ütë ja̧ dëbëräpȩ cjiaji̧ri̧ oa daea̧requedejȩrȩ, Ütërë charea̧ ba chia ja̧ dëbëräpȩ cjiaji̧ri̧ oa. Ado ja̧dëa ji̧ daea̧requede go̧ȩ i chiamȩ joë ji̧ra̧ oa. Areia̧ oa cjia maea oa daea̧requede. Jabechji̧ pumȩ judiro̧ cjo̧ro̧a̧ nö̧ta chjai̧dëri̧ japea̧ pio judi go̧ȩpea̧ oa cjiaremȩde pio jiro joërä. Ado ja̧dëa ji̧ ado cja̧rȩmo̧ joë oa daea̧requede peaja̧di, bucho ana̧ cjo̧ro̧rea̧ chiaji̧ri̧ ja̧ quȩ chiamȩ joë pio ju̧i̧. Ado ja̧dëa ji̧ Ütë tjamo̧ judi ütara̧dejȩrȩ pumȩ ji̧ri̧. Aja̧, judiro̧ cjo̧ro̧a̧ nö̧ta japea̧ pio ju̧i̧ ütara̧dejȩrȩ.

¹³ Ado uiräpȩ jemu̧i̧ ja̧borëreji̧ri̧ pio judiro̧ bëdüa̧dirȩ Ütë tjamo̧ ja̧ dëbëräpȩ cjiadäräpea̧ oa, ütara̧ oa cjiapea̧ oa. Ado daburo na̧ra̧ oa cjiarëreji̧ri̧ pio judiro̧, ado ja̧boa̧ji̧ri̧ judiro̧ tutia̧ oa cjiamȩräpȩ cjiaji̧ri̧ pio judiro̧ peaja̧di bëdüa̧dirȩ ju̧i̧ ja̧ dëbëräpȩ cjiadäräpea̧ oa, ütara̧ oa cjiapea̧ oa. Jabechji̧ ütëbodärärë bëdüa̧ oa cjiadiäa̧ maeadirȩ. Ado judiro̧ cjo̧ro̧a̧ nö̧ta japea̧ pio ju̧i̧ ütararemȩdejȩrȩ.

¹⁴ Ja̧dëa ji̧ ja̧borea̧ decjiape baga̧de. Jabechji̧ ja̧borea̧ üdë acji tai̧mi̧ dari̧ japarërea̧ ji̧, pumȩ ja̧ icjararemȩ pio ju̧i̧ yuropa tänȩrërea̧ ji̧, jabechji̧ aeno̧a̧ oa cjiami̧ dari̧ cjiadiäa̧de cjo̧dë tja ana̧räpȩ ju̧ri̧. Jabechji̧ jiro decjiapea̧de. Ado ja̧boa̧ji̧ri̧ judiro̧ tutia̧ oa cjiamȩräpȩ üdë cjo̧dë tja ana̧räpȩ aeno̧a̧ oa cjiami̧ dari̧ cjiadiäa̧de peaja̧di. Aja̧, ja̧boa̧ji̧ri̧ judiro̧ tutia̧ oa cjiamȩräpȩ üdë, ja̧boa̧ji̧ri̧ pio ji̧ri̧ ji̧dë ma chaäa̧ oa goami̧ dari̧ goarërea̧ ji̧, jabechji̧ cjo̧dë tja ana̧räpȩ aeno̧a̧ oa cjiami̧ dari̧ cjiadiäa̧de peaja̧di. Jabechji̧ jiro decjiapea̧de. Ado cjo̧dë tja ana̧räpȩmo̧ aeno̧pea̧ üdë, jabechji̧ duri oa ma̧na̧mȩ ja̧borea̧de. Duri oa cjiadiäa̧mȩ ja̧borea̧de.

¹⁵ Ado pumȩ judiro̧ ütëbodärärë jibëa̧ quȩ oa bucho ana̧ cjo̧ro̧rea̧ joërä go̧ȩpea̧ oa cjiadëa̧rä judi, jabechji̧ cjo̧dë tja ana̧räpȩ aeno̧a̧ oa cjiadiäa̧ maeadirȩ.