Jechurë Na̧rȩrërea̧ Ma̧ȩ 2 - Biblia Pume

Jechu judi ma̧ȩ yürürëremȩde Epjecho quȩmȩ bë ma̧ri̧räpȩ a̧dopaji̧ri̧ ja̧ oa

¹ Ja̧dëa ji̧ ji̧dë u̧i̧ yo̧mȩrȩ a̧de ni̧bä chjaoa̧dique Jechu judi: —Danȩ, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Epjecho quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, cja̧ȩta̧ra̧ ichiri yo̧a̧ri̧ büë oa goamȩ pio judirequede. Ca̧ mu̧i̧ chjuari ja̧ ichirä goamȩ pio judirequede. Ado tataparea̧ chiamȩ to chjarerä tai̧mȩ pio judirequede, oro maeara̧ japea̧ oa cjiamȩ tataparea̧ chjarerä.

² Danȩ, dabarequede pio dibë chjiari. Mȩnȩro̧ ca̧ea̧ pio ju̧i̧ ja̧bepe chjaoa̧ pio ju̧i̧ chjiari, mȩnȩro̧ goaedëräbo coëma cjiari̧ cjo̧ro̧a̧ pio ju̧i̧ chjiari dabarequede. Chjuari̧ quëna̧ji̧ri̧rȩ ja̧bepaji̧ri̧ oa, jëreeadëji̧ri̧ oa darequededibe davä conȩda̧ oa cjia̧räbo. Ado chjai̧dëri̧ japaji̧ri̧ pio ji̧ri̧ ta̧rë ja̧bodë marenȩro̧jȩrȩ. ‘Jabechji̧diro̧da’ quëna̧ dadë marenȩro̧jȩrȩ. Pio ju̧i̧bo dabarequede. Ado mȩnȩro̧, teracabari̧ yo̧ji̧ri̧ pio ji̧ri̧ chjadëri̧ ütarë daea̧ pio ju̧i̧ chjiaribo dabarequede. Tjamo̧ davä. Mȩnȩro̧ na̧e chiaji̧ri̧rȩ chjadëri̧ ütarë daea̧ oaiä, chjadëri̧ dabaji̧ri̧pea̧nȩrȩ teracabari̧ yo̧ji̧ri̧ pio ji̧ri̧ chjiari, Jechurë chjadüa̧cji̧ quëna̧ japaji̧ri̧ pio ji̧ri̧ chjiari. ‘Aja̧, ma̧ȩ chjádë yürüji̧ri̧ maeadiro̧da’ quëna̧ dabaji̧ri̧pea̧nȩrȩ chjadëri̧. Pio ju̧i̧ chjiaribo dabarequede.

³ Ado mȩnȩro̧ pio coaiäpȩmo̧ quëna̧ji̧ri̧pea̧ oaiä, jabechji̧ gito ana̧ tjamo̧ri̧ tararëreji̧ri̧nȩrȩ. Jabo mai̧ dari̧ conȩda̧ oa cjiaräbo, jabechji̧ bücjüri̧ cjiadëji̧ri̧rȩ cjo̧ro̧rëreji̧ri̧nȩrȩ chjuari̧ quëna̧ji̧ri̧rȩ, järidëpe bagaji̧ri̧rȩ. Pio ju̧i̧ chjiaribo dabarequede pio dibë chjiari.

⁴ Jabo danȩrȩ, jabë pjärämȩnȩrȩ. Ado pio ju̧i̧iä pio yoamo̧i̧ ma̧ȩra̧ chi̧dëeapea̧ chiarequededibe jabo. Jabechji̧ mȩnȩro̧ pio coa pearä earërea̧mi̧ eadëji̧ri̧pea̧nȩro̧coe. Jabëtarari̧mi̧ earenȩro̧coe. Ado pio judi goae tjamo̧dëdique.

⁵ Danȩrȩ ca̧ pumȩ, puë urëdi tjamo̧ro choë cjatäa̧mi̧ dari̧ cjiadiäa̧nȩrȩ. Ado pio ju̧i̧iä yo̧requededibe. Carupë jo̧rȩtachji̧vä. Mȩnȩro̧ pio coaiäpȩmo̧ pearä ea tjamo̧rërea̧mi̧ carupë jo̧rȩtachji̧vä. Ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari. Mȩnȩro̧ coa pearä earërea̧mi̧ ji̧dë ma eachji̧coe ado chjereno̧. Jabo mȩnȩro̧ ano̧ mire jo̧rȩtadërä judi, pio dibëiäpȩ jäparequede, pio dibë bide cjaeämi̧ dari̧ japapea̧ oa. Tjamo̧ davä. Dibëa̧ chjarerä cjiamȩ tataparea̧ chiamȩ to pio ju̧i̧ mitëpareconȩ, pio dibë chjiari na̧rȩrea̧ pio ju̧i̧. Aja̧, cjiadiädëri̧ mitëpareconȩ.

⁶ Jabo danȩrȩ, mȩnȩro̧ chjadëri̧ japea̧ pio ju̧i̧ a̧de yo̧tämi̧ cjiarequededibe jabo. Danȩrȩ, Nicorita quȩmȩ pio ju̧i̧ cho̧rëdiäji̧ri̧ judiro̧ japea̧ pio ju̧i̧ ea tjamo̧dënȩrȩ pio cüdëmi̧ dari̧. Aja̧ ca̧ pumȩ, chjadëri̧ eadëa̧renȩro̧jo̧ȩ.

⁷ "Danȩrȩ, ta̧rë puë chiami̧ dari̧ cjo̧ro̧ji̧ri̧ judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oëra̧ti̧ oa a̧dopaji̧ri̧ oa. Ja̧di ta̧rëri̧ yo̧diibe: 'Boadäräa̧ji̧ri̧ pio ji̧ri̧ jura tänȩparequedejȩrȩ bucho ana̧ cjo̧ro̧rea̧ to ja̧ jurarea̧ pio ju̧i̧. Tjamo̧ davä. Pio jiro to üdë Ütë tjamo̧ ja̧ tjadoräpȩde. Ado pio ju̧i̧ ja̧ jurarea̧ oa jura tänȩparequededibe boadäräa̧ji̧ri̧ pio ji̧ri̧iäpȩmo̧.' Aja̧, ja̧di ta̧rëri̧ yo̧de Tjo tjamo̧ judi. Ta̧rë ja̧bochji̧jo̧ȩ.“ Aja̧ Juan, pio ju̧i̧mo̧ go̧ȩpe chjadütä earequedemȩ Epjecho quȩmȩ bë ma̧ri̧räpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Epjecho quȩmȩ bë ma̧ri̧räpȩ a̧dopaji̧ri̧ ja̧ oa.

Jechu judi ma̧ȩ yürürëremȩde Echimira quȩmȩ bë ma̧ri̧räpȩ a̧dopaji̧ri̧ ja̧ oa

⁸ Ado coa ni̧bämȩ judi ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dique: —Danȩ Juan, pio yoa ma̧ȩ oa go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Echimira quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Danȩ, pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, pio yoa ma̧ȩ üdë, jabechji̧ pearäri ja̧mȩ pio judiri ja̧de. Yuropadëmȩ pio judiri ja̧de. Ja̧boa̧remȩrȩ bëdü ëte ado chjereno̧ cjo̧ro̧mȩ pio judiri ja̧de. Ado pio judirequede cüdë.

⁹ Danȩrȩ, dabarequede pio dibë chjiari. Mȩnȩro̧ chjai̧dë oa chjätäa̧ pio ju̧i̧ chjiari, o judiro̧ dibë conȩda̧ pio ju̧i̧ chjiari dabarequede. Ado chjö̧na̧i̧ti̧ oa cjäri̧ ja̧boji̧ri̧ oa darequededibe, eami̧ oa goadëji̧ri̧ oa. Jabo eami̧ oa goadëräbo, jabechji̧ a̧dë chjäte ji̧ra̧ri̧ goaji̧ri̧mi̧ dari̧ cjianȩrȩ. Jabo dëdë, conȩdadiro̧dibe. Ado pio ju̧i̧ chjiari dabarequede. Ado judio judiro̧ pio dibëiäpȩmo̧ teracabari̧ aechide ni̧bäa̧ pio ju̧i̧ chjiaribo dabarequede. ‘Ütë tjamo̧ ja̧ pumȩrea̧rȩ’ yo̧dirȩ, jabo cjäri̧ madirȩ, Ütë tjamo̧ ja̧ pumȩdëdirȩ. Ichiae ja̧ pumȩdirȩ.

¹⁰ Jabo uapadëchji̧vä jabo. Mȩnȩro̧ chjai̧dëri̧ chjätäpea̧ pio ju̧i̧ chjiari uapadëchji̧vä. Danȩrȩ, chaäa̧ oa cjiapanȩrȩ orë. Aja̧, Ichiae pio judi tänȩa̧ oa chaärea̧ bëräpȩ tutia̧ oa cjiapanȩrȩ o judiro̧. Ado tutia̧ oa cjia oaiä, jabechji̧ ütara̧ oa cjiapanȩrȩ. Ado ichi chjö̧na̧i̧ do nö̧ta oa chjai̧dëri̧ chjätäpanȩrȩ. Jabo uapadëchji̧vä. Pio dibë ja̧bo tänȩräbo, jabechji̧ chjuari̧ quëna̧chji̧vä pio coaiäpȩmo̧, quëna̧rea̧mi̧dëräbo. Ado mȩnȩro̧ chjadëri̧ boadäräa̧ oaiä, jabechji̧, yürüparequededibe bucho ana̧ cjo̧ro̧rea̧ pio ju̧i̧.

¹¹ “Danȩrȩ, ta̧rë puë chiami̧ dari̧ cjo̧ro̧ji̧ri̧ judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ oa a̧dopaji̧ri̧ oa. Ja̧di ta̧rëri̧ yo̧diibe: ‘Boadärärea̧ daji̧ri̧ pio judiro̧, jabechji̧ ji̧dë duri oa ma̧na̧pamȩ ja̧borea̧ pio oaiä conȩda̧ oa cjiadëpadirȩ.' Aja̧, ja̧di ta̧rëri̧ yo̧de Tjo tjamo̧ judi. Ta̧rë ja̧bochji̧jo̧ȩ.” Aja̧ Juan, pio ju̧i̧mo̧ go̧ȩpe chjadütä earequedemȩ Echimira quȩmȩ bë ma̧ri̧räpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Aja̧ ca̧ oti̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Echimira quȩmȩ bë ma̧ri̧räpȩ a̧dopaji̧ri̧ ja̧ oa.

Jechu judi ma̧ȩ yürürëremȩde Pegamo quȩmȩ bë ma̧ri̧räpȩ a̧dopaji̧ri̧ ja̧ oa

¹² Ado coa ni̧bämȩ judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ Juan, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Pegamo quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, dëbëribo jo̧dë chiamȩ coana̧rea̧ go̧a̧ti̧ oa chiamȩ pio judirequede cüdë. Ado pio yoa ma̧ȩ üdë, ca̧ea̧ri ja̧de.

¹³ Danȩrȩ, pio dibë chjiari dabarequede. ‘Ichiaerë ana̧ tjamo̧ri̧ ja̧bepea̧räpȩ cjo̧ro̧diro̧da, Ichiaerë tjamo̧ cjo̧ro̧a̧mi̧ daräpȩ cjo̧ro̧diro̧da’ quëna̧ dabarequededibe. Jabo ja̧di daräpȩ cjo̧ro̧räbo, jabechji̧ coëma cjiari̧ cjo̧ro̧nȩrȩ. Jabechji̧ pio coaiäpȩmo̧ quëna̧dëpe bagadëa̧nȩrȩ. Ado dibëa̧ chjarerä cjo̧ro̧remȩ pio ju̧i̧ ja̧bo tänȩrërea̧ ji̧, pio coa chjiari ji̧dë ma ni̧bäremȩ pio ju̧i̧ ja̧bo tänȩrërea̧ ji̧, Atipa quȩmȩ pio ju̧i̧ ja̧bo tänȩa̧ ji̧, jabechji̧ mȩnȩro̧ quëna̧dëpe bagatärea̧ ji̧, cjäri̧ manȩrȩ, quëna̧dëpe bagadëa̧nȩrȩ, jabo jabechji̧ pio coaiäpȩmo̧ chjuari̧ quëna̧ji̧ri̧rȩ cjo̧ro̧rëreji̧ri̧renȩrȩ chjao tjamo̧räbo, Ichiaerë bëpea̧mi̧ daräpȩ cjo̧ro̧räbo.

¹⁴ Jabo mȩnȩro̧ ja̧di dari̧ quëna̧räbo, jabë pjarämȩnȩrȩ. Ado pio ju̧i̧iä pio yoamo̧i̧ ma̧ȩra̧ chi̧dëeapea̧ chiarequededibe. Danȩrȩ, dibë nö̧ta a̧dopaji̧ri̧ judiro̧ orë ado cja̧rȩmo̧ ma̧ȩrä cjo̧ro̧dirȩ. Aja̧, Barama quȩmȩ pio judi no̧mȩ a̧ra̧ano̧rërea̧ ma̧ȩrä cjo̧ro̧dirȩ. Ado pio judi chidëearërea̧ oaiä, Baraco quȩmȩ judi ana̧ri̧ chi̧dëeatarëremȩdejȩrȩ icharaita ji̧ri̧ chjai̧dëri̧ japatä. Aja̧, teracaba ütë pio ju̧i̧iäpȩmo̧ yürüa̧ jurarea̧ pio ju̧i̧ juratä yo̧rëremȩdejȩrȩ. Ado cja̧rȩmo̧ ja̧ iei̧ pio ji̧ baë ëba mo̧a̧tä yo̧rëremȩdejȩrȩ peaja̧di. Ado danȩrȩ, pio mȩnȩro̧ orë peaja̧di dari̧ japanȩrȩ.

¹⁵ Ado pio ju̧i̧ uëri Nicorata quȩmȩ judi a̧ra̧ano̧rërea̧ ma̧ȩrä cjo̧ro̧nȩrȩ peaja̧di. Aja̧, mȩnȩro̧ orë pio ju̧i̧ ja̧ ma̧ȩrä cjo̧ro̧nȩrȩ. Jabo cjäri̧ ma ca̧ oti̧, ja̧di dari̧ japea̧ üdë goae tjamo̧dëdique.

¹⁶ Ado pio ju̧i̧iä jabechji̧, putu jura̧ a̧dë chami̧ dari̧ chjere jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari. Jabo chjere jo̧rȩtadërä judi, jabechji̧ acji jäparequede pio jiro pumȩ pio ji̧ri̧ bide cjaeämi̧ dari̧ japapea̧ oa. Aja̧, dëbëpe chjaoparequedejȩrȩ ca̧ yari pio judiri go̧dümȩ coana̧rea̧ go̧a̧ti̧mi̧ dara̧ pio ju̧ri̧ra̧.

¹⁷ “Danȩrȩ, ta̧rë puë chiami̧ dari̧ cjo̧ro̧ji̧ri̧ pio judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ cjiaji̧ri̧ oa. Ja̧di ta̧rëri̧ yo̧diibe: ‘Boadäräa̧ji̧ri̧ pio ji̧ri̧iäpȩmo̧ yürüparequedejȩrȩ ‘ma̧na̧’ quȩmȩ jurarea̧ oa, goadia̧ oa cjiarëremȩ jurarea̧ oa, a̧dëri ja̧ jurarea̧ oa. Ado ju̧i̧ uëri yürüparequedejȩrȩ ta̧dë pjatë oa. Aja̧, quȩ chiamȩ ta̧dë oa, quȩ peaja̧ oa chiamȩ ta̧dë oa yürüparequedejȩrȩ pumȩ nö̧ta oa. Ado ta̧dë mitëa̧ji̧ri̧ pio judiro̧ nö̧tai̧rȩ dabaeji̧ri̧dirȩ jibëa̧rä go̧ȩpea̧ oa cjiamȩ pio ju̧i̧, o judiro̧ dabarea̧mi̧dëri̧.’ Aja̧, ja̧di ta̧rëri̧ yo̧de Tjo tjamo̧ judi. Ta̧rë ja̧bochji̧jo̧ȩ.” Aja̧ Juan, pio ju̧i̧mo̧ go̧ȩpe chjadütä earequedemȩ Pegamo quȩmȩ bë ma̧ri̧räpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Pegamo quȩmȩ bë ma̧ri̧räpȩ a̧dopaji̧ri̧ ja̧ oa.

Jechu judi ma̧ȩ yürürëremȩde Tiatira quȩmȩ bë ma̧ri̧räpȩ a̧dopaji̧ri̧ ja̧ oa

¹⁸ Ado coa ni̧bämȩ pio judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaoa̧dique: —Danȩ Juan, ja̧di ta̧rëri̧ ma̧ȩ go̧ȩpe chjadütä earequedemȩ ca̧ mu̧i̧tjoi̧ pio ju̧i̧iäpȩmo̧, Tiatira quȩmȩ bë ma̧ri̧räpȩ a̧doparea̧ oa tjamo̧ jidamȩ pio ju̧i̧iäpȩmo̧ —yo̧a̧dique—. Pio jȩa nö̧ta a̧dopaji̧ri̧ pio ji̧ri̧iäpȩmo̧ ja̧di ta̧rëri̧ ni̧bä chjaotä eareconȩ: “Danȩrȩ, pio yoa ma̧ȩ üdë Ütë tjamo̧ Joja pio judiri ja̧de. Ju̧i̧ ja̧ dacho üdë cjo̧dërë goae tarari̧ gärimi̧ dari̧ tatade. Ado pio ju̧i̧ ja̧ ta üdë boro̧che quȩmȩ chjipararirë tatami̧ dari̧ cjiade. Aja̧, pio judimȩrȩ ma̧ȩ yürürequededibe.

¹⁹ Danȩrȩ, pio dibë chjiari chjadëri̧ dabarequede ca̧ pumȩ. Aja̧, mȩnȩro̧ dibëa̧ dëbëti̧ra̧ chia ea̧ pio ju̧i̧ dabarequededibe, mȩnȩro̧ chjuari̧ quëna̧ pio ju̧i̧bo. Ado dibëa̧ ba dëbëti̧ra̧ chia a̧doa̧ pio ju̧i̧ dabarequede peaja̧di, mȩnȩro̧ ja̧bepea̧ pio ju̧i̧ chjiaribo. Ado mȩnȩro̧ chjai̧dë oa chjätäräbo, jabechji̧ chjuari̧ quëna̧ji̧ri̧rȩ cjo̧ro̧nȩrȩ, Ütë tjamo̧ ju̧i̧ jëreea tänȩdëji̧ri̧rȩ. Ado pio ju̧i̧bo dabarequede. Ado mȩnȩro̧ Ütë tjamo̧ ja̧ oa ana̧ri̧ ja̧bepea̧ pio ju̧i̧ chjiaribo dabarequede. Jabechji̧ mȩnȩro̧ pearä ja̧beparërea̧ ji̧, jabechji̧ ji̧dë u̧i̧ ana̧ri̧ ja̧bepaji̧ri̧pea̧nȩrȩ yaba̧. Ado pio ju̧i̧ chjiaribo dabarequede.

²⁰ Jabo danȩrȩ, mȩnȩro̧ coëma cjiari̧ cjo̧ro̧räbo, jabë pjärämȩnȩrȩ. Ado pio ju̧i̧iä pio yoamo̧i̧ ma̧ȩra̧ chi̧dëeapea̧ chiarequededibe. Danȩrȩ, mȩnȩro̧ oëra̧ a̧ra̧ano̧yi̧ pio ji̧ tuti chi̧dëeatärea̧ ji̧, Jechabe quȩyi̧ iei̧ pio ji̧ tuti chi̧dëeatärea̧ ji̧, cjäri̧ manȩrȩ, japadë manȩrȩ. Ado pio ji̧ a̧ra̧ano̧rea̧ yürüdëtärea̧ ji̧, jabechji̧ yürü marenȩro̧jȩ. Ado teracabari̧ a̧ra̧ano̧yi̧rȩ u̧i̧pea̧nȩjȩrȩ ca̧ mu̧i̧tjoi̧ pio ji̧ri̧. Aja̧, teracaba ütë pio ju̧i̧iäpȩmo̧ yürüa̧ jurarea̧ pio ju̧i̧ jurapea̧ oa, jibëa̧ iei̧dë pio ji̧ baë ëba mo̧a̧pea̧ oa u̧i̧pë yo̧a̧nȩjȩrȩ. Ado pio yi̧ro iei̧ pio jini̧, ‘Aja̧, Ütërë ea jana̧ chjadüa̧ oa ni̧bäyi̧requede’ yo̧yi̧nȩ. Jabo cjäri̧ manȩjȩrȩ, teracabari̧ yo̧nȩjȩrȩ.

²¹ Ado ano̧ mire jo̧rȩtapea̧ ji̧ jidatatea̧requedejȩ jabo cjäri̧ manȩ, ano̧ mire jo̧rȩtadëri̧ cjianȩ. Jabechji̧ üi̧ goarati̧nȩ. Aure iei̧rȩ yürü chjaomi̧ dari̧ cjo̧ro̧yi̧rȩ ano̧ mire jo̧rȩtadëri̧ cjianȩ.

²² Ado pio ju̧i̧iä japamitë boi̧chji̧ chjätä ëte gito ana̧ tjamo̧ri̧ tara tänȩparequedejȩ. Ado pio ji̧ nö̧ta ëba mo̧a̧ji̧ri̧ pio ji̧ri̧bo ana̧ri̧ bape chjaoparequedejȩrȩ judiro̧ jabërä ano̧ mire jo̧rȩtadërä judi.

²³ Aja̧, pio ji̧ ta̧rë ja̧boji̧ri̧ pio ji̧ri̧ chjaodëri̧ ja̧bo tänȩparequedejȩrȩ, ji̧ ja̧ u̧ri̧mi̧ da pio ji̧ri̧. Ado cüdë ja̧di dari̧ japea̧ oaiä, cüdë ana̧ri̧ bape chjaoa̧ oaiä, jabechji̧ a̧doparea̧ nö̧tai̧rȩ pio coa chjiari coëma cjiari̧ jo̧rȩtapadirȩ. ‘Aja̧, Jechu judi cjacjarë damȩ pio judidida, ibëa̧ chji̧ra̧ goadi jo̧rȩtarea̧mi̧dëdida, jabechji̧ pio ibë chjiari chjö̧na̧i̧ oa dabamȩdida’ quëna̧ jo̧rȩta mapadirȩ. Tjamo̧ davä. Pio dibë chjiari chjadëri̧ dabamȩrȩ bape chjaoparequededibe pumȩ nö̧tai̧ oa, mȩnȩro̧ chjai̧dëri̧ japea̧ ba oa.

²⁴ “Jabo mȩnȩro̧ orë, Tiatiraräpȩ cjo̧ro̧ji̧ri̧ judiro̧ orë, jabechji̧ pio jiro iei̧rȩ a̧ra̧ano̧a̧ ma̧ȩrä cjo̧ro̧dënȩrȩ. Ta̧rë ja̧bodë marenȩro̧jȩ. Jabo o judiro̧, Ichiae pio ju̧i̧ ba chia jo̧rȩtaji̧ri̧ judiro̧, dëdë, ta̧rë ja̧bodiro̧jȩ. ‘Aja̧, Ichiae pio judiri goadi ma̧na̧mȩ a̧ra̧ano̧rea̧ ma̧ȩde’ yo̧dirȩ, jini̧ a̧ra̧ano̧a̧ pio ji̧ chjiari. Jabo mȩnȩro̧ pio jiro a̧ra̧ano̧rea̧ ma̧ȩ oa jiada̧renȩro̧jo̧ȩ. Ado pio ju̧i̧iä jabechji̧, a̧de yo̧dëparequededibe. Chja jabechji̧de.

²⁵ Jabo pio yoamo̧i̧ ma̧ȩ oa yürürequededibe jabo. Danȩrȩ, pio coaiäpȩmo̧ chjuari̧ quëna̧chji̧coe cüdë ma̧na̧rä yuro.

²⁶ Ado boadärärea̧ daji̧ri̧ pio ji̧ri̧, jabechji̧ ju chiarea̧ yürüparequedejȩrȩ. Tjamo̧ davä. Cjiadiäa̧rä yuro ca̧ ma̧ȩrä cjo̧ro̧ji̧ri̧ pio ji̧ri̧, ju chiarea̧ yürüparequedejȩrȩ judiro̧ tjamo̧ yo̧ji̧ri̧rȩ cjo̧ro̧pea̧ oa.

²⁷ Peaja̧di dari̧ yürürëremȩdique ca̧ Ama̧i̧ judi. Cüdë tjamo̧ yo̧mȩrȩ cjo̧ro̧pea̧ oa ju chiarea̧ yürürëremȩdique. Ado pio coa yürürërea̧mi̧ yürüparequedejȩrȩ peaja̧di, boadärärea̧ daji̧ri̧ pio ji̧ri̧. Jabechji̧, pio ji̧ri̧ ja̧ chja̧oerä cjo̧ro̧padirȩ chiri nö̧tai̧ oa cjo̧ro̧ji̧ri̧ judiro̧, eami̧ pumȩ üdë dëbëparea̧mi̧dëri̧. Jabechji̧ chjiparari to iturë dabu yocodë oa chjaodëri̧ popë japami̧ dari̧ tjamo̧ yo̧ji̧ri̧rȩ cjo̧ro̧padirȩ, cjäri̧ri̧ cjia darea̧ decjiari̧.

²⁸ Ado boadärärea̧ daea̧ji̧ri̧ pio ji̧ri̧, jabechji̧ yürüparequedejȩrȩ doparä go̧dümȩ büë pio ju̧i̧.

²⁹ “Danȩrȩ, ta̧rë puë chiami̧ dari̧ cjo̧ro̧ji̧ri̧ pio judiro̧ ütëborë chjadëri̧ acji cjaeä ta̧rëtäreji̧ri̧diro̧jo̧ȩ Tjo tjamo̧ pio ju̧i̧. Jabechji̧ ma̧ȩ ba chia tjamo̧ oa yo̧de ca̧ a̧doparea̧ pio ji̧ri̧iäpȩmo̧, oërati̧ oa a̧doparea̧ oa.” Aja̧ Juan, pio ju̧i̧mo̧ go̧ȩpe chjadütä earequedemȩ Tiatira quȩmȩräpȩ a̧doparea̧ ja̧ tjamo̧ jidamȩ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ ma̧ȩ yürüa̧dique Jechu judi Tiatira quȩmȩräpȩ a̧dopaji̧ri̧ ja̧ oa.